Read Besoa Eteꞌ 4 Bible Online

Eteꞌ 4 - Besoa bible

Eteꞌ 4

¹Kanaisána Modekai poliwona Haman kaꞌina mopatunana upu-upu toIahudiꞌ, hai upu-upu párewáraꞌ ina raꞌala, ia mohepaꞌ-hepaꞌ miꞌi waruꞌna haneꞌi mopakeꞌ waruꞌ karuꞌ, hai moawui wuáꞌna tandaꞌ kamasusana laluna. Roo onoꞌ, ia molulumao i tangaꞌ kótá hai teriaꞌ ngkalao napasimbuku ánti kawiorana.

²I babaꞌá támbi kadatuá ia mengkaroo, láwiꞌ tauna to mopakeꞌ waruꞌ karuꞌ tiꞌara peisá mesuaꞌ.

³Noꞌonoꞌ woꞌo i upu-upu poropensi, upu-upu toIahudiꞌ mowáláheꞌ karuꞌ hai raꞌawui haneꞌi rapaturui tandaꞌ kamasusana laluraꞌ, hai mopuasaꞌheꞌ woꞌo ánti kamohádiraꞌ miꞌi hawaꞌna datu.

⁴I tempóraꞌ ánáꞌntawine to mamporángá datu Eteꞌ hai upu-upu topekádipurána mopahaweꞌ i Eteꞌ apa to nabábehi Modekai, masusa ntepuꞌu laluna. Mewaliꞌ Eteꞌ mopakatu waruꞌ i Modekai bona napopopaháwángi waruꞌ karuꞌ, agáiáná ia tiꞌara mau moala.

⁵Hangko ionoꞌ, Eteꞌ mokióꞌ miꞌi Hata, hadua tauna to napakanótó datu mewaliꞌ topobágóꞌna Eteꞌ, haneꞌi nahuoꞌ lao i Modekai bona mampekuneꞌ apa lempóna upu-upu to nabábehi iti, hai apa riꞌi ntóáꞌna.

⁶Pohuꞌ mpuꞌu miꞌi iti Hata lao mampombelámbiꞌá Modekai i tanalapa to i lindoꞌna babaꞌá támbi kadatuá.

⁷Mewaliꞌ napolaluita mpuꞌu miꞌi Modekai upu-upuna to pewaliꞌ iti. Hai napolaluita woꞌo mokana podándina Haman kaꞌina mobaiarina dóiꞌ peráꞌ i kadatuá ane roomoheꞌ upu-upu toIahudiꞌ rapatuna.

⁸Noꞌonoꞌ woꞌo hawaꞌna datu to teukiꞌ i sura to rapopesuwuꞌ hangko i kótá Susana bona ina mopatuna upu-upu toIahudiꞌ. Modekai mampeweꞌi sura iti i Hata bona napeweꞌi i Eteꞌ, hai napembiáꞌ woꞌo bona Eteꞌ lao mampombelámbiꞌá datu hai membiáꞌ bona datu mopatongawaꞌ kamaꞌahiꞌna i hangka toIahudiꞌna.

⁹Hangko ionoꞌ, mesuleꞌ miꞌi Hata lao mampombelámbiꞌá Eteꞌ hai ia mopahaweꞌ upu-upu laluitana Modekai.

¹⁰Kamohádina tewáina Modekai, Eteꞌ mohuoꞌ wopiꞌi huleꞌ Hata moánti tewáina bona napahaweꞌ i Modekai.

¹¹Tewái iti ia miꞌi: “Ara áturá to manguliꞌ, upu-upu tauna, maroꞌa tobaleilo, maroꞌa towawine, ane mesuaꞌi i lintuꞌ potarimaꞌána datu torare, agáiáná ane tiꞌarai nakióꞌ datu, hangaa-ngaa rahuku mate. Iti mewaliꞌ miꞌi hambuaꞌ hawaꞌ to tepakanótó. Mewaliꞌ upu-upu tauna, maroꞌa topobágóꞌ i kadatuá haweꞌ-haweꞌ i tauna to ara i upu-upu poropensi, moisámoheꞌ hawaꞌ iti. Hampákáꞌ peá rárá, bona tauna peisá mesuaꞌ i lintuꞌ potarimaꞌána datu torare: ane datu motudoꞌ tauna hai laiꞌ buláwána, lempóna tauna iti tiꞌara ina rapapate. Deꞌe-deꞌe hambulámoꞌ tiꞌaraꞌaꞌ nakióꞌ-kióꞌ datu.”

¹²Napahaweꞌ mpuꞌu miꞌi Hata tewáina Eteꞌ iti i Modekai.

¹³Kanahádina Modekai tewáina Eteꞌ, nabálási wopiꞌi iti laluitana Eteꞌ hai laluita pepaingáꞌi, nauliꞌ node: “Ineeꞌ nupekiri ánti kaꞌárámu i támbi kadatuá, io peá to ina tueꞌ hangko i upu-upu toIahudiꞌ!

¹⁴Láwiꞌ kehapiꞌ tiꞌara nutulungiheꞌ hangka toIahudiꞌmu tempó deꞌe, bateꞌna ara to ntániꞌna to ina motulungiheꞌ hangko i kaꞌina rapapateraꞌ iti. Agáiáná upu-upu tinámu hai io woꞌo haduduámu, bateꞌmi ina rapapate. Babilaꞌ ara tunggáiána haneꞌi io to tepileꞌi mewaliꞌ datu towawine i tempó deꞌe.”

¹⁵Mewaliꞌ Eteꞌ mohuoꞌ wopiꞌi Hata lao i Modekai mopahaweꞌ bálásina tewáina. Nauliꞌ Eteꞌ node:

¹⁶“Upu-upu toIahudiꞌ to ara i kótá Susana, nurámpuheꞌ bona rapekakaeáꞌaꞌ, hai hangaa-ngaa mopuasaꞌheꞌ tálu alona tálu wengina, ineeꞌheꞌ mandeꞌ hai mainu. Kódóꞌ woꞌo hai ánáꞌntawine to mamporángáꞌaꞌ oaꞌ, ina mopuasaꞌangkaiꞌ. Upu onoꞌ hangko laoraꞌaꞌ mampombelámbiꞌá datu, kehapiꞌ ina moliungimoꞌ hawaꞌ to tepakanótó miꞌi. Kehapiꞌ rapapatentoaꞌ, tiꞌaranto moapa.”

¹⁷Mewaliꞌ pohuꞌ miꞌi Modekai hangko ionoꞌ lao mpuꞌu miꞌi mampopolumao hawaꞌna Eteꞌ.