Read Besoa Pewaliꞌána 49 Bible Online

Pewaliꞌána 49 - Besoa bible

Pewaliꞌána 49

¹Roo onoꞌ, Iako mokióꞌheꞌ ánáꞌna haneꞌi nauliꞌ, “Mengkahungkuꞌmokou mai, ina kupopaisáꞌámokou apa to ina mewaliꞌ i kómu i tempó to ina haweꞌ.

²Ánáꞌnakou Iako, moromu-romukou hai nipehádingi. Nipehádingi maroꞌa laluitana Sáráeliꞌ[172] umámi.

³Rube ánáꞌkuꞌ to towutuꞌ, róhóngkuꞌ tongawaꞌ miꞌi i wátámu; io miꞌi ánáꞌkuꞌ to towutuꞌ, to mesupaꞌ tangaꞌkuꞌ mani maróhó. Mouláꞌ katowutuꞌmu, io miꞌi to teádái hai to makuasaꞌ.

⁴Agáiáná io nodo pekoꞌ uwai to rumihi pokalena, láwiꞌ tiꞌara nubuku momeeꞌ peundeꞌána lalumu. Mewaliꞌ tiꞌarapokoꞌ rarekeꞌ to teádái i oloꞌraꞌ halalumu, láwiꞌ nupoiluhi hadua towawinengkuꞌ to kukarodua;[173] mepakahiliá mpuꞌukoꞌ.

⁵Simeoꞌ hai Lewi topohalaluheꞌ, to mopakeꞌheꞌ pihoꞌ bona mepakarugiꞌ.[174]

⁶Tiꞌara ina kuꞌuláꞌ pobutusiraꞌ; tiꞌaraheꞌ woꞌo ina kuporángá i poromu-romuáraꞌ, láwiꞌ ánti kamasekeraꞌ, mepapateheꞌ, hai ánti kamasilakaraꞌ, motimpóheꞌ gapiꞌ to maróhó.

⁷Hárárámoheꞌ, láwiꞌ rumihi ntepuꞌu kamasodoraꞌ. Hárárámoheꞌ, láwiꞌ rumihi kamasekeraꞌ.[175] Ina kupopogááꞌ-gááꞌheꞌ i humalele tampoꞌ Sáráeliꞌ; Ina kupamahawuꞌheꞌ i oloꞌraꞌ upu-upu tinána Iako.[176]

⁸Iudá, io ina monangikoꞌ ewálimu. Halalumuheꞌ ina motóiákoꞌ,[177] hai ina motóngkóꞌheꞌ i lindoꞌmu.

⁹Ó Iudá, io nodo hambaꞌa singá[178] to maleheꞌ mani, to mohakaꞌ miꞌi binataꞌ to ina naꞌandeꞌ, haneꞌi mesuleꞌ huleꞌ lao i katoroꞌána. Ane maturu ionoꞌ, tiꞌara ara to pebáiꞌ moruaꞌ.

¹⁰Iudá ina motibaaꞌ laiꞌ kadatuá,[179] hai pemuleꞌána ina mepárentá oaꞌ duuꞌna haweꞌ hadua to hintotoꞌ ntepuꞌu mepárentá.[180] Tauna hangko i upu-upu kadatuá ina moánti popenómbáraꞌ i hia, hai ina motóngkóꞌheꞌ hai mengkoruꞌheꞌ i lindoꞌna.

¹¹Maroꞌa ntepuꞌu katueꞌna Iudá, hai handaꞌ ntepuꞌu rasiꞌna i powiáꞌna. Melumbuꞌ ntepuꞌu anggoroꞌna duuꞌna tóáꞌ kau anggoroꞌ napotakaꞌi kalide, mogalo waruꞌna nabahoꞌi riꞌi hai uwai anggoroꞌ.

¹²Ánti kahandaꞌna anggoroꞌna, mátána ina mewaliꞌ malei. Ánti kahandaꞌna uwai huhu gapiꞌ, ngihina ina mewaliꞌ bulá.

¹³Sebuloꞌ ina toroꞌ i wiwi tahiꞌ hai ina mewaliꞌ nodo pehupeꞌá kapalaꞌ tahiꞌ. Parailiꞌna tampoꞌna ina haweꞌ i kótá Sido.[181]

¹⁴Sakari nodo hambaꞌa kalide to maróhó, to molukuꞌ i hiliꞌna inántina.

¹⁵Ane naita pengkarooána iti maroꞌa hai kamaruduꞌna tampoꞌna, ina mengkabungkuꞌ miꞌi rapohumpádái inántina, hai mobágóꞌ matimi nodo hadua hawiꞌ.

