Read Besoa Pewaliꞌána 7 Bible Online

Pewaliꞌána 7 - Besoa bible

Pewaliꞌána 7

¹PUEꞌ mongkóráꞌ wopiꞌi i Noho, Nauliꞌ, “Hangko i oloꞌraꞌ upu-upu tauna to tueꞌ deꞌe-deꞌe, io peá to manótó i peitáNgkuꞌ. Mewaliꞌ, mesuaꞌmokoꞌ i lalu duanga to mahile hingkakani hai tinámu.

²Hangaa-ngaa nuántiheꞌ pitu bokona hangko i pákáꞌ-pákáꞌna binataꞌ to tiꞌara rapáliá hai to peisá rapopenómbá i Kódóꞌ. Ane binataꞌ to ntániꞌna, hamboko peá to nuánti.

³Hangaa-ngaa nuántiheꞌ woꞌo pitu bokona hangko i pákáꞌ-pákáꞌna tádáhi. Upu-upu iti hangaa-ngaa nubábehi bona peisáheꞌ memuleꞌ i duniáꞌ,

⁴láwiꞌ pitu rái alona ina Kupopendáulu udá to tiꞌara ina wóró iba puloꞌna alona hai iba puloꞌna wengina kamaruena. Ina Kubábehi noꞌonoꞌ bona upu-upu to Kupopewaliꞌ to tueꞌ i duniáꞌ ina tuna.”

⁵Upu-upu hawaꞌna PUEꞌ, napeuláꞌi mpuꞌu miꞌi Noho.

⁶I tempóna duniáꞌ nalábóꞌ uwai, tinuwuꞌna Noho ini átuna parena.

⁷Noho hai toinána, hingkakani hai ánáꞌraꞌ hai toináraꞌ, mesuaꞌheꞌ i lalu duanga to mahile bona tepatueꞌheꞌ hangko i kanalábóꞌna uwai i duniáꞌ.

⁸Haweꞌmoheꞌ woꞌo pákáꞌ-pákáꞌna tádáhi hai binataꞌ, tepasuaꞌ to mendólóꞌ, maroꞌa to peisá rapopenómbá i Pueꞌ Ala, maroꞌa to tiꞌara.

⁹Hamboko-hambokoheꞌ haweꞌ i Noho hai mesuaꞌheꞌ i lalu duanga to mahile, láwiꞌ noꞌonoꞌ miꞌi párentána Pueꞌ Ala i Noho.

¹⁰Pitu alona hangko i polaluitaraꞌ Pueꞌ Ala hai Noho, mantepuꞌu miꞌi duniáꞌ nalábóꞌ uwai.

¹¹Magáná miꞌi tinuwuꞌna Noho ini átuna parena, i alo kahampuloꞌ hai pitu wulá kaduá, tebungkáhi miꞌi hinángkáꞌna rárá uwai i lalu tampoꞌ. Hai langiꞌ tebungkáhi miꞌi woꞌo duuꞌna kebuꞌu udána.[24]

¹²Kamaruena udá iti iba puloꞌna alona hai iba puloꞌna wengina.

¹³I alo kapitu iti, Noho hai toinána mesuaꞌheꞌ i lalu duanga to mahile hingkakani hai ánáꞌraꞌ to tálu, ia miꞌi Semuꞌ, Hama hai Apeꞌ, hai upu-upuheꞌ toináraꞌ.

¹⁴Hingkakani hai hira, araheꞌ woꞌo mampopengaa tádáhi hai binataꞌ, tepasuaꞌ binataꞌ to mendólóꞌ.

¹⁵Hintotoꞌ hai hawaꞌna Pueꞌ Ala i Noho, upu-upu binataꞌ iti mesuaꞌheꞌ i lalu duanga to mahile hingkakani hai Noho, hamboko-hamboko. Roomoheꞌ mesuaꞌ, PUEꞌ motuko babaꞌna duanga iti.

¹⁷Iba puloꞌna alona hai iba puloꞌna wengina kamaruena, katetátámbáiá uwai to molábóꞌ duniáꞌ duuꞌna támpu miꞌi tampoꞌ, hai duanga iti monanto-nanto i wongko uwai.

¹⁹Tetátámbái oaꞌ kahandaꞌna uwai duuꞌna támpu upu-upu buluꞌ.

²⁰Uwai iti liliu mengkaheꞌ haweꞌ i pitu mete hangko i tutuꞌ buluꞌ.

²¹Noꞌonoꞌ miꞌi rárána Pueꞌ Ala mopatuna upu-upu to meinao to tueꞌ i duniáꞌ deꞌe, iamoheꞌ mampopengaa tádáhi hai hinángkáꞌna binataꞌ, maroꞌa to manondoꞌ ba to maila, hai upu-upu tauna. Bateꞌraꞌ peá Noho hantámbi hai hinángkáꞌna to ara i lalu duanga to mahile to tiꞌara napatuna Pueꞌ Ala.

²⁴Uwai iti molábóꞌ duniáꞌ deꞌe hangatu lima puloꞌna alona kamaruena.