Read Besoa Eteꞌ 2 Bible Online

Eteꞌ 2 - Besoa bible

Eteꞌ 2

¹Bahangapa parena hangko ionoꞌ,[1] Datu Ahasiwero tiꞌara piꞌi mabukoꞌ, agáiáná mampekiri mani oaꞌ kana i apa to nabábehi Wasti hai párentá to napopewaliꞌ.

²Onoꞌ miꞌi haneꞌi upu-upu topobágóꞌna datu to napoinálái ntepuꞌu, molaluitaheꞌ i hia, rauliꞌ, “Maroꞌa ntepuꞌu ane nuhuoꞌheꞌ bahangapa topobágóꞌ i kadatuá deꞌe, bona laoheꞌ mampeliꞌ ánáꞌntawine to malásáꞌ.

³Nupileꞌimoheꞌ bahangapa topobágóꞌ i hambuaꞌ-hambuaꞌ poropensi i kadatuá deꞌe, bona morámpuheꞌ upu-upu ánáꞌntawine to malásáꞌ haneꞌi raꞌánti lao i támbi kadatuá to rakatoroꞌi towawinena datu i bente Susana. Hai ina nakámpáiheꞌ Hegai, topobágóꞌna datu to motadulakoi to mourusi towawinena datu hai to hangaa-ngaa mowongi-wongiꞌiheꞌ.

⁴Roo onoꞌ, datu peisá mopileꞌi ánáꞌntawine to malásáꞌ ntepuꞌu, to ina mewaliꞌ toinána datu mopaháwángi Wasti.” Upu-upu laluita iti napokana ntepuꞌu datu, mewaliꞌ napeuláꞌi mpuꞌu miꞌi.

⁵I bente Susana, ara hadua toIahudiꞌ to rahangaꞌ Modekai ánáꞌna Iair. Ia muleꞌna Simei ánáꞌna Kisi hangko i pemuleꞌána Benami.

⁶Modekai iti hampohalaluá ratawani tempóna Ierusale napombealaꞌá Nebukanesa datu i Bábeli.[2] Ia raꞌánti lao i Bábeli hingkakani hai Ioiaki daturaꞌ toIudá, hai handaꞌ mani tauna ntániꞌna.

⁷Modekai iti ara halaluna to rahangaꞌ Eteꞌ.[3] I lalu básá Iberani rauliꞌ Hadasa. Tosaena Eteꞌ matemoheꞌ, mewaliꞌ naꞌángkáꞌ Modekai mewaliꞌ ánáꞌna haduduána. Ánáꞌntawine iti malásáꞌ ntepuꞌu hai mababe powátána.

⁸Karoona párentána datu rapahaweꞌ i humalele kadatuána, handaꞌ ntepuꞌu towawine to raꞌánti lao i bente Susana, hai Eteꞌ woꞌo raꞌánti lao ionoꞌ. Rapatoroꞌheꞌ i támbi kadatuá, nakámpáiheꞌ Hegai, topokádipurána towawinenaheꞌ datu.

⁹Hegai iti mampokagóeꞌ ntepuꞌu Eteꞌ, onoꞌ miꞌi haneꞌi Eteꞌ iti poloꞌ nakádipurá mpakaroꞌa bona rawongi-wongiꞌi. Noꞌonoꞌ woꞌo pandeꞌna. Ánti karapomahilena, Eteꞌ ralimbá i katoroꞌá to maroꞌa ntepuꞌu i lalu támbi kadatuá, hai pituheꞌ ánáꞌntawine to mokádipurá Eteꞌ.

¹⁰Ánti kanapaturoꞌna miꞌi ami Modekai, onoꞌ miꞌi haneꞌi tiꞌara nauliꞌ-uliꞌ Eteꞌ katoIahudiꞌna.

¹¹Alo-alona Modekai lao molulumao hungkuꞌ i tangabaa támbi kadatuá to rakatoroꞌiheꞌ towawinena datu, bona naisá apa to mewaliꞌ i Eteꞌ.

¹²Upu-upu towawine iti, rakádipuráheꞌ hampuloꞌ hai rombulá mouláꞌ áturá. Tempó iti, mampopengaa to rapakeꞌ bona malásáꞌheꞌ. Ini wulána kamaruena mopakeꞌheꞌ wongi-wongi to rabábehi hangko i mire, hai ini woꞌo wulána mopakeꞌ wopaheꞌ wongi-wongi to ntániꞌna hai rampaꞌ-rampaꞌ bona malásáꞌ ntepuꞌuheꞌ. Roo onoꞌ, hadua-hadua molámbiꞌ tempó ina mampombelámbiꞌá Datu Ahasiwero.

