Read Besoa Pewaliꞌána 46 Bible Online

Pewaliꞌána 46 - Besoa bible

Pewaliꞌána 46

¹Mewaliꞌ mangkádipurámoheꞌ Iako hantina haneꞌiheꞌ pohuꞌ. Kahaweꞌraꞌ i wánuá Baraseba, napopenómbá miꞌi Iako bahangapa báꞌána binataꞌ i Pueꞌ Ala to napenómbái Isakiꞌ, umána.

²Tangaꞌ káindi, mampatongawaꞌ miꞌi Pueꞌ Ala i hia moliu pampetudeꞌá, Nauliꞌ, “Iako, Iako!” Mehániꞌ Iako, “Deꞌentoaꞌ, Pueꞌ.”

³Mongkóráꞌ miꞌi Pueꞌ Ala, Nauliꞌ, “Kódóꞌ miꞌi Pueꞌ Ala to napenómbái umámu. Ineeꞌkoꞌ malááꞌ lao i tampoꞌ Másiriꞌ, láwiꞌ ionoꞌ pemuleꞌámuheꞌ ina Kupopewaliꞌ hambuaꞌ kadatuá to mahile.

⁴Ina Kuporángákoꞌ lao i tampoꞌ Másiriꞌ, hai ina Kuánti pemuleꞌámuheꞌ mesuleꞌ mai i tampoꞌ deꞌe,[158] hai ane haweꞌ miꞌi tempómu mate, Iusupu to ina mokádipurákoꞌ.”[159]

⁵Roo onoꞌ, ánáꞌnaheꞌ Iako mampopesaweꞌ umáraꞌ, toináraꞌ hai ánáꞌraꞌheꞌ i kereta to napakatuáheꞌ Piraoꞌ, haneꞌiheꞌ pohuꞌ hangko i wánuá Baraseba.

⁶Raꞌántiheꞌ woꞌo binataꞌraꞌ hai párewáraꞌ to ralámbiꞌ i tampoꞌ Kánáꞌá, haneꞌi Iako hai upu-upu pemuleꞌána, ánáꞌna hai ueꞌna, laoheꞌ i tampoꞌ Másiriꞌ.

⁸Deꞌe miꞌi hangaꞌraꞌ pemuleꞌána Iako to rauliꞌ woꞌo Sáráeliꞌ, to melimbá lao i tampoꞌ Másiriꞌ:

⁹Ánáꞌnaheꞌ Iako hai Lea tobaleilo, pombeusu-usuána node: Rube ánáꞌna Iako to towutuꞌ hai ánáꞌnaheꞌ: Henoꞌ, Paluꞌ, Hesero hai Karimi. Simeoꞌ hai ánáꞌnaheꞌ: Iemue, Iamini, Ohada, Iakini, Soha hai Saulu.[160] Inána Saulu ia miꞌi toKánáꞌá. Lewi hai ánáꞌnaheꞌ: Gereso, Kehaꞌ hai Merari. Iudá hai ánáꞌnaheꞌ: Ereꞌ, Ona, Sela, Peresi, hai Sera, agáiáná Ereꞌ hai Ona matemoheꞌ i tampoꞌ Kánáꞌá. Ánáꞌnaheꞌ Peresi ia miꞌi Hesero hai Hamu. Sakari hai ánáꞌnaheꞌ: Tola, Pua, Aiubi, hai Simiro. Sebuloꞌ hai ánáꞌnaheꞌ: Sereꞌ, Eloni, hai Ialeꞌeli. Ara mani hadua ánáꞌraꞌ Iako hai Lea, hadua towawine to rahangaꞌ Dina. Kahambokoraꞌ Iako hai Lea i tampoꞌ Pádá-Árá, pemuleꞌáraꞌ tálu puloꞌraꞌ hai tálu.

