Read Besoa Pewaliꞌána 9 Bible Online

Pewaliꞌána 9 - Besoa bible

Pewaliꞌána 9

¹Roo onoꞌ, Pueꞌ Ala mowátiꞌ Noho hai ánáꞌnaheꞌ, Nauliꞌ, “Memuleꞌ-muleꞌmokou duuꞌna handaꞌ pemuleꞌámi mokatoroꞌi humalele duniáꞌ.

²Upu-upu binataꞌ, tádáhi, hai bouꞌ ina malááꞌheꞌ i kómu. Upu-upuna Kuweꞌikou bona nikuasaꞌiheꞌ.

³Hangkoia Kuweꞌikou hinángkáꞌ tudaꞌ-tudaꞌ mewaliꞌ pandeꞌmi. Deꞌe-deꞌe Kuweꞌikou woꞌo upu-upu to tueꞌ i duniáꞌ mewaliꞌ pandeꞌmi.

⁴Hampákáꞌ peá to tiꞌara mpuꞌu peisá niandeꞌ, ia miꞌi óntóꞌ bauꞌ to ara mani waheꞌna, láwiꞌ katueꞌ ara i lalu waheꞌna.[25]

⁵Ane hadua tauna mopapate hangka taunána, ia hangaa-ngaa rahuku mate. Noꞌonoꞌ woꞌo ane hambaꞌa binataꞌ mopapate tauna, ia hangaa-ngaa rapapate.

⁶Láwiꞌ Kubábehi tauna mouláꞌ pambiáráNgkuꞌ haduduáNgkuꞌ, onoꞌ miꞌi haneꞌi heáná peá to mopapate tauna ntániꞌna, ia woꞌo hangaa-ngaa rapapate.

⁷Hai kómu, memuleꞌmokou duuꞌmi handaꞌ hai nikatoroꞌi humalele duniáꞌ deꞌe.”

⁸Napaliliu miꞌi Pueꞌ Ala laluitaNa i Noho hai i ánáꞌnaheꞌ, Nauliꞌ,

⁹“Deꞌe-deꞌe Kupaꞌara pototowi i kómu hai i upu-upu pemuleꞌámi,

¹⁰hai i upu-upu tádáhi hai binataꞌ, maroꞌa to manondoꞌ ba to maila, to mesuwuꞌ hingkakani hai kómu hangko i duanga to mahile.

¹¹Deꞌe miꞌi pototowiNgkuꞌ i kómu: tiꞌara piꞌi ina Kulábóꞌá duniáꞌ deꞌe hai uwai, hai tiꞌara piꞌi ina Kupakeꞌ uwai mopatuna upu-upu to tueꞌ i duniáꞌ.[26]

¹²Deꞌe-deꞌe ina Kuweꞌikou tandaꞌ to mopakaróhó pototowiNgkuꞌ i kómu hai upu-upu pemuleꞌámi hai upu-upu to tueꞌ i duniáꞌ.

¹³Ina Kupaꞌara mpárágiá i gawu. Iti to ina mewaliꞌ tandaꞌ pototowiNgkuꞌ i upu-upu to tueꞌ i duniáꞌ.

¹⁴Ane Kupaꞌara gawu i wongko duniáꞌ hai mesupaꞌ mpárágiá,

¹⁵ina Kuita haneꞌi Kubuhinao pototowiNgkuꞌ to tiꞌara mokahópóꞌá i kómu hai i upu-upu to tueꞌ i duniáꞌ. Tiꞌara piꞌi ina Kulábóꞌá duniáꞌ deꞌe hai uwai bona mopatuna upu-upu to tueꞌ.

¹⁷Iti miꞌi tandaꞌna pototowiNgkuꞌ to Kupaꞌara i hinángkáꞌ to tueꞌ i wongko duniáꞌ.”

¹⁸Ánáꞌna Noho to mesuwuꞌheꞌ hangko i duanga to mahile iti iamoheꞌ Semuꞌ, Hama hai Apeꞌ. Hama ia miꞌi umána Kánáꞌá to mewaliꞌ toioruraꞌ toKánáꞌá.

¹⁹Ánáꞌna Noho to tálu iti, mewaliꞌheꞌ toioruraꞌ upu-upu tauna i humalele duniáꞌ.

²⁰Bágóꞌna Noho, topohinoe. Ia miꞌi to rungu-runguna mobábehi hinoe anggoroꞌ.

²¹Hangkani tempó, Noho mainu anggoroꞌ duuꞌna malangu. Ia maturu i lalu bambaruꞌna hai menggelá.

²²Kanaitána Hama umána tiꞌara mewaruꞌ, kásáliu ia mesuwuꞌ lao i rawa hai mopahaweꞌ i wutuꞌnaheꞌ apa to naita.

²³Hangko ionoꞌ, Semuꞌ hai Apeꞌ laomoheꞌ moánti kómóꞌ rahámpá. Molumao ntaleuꞌheꞌ mesuaꞌ i bambaruꞌna, rakómókiá umáraꞌ to tangaꞌna mani letaꞌ. Mehaileꞌ ntudáheꞌ bona tiꞌara raita katiꞌárána mewaruꞌ umáraꞌ iti.

²⁴Pempaa miꞌi Noho hangko i kamalanguna, naisá miꞌi apa to nabábehi Hama ánáꞌngkaupuá.

²⁵Onoꞌ miꞌi haneꞌi nauliꞌ: “Kánáꞌá hangaa-ngaa tehuku ánti bábehiána umána, ia miꞌi Hama! Ia hangaa-ngaa mewaliꞌ hawiꞌraꞌ wutuꞌna, hawiꞌ to tepaiwóiꞌá ntepuꞌu.”

²⁶Nauliꞌ wopiꞌi Noho: “Kutóiá PUEꞌ Ala to napenómbái Semuꞌ. Kánáꞌá hangaa-ngaa mewaliꞌ hawiꞌna.

²⁷Kupembiáꞌ i Pueꞌ Ala bona katoroꞌána Apeꞌ[27] rapamaeláꞌ, hai pemuleꞌána toroꞌheꞌ hingkakani hai pemuleꞌána Semuꞌ, agáiáná Kánáꞌá hangaa-ngaa mewaliꞌ hawiꞌraꞌ.”

²⁸Karoona duniáꞌ nalábóꞌ uwai, Noho tueꞌ mani tálu átuna lima puloꞌna parena.

²⁹Mewaliꞌ tinuwuꞌna Noho, hahioꞌ átuna lima puloꞌna parena, hangko mate riꞌi.