Read Besoa Pewaliꞌána 48 Bible Online

Pewaliꞌána 48 - Besoa bible

Pewaliꞌána 48

¹Bahangapa kamaruena hangko ionoꞌ, rabámbáriá miꞌi Iusupu karumihina kamaduꞌana umána. Mewaliꞌ laoheꞌ Iusupu hai ánáꞌna to rodua, iamoheꞌ Eparai hai Manase.

²Kanahádina Iako kahaweꞌraꞌ Iusupu hampoánáka, napakaróhó miꞌi laluna, haneꞌi mehoda i paturuána.

³Nauliꞌ Iako i Iusupu, “Pueꞌ Ala to Makuasaꞌ mopatongawaꞌ i kódóꞌ i tampoꞌ Kánáꞌá i wánuá Beteli to rauliꞌ woꞌo Lusi. Ionoꞌ, Nawátiꞌmoꞌ,

⁴hai Nahángáꞌáꞌáꞌaꞌ, ‘Ina Kupahandaꞌ pemuleꞌámu duuꞌna handaꞌ ntepuꞌukou, hai ina Kupopewaliꞌkou handaꞌ kadatuá. Hai tampoꞌ deꞌe ina Kupeweꞌi i pemuleꞌámu rapopueꞌ haweꞌ i rue-ruena.’ ”[165]

⁵Napaliliu wopiꞌi Iako laluitana, nauliꞌ, “Iusupu, ane ánáꞌmu to rodua Eparai hai Manase to mesupaꞌ i tampoꞌ Másiriꞌ hangko tiꞌara maniaꞌ haweꞌ ieneꞌ, kupoánáꞌheꞌ hai kurekeꞌheꞌ ánáꞌkuꞌ hibali hai Rube hai Simeoꞌ.[166]

⁶Ane ara maniheꞌ ánáꞌmu, tiꞌarapoheꞌ ina kurekeꞌ ánáꞌkuꞌ, agáiáná mewaliꞌheꞌ ánáꞌmu. Sosoraraꞌ ina ratarima hangko i Eparai hai Manase wutuꞌraꞌ.

⁷Kubuhinao inámu Raheli.[167] Hangkoia, tempóntaꞌ mesuleꞌ hangko i tampoꞌ Pádá-Árá, ia mate i tampoꞌ Kánáꞌá, tiꞌara karaoꞌ hangko i wánuá Eparata, hai wiora ntepuꞌuaꞌ. Kutawu peá ionoꞌ i wiwi rárá to lao i Eparata,” ia miꞌi i Beteleme.[168]

⁸Kanaitáraꞌ Iako ánáꞌna Iusupu, napekuneꞌ, “Heánáheꞌ ánángkóiꞌ deꞌe?”

⁹Mehániꞌ Iusupu, “Deꞌemoheꞌe ánáꞌkuꞌ to naweꞌiaꞌ Pueꞌ Ala ieneꞌ, i tampoꞌ Másiriꞌ.” Nauliꞌ Iako, “Nupahungkuꞌheꞌ mai bona kuwátiꞌheꞌ.”

¹⁰Ánti kamatoámána mpiiꞌ miꞌi Iako, tiꞌara piꞌi gaga meita. Napahungkuꞌheꞌ Iusupu ánáꞌna iti, haneꞌi Iako mokápui hai moángkiheꞌ.

¹¹Roo onoꞌ, molaluita wopiꞌi Iako i Iusupu, “Katoꞌuána tiꞌara piꞌi kuhárungá kaꞌina mohidupaꞌtaꞌ mani, agáiáná Pueꞌ Ala moweꞌiaꞌ tempó to maroꞌa haneꞌi kubuku mpiiꞌ mani mampohidupaꞌáheꞌ ueꞌkuꞌ.”

¹²Hangko ionoꞌ, naꞌalamoheꞌ Iusupu ánáꞌna hangko i Iako,[169] haneꞌi molingkudu i lindoꞌna umána motóngkóꞌ haweꞌ i tampoꞌ.

