Read Besoa Pewaliꞌána 42 Bible Online

Pewaliꞌána 42 - Besoa bible

Pewaliꞌána 42

¹Kanahádina Iako ara pare i tampoꞌ Másiriꞌ, napolaluitaꞌámoheꞌ ánáꞌna, nauliꞌ, “Moapa riꞌi haneꞌi roo-roo pekou?

²Kuhádi deꞌe-deꞌe ara pare i tampoꞌ Másiriꞌ. Laomokou i tampoꞌ iti mohóló pare bona tiꞌarakeꞌ mate holo.”

³Onoꞌ miꞌi haneꞌi pohuꞌ mpuꞌumoheꞌ wutuꞌna Iusupu to hampuloꞌ iti hangko i tampoꞌ Kánáꞌá bona laoheꞌ mohóló pare i tampoꞌ Másiriꞌ.

⁴Agáiáná Iako tiꞌara mopaliu Benami wátá ádina Iusupu raꞌánti halaluna, láwiꞌ napokalááꞌ ina hurewuꞌ.

⁵Ánti kamarimi i tampoꞌ Kánáꞌá, ánáꞌnaheꞌ Iako hai handaꞌ tauna ntániꞌna laoheꞌ mohóló pare i tampoꞌ Másiriꞌ.

⁶To mampobaluꞌ pare i tauna to haweꞌ hangko i tampoꞌ ntániꞌna ia miꞌi Iusupu, láwiꞌ ia sulewátána datu i tampoꞌ Másiriꞌ. Onoꞌ miꞌi haneꞌi i kahaweꞌraꞌ wutuꞌna, molingkuduheꞌ motóngkóꞌ i bitina.[150]

⁷Kanaitána Iusupu wutuꞌnaheꞌ, naisá miꞌi kaheánáraꞌ, agáiáná mampe to tiꞌaraheꞌ naisá, mole riꞌi naisámontoheꞌ. Mahárá polaluitana i hira, napekuneꞌ, “Kómu, toapakou?” Mehániꞌheꞌ, “Tuá, kaiꞌ toKánáꞌáꞌangkaiꞌ. Maiangkaiꞌ mohóló pandeꞌ.”

⁸Naisántoheꞌ Iusupu kawutuꞌnaheꞌ, agáiáná hira tiꞌaraheꞌ meisá.

⁹Nabuhinao miꞌi Iusupu paturuna kana i hira, onoꞌ miꞌi haneꞌi nauliꞌ, “Kómu deꞌe, mai pekou momata-matai iumbá kamaledeꞌána tampoꞌkiꞌ.”

¹⁰Mehániꞌheꞌ, “Tuá, tiꞌaraꞌangkaiꞌ tauna to noꞌonoꞌ. Mai peangkaiꞌ mohóló pare.

¹¹Kaiꞌ deꞌe, hampohalaluáꞌangkaiꞌ, hadua peá umángkiꞌ. Kaiꞌ tauna to maroꞌa, tiꞌara ara tunggáiángkiꞌ mai momata-matai tampoꞌmi.”

¹²Agáiáná nauliꞌ Iusupu i hira, “Dongkoꞌmi! Kómu mai molelemata iumbá kamaledeꞌána tampoꞌkiꞌ.”

¹³Mehániꞌheꞌ, “Pueꞌ, kaiꞌ hampohalaluá, hampuloꞌangkaiꞌ hai rodua. Hadua peá umángkiꞌ i tampoꞌ Kánáꞌá. Hadua halalungkiꞌ tiꞌara piꞌi ara, hai hadua ádingkiꞌ to toadi deꞌe-deꞌe mamporángá umángkiꞌ.”

¹⁴Mehániꞌ Iusupu, “Toꞌu to kuꞌuliꞌ. Kómu deꞌe, haweꞌkou mai molelemata.

