Read Besoa Eteꞌ 