Read Besoa Eteꞌ 3 Bible Online

Eteꞌ 3 - Besoa bible

Eteꞌ 3

¹Bahangapa miꞌi kamaruena Eteꞌ mewaliꞌ datu towawine, Datu Ahasiwero mampopengkaheꞌ lántiꞌna Haman ánáꞌna Hamedata muleꞌna Agaꞌ, hai napakanótó datu bona Haman mewaliꞌ to i reáraꞌ upu-upu to mapángkáꞌ lántiꞌraꞌ i lalu kadatuá iti.

²Datu Ahasiwero mampehawaꞌiá woꞌo bona upu-upu topobágóꞌna hangaa-ngaa molingkuduheꞌ i lindoꞌna Haman, motóngkóꞌ haweꞌ i tampoꞌ, tandaꞌ pebiláꞌraꞌ. Upu-upuheꞌ to ara i babaꞌá támbi kadatuá mampeuláꞌi hawaꞌna iti, ngkáliꞌna riꞌi Modekai tiꞌara mau.

³I tempóna topobágóꞌna datu to i babaꞌá támbi kadatuá moita bábehiána Modekai iti, rakuneꞌ miꞌi iti Modekai, rauliꞌ, “Moapa riꞌi haneꞌi tiꞌarakoꞌ mampeuláꞌi hawaꞌna datu?”

⁴Alo-alona Modekai iti rakámbáróá topobágóꞌ to ara i babaꞌá támbi kadatuá, bona ia mampeuláꞌi hawaꞌna datu, agáiáná tiꞌaranto napehádingi pekámbáróáraꞌ iti, nauliꞌ riꞌi node: “Kódóꞌ toIahudiꞌaꞌ. Tiꞌaraꞌaꞌ peisá molingkudu i lindoꞌraꞌ tauna.” Mewaliꞌ bábehiána Modekai iti lao rapehángáꞌá i Haman, láwiꞌ raundeꞌ mampeita apa to ina nabábehi Haman i Modekai.

⁵Kanaitána Haman katiꞌárána mpuꞌu mau Modekai molingkudu i lindoꞌna, mewaliꞌ mabukoꞌ ntepuꞌu.

⁶Kanaisána Haman katoIahudiꞌna iti Modekai, nauliꞌ i laluna, “Salaꞌ-salaꞌ ane Modekai peá kupapate.” Mewaliꞌ napakanótó miꞌi ina mopapateheꞌ upu-upu toIahudiꞌ to ara i humalele kadatuána Ahasiwero.

⁷I wulá kaꞌisáꞌ to rauliꞌ wulá Nisa, i kahampuloꞌna hai rompare datu Ahasiwero mepárentá,[6] Haman mohuoꞌ tauna bona motende pur i lindoꞌna, lempóna rabolobiaꞌ. Tunggáiána bona mampeliꞌ tempó to maroꞌa ina mampopolumao tunggáiána, ia miꞌi ina mopapate upu-upu toIahudiꞌ. Mewaliꞌ tempó to tepakanótó iti kana imbaꞌna hampuloꞌ hai tálu wulá kahampuloꞌ hai duá i wulá to rauliꞌ wulá Adara,[7] ia miꞌi hungkuꞌ hampare hangko i karabolobiaꞌna.

⁸Hangko ionoꞌ, lao mpuꞌu miꞌi Haman mampombelámbiꞌá datu haneꞌi molaluita, nauliꞌ, “Ee, pueꞌkuꞌ datu! Mahile mpuꞌu tueꞌmu! Araheꞌ hantina tauna[8] to mahawuꞌ i humalele kadatuána datu. Taunaheꞌ iti montaniꞌ ntepuꞌu ádáraꞌ, pelumbuꞌna miꞌi tiꞌaraheꞌ mau mampeuláꞌi áturána datu. Mewaliꞌ maroꞌa mani ane tiꞌarapoheꞌ nupatodáhi toroꞌ i kadatuámu.

⁹Ane nupokana datu, maroꞌa ntepuꞌu ane nubábehi sura párentá bona hira ina rapatunaheꞌ. Mewaliꞌ ane nupokana pembiáꞌkuꞌ deꞌe, kudándi ina kuhuhuꞌ dóiꞌ peráꞌ i topokádipurá dóiꞌ kadatuá, kamatimina peráꞌ iti tálu átuna iba puloꞌna sábuna kiló.”

¹⁰Kanahádina peá datu upu-upu laluitana Haman iti, ia kásáliu moposu hingkoliꞌna to paka napakeꞌ motandaꞌi sura-sura párentá, haneꞌi napeweꞌi i Haman ánáꞌna Hamedata muleꞌna Agaꞌ, ewáliraꞌ toIahudiꞌ iti.

¹¹Upu onoꞌ, molaluita miꞌi datu i Haman, nahángáꞌá node: “Ba nupanoumbámoheꞌ tauna iti, hai dóiꞌ iti woꞌo ba nupaiapa miꞌi nuwoli, io perái to mourusi.”

¹²Mewaliꞌ Haman mampopealamoheꞌ upu-upu guruntulisiꞌ to mobágóꞌ i hambuaꞌ-hambuaꞌ poropensi i humalele kadatuá, haneꞌi nahuoꞌheꞌ moukiꞌ sura haweꞌ i upu-upu biti mágáuꞌ hai tauna to mapángkáꞌ lántiꞌraꞌ i lalu kadatuá, haweꞌ-haweꞌ i tadulako-tadulako i hambuaꞌ-hambuaꞌ roboꞌ. Hai sura iti raukiꞌ mouláꞌ básá hai poukiꞌraꞌ i hambuaꞌ-hambuaꞌ poropensi hai moliu hangaꞌna Datu Ahasiwero. Sura iti rapetándái hai hingkoliꞌ datu.

¹³Sura-sura iti hawiáꞌ raꞌánti tauna to tepakanótó miꞌi bágóꞌraꞌ moánti-ánti sura i humalele kadatuá. Óntóꞌna sura iti ia miꞌi párentá bona mopatunaheꞌ toIahudiꞌ, mewaliꞌ hangaa-ngaa rapapateheꞌ upu-upu, maroꞌa tosae, maroꞌa to maleheꞌ mani, haweꞌ-haweꞌ i towawine hai ánángkóiꞌ. Tiꞌara ara to raliu bona tunaheꞌ upu-upu toIahudiꞌ iti, hai párewáraꞌ peisá raꞌala. Kaꞌina rapapateraꞌ toIahudiꞌ iti ina mewaliꞌ i lalu hangaloá peá, ia miꞌi i imbaꞌna hampuloꞌ hai tálu, wulá kahampuloꞌ hai duá to rauliꞌ wulá Adara.

¹⁴Sura párentá iti hangaa-ngaa mewaliꞌ hambuaꞌ áturá i upu-upu roboꞌ, hai hangaa-ngaa hawiáꞌ rapahaweꞌ bona poloꞌheꞌ mampatimama ina mopapateheꞌ toIahudiꞌ i alo to tepakanótó miꞌi.

¹⁵Ánti kanapárentána datu, onoꞌ miꞌi haneꞌi ragagu lao moánti sura iti. Hai áturá iti rapahaweꞌ woꞌo i bente Susana. Wuli ntepuꞌuheꞌ to toroꞌ i kótá Susana iti, agáiáná Datu Ahasiwero hai Haman lebaꞌ-lebaꞌntoheꞌ mainu.