¹⁵Ina kupáresáꞌ katoꞌuna laluitami node: mopindaꞌaꞌ i lalu hangaꞌna Piraoꞌ, tiꞌarakou peisá pohuꞌ hangko i tampoꞌ deꞌe ane ádimi to toadi tiꞌara mani haweꞌ ieneꞌ.

¹⁶Hadua hangko i kómu hangaa-ngaa mesuleꞌ lao mai moala ádimi. To ntániꞌna ina kutaha ieneꞌ bona manótó ntepuꞌu katoꞌuna polaluitami. Ane tiꞌara toꞌu apa to niuliꞌ, i lalu hangaꞌna Piraoꞌ, kómu deꞌe hangaa-ngaa to maikou momata-matai tampoꞌkiꞌ.”

¹⁷Roo onoꞌ, napopesuaꞌheꞌ upu-upu i lalu tarungku tálu alona kamaruena.

¹⁸I katáluna alona, napopeala wopaheꞌ Iusupu iti halaluna, hai nahángáꞌáheꞌ “Kódóꞌ deꞌe tauna to mengkoruꞌaꞌ i Pueꞌ Ala. Kómu ina kukábáhákou ane nipeuláꞌi rárá to node:

¹⁹bona tongawaꞌ ntepuꞌu kómu toꞌu-toꞌu tauna to manoroꞌ, hadua hangko i oloꞌmi ina kutaha i lalu tarungku, hai to ntániꞌna peisá miꞌi mesuleꞌ moánti pare to nihóló bona rapotueꞌ tinámi to tangaꞌraꞌ mantódihá rimi.

²⁰Ane mesuleꞌ wopakou, hangaa-ngaa niánti mai i kódóꞌ ádimi to toadi. Ane nibábehi noꞌonoꞌ, ina tongawaꞌ katoꞌuna polaluitami, hai tiꞌarapokou ina kuhuku mate.” Rapokana mpuꞌu pobutusina sulewátána datu iti.

²¹Roo onoꞌ, molaluitaheꞌ hadua hai hadua, rauliꞌ, “Peita! Kitaꞌ deꞌe-deꞌe rahuku ánti kamasalaꞌtaꞌ i ádintaꞌ hangkoia; ia membiáꞌ woia ahiꞌ i kitaꞌ, agáiáná tiꞌara tapehádingi, kehapiꞌ taitanto kamapárina. Onoꞌ miꞌi haneꞌi deꞌe-deꞌe molámbiꞌkeꞌ kapári to nodeꞌe.”[151]

²²Nauliꞌ Rube, “Tiꞌara paꞌi hangkoia kuhángáꞌántokou bona ádintaꞌ iti ineeꞌ woia tapopoapa, agáiáná tiꞌara nipehádingi. Mewaliꞌ deꞌe-deꞌe kamatena hangaa-ngaa tapohurunga.”

²³Naisá Iusupu lempóna básáraꞌ, agáiáná hira, tiꞌara raisá kanoꞌonoꞌna, láwiꞌ ane molaluitaheꞌ, Iusupu mopakeꞌ gurubásá.

²⁴Kanahádina Iusupu apa to nauliꞌ Rube iti, napálehimoheꞌ lao teriaꞌ. I tempóna nabuku wopiꞌi molaluita, ia mesuleꞌ i halalunaheꞌ, haneꞌi moala Simeoꞌ napopetimpuku i lindoꞌraꞌ halaluna.

²⁵Mohawaꞌ miꞌi Iusupu bona upu-upu karuꞌraꞌ wutuꞌna raóntóki pare, hai dóiꞌraꞌ hadua-hadua rapusaꞌ peá huleꞌ i lalu karuꞌraꞌ, haneꞌi raweꞌiheꞌ woꞌo bokuraꞌ. Hawaꞌna iti rapeuláꞌi mpuꞌu topobágóꞌna.

²⁶Hangko ionoꞌ, wutuꞌna mopasawiꞌmoheꞌ inántiraꞌ i kalideraꞌ, haneꞌi pohuꞌmoheꞌ ina mesuleꞌ lao i tampoꞌraꞌ.

²⁷I kahambengiáraꞌ, ara to mobungkáhi karuꞌna ina mopaꞌandeꞌ kalidena. Nahumba riꞌi dóiꞌna i wongko pare to i karuꞌna iti.

²⁸Nahángáꞌáheꞌ halaluna, “Dóiꞌkuꞌ rapopesuleꞌ peá! Peita, dentoiꞌe i lalu karuꞌkuꞌ!” Rapotingkáráꞌ hai malááꞌheꞌ haneꞌi mombekuneꞌ-kuneꞌheꞌ, rauliꞌ, “Apa riꞌi tunggáiána Pueꞌ Ala i kitaꞌ?”

²⁹Kahaweꞌraꞌ i tampoꞌ Kánáꞌá, rapolaluita i umáraꞌ upu-upu to mewaliꞌ,

³⁰rauliꞌ, “Sulewátána datu i tampoꞌ Másiriꞌ, mahárá polaluitana i kaiꞌ, hai naraiꞌangkaiꞌ to lao momata-matai tampoꞌraꞌ.

³¹Mehániꞌangkaiꞌ, ‘Kaiꞌ tauna to manoroꞌ, tiꞌaraꞌangkaiꞌ mai momata-matai tampoꞌmi.

³²Kaiꞌ hampohalaluá, hampuloꞌangkaiꞌ hai rodua, hadua peá umángkiꞌ. Hadua ádingkiꞌ tiꞌara piꞌi ara, hai ádingkiꞌ to toadi, deꞌe-deꞌe mamporángá umángkiꞌ i tampoꞌ Kánáꞌá.’

³³Nauliꞌ sulewátána datu, ‘Ina kupáresáꞌkou bona tongawaꞌ kómu toꞌu-toꞌu tauna to manoroꞌkou; hadua hangko i oloꞌmi ina kutaha ieneꞌ, to ntániꞌna peisá miꞌi mesuleꞌ moánti pare i tinámi to tangaꞌraꞌ mantódihá rimi.

³⁴Ane mai wopakou, hai ane niánti mai ádimi to toadi iti, ina kuisá katiꞌárámi mpuꞌu to mai momata-matai tampoꞌkiꞌ, agáiáná kómu tauna to manoroꞌ. Mewaliꞌ ane noꞌonoꞌi, halalumi to kutaha ieneꞌ ina kupopesuleꞌ i kómu, hai peisákou mai ieneꞌ mobaluꞌ-baluꞌ.’ ”

³⁵Karabubuhana pare to i karuꞌraꞌ, hadua-hadua molámbiꞌraheꞌ hepuꞌraꞌ to moꞌóntóꞌ dóiꞌ; onoꞌ miꞌi haneꞌi rumihi kamalááꞌraꞌ, noꞌonoꞌ woꞌo umáraꞌ.

³⁶Roo onoꞌ, nauliꞌ umáraꞌ, “Ánti kakómuna, haneꞌiheꞌ matántá ánáꞌkuꞌ. Iusupu tiꞌara piꞌi ara; noꞌonoꞌ woꞌo Simeoꞌ; hai deꞌe-deꞌe Benami wopiꞌi ina niánti. Rumihi ntepuꞌu kamapárina lalungkuꞌ.”

³⁷Hangko ionoꞌ, nauliꞌ Rube, “Umaꞌ, nuweꞌiaꞌ iti Benami. Kudándi, ina kuánti mesuleꞌ; ane tiꞌara piꞌi mesuleꞌ, ánáꞌkuꞌ tobaleilo to rodua peisá nupapate.”

³⁸Agáiáná nauliꞌ Iako, “Ineeꞌ! Benami tiꞌara peisá niánti. Wutuꞌna mate miꞌi hai ia perái to ara deꞌe-deꞌe. Kódóꞌ deꞌe, matoamamoꞌ. Ane ia wopiꞌi molámbiꞌ rugiꞌ i polumaoámi, ina mopaꞌara peá kapári duuꞌkuꞌ mate.”