Read Besoa Pewaliꞌána 50 Bible Online

Pewaliꞌána 50 - Besoa bible

Pewaliꞌána 50

¹Iusupu mopalumbá i wátána umána moteriahi haneꞌi moángki lindoꞌna umána.[194]

²Roo onoꞌ, nakióꞌmoheꞌ topobágóꞌna to moisá ntepuꞌu morampaꞌi wátámandoꞌ bona tiꞌara poloꞌ magoro, hai nahuoꞌheꞌ morampaꞌi wátámandoꞌna umána.

³Bágóꞌ iti moparaluu tempó iba puloꞌna alona. Hai toMásiriꞌ moꞌomboꞌ kamatena Iako pitu puloꞌna alona kamaruena.[195]

⁴Hópóꞌ miꞌi omboꞌ, Iusupu membiáꞌ i topobágóꞌna Piraoꞌ bona mopahaweꞌheꞌ tewáina i Piraoꞌ node:

⁵“Hangko tiꞌara mani mate umángkuꞌ, nahuoꞌaꞌ modándi bona kutawu wátána i popatawuá to rapatimama miꞌi i tampoꞌ Kánáꞌá. Onoꞌ miꞌi haneꞌi kupembiáꞌ i kitaꞌ bona teweꞌiaꞌ tempó lao mopatawu umángkuꞌ. Roo onoꞌ, ina mesuleꞌaꞌ huleꞌ.”

⁶Mehániꞌ Piraoꞌ, “Peisánto. Laomokoꞌ mopatawu umámu hiolaꞌ hai dándimu i hia.”

⁷Lao mpuꞌu miꞌi Iusupu mopatawu umána. Upu-upu topobágóꞌna Piraoꞌ, totosae i támbina, hai upu-upu totosae to ara i tampoꞌ Másiriꞌ, laoheꞌ woꞌo mamporángá Iusupu.

⁸Hantámbiánaheꞌ hai upu-upu halaluna, hai upu-upu tauna to ara i támbina umána, laoheꞌ woꞌo. Bateꞌna perái ánáꞌraꞌ hai binataꞌraꞌ to rapálehi i roboꞌ Gose.

⁹Surudadoꞌ to mokereta hai to modárá laoheꞌ woꞌo. Onoꞌ miꞌi haneꞌi handaꞌ ntepuꞌuheꞌ to meuláꞌ i hia.

¹⁰Haweꞌmoheꞌ i katoroꞌáraꞌ toporánáꞌ pare i Gore-Haꞌataꞌ hungkuꞌ i uwai Iarade, metatangiheꞌ upu-upu. Ionoꞌ Iusupu moꞌomboꞌ mani umána pitu alona pitu wengina.

¹¹Karaitáraꞌ pueꞌ wánuá toKánáꞌá, rauliꞌ, “Mewiwiorai mpuꞌu omboꞌraꞌ toMásiriꞌ iti.” Onoꞌ miꞌi haneꞌi katoroꞌá iti rahangaꞌ Abeleꞌ-Misirai.[196]

¹²Mewaliꞌ, rabábehi mpuꞌumoheꞌ ánáꞌna Iako apa to naꞌawiliáheꞌ:

¹³wátámandoꞌna raꞌánti huleꞌ lao i tampoꞌ Kánáꞌá hai ratawu i balamba watu i hinoe Mapela. Balamba iti tándáꞌ i mata alo i wánuá Mamere, i tampoꞌ to nahóló Burahima hangkoia i Epero toHeti, bona rapopewaliꞌ popatawuá.

¹⁴Upu miꞌi Iusupu mopatawu umána, mesuleꞌmoheꞌ lao i tampoꞌ Másiriꞌ hingkakani hai halaluna hai upu-upu tauna to meuláꞌ.

¹⁵Láwiꞌ mate miꞌi umáraꞌ, halaluna Iusupu malááꞌmoheꞌ haneꞌi molaluitaheꞌ hadua hai hadua, rauliꞌ, “Noumbámokeꞌ ane rápáꞌna Iusupu mopailalukeꞌ hai naháwángi bábehiántaꞌ to kadake i hia hangkoia?”

¹⁶Onoꞌ miꞌi haneꞌi rapakatu miꞌi laluita i Iusupu to node: “Hangko tiꞌara mani mate umámu,

¹⁷nahuoꞌmongkaiꞌ bona kipahaweꞌ pembiáꞌna deꞌe i hio, ‘Nuámpungi miꞌi kamasalaꞌraꞌ wutuꞌmu i hio.’ Mewaliꞌ kaiꞌ deꞌe, hawiꞌnaꞌangkaiꞌ woꞌo Pueꞌ Ala to napenómbái umántaꞌ, kipembiáꞌ wongkaiꞌkaa bona ineeꞌ nupailalu salaꞌ to kibábehi i hio hangkoia.” Kanahádina Iusupu laluitaraꞌ iti, ia teriaꞌ.[197]

¹⁸Roo onoꞌ, laomoheꞌ halaluna upu-upu mopalumbá i bitina, rauliꞌ, “Kaiꞌ deꞌe hawiꞌmu.”

¹⁹Agáiáná nauliꞌ Iusupu i hira, “Ineeꞌmokou malááꞌ. Kuasaꞌkuꞌ tiꞌara hibali hai kuasaꞌna Pueꞌ Ala.

²⁰Kehapiꞌ nitunggái mobábehi to kadake i kódóꞌ, Pueꞌ Ala ara tunggáiáNa to maroꞌa. Apa to mewaliꞌ miꞌi hangkoia, mewaliꞌ ráráNa mopatueꞌ tauna to handaꞌ.

²¹Mewaliꞌ ineeꞌmokou malááꞌ i kódóꞌ láwiꞌ ina kupatimama hinángkáꞌ to niparaluu haweꞌ-haweꞌ i ánáꞌmi.” Noꞌonoꞌ miꞌi Iusupu mopatinda hai mopalindó laluraꞌ halaluna.

²²Iusupu hai halaluna toroꞌheꞌ hingkakani i tampoꞌ Másiriꞌ. I kamatena Iusupu, tinuwuꞌna hangatu miꞌi hai hampuloꞌ parena.

²³Hangko tiꞌara mani mate, nampakaꞌ mani moita ánáꞌna hai ueꞌna Eparai. Nampakaꞌ mani woꞌo moita ánáꞌna Maki,[198] ia miꞌi ueꞌna Manase. Ánáꞌnaheꞌ Maki napoánáꞌ Iusupu.

²⁴Hangko tiꞌara mani mate, nahángáꞌáheꞌ halaluna, “Tiꞌara piꞌi marue ina matemoꞌ, agáiáná Pueꞌ Ala ina mokádipurákou oaꞌ hai moántikou hangko i tampoꞌ deꞌe lao i tampoꞌ to Nadándi i Burahima, Isakiꞌ hai Iako.[199]

²⁵Hangaa-ngaa modándikou i kódóꞌ. Ane naporángákou Pueꞌ Ala mesuleꞌ lao i tampoꞌ Kánáꞌá, hangaa-ngaa niánti woꞌo wátámandoꞌkuꞌ.”[200]

²⁶Magáná miꞌi tinuwuꞌna hangatu hai hampuloꞌ parena, mate miꞌi Iusupu. Wátámandoꞌna rarampaꞌi hai rawoli i lalu lómu i tampoꞌ Másiriꞌ.