Read Besoa Pewaliꞌána 44 Bible Online

Pewaliꞌána 44 - Besoa bible

Pewaliꞌána 44

¹Hangko ionoꞌ, Iusupu mampohawaꞌá miꞌi tadulako topokádipurá támbina, nauliꞌ, “Nuóntóki iti karuꞌraꞌ hai pare, sukáꞌ-sukáꞌna pebukuáraꞌ moánti, hai dóiꞌraꞌ hadua-hadua nupusaꞌ huleꞌ i karuꞌraꞌ i wongko pareraꞌ.

²Hai painuángkuꞌ to rabábehi hangko i peráꞌ, nupusaꞌ woꞌo i lalu karuꞌna ádiraꞌ to toadi hingkakani hai dóiꞌ popehólóna pare.” Topokádipurá támbina mampeuláꞌi mpuꞌu miꞌi hawaꞌ iti.

³Kahalona mepulo-pulo, halaluna Iusupu rapopeángkáꞌheꞌ hai kalideraꞌ.

⁴Tiꞌara maniheꞌ karaoꞌ hangko i kótá, nauliꞌ Iusupu i tadulako topokádipurá támbina, “Nugagu nudápáꞌheꞌ. Ane nulámbiꞌheꞌ, nuhángáꞌáheꞌ, ‘Moapa riꞌi haneꞌi kamaroꞌana tuángkuꞌ niháwángi hai to kadake?

⁵Moapa riꞌi haneꞌi nipanako painuá peráꞌ to napainui pueꞌkuꞌ hai napakeꞌ woꞌo mebao?[154] Kómu mobábehikou to kadake to rumihi ntepuꞌu.’ ”

⁶Kanalámbiꞌraꞌ topokádipurá iti halalunaheꞌ Iusupu, napahaweꞌáheꞌ hintotoꞌ hai apa to nauliꞌ Iusupu.

⁷Mehániꞌheꞌ, “Apa tunggáiámu, tuá? Tiꞌaraꞌangkaiꞌ pebáiꞌ mobábehi to kadake to noꞌonoꞌ!

⁸Nuisánto tuá, mogalo riꞌi dóiꞌ to kihumba i lalu karuꞌkiꞌ, kipopasuleꞌ miꞌi i hio. Mewaliꞌ tiꞌara mesuaꞌ i akala ane mopanakoangkaiꞌ peráꞌ ba buláwá hangko i támbina sulewátána datu.

⁹Ane hadua hangko i oloꞌkiꞌ rapolámbiꞌi párewá iti, rángina miꞌi ia rahuku mate hai kaiꞌ upu-upu ina mewaliꞌangkaiꞌ hawiꞌmu tuá.”

¹⁰Nauliꞌ to rahuoꞌ iti, “Maroꞌa miꞌi, agáiáná heáná peá to rapolámbiꞌi painuá iti, bateꞌna ia to ina mewaliꞌ hawiꞌkuꞌ; to ntániꞌna peisá miꞌi liliu mesuleꞌ.”

¹¹Ragagu-gagu miꞌi motáurá inántiraꞌ haneꞌi rabungkáhi karuꞌraꞌ hadua-hadua.

¹²Roo onoꞌ, topokádipurá támbina Iusupu mopáresáꞌ karuꞌraꞌ, mantepuꞌu i karuꞌna to towutuꞌ duuꞌna haweꞌ i karuꞌna to toadi, hai tongawaꞌ painuá iti ralámbiꞌ i karuꞌna Benami.

¹³Wutuꞌnaheꞌ masusa ntepuꞌu laluraꞌ, onoꞌ miꞌi haneꞌi mohepaꞌ-hepaꞌheꞌ waruꞌraꞌ. Roo onoꞌ, rapasawiꞌ miꞌi inántiraꞌ i kalideraꞌ, haneꞌi mesuleꞌheꞌ huleꞌ upu-upu lao i kótá.

¹⁴Kahaweꞌraꞌ Iudá hampohalaluá i támbina Iusupu, rahumba mani Iusupu ionoꞌ, mewaliꞌ mopalumbáheꞌ i bitina.

¹⁵Nauliꞌ Iusupu, “Moapa riꞌi haneꞌi noꞌonoꞌ bábehiámi? Tiꞌara paꞌi niꞌisá tauna to nodo kódóꞌ peisá mebao?”

¹⁶Mehániꞌ Iudá, “Apa mani paꞌi to hangaa-ngaa kiuliꞌ, tuá? Tiꞌara piꞌi ara rárá to mopatongawaꞌ noumbá kamanótóngkiꞌ. Pueꞌ Ala mopatongawaꞌ miꞌi kamasalaꞌkiꞌ. Deꞌe-deꞌe kaiꞌ upu-upu mewaliꞌmongkaiꞌ hawiꞌmu, tiꞌara peá to rapolámbiꞌi painuá iti.”

