Read Besoa Pewaliꞌána 8 Bible Online

Pewaliꞌána 8 - Besoa bible

Pewaliꞌána 8

¹Kehapiꞌ noꞌonoꞌ kanalábóꞌna duniáꞌ hai uwai, Pueꞌ Ala bateꞌ-bateꞌna mambuhinao Noho hai upu-upu binataꞌ to ara i lalu duanga iti, maroꞌa to manondoꞌ hai to maila. Onoꞌ miꞌi haneꞌi napaꞌara Pueꞌ Ala wui to rumihi bona uwai iti mauhu.

²Rárá uwai to ara i lalu tampoꞌ hai to ara i langiꞌ Natuko. Tiꞌara piꞌi keudá,

³álána uwai mantepuꞌu miꞌi mauhu. Liu miꞌi hangatu lima puloꞌna alona, mauhu mani oaꞌ uwai i duniáꞌ.

⁴Mewaliꞌ i alo kahampuloꞌ hai pitu wulá kapitu, duanga iti tehumpádá miꞌi i wongko buluꞌ Araraꞌ.

⁵Uwai to molábóꞌ duniáꞌ kalao-lao miꞌi mauhu, hai i alo kaꞌisáꞌ wulá kahampuloꞌ, mantepuꞌu miꞌi raita tutuꞌ buluꞌ.

⁶Magáná miꞌi iba puloꞌna alona, Noho mobungkáhi miꞌi sungkekeꞌ duangana,

⁷haneꞌi napalóhóꞌ hambaꞌa tádáhi kaaꞌ. Tádáhi iti tiꞌara piꞌi mesuleꞌ i duanga to mahile, ngkálu soꞌu ngkálu mai membara-mbara duuꞌna uwai mauhu ntepuꞌu.

⁸Roo onoꞌ, Noho mopalóhóꞌ wopiꞌi tádáhi manggebodoꞌ bona naisá ntepuꞌu kamauhuna uwai,

⁹agáiáná tádáhi iti tiꞌara mani molámbiꞌ pesóndáꞌána, láwiꞌ tiꞌara mani mesupaꞌ lorena i humalele duniáꞌ. Onoꞌ miꞌi haneꞌi tádáhi iti mesuleꞌ lao i duanga to mahile. I pesuleꞌna, napopesuwuꞌ Noho taena mopakaꞌ tádáhi iti hai napasuaꞌ i lalu duanga.

¹⁰Napegiá mani Noho pitu alona haneꞌi napalóhóꞌ wopiꞌi tádáhi manggebodoꞌ iti.

¹¹Kalumbaꞌ miꞌi, tádáhi iti mesuleꞌ lao i Noho. Naposamaꞌ hampepaꞌ lolo taweꞌ saitu to hangko napiuki. Hangko ionoꞌ, naisá miꞌi Noho kamauhuna miꞌi uwai.

¹²Napegiá wopiꞌi pitu alona haneꞌi napalóhóꞌ huleꞌ tádáhi manggebodoꞌ iti, agáiáná tádáhi iti tiꞌara piꞌi mesuleꞌ.

¹³Magáná miꞌi tinuwuꞌna Noho ini átuna hai hampare, i alo kaꞌisáꞌ wulá kaꞌisáꞌ, uwai mauhu ntepuꞌu miꞌi. Mewaliꞌ nabungkáhi miꞌi Noho atuꞌna duanga to mahile iti, haneꞌi napeita mantoleli. Naita tampoꞌ mantepuꞌu miꞌi bangi.

¹⁴I alo karompuloꞌ hai pitu wulá kaduá, upu-upu tampoꞌ bangi ntepuꞌu miꞌi.

¹⁵Molaluita wopiꞌi Pueꞌ Ala i Noho, Nauliꞌ,

¹⁶“Mesuwuꞌmokoꞌ hangko i duanga iti hingkakani hai toinámu, ánáꞌmuheꞌ hai toináraꞌ.

¹⁷Nupasuwuꞌmoheꞌ woꞌo upu-upu tádáhi hai binataꞌ, maroꞌa to manondoꞌ, ba to maila, ba to mendólóꞌ, bona memuleꞌheꞌ i humalele duniáꞌ.”

¹⁸Mewaliꞌ, mesuwuꞌ mpuꞌu miꞌi Noho hangko i duanga iti hingkakani hai toinána, hai ánáꞌnaheꞌ hai toináraꞌ.

¹⁹Mesuwuꞌheꞌ woꞌo upu-upu tádáhi hai binataꞌ mouláꞌ pákáꞌ-pákáꞌna hangko i duanga to mahile.

²⁰Karooraꞌ mesuwuꞌ hangko i duanga to mahile, Noho mampopombeusu-usu watu moaró hambuaꞌ paintuá popenómbá i PUEꞌ. Hangko ionoꞌ, naꞌala bahangapa binataꞌ hai tádáhi to hintotoꞌ rapopenómbá. Binataꞌ hai tádáhi iti naintu napopenómbá i PUEꞌ i wongko paintuá popenómbá to nabábehi iti.

²¹PUEꞌ mampokagóeꞌ popenómbána to mawongi iti, onoꞌ miꞌi haneꞌi Nauliꞌ i laluNa: “Tiꞌara piꞌi ina Kuhuku duniáꞌ deꞌe moháwángi bábehiána tauna. Kehapiꞌ kadake laluraꞌ tauna hangko i kaꞌánángkóiꞌáraꞌ, tiꞌara piꞌi ina Kupamaropuꞌ upu-upu to tueꞌ i duniáꞌ nodo to Kubábehi deꞌe.

²²I tempóna mani duniáꞌ deꞌe ara, hangaa-ngaa ara oaꞌ: tempó mantudaꞌ hai tempó mepare, tempó lengiꞌ hai tempó maꞌámuꞌ, tempó alo hai tempó keudá, hai hangaa-ngaa ara woꞌo mabaa hai káindi.”