¹⁶Daa ina mohoda-hoda posisalaꞌraꞌ taunána,[182] hai pemuleꞌána ina mewaliꞌheꞌ hantina hibali hai tina ntániꞌna i oloꞌraꞌ toSáráeliꞌ.

¹⁷Agáiáná ia nodo hambaꞌa lelótó to mangawu i wiwi karadaa, nodo hambaꞌa lelótó to mobisa i wiwi rárá, to motilóꞌ padóꞌna dárá, haneꞌi to mesaweꞌ tebálingkárá.”[183]

¹⁸Ionoꞌ, meraruaꞌ miꞌi Iako i Pueꞌ Ala, nauliꞌ, “Ó PUEꞌ, kupepegiá mani petulungi to hangko i Hio.” Roo onoꞌ, nauliꞌ wopiꞌi:

¹⁹“Gati ina rabungkáꞌ toperampaꞌ, agáiáná ia ina morámpákiheꞌ huleꞌ.[184]

²⁰Asere, ina handaꞌ pandeꞌna to maroꞌa; pandeꞌ to hintotoꞌ napoporórá datu.[185]

²¹Natali nodo lagiwa lundara to tekábáhá;[186] mababeheꞌ poánáꞌraꞌ.

²²Iusupu nodo hampóꞌá kau to handaꞌ wuaꞌna,[187] to tueꞌ i wiwi uwai; dáꞌá-dáꞌána mendai moliungi bosoꞌ watu.[188]

²³Kehapiꞌ topepanaꞌ meꞌewaꞌ, mepobiti hai mepanaꞌ,

²⁴ambiꞌ melumbuꞌ mani kamaróhóna taena Iusupu mepanaꞌ, hai tiꞌara bata-bata laluna,[189] láwiꞌ naporángá kuasaꞌna Pueꞌ Ala; Hai Pueꞌ Ala to Makuasaꞌ to napenómbái Iako, Ia miꞌi to mokádipurákoꞌ nodo hadua topoewu. Ia miꞌi to mewaliꞌ buluꞌ watu, pengkatueꞌáraꞌ toSáráeliꞌ.

²⁵Pueꞌ Ala to napenómbái umámu ina motulungikoꞌ. Pueꞌ Ala to Makuasaꞌ ina mowátiꞌkoꞌ hai mopaꞌaraꞌákoꞌ udá hangko i langiꞌ, uwai hangko i lapi tampoꞌ, handaꞌ pemuleꞌámi hai binataꞌmi.[190]

²⁶Pewátiꞌna Pueꞌ Ala to napenómbái umámu ina melumbuꞌ peraeꞌna hangko i peraeꞌna buluꞌ to ara miꞌi ami hangko i pewaliꞌána duniáꞌ. Kupembiáꞌ bona upu-upu pewátiꞌ iti haweꞌ i Iusupu; ia miꞌi to teádái ntepuꞌu i oloꞌnaheꞌ halaluna.[191]

²⁷Benami nodo hambaꞌa serigala to maseke. Ane mepuloi, mohakaꞌ pandeꞌna; ane káindiꞌi, mogáláꞌ-gáláꞌ apa to nalámbiꞌ.”[192]

²⁸Noꞌonoꞌ miꞌi Iako mopakanótó pewátiꞌ i ánáꞌnaheꞌ to hampuloꞌ hai rodua to mewaliꞌ toioruraꞌ hampuloꞌ hai rontina toSáráeliꞌ. Upu-upuheꞌ nawátiꞌ mouláꞌ apa to hintotoꞌ i hira hadua-hadua.

²⁹Roo onoꞌ, meawili miꞌi Iako i ánáꞌnaheꞌ, nauliꞌ, “Tiꞌara piꞌi marue ina matemoꞌ. Hangaa-ngaa nitawuaꞌ i popatawuáraꞌ toiorungkuꞌ, ia miꞌi balamba to ara i hinoe Mapela, tándáꞌ i mata alo wánuá Mamere i tampoꞌ Kánáꞌá. Hangkoia Burahima mohóló miꞌi hinoe iti to nakaꞌarai balamba watu hangko i Epero toHeti, bona rapopewaliꞌ popatawuá.[193]

³¹Ionoꞌ miꞌi Burahima hai Sáráꞌ ratawu; noꞌonoꞌ woꞌo Isakiꞌ hai Ribeka, hai ionoꞌ woꞌo Lea kutawu.

³²Hinoe hai balamba watu iti rahóló miꞌi hangko i toHeti. Mewaliꞌ kódóꞌ woꞌo hangaa-ngaa nitawuaꞌ ionoꞌ.”

³³Karoona Iako moawili ánáꞌnaheꞌ, naꞌángkáꞌ miꞌi bitina i paturuána, napakanoroꞌ wátána, haneꞌi upu miꞌi inaona.