¹³I tempóraꞌ ina lao mampombelámbiꞌá datu, hira peisáheꞌ membiáꞌ apa peá hangko i katoroꞌáraꞌ towawine,[4] bona raꞌánti lao mampombelámbiꞌá datu i lalu támbi kadatuána.

¹⁴Kalumbaꞌ hangko raꞌánti riꞌi lao mampombelámbiꞌá datu, hai mepulo ia mesuleꞌ wopiꞌi, agáiáná towawine iti rapatoroꞌ wopiꞌi i támbi kadatuá katoroꞌáraꞌ towawinena datu to karombuaꞌna. Támbi kadatuá iti nakámpái Saga topobágóꞌna datu to mokámpái towawine to napiaraꞌheꞌ datu. Hira iti tiꞌarapoheꞌ rapaliu mampombelámbiꞌá datu, ngkáliꞌna riꞌi ane datu mampokagóeꞌ towawine iti hai mokábelái hangaꞌna.

¹⁵Haweꞌ miꞌi tempóna Eteꞌ ánáꞌna Abihai ina raꞌánti lao i datu. Abihai iti halaluna umána Modekai, hai Modekai moángkáꞌ Eteꞌ mewaliꞌ ánáꞌna. Eteꞌ tiꞌara membiáꞌ ba apa-apa, ngkáliꞌna apa to nahángáꞌá Hegai topokámpái towawine, iti peá to napakeꞌ. Hai Eteꞌ rapokaꞌahiꞌ upu-upu tauna to moita.

¹⁶Noꞌonoꞌ miꞌi karaꞌántina Eteꞌ mampombelámbiꞌá Datu Ahasiwero i lalu támbi kadatuána i wulá kahampuloꞌ to rauliꞌ wulá Tebeꞌ, i pare kapitu popárentána Ahasiwero.[5]

¹⁷Datu iti mampomahile ntepuꞌu Eteꞌ melumbuꞌ hangko i ánáꞌntawine to ntániꞌna, onoꞌ miꞌi haneꞌi natataliꞌi miꞌi hai tatali kadatuá, tandaꞌna ia miꞌi toinána to mopaháwángi Wasti.

¹⁸Hangko ionoꞌ, datu Ahasiwero mopaꞌara miꞌi posusa. Ia mokióꞌ upu-upu tauna to mapángkáꞌ lántiꞌraꞌ hai upu-upu topobágóꞌna. Posusa iti nabábehi tandaꞌ kamampomahilena Eteꞌ hai napahaweꞌ woꞌo i upu-upu poropensi bona mengkarooheꞌ mobágóꞌ i kadatuá, hai naweꞌiheꞌ woꞌo handaꞌ parasee.

¹⁹I kararámpuraꞌ ánáꞌntawine i karongkánina, Modekai mehoda i babaꞌá támbi kadatuá, láwiꞌ i tempó iti ia mewaliꞌ miꞌi topobágóꞌ i kadatuá.

²⁰Hangko tiꞌara mani mewaliꞌ toinána datu, Eteꞌ nakóntó Modekai bona ineeꞌ nauliꞌ katoIahudiꞌna. Onoꞌ miꞌi haneꞌi nawuniángi oaꞌ. Napeuláꞌi ntepuꞌu Eteꞌ hawaꞌna iti, nodo biásána i tempóna kókóiꞌ mani.

²¹Hangkani tempó, tangaꞌna Modekai mehoda i babaꞌá támbi kadatuá, rodua topobágóꞌna datu to mokámpái lintuꞌna datu, iamoheꞌ Bita hai Teresi, mangkaliwoheꞌ ina mopapate datu láwiꞌ kóiꞌ inaoraꞌ.

²²Agáiáná liworaꞌ iti nahádi Modekai, mewaliꞌ hawiáꞌ lao napehángáꞌá i Eteꞌ, haneꞌi Eteꞌ lao i datu mopahaweꞌ laluitana Modekai.

²³Mewaliꞌ kara-kara iti rawungkeꞌ miꞌi, hai tongawaꞌ katoꞌuna. Hangko ionoꞌ, tauna to rodua iti rahukuheꞌ mate, ratóe i kau duuꞌraꞌ mate. Upu-upu to mewaliꞌ iti raukiꞌ i lindoꞌna datu i lalu sura poukiꞌá daritakáná kadatuá.