Read Besoa Eteꞌ 1 Bible Online

Eteꞌ 1 - Besoa bible

Eteꞌ 1

¹Tempóna Ahasiwero mewaliꞌ datu i Peresia, kadatuána tegáláꞌ mewaliꞌ hangatu rompuloꞌ hai pitu poropensi, mantepuꞌu hangko i India haweꞌ i Etiopia.

²Pehodaꞌá popárentáꞌána i lalu bente Susana.

³I katáluna miꞌi parena Ahasiwero mewaliꞌ datu, ia mamposusaiheꞌ upu-upu tauna to mapángkáꞌ lántiꞌraꞌ hai to mampopolumao bágóꞌraꞌ i kadatuána, upu-upu tadulako surudadoꞌ to hangko i Peresia hai Media, hai upu-upu tuꞌáná hangko i humalele poropensi i kadatuána.

⁴Mosusaheꞌ ini wulána kamaruena. Tangaꞌna susa iti molumao, Datu Ahasiwero mampetudeꞌá woꞌo upu-upu kapebukuna hai kapeawaꞌna kadatuána.

⁵Hópóꞌ miꞌi posusa to ini wulána iti, datu mopaꞌara wopiꞌi susa to pitu alona kamaruena, hai upu-upu to nakióꞌ iamoheꞌ tauna to mapángkáꞌ lántiꞌraꞌ hai upu-upu tauna to ara i lalu bente Susana iti, maroꞌa topebuku, maroꞌa topeahiahiꞌ.

⁶Tangabaana támbi kadatuá iti rabungaꞌ-bungaꞌi hai báná to bulá to meálu ntepuꞌu hai báná to makámumu. Báná iti rapoanaꞌi kálá-kálá to rabábehi hangko i peráꞌ, ratakaꞌ hai bárárá to makámumu to meálu ntepuꞌu, haneꞌi ratóe i áriꞌi to rabábehi hangko i watu to bulá. Ionoꞌ ara woꞌo pehodaꞌá to rabábehi hangko i buláwá hai peráꞌ, haneꞌi raꞌatoroꞌ i daula to rabábehi hangko i watu to bulá, watu akeꞌ, sisiꞌ mutiara to mengkilaꞌ, hai watu to ntániꞌna to masuliꞌ hólóna.

⁷Handaꞌ ntepuꞌu anggoroꞌ to napatimama miꞌi datu, hai painuáraꞌ iti i mangku to rabábehi hangko i buláwá to mampopengaa lenggeꞌna.

⁸Torare iti peisáheꞌ mainu mouláꞌ peundeꞌáraꞌ hadua-hadua, láwiꞌ onoꞌ miꞌi párentána datu i upu-upu toperórá.

⁹Tempó iti woꞌo, toinána datu to rahangaꞌ Wasti mopaꞌara posusa. To nakióꞌ mouláꞌ posusa iti iamoheꞌ upu-upu towawine to ara i lalu támbi kadatuána Ahasiwero.

¹⁰I alo kapitu posusáraꞌ iti, góeꞌ ntepuꞌu Datu Ahasiwero láwiꞌ handaꞌ miꞌi painuna anggoroꞌ. Onoꞌ miꞌi haneꞌi nakióꞌmoheꞌ pitu topobágóꞌna to napoinálái ntepuꞌu, iamoheꞌ Mehuma, Bista, Habona, Bitaꞌ, Abata, Seta hai Karaka,

¹¹bona laoheꞌ moala Wasti toinána, hai rapopopakeꞌ tatali kadatuá haneꞌi raꞌánti lao i datu bona napopaita kamalásáꞌna i upu-upu torare, maroꞌa to mapángkáꞌ lántiꞌraꞌ, maroꞌa tauna biásá, láwiꞌ Wasti iti malásáꞌ ntepuꞌu.

¹²Agáiáná tempóna rapahaweꞌ topobágóꞌ hawaꞌna datu i Wasti datu towawine, ia tiꞌara mau mampeuláꞌi hawaꞌna, onoꞌ miꞌi haneꞌi napoláláꞌ ntepuꞌu Datu Ahasiwero hai rumihi kamabukoꞌna.

