Read Besoa Pewaliꞌána 47 Bible Online

Pewaliꞌána 47 - Besoa bible

Pewaliꞌána 47

¹Hangko ionoꞌ, Iusupu moántiheꞌ lima halaluna bona lao mampohidupaꞌá Piraoꞌ, nauliꞌ, “Umángkuꞌ hai halalungkuꞌ hangko i tampoꞌ Kánáꞌá haweꞌmoheꞌ moánti bekeꞌ, gapiꞌ hai upu-upu párewáraꞌ. Deꞌe-deꞌe aramoheꞌ i roboꞌ Gose.” Roo onoꞌ, napopombekaisángaheꞌ halaluna iti hai Piraoꞌ.

³Napekuneꞌ Piraoꞌ i hira, “Apa bágóꞌmi?” Mehániꞌheꞌ, “Datu, kaiꞌ deꞌe, topoewuangkaiꞌ nodoheꞌ woꞌo toiorungkiꞌ.

⁴Maiangkaiꞌ i tampoꞌ deꞌe, láwiꞌ i tampoꞌ Kánáꞌá rumihi kamarimi. Ionoꞌ tiꞌara piꞌi ara rumpuꞌ, pandeꞌraꞌ bekeꞌ hai dimbá. Ane napaliuangkaiꞌ datu, toroꞌangkaiꞌ i roboꞌ Gose.”

⁵Hangko ionoꞌ, nauliꞌ Piraoꞌ i Iusupu, “Deꞌe-deꞌe umámu hai halalumu aramoheꞌ ieneꞌ.

⁶Nupahibali peá tampoꞌ Másiriꞌ deꞌe nodo tampoꞌmu haduduámu. Nupatoroꞌmoheꞌ i roboꞌ Gose, tampoꞌ to maruduꞌ ntepuꞌu. Hai ane arai i oloꞌraꞌ tauna to moisá ntepuꞌu mokádipurá binataꞌ, nupoweꞌiheꞌ bágóꞌ mampoewu woꞌo binataꞌkuꞌ.”

⁷Iusupu mampopombekaisángaheꞌ woꞌo umána hai Piraoꞌ, hai Iako membiáꞌ bona Piraoꞌ nawátiꞌ Pueꞌ.

⁸Roo onoꞌ, Piraoꞌ mekuneꞌ i hia, “Umaꞌ, hangapa miꞌi tinuwuꞌtaꞌ?”

⁹Mehániꞌ Iako i Piraoꞌ, “Datu, tinuwuꞌkuꞌ hangatu miꞌi hai tálu puloꞌna parena. Katueꞌkuꞌ bukeꞌ hai kapári hai rembe tinuwuꞌkuꞌ ane tapahibali hai tinuwuꞌraꞌ toiorungkuꞌ topoliloheꞌ.”

¹⁰Roo onoꞌ, Iako membiáꞌ wopiꞌi bona Piraoꞌ nawátiꞌ Pueꞌ, haneꞌi mesabiꞌ miꞌi.

¹¹Mewaliꞌ Iusupu mopatoroꞌmoheꞌ halaluna i tampoꞌ Másiriꞌ. Naweꞌimoheꞌ tampoꞌ to maruduꞌ ntepuꞌu mewaliꞌ gáláꞌraꞌ i roboꞌ Gose to ina rauliꞌ woꞌo roboꞌ Ramese,[162] hintotoꞌ hai apa to nauliꞌ Piraoꞌ.

¹²Hai napatimamaꞌá woꞌo pandeꞌna umána hai halalunaheꞌ haweꞌ-haweꞌ i ánáꞌraꞌ.

¹³Kamarimi iti rumihi ntepuꞌu, hai i humalele tampoꞌ tiꞌara piꞌi ara pandeꞌ. Onoꞌ miꞌi haneꞌi maledeꞌmoheꞌ tauna to toroꞌ i tampoꞌ Másiriꞌ hai i tampoꞌ Kánáꞌá.

¹⁴Káni-kánina tauna mohóló pare, Iusupu morámpu dóiꞌ popobaiari pare haneꞌi nawoli i támbi kadatuána Piraoꞌ.

¹⁵Upu miꞌi dóiꞌ i tampoꞌ Másiriꞌ hai i tampoꞌ Kánáꞌá, laoheꞌ toMásiriꞌ i Iusupu, rauliꞌ, “Nuweꞌi wongkaiꞌkaa pandeꞌkiꞌ. Ineeꞌangkaiꞌ nupatodáhi mate. Dóiꞌkiꞌ upu miꞌi.”

¹⁶Mehániꞌ Iusupu, “Ane upu miꞌi dóiꞌmi, niweꞌiaꞌ binataꞌmi, bona kuweꞌikou pandeꞌmi.”

¹⁷Mewaliꞌ binataꞌraꞌ rapeweꞌi miꞌi i Iusupu, rapopobaiari pandeꞌraꞌ. Handaꞌ pákáꞌna binataꞌraꞌ to raꞌánti, nodo dárá, dimbá, bekeꞌ, gapiꞌ hai kalide. Hampare kamaruena, Iusupu mampoweꞌiheꞌ pandeꞌraꞌ to rabaiari hai binataꞌraꞌ.