¹³Roo onoꞌ, napahungkuꞌ wopaheꞌ Iusupu ánáꞌna to rodua iti i lindoꞌna Iako, Manase towutuꞌ tándáꞌ i kuánána, haneꞌi Eparai toadi tándáꞌ i kabeoꞌna.

¹⁴Agáiáná Iako mampopombehape taena, tae kuánána mopágá wuáꞌna Eparai, kehapiꞌ ia toadi, hai tae kabeoꞌna mopágá wuáꞌna Manase, kehapiꞌ ia towutuꞌ.

¹⁵Roo onoꞌ, Iako mowátiꞌ Iusupu, nauliꞌ: “Pueꞌ Ala to rapenómbái Burahima hai Isakiꞌ toiorungkuꞌ. Ia miꞌi to moteteꞌaꞌ[170] haweꞌ deꞌe-deꞌe.

¹⁶Ia miꞌi to mopatongawaꞌ i kódóꞌ moliu malaꞌekaNa. Ia to mokábáháꞌaꞌ hangko i hinángkáꞌ kapári. Kupembiáꞌ i Pueꞌ Ala bona mowátiꞌheꞌ ánángkóiꞌ deꞌe. Kupembiáꞌ bona ánángkóiꞌ to kupoánáꞌheꞌ deꞌe ina mopaliliuheꞌ kamahilena hangaꞌkuꞌ, hai hangaꞌraꞌ toiorungkuꞌ Burahima hai Isakiꞌ. Kupembiáꞌ bona memuleꞌheꞌ duuꞌna handaꞌ pemuleꞌáraꞌ i duniáꞌ.”

¹⁷Kanaitána Iusupu umána mopágá tae kuánána i wuáꞌna Eparai, tiꞌara napomaroꞌa. Onoꞌ haneꞌi natibaaꞌ tae kuánána umána ina nalimbá i wongko wuáꞌna Manase,

¹⁸nauliꞌ, “Umaꞌ, ineeꞌkoꞌ noꞌonoꞌ. Deꞌe miꞌi ánáꞌkuꞌ towutuꞌ. Hangaa-ngaa nupágá tae kuánámu i wuáꞌna.”

¹⁹Agáiáná laluitana iti tiꞌara napokana umána, nauliꞌ, “Kuisánto, ánáꞌkuꞌ. Kuisá miꞌi. Manase ina mahile woꞌo kuasaꞌna, hai pemuleꞌánaheꞌ ina mewaliꞌ hambuaꞌ kadatuá to mahile. Agáiáná kehapiꞌ noꞌonoꞌ, ádina to ina melumbuꞌ kamahilena kuasaꞌna hangko i hia, hai pemuleꞌána ádina ina mewaliꞌheꞌ handaꞌ kadatuá to mahile.”[171]

²⁰Mewaliꞌ i alo iti, nawátiꞌ wopaheꞌ ánángkóiꞌ iti, nauliꞌ: “ToSáráeliꞌ ina mokábelái hangaꞌmi ane mowátiꞌheꞌ tauna, ina rauliꞌ: ‘Tapembiáꞌ i Pueꞌ Ala bona Nawátiꞌkoꞌ nodo Eparai hai Manase.’ ” Noꞌonoꞌ miꞌi Iako mopaioru Eparai hangko i Manase.

²¹Hangko ionoꞌ, molaluita miꞌi Iako i Iusupu, nauliꞌ, “Tiꞌara piꞌi marue ina matemoꞌ, agáiáná Pueꞌ Ala ina mamporángákou hai moántikou mesuleꞌ i tampoꞌraꞌ toiorumi.

²²Ina kuweꞌikoꞌ tampoꞌ to melumbuꞌ hangko i to kuweꞌiheꞌ halalumu. Deꞌe-deꞌe kuweꞌikoꞌ hambikáꞌ buluꞌ, tampoꞌ to kuperampaꞌi hangko i toAmori tempóngkiꞌ mombeala.”