¹³Nodo biásána, ane arai to pewaliꞌ i kadatuá, datu mokióꞌheꞌ tauna to bukeꞌ timbá to moisá ntepuꞌu áturá-áturá kadatuá, bona napampekuneꞌi apa to hangaa-ngaa nabábehi.

¹⁴Taunaheꞌ iti iamoheꞌ Karasena, Seta, Adamata, Tarisi, Merese, Marasena hai Memuka, hai to pituheꞌ iti mapángkáꞌ lántiꞌraꞌ i kadatuá Peresia hai Media. Onoꞌ miꞌi haneꞌi peisáheꞌ mampombelindoꞌá datu.

¹⁵Napekuneꞌ datu i hira, nauliꞌ, “Mouláꞌ áturá to tepakanótó miꞌi, apa miꞌi to hangaa-ngaa rabábehi i toinángkuꞌ Wasti datu towawine, láwiꞌ tempóngkuꞌ mohuoꞌ taunángkuꞌ lao mokióꞌ, ia tiꞌara mau mampeuláꞌi hawaꞌkuꞌ.”

¹⁶Molaluita miꞌi Memuka i datu, rasabiki upu-upu tauna to mapángkáꞌ lántiꞌraꞌ, nauliꞌ, “Bábehiána Wasti datu towawine iti tiꞌara peá mopakóiꞌ laluna datu, agáiáná mopakóiꞌ woꞌo upu-upu to mapángkáꞌ lántiꞌraꞌ, hai upu-upu to ara i humalele kadatuá,

¹⁷láwiꞌ i karahádina bámbári datu towawine iti tiꞌara mampeuláꞌi pekióꞌna datu, bábehiána iti ina rapeuláꞌi upu-upu towawine, álána tiꞌaraheꞌ woꞌo ina mobiláꞌ toámáraꞌ.

¹⁸Mewaliꞌ, ane rahádiꞌi to pewaliꞌ iti, upu-upu toináraꞌ tauna to mapángkáꞌ lántiꞌraꞌ i Peresia hai i Media, bateꞌna ina mampeuláꞌiheꞌ woꞌo bábehiána datu towawine iti, tiꞌaraheꞌ ina mobiláꞌ toámáraꞌ hai ina mosisalaꞌ peheꞌ oaꞌ.

¹⁹Onoꞌ miꞌi haneꞌi, ane nupokana datu, kipembiáꞌ bona datu mopaꞌara hambuaꞌ párentá to hangaa-ngaa teukiꞌ i lalu sura poukiꞌá áturá bona tiꞌara piꞌi peisá radiiꞌ huleꞌ, maroꞌa i Peresia maroꞌa i Media. I lalu sura áturá iti, hangaa-ngaa raukiꞌ, Wasti tiꞌara piꞌi peisá lao mampombelindoꞌá datu, hai hangaa-ngaa rapeliꞌ towawine to ntániꞌna to ina mopaháwángi Wasti, to maroꞌa mani pambiárána hangko i Wasti.

²⁰Ane pobutusina datu iti rahádi upu-upu tauna i humalele kadatuá, upu-upu towawine ina mobiláꞌheꞌ toámáraꞌ, maroꞌa to mapángkáꞌ lántiꞌraꞌ, haweꞌ-haweꞌ i tauna biásá.”

²¹Polámbiꞌna Memuka iti napokana ntepuꞌu datu hai upu-upu tauna to mapángkáꞌ lántiꞌraꞌ. Mewaliꞌ datu mopaꞌara mpuꞌu miꞌi hambuaꞌ áturá mouláꞌ polámbiꞌna Memuka.

²²Onoꞌ miꞌi haneꞌi rapakatu mpuꞌu miꞌi sura iti moliu hangaꞌna datu i upu-upu poropensi, mouláꞌ poukiꞌraꞌ hai básáraꞌ haduduáraꞌ. Óntóꞌna sura iti manguliꞌ node: “Upu-upu tobaleilo hangaa-ngaa mewaliꞌ topeatoroꞌ i lalu támbi, hai hangaa-ngaa mopakeꞌheꞌ básáraꞌ haduduáraꞌ i támbiraꞌ.”