Read Besoa Pewaliꞌána 45 Bible Online

Pewaliꞌána 45 - Besoa bible

Pewaliꞌána 45

¹Kanahádina Iusupu laluitana Iudá, tiꞌara piꞌi nabuku motaha laluna i lindoꞌraꞌ topobágóꞌna, onoꞌ miꞌi haneꞌi nahuoꞌheꞌ pohuꞌ hawiáꞌ-wiáꞌ hangko i lintuꞌ, bona ia mopakanótó kaheánána i halalunaheꞌ.

²Karooraꞌ topobágóꞌna mesuwuꞌ, Iusupu teriaꞌ miꞌi napasimbuku, álána rahádi toMásiriꞌ to araheꞌ i rawa lintuꞌ, haneꞌi tebámbári haweꞌ-haweꞌ i támbi kadatuána Piraoꞌ.

³Nauliꞌ Iusupu i halalunaheꞌ, “Kódóꞌ miꞌi deꞌe Iusupu. Toꞌu paꞌi tueꞌ mani umántaꞌ?” I karahádina laluitana, malááꞌ ntepuꞌuheꞌ halaluna hai tiꞌara rabuku mehániꞌ.

⁴Onoꞌ miꞌi haneꞌi nauliꞌ Iusupu i halalunaheꞌ, “Mengkahungkuꞌmokou mai.” Mehungkukimoheꞌ halaluna, hai nauliꞌ wopiꞌi, “Kódóꞌ miꞌi deꞌe Iusupu halalumi to nipobaluꞌáheꞌ toMásiriꞌ hangkoia.

⁵Ineeꞌntokou malááꞌ ba nahohoꞌ inaomi i kanipobaluꞌkuꞌ. Katoꞌuána Pueꞌ Ala haduduáNa mohuoꞌaꞌ moioru hangko i kómu mai ieneꞌ, bona mopatueꞌaꞌ tauna to handaꞌ.

⁶Deꞌe-deꞌe hangko rompare tempó rimi, hai lima mani parena tauna tiꞌaraheꞌ peisá mantudaꞌ-ntudaꞌ ba mepare.[155]

⁷Ánti peundeꞌána Pueꞌ Ala, Nahuoꞌmoꞌ mai moioru hangko i kómu. Iti miꞌi to mewaliꞌ hambuaꞌ rárá bona peisáꞌaꞌ mokádipurákou hai mopatueꞌkou bona ara pemuleꞌámi to handaꞌ.

⁸Mewaliꞌ tiꞌara ánti kanipobaluꞌkuꞌ haneꞌiaꞌ haweꞌ ieneꞌ, agáiáná láwiꞌ iti miꞌi peundeꞌána Pueꞌ Ala. Ia to mampopewaliꞌaꞌ sulewátána Piraoꞌ. Naweꞌiaꞌ kuasaꞌ i támbi kadatuána Piraoꞌ hai i humalele tampoꞌ Másiriꞌ.

⁹Deꞌe-deꞌe hawiáꞌmokou mesuleꞌ lao i umántaꞌ, hai nipahaweꞌá laluitangkuꞌ to node: Deꞌe miꞌi laluitana Iusupu, ánáꞌmu. ‘Naweꞌiaꞌ Pueꞌ Ala kuasaꞌ i humalele tampoꞌ Másiriꞌ. Kawiáꞌmokoꞌ mai mampohidupaꞌáꞌaꞌ ánáꞌmu.

¹⁰Umaꞌ peisá toroꞌ i tampoꞌ Másiriꞌ i roboꞌ Gose,[156] bona hungkuꞌ i kódóꞌ, hingkakani hai ánáꞌmu hai ueꞌmuheꞌ, dimbá, bekeꞌ, gapiꞌ hai hinángkáꞌna párewámu.

¹¹Ane umaꞌ toroꞌ miꞌi i roboꞌ Gose, peisámokoꞌ kukádipurá, láwiꞌ tempó rimi lima mani parena. Ane tiꞌarai noꞌonoꞌ, umaꞌ hantámbi hai upu-upu tauna to ara hingkakani hai kómu, ina molámbiꞌkou kapári.’

¹²Halalungkuꞌ, deꞌe-deꞌe niꞌita mata haduduámi hai noꞌonoꞌ woꞌo io, Benami; kódóꞌ miꞌi deꞌe Iusupu to mampolaluitaꞌákou.

¹³Nipahaweꞌá umántaꞌ, noumbá kamakuasaꞌkuꞌ hai karabiláꞌkuꞌ ieneꞌ i tampoꞌ Másiriꞌ. Nipolaluita hinángkáꞌna to niꞌita, hai kawiáꞌ miꞌi mai niánti umántaꞌ ieneꞌ.”

¹⁴Roo onoꞌ, Iusupu mokápui miꞌi Benami ádina, haneꞌi teriaꞌ. Benami woꞌo teriaꞌ mokápui Iusupu.

¹⁵Tangaꞌna mani teriaꞌ, Iusupu mokápui upu-upu halaluna, hai naꞌángkiheꞌ. Roo onoꞌ, mantepuꞌumoheꞌ molalaluita.

¹⁶Kanahádina Piraoꞌ hai upu-upu tauna i támbina bámbári kahaweꞌraꞌ halaluna Iusupu, góeꞌheꞌ woꞌo.

¹⁷Nauliꞌ Piraoꞌ i Iusupu, “Nuhángáꞌáꞌáheꞌ halalumu node: ‘Deꞌe miꞌi to hangaa-ngaa nibábehi. Nikádipurá pare i kalidemi hai mesuleꞌkou lao i tampoꞌ Kánáꞌá.

¹⁸Roo onoꞌ, peisákou melimbá mai ieneꞌ hingkakani hai umámi hampoánáka. Ina kuweꞌikou tampoꞌ to maruduꞌ ntepuꞌu ieneꞌ i tampoꞌ Másiriꞌ, bona maroꞌa katueꞌmi.’

¹⁹Hai nuhuoꞌheꞌ woꞌo moánti hangko ieneꞌ bahangapa kereta bona rapesaweꞌi toináraꞌ, ánáꞌraꞌ to kókóiꞌ mani, hai napesaweꞌi woꞌo umámu.

²⁰Ineeꞌntoheꞌ mampekiri párewáraꞌ to rapálehi, láwiꞌ ina kuweꞌiheꞌ to maroꞌa ntepuꞌu i tampoꞌ Másiriꞌ.”

²¹Ánáꞌnaheꞌ Iako mampeuláꞌi mpuꞌu miꞌi hawaꞌna Piraoꞌ iti. Naweꞌimoheꞌ Iusupu bahangapa kereta hai bokuraꞌ i rárá hiolaꞌ hai apa to nauliꞌ Piraoꞌ.

²²Naweꞌiheꞌ woꞌo waruꞌraꞌ to mababe hadua-hadua, agáiáná Benami naweꞌi dóiꞌ tálu átuna dóiꞌ peráꞌ[157] hai waruꞌna to woꞌu lima tauna.

²³Napakatu woꞌo i umána hampuloꞌ báꞌána kalide to rapopoánti párewáraꞌ to maroꞌa hangko i tampoꞌ Másiriꞌ, hai hampuloꞌ woꞌo kalide rapopoánti pare, rótiꞌ, hai pandeꞌ to ina rapoboku i polumaoána melimbá lao i tampoꞌ Másiriꞌ.

²⁴Timama miꞌi upu-upu inántiraꞌ, napopeángkáꞌmoheꞌ Iusupu, haneꞌiheꞌ nahángáꞌá, “Ineeꞌkou mosisisalaꞌ i rárá!”

²⁵Mewaliꞌ pohuꞌ mpuꞌumoheꞌ hangko i tampoꞌ Másiriꞌ, mesuleꞌheꞌ lao i tampoꞌ Kánáꞌá, katoroꞌána Iako.

²⁶Kahaweꞌraꞌ, rapolaluita miꞌi i umáraꞌ, rauliꞌ, “Umaꞌ, Iusupu tueꞌ mani! Ia tauna to makuasaꞌ i humalele tampoꞌ Másiriꞌ.” Kanahádina bámbári iti, napotingkáráꞌ Iako, hai tiꞌara mani napoinálái.

²⁷Agáiáná roo rapolaluita upu-upu to mewaliꞌ i Iusupu, hai napeita kereta to napakatu Iusupu to ina rapesaweꞌi lao i tampoꞌ Másiriꞌ, hangko maróhó riꞌi laluna hai napoinálái.

²⁸Nauliꞌ Iako, “Tueꞌ mani rikaa ánáꞌkuꞌ Iusupu! Onoꞌ peá to kupoinao. Hangaa-ngaa laoaꞌ mampeita hangko tiꞌara maniaꞌ mate.”