¹⁷Agáiáná nauliꞌ Iusupu, “Tiꞌara noꞌonoꞌ tunggáiángkuꞌ! Bateꞌna peá to rapolámbiꞌi painuángkuꞌ iti, ia to ina kupohawiꞌ. To ntániꞌna, peisákou mesuleꞌ i umámi.”

¹⁸Roo onoꞌ, Iudá mohungkuki Iusupu, nauliꞌ, “Tuá, membiáꞌaꞌ ámpu. Ane nupomaroꞌai, ina molaluita maniaꞌ i tuángkuꞌ. Ineeꞌ wongkódóꞌá nukabukoꞌi, kehapiꞌ tuángkuꞌ hibali hai Piraoꞌ.

¹⁹Tuá, iaꞌo nukuneꞌangkaiꞌ, ‘Babilaꞌ ara mani umámi hai halalumi to ntániꞌna?’

²⁰Mehániꞌangkaiꞌ, ‘Umángkiꞌ ara mani, agáiáná matoama miꞌi, hai i kamatoamaꞌána miꞌi, hangko mesupaꞌ riꞌi ádingkiꞌ. Wutuꞌna ádingkiꞌ to hangina-nginaheꞌ mate miꞌi, mewaliꞌ deꞌe-deꞌe bateꞌna rái ia haduduána to tueꞌ. Onoꞌ miꞌi haneꞌi napomahile ntepuꞌu umángkiꞌ.’

²¹Hangko ionoꞌ tuá, nupehawaꞌiá bona kiánti mai ádingkiꞌ bona nuita,

²²haneꞌi mehániꞌangkaiꞌ, ‘Ádingkiꞌ iti tiꞌara mpuꞌu peisá mampogááka umána, láwiꞌ ane mampogááka umána, umaꞌ ina mate.’

²³Agáiáná nauliꞌ wopiꞌi tuá i kaiꞌ, ‘Tiꞌarakou peisá mai i lindoꞌkuꞌ ane ádimi tiꞌara mai niánti.’

²⁴Pesuleꞌkiꞌ haweꞌ i umaꞌ, kipahaweꞌá miꞌi laluitamu, tuá.

²⁵Hangko ionoꞌ, nahuoꞌ wopangkaiꞌ mai mohóló pare.

²⁶Agáiáná mehániꞌangkaiꞌ, ‘Tiꞌaraꞌangkaiꞌ peisá molindoꞌ sulewátána datu ane ádingkiꞌ to toadi tiꞌara kiánti. Peisáꞌangkaiꞌ lao ane ádingkiꞌ kiánti woꞌo.’

²⁷Roo onoꞌ, nauliꞌ umángkiꞌ, ‘Niꞌisánto toinángkuꞌ Raheli rodua peá ánáꞌna.

²⁸Towutuꞌ mopálehimoꞌ. Bateꞌna ia mate miꞌi nahakaꞌ singá, láwiꞌ duuꞌna deꞌe-deꞌe tiꞌara piꞌi kuita.

²⁹Ane niala wopiꞌi ádimi to toadi deꞌe hangko i kódóꞌ, hai ina ara wopiꞌi to mewaliꞌ i hia, kapári to nibábehiáꞌaꞌ iti ina mopakawiáꞌ kamatengkuꞌ láwiꞌ deꞌe-deꞌe matoamamoꞌ!’

³⁰Tuá, onoꞌ miꞌi haneꞌi, ane mesuleꞌangkaiꞌ i umángkiꞌ hai tiꞌaraꞌangkaiꞌ mampohingkakaniá ádingkiꞌ deꞌe, manótó miꞌi kaꞌina matena miꞌi umángkiꞌ. Katueꞌna umángkiꞌ bateꞌna mentóáꞌ i ánáꞌna deꞌe, hai ia matoama ntepuꞌu miꞌi, mewaliꞌ kapári to kibábehi ina moánti kamatena umángkiꞌ.

³²Agáiáná kódóꞌ hawiꞌmu, modándimoꞌ i umángkuꞌ, ina kupohurunga katueꞌna ánáꞌna deꞌe. Kupolaluita i umaꞌ, ane tiꞌarai kuánti ánángkóiꞌ iti mesuleꞌ i hia, kódóꞌ ina mampohurunga duuꞌkuꞌ mate.

³³Mewaliꞌ kupembiáꞌ i tuá, rángina miꞌi kódóꞌ deꞌe nupohawiꞌ mopaháwángi ádingkiꞌ iti, bona ia mesuleꞌ peá hingkakani hai wutuꞌnaheꞌ.

³⁴Tiꞌara kubuku mesuleꞌ i umángkiꞌ, hai tiꞌaraꞌaꞌ pebáiꞌ moita kapári to ina morampe umángkiꞌ, ane ádingkiꞌ deꞌe tiꞌara piꞌi kiánti.”