¹⁶Ánáꞌnaheꞌ Iako hai Silipa hawiꞌna Lea to naweꞌi Lábá, meuláꞌheꞌ woꞌo. Pombeusu-usuána node: Gati hai ánáꞌnaheꞌ: Sipio, Hagi, Suni, Esibo, Eri, Arodi hai Areli. Asere hai ánáꞌnaheꞌ: Imina, Isiwa, Isiwi, Beria, hai Sera halaluraꞌ towawine. Ánáꞌnaheꞌ Beria iamoheꞌ Heberi hai Malakie. Kahambokoraꞌ Iako hai Silipa, pemuleꞌáraꞌ hampuloꞌ hai ini.

¹⁹Ánáꞌnaheꞌ Iako hai Raheli, pombeusu-usuána node: Iusupu hai ánáꞌnaheꞌ to rapoánáka i tampoꞌ Másiriꞌ: Manase hai Eparai. Asina toinána Iusupu ia miꞌi ánáꞌna Potipera, tadulako menómbá i kótá On. Benami hai ánáꞌnaheꞌ: Bela, Bekeri, Asabeleꞌ, Gera, Naꞌama, Ehi, Rosi, Mupi, Upi, hai Areꞌ. Kahambokoraꞌ Iako hai Raheli, pemuleꞌáraꞌ hampuloꞌ hai iba.

²³Ánáꞌnaheꞌ Iako hai Biláꞌ hawiꞌna Raheli to naweꞌi Lábá, pombeusu-usuána node: Daa hai ánáꞌna: Husimi. Natali hai ánáꞌnaheꞌ: Iasee, Guni, Iese hai Sileꞌ. Kahambokoraꞌ Iako hai Biláꞌ, pemuleꞌáraꞌ pitu.

²⁶Pemuleꞌána Iako to melimbá lao i tampoꞌ Másiriꞌ, ini puloꞌraꞌ hai ini, tiꞌara maniheꞌ tepasuaꞌ mániána.

²⁷Ánáꞌnaheꞌ Iusupu to rapoánáka i tampoꞌ Másiriꞌ, roduaheꞌ. Mewaliꞌ Iako hantina to haweꞌ i tampoꞌ Másiriꞌ, upu-upuraꞌ pitu puloꞌna kahandaꞌraꞌ.

²⁸I tangaꞌ polumaoáraꞌ, Iako mohuoꞌ miꞌi Iudá[161] moioru lao mohángáꞌá Iusupu bona lao mampombehumbaꞌá umána i roboꞌ Gose. Kahaweꞌna umána i Gose,

²⁹Iusupu mopatimama keretana hai lao mampohidupaꞌá umána. I pombelámbiꞌraꞌ iti, Iusupu mokápui umána hai marue teriaꞌ i wángána.

³⁰Nauliꞌ Iako i Iusupu, “Deꞌe-deꞌe, timamamoꞌ mate, láwiꞌ kuitamokoꞌ hai kuisá tueꞌ manikoꞌ.”

³¹Roo onoꞌ, nauliꞌ Iusupu i halalunaheꞌ hai tinána to ntániꞌna, “Ina laoaꞌ ioru mampopaisá i Piraoꞌ node: ‘Haweꞌmoheꞌ halalungkuꞌ hai tinána umángkuꞌ hangko i tampoꞌ Kánáꞌá.

³²Hira topoewu dimbá hai gapiꞌ, hai upu-upu binataꞌraꞌ hai párewáraꞌ raꞌánti mai ieneꞌ.’

³³Mewaliꞌ, ane nakióꞌkou Piraoꞌ hai nakuneꞌkou kana i bágóꞌmi,

³⁴nipahaweꞌ node: ‘Hangko ánángkóiꞌ maniangkaiꞌ duuꞌna deꞌe-deꞌe, kaiꞌ topokádipurá binataꞌ nodoheꞌ woꞌo toiorungkiꞌ.’ Ane nipahaweꞌi noꞌonoꞌ, ina nahuoꞌkou toroꞌ i roboꞌ Gose, láwiꞌ toMásiriꞌ mampokatidiꞌheꞌ topoewu.”