¹⁸Liu miꞌi hampare iti, haweꞌ wopaheꞌ i hia, rauliꞌ, “Tuá, upu miꞌi dóiꞌkiꞌ. Ane binataꞌkiꞌ, io miꞌi pueꞌna. Tiꞌara piꞌi ara apa-apangkiꞌ to peisá kiweꞌikoꞌ, bateꞌna rái wátángkiꞌ hai tampoꞌkiꞌ.

¹⁹Ineeꞌangkaiꞌ nupatodáhi mate. Ineeꞌ nupatodáhi hinoengkiꞌ tiꞌara tetudaꞌi. Kihuhuꞌ tampoꞌkiꞌ i Piraoꞌ hai kaiꞌ ina mewaliꞌangkaiꞌ hawiꞌna. Nuweꞌi peangkaiꞌ pare kagánáꞌána kipopoumpuki tueꞌkiꞌ hai tinudaꞌ woꞌo bona kipotinudaꞌ woꞌo i hinoengkiꞌ.”

²⁰Onoꞌ miꞌi haneꞌi upu-upu tampoꞌraꞌ toMásiriꞌ nahóló mpuꞌu miꞌi Iusupu mewaliꞌ tampoꞌna Piraoꞌ. Ánti karumihina kamarimi iti, upu-upu toMásiriꞌ mampobaluꞌmoheꞌ tampoꞌraꞌ i hia, haneꞌi upu-upu tampoꞌ i Másiriꞌ napopepueꞌ miꞌi i Piraoꞌ.

²¹Kaupuána, upu-upu tauna i humalele tampoꞌ Másiriꞌ mewaliꞌ hawiꞌna Piraoꞌ.

²²Bateꞌna perái tampoꞌraꞌ tadulako menómbá to tiꞌara nahóló Iusupu, láwiꞌ pandeꞌraꞌ napatimamaꞌámoheꞌ Piraoꞌ. Onoꞌ haneꞌi tiꞌaraheꞌ paraluu mampobaluꞌ tampoꞌraꞌ.

²³Nauliꞌ Iusupu i tauna to handaꞌ, “Bona niꞌisá, kómu hai tampoꞌmi kuhólóá miꞌi Piraoꞌ. Deꞌe miꞌi tinudaꞌ to ina nitudaꞌ i hinoemi.

²⁴Ane meparekou onoꞌ, hangaa-ngaa niweꞌi Piraoꞌ hanggáláꞌ lima hangko i rasiꞌmi. Pentáráꞌána hangko ionoꞌ peisá niala, nipotinudaꞌ hai niandeꞌ hampoánáka.”

²⁵Mehániꞌheꞌ, “Bulá lalungkiꞌ mewaliꞌangkaiꞌ hawiꞌna Piraoꞌ, láwiꞌ nupelaemongkaiꞌ hangko i kamarimi. Kihárungá ina nutarimaꞌangkaiꞌ maroꞌa.”

²⁶Hangko ionoꞌ, nabábehi miꞌi Iusupu áturá i tampoꞌ Másiriꞌ bona hanggáláꞌ lima hangko i powiáꞌraꞌ hangaa-ngaa mewaliꞌ gáláꞌna Piraoꞌ. Haweꞌ deꞌe-deꞌe[163] áturá iti rapopolumao mani. Bateꞌna perái tampoꞌraꞌ tadulako menómbá to tiꞌara mewaliꞌ tampoꞌna Piraoꞌ.

²⁷Mewaliꞌ toSáráeliꞌ mokatoroꞌi roboꞌ Gose i tampoꞌ Másiriꞌ. Hangko ionoꞌ, kamaroꞌa-roꞌaꞌá riꞌi tueꞌraꞌ hai memuleꞌheꞌ duuꞌraꞌ handaꞌ.

²⁸Iako tueꞌ mani hampuloꞌ hai pitu parena i tampoꞌ Másiriꞌ duuꞌna gáná miꞌi tinuwuꞌna hangatu iba puloꞌna hai pitu parena.

²⁹Hungkuꞌ miꞌi tempóna ina mate, Iako mokióꞌ miꞌi Iusupu haneꞌi meawili, nauliꞌ, “Ane nupokaꞌahiꞌaꞌ hai nupomahileaꞌ, nuwoli taemu i páꞌángkuꞌ hai modándimokoꞌ, bona ineeꞌaꞌ nutawu i tampoꞌ Másiriꞌ.

³⁰Kuꞌundeꞌ peá ratawu i popatawuáraꞌ toiorungkuꞌ. Kupembiáꞌ bona maꞌahiꞌ lalumu i kódóꞌ hai nuánti mesuleꞌ wátámandoꞌkuꞌ hangko i tampoꞌ deꞌe lao nutawu i popatawuáraꞌ iti.”[164] Nahániki Iusupu, “Umaꞌ, ina kubábehi nodo to nuhángáꞌáꞌáꞌaꞌ.”

³¹Nauliꞌ Iako, “Modándimokoꞌ i kódóꞌ.” Mewaliꞌ modándi mpuꞌu miꞌi Iusupu. Roo onoꞌ, motóngkóꞌ miꞌi Iako tándáꞌ i wuáꞌ paturuána, menómbá i Pueꞌ Ala.