Read Besoa Pewaliꞌána 43 Bible Online

Pewaliꞌána 43 - Besoa bible

Pewaliꞌána 43

¹Kamarimi i tampoꞌ Kánáꞌá rumihi ntepuꞌu,

²hai pare to lao rahóló i tampoꞌ Másiriꞌ upu miꞌi. Onoꞌ miꞌi haneꞌi nauliꞌ Iako i ánáꞌnaheꞌ, “Lao wopakou i tampoꞌ Másiriꞌ, mohóló pare bona ara pandeꞌtaꞌ.”

³Agáiáná nauliꞌ Iudá[152] i umána, “Napaingáꞌi mpiiꞌangkaiꞌ sulewátána datu i Másiriꞌ, tiꞌaraꞌangkaiꞌ peisá haweꞌ i hia ane Benami tiꞌara kiánti.

⁴Ane nupaliu iti ádingkiꞌ kiánti, hangko laoraꞌangkaiꞌ mohóló pandeꞌtaꞌ,

⁵agáiáná ane tiꞌara nupaliu, tiꞌaraꞌangkaiꞌ lao, láwiꞌ roo miꞌi nauliꞌ sulewátána datu, tiꞌaraꞌangkaiꞌ peisá lao i hia ane ádingkiꞌ tiꞌara kiánti.”

⁶Nauliꞌ Iako, “Moapa riꞌi haneꞌi nipakasusa gagaꞌaꞌ? Moapa riꞌi haneꞌi nihángáꞌá tauna iti kaꞌárána mani ádimi?”

⁷Hadua hangko i oloꞌraꞌ mehániꞌ, nauliꞌ, “Tauna iti napetámpáꞌ ntepuꞌu kana i kaiꞌ hampohalaluá, napekuneꞌ, ‘Tueꞌ mani paꞌi umámi?’ Napekuneꞌ wopiꞌi, ‘Babilaꞌ ara mani ádimi tobaleilo to ntániꞌna?’ Onoꞌ miꞌi haneꞌi kihániki peá upu-upu pekuneꞌna. Tiꞌara ara i pekiringkiꞌ ina nahuoꞌangkaiꞌ moánti iti ádingkiꞌ i hia.”

⁸Roo onoꞌ, nauliꞌ Iudá i umáraꞌ, “Nupaliu miꞌi ádingkiꞌ iti kiánti bona poloꞌangkaiꞌ pohuꞌ, bona tiꞌara ara i oloꞌtaꞌ to mate holo, maroꞌa kaiꞌ hai io umaꞌ, hai upu-upu ánáꞌkiꞌ.

⁹Kódóꞌ miꞌi to ina mampohurunga katueꞌna Benami. Ane tiꞌara mai kuánti huleꞌ i umaꞌ, peisá nupeliꞌ i kódóꞌ hai kupohárárá duuꞌkuꞌ mate.

¹⁰Ane kepoloꞌangkaiꞌ nupaliu, kemesuleꞌmongkaiꞌ mai karongkánina.”

¹¹Nahániki umáraꞌ, “Ane noꞌonoꞌi, hangaa-ngaa niánti woꞌo apa porasiꞌántaꞌ to maroꞌa ntepuꞌu hangko i tampoꞌ deꞌe. Nipusaꞌ i karuꞌmi, napopedupaꞌ sulewátána datu; nodo balasee, tináháꞌ, huloꞌ, rampaꞌ-rampaꞌ to masuliꞌ, beꞌau hai wuaꞌ halekaꞌ to matamaꞌ raꞌandeꞌ.

¹²Niánti woꞌo dóiꞌ rongkani kahandaꞌna hangko i dóiꞌ to niánti rungu-runguna. Babilaꞌ ánti kakakiꞌraꞌ haneꞌi dóiꞌ iti ara i lalu karuꞌmi, hai hangaa-ngaa nipopesuleꞌ.

¹³Niánti woꞌo ádimi hai hawiáꞌmokou mesuleꞌ lao i tauna iti.

¹⁴Tapembiáꞌ i Pueꞌ Ala to Makuasaꞌ bona sulewátána datu iti maꞌahiꞌ i kómu, hai mampopesuleꞌ Benami hai Simeoꞌ. Dekódóꞌ, ane matántámoheꞌ ánáꞌkuꞌ, tapanoumbá paꞌi!”

¹⁵Hangko ionoꞌ, halalunaheꞌ Iusupu pohuꞌmoheꞌ lao i tampoꞌ Másiriꞌ. I kapohuꞌraꞌ iti, moántiheꞌ Benami, pedupaꞌ hai dóiꞌ rongkani kahandaꞌna hangko i rungu-runguna. Kahaweꞌraꞌ ionoꞌ, laoheꞌ mampombelámbiꞌá Iusupu.

¹⁶Kanaitána Iusupu haweꞌ miꞌi Benami hingkakani hai halalunaheꞌ, napohawaꞌá tadulako topokádipurá támbina, nauliꞌ, “Nuántiheꞌ tauna iti lao i támbingkuꞌ, nusambale hambaꞌa binataꞌ, nuꞌundá hai nupatimama maroꞌa, láwiꞌ ina mandeꞌangkaiꞌ hingkakani dekalialo.”

¹⁷Topokádipurá támbi iti mopatimama mpuꞌu miꞌi apa to rahawaꞌá, hai halalunaheꞌ Iusupu naꞌánti lao i támbi.

¹⁸I karaꞌántiraꞌ lao i támbina Iusupu, malááꞌmoheꞌ halaluna haneꞌi rauliꞌ, “Moapa riꞌi haneꞌi raꞌántikeꞌ ieneꞌ? Babilaꞌ mokana i dóiꞌ to tahumba i karuꞌtaꞌ kamaintaꞌ rungu-runguna. Ina nahakaꞌkeꞌ, naꞌala kalidentaꞌ hai napohawiꞌkeꞌ.”

¹⁹Onoꞌ miꞌi haneꞌi, kahaweꞌraꞌ miꞌi i babaꞌ támbina Iusupu, rapolaluita i tadulako topokádipurá támbi,

²⁰rauliꞌ, “Membiáꞌangkaiꞌ ámpu, láwiꞌ hangkoia hangkanimongkaiꞌ mai mohóló pare,

²¹agáiáná i tempóngkiꞌ mesuleꞌ, i kahambengiángkiꞌ, mobungkáhiangkaiꞌ karuꞌkiꞌ hadua-hadua. Kipotingkáráꞌ láwiꞌ dóiꞌ popehólóngkiꞌ pare aranto i karuꞌ i wongko pare, hai tiꞌara kiꞌisá kaheánána to mamboli. Dóiꞌ iti kiánti mpasuleꞌ mai hai dóiꞌ to ina kipopehóló wopiꞌi pare.”

²³Nauliꞌ topokádipurá támbi, “Nipatinda peá lalumi. Ineeꞌntokou malááꞌ. Pueꞌ Ala to nipenómbái hai to napenómbái umámi, Ia miꞌi to mampoweꞌikou dóiꞌ iti i karuꞌmi. Hólóna pare to niánti mai iaꞌo, kutarima miꞌi.” Hangko ionoꞌ, ia moánti miꞌi Simeoꞌ lao i hira,

²⁴haneꞌi naꞌántiheꞌ mesuaꞌ i lalu támbina Iusupu. Naweꞌiheꞌ uwai rapopobahoꞌi bitiraꞌ, hai napehuoꞌá bona kalideraꞌ rapopandeꞌheꞌ woꞌo.

²⁵Roomoheꞌ napopaisáꞌá kaꞌina mandeꞌraꞌ hingkakani hai Iusupu, mopatimamamoheꞌ popedupaꞌraꞌ to ina rahuhuꞌ i Iusupu kalialo iti.

²⁶Kahaweꞌna Iusupu i támbina iti, rahuhuꞌá popedupaꞌraꞌ haneꞌi molingkuduheꞌ motóngkóꞌ i bitina.

²⁷Napekuneꞌ miꞌi Iusupu, nauliꞌ, “Maroꞌa-roꞌantokou?” haneꞌi mekuneꞌ wopiꞌi, “Iaꞌo, nipolaluita i kódóꞌ kana i umámi to matinuwuꞌ miꞌi. Noumbá bámbárina deꞌe-deꞌe? Ba ara mani?”

²⁸Mehániꞌheꞌ, “Ara mani, tuá. Umángkiꞌ to mobiláꞌkoꞌ maroꞌa-roꞌanto,” hai molingkudu wopaheꞌ motóngkóꞌ i bitina Iusupu tandaꞌ pebiláꞌraꞌ.

²⁹Kanaitána Iusupu Benami ádina to hangina-nginaheꞌ, napekuneꞌ, “Ba demiꞌe ádimi to toadi to nipolaluita miꞌi i kódóꞌ?” haneꞌi molaluita i Benami, “Tapembiáꞌ bona Pueꞌ Ala mowátiꞌkoꞌ.”

³⁰Rumihi kamabilana Iusupu hai rumihi woꞌo kamaꞌahiꞌna i ádina iti. Ánti katiꞌárána piꞌi nabuku motaha kamabilana, manggagu miꞌi mesuaꞌ i lintuꞌna haneꞌi teriaꞌ.

³¹Roo onoꞌ, nabahoꞌi lindoꞌna haneꞌi mesuwuꞌ, hai nahuoꞌ hawiꞌna mopatimama pandeꞌraꞌ.

³²Iusupu tepataniꞌ mejá pandeꞌána. Halaluna mandeꞌheꞌ i hambuaꞌ mejá, hai toMásiriꞌ mandeꞌheꞌ woꞌo i mejá ntániꞌna, láwiꞌ rapokatidiꞌ toMásiriꞌ ane mandeꞌheꞌ hingkakani hai toIberani.[153]

³³Halaluna Iusupu rakádipuráheꞌ i hambuaꞌ mejá to mombelindoꞌ hai mejána Iusupu. Rapopehodamoheꞌ mouláꞌ pombeusu-usuána tinuwuꞌraꞌ mantepuꞌu i to towutuꞌ haweꞌ i to toadi. Karaitána peá pombeusu-usuána pehodaraꞌ, mombetótóiheꞌ hadua hai hadua láwiꞌ wuliheꞌ.

³⁴Hira raróráheꞌ hangko i mejána Iusupu, hai rórána Benami lima kánina kahandaꞌna hangko i róráraꞌ wutuꞌna. Mandeꞌ hai mainuheꞌ hingkakani hai Iusupu i kagóeꞌ-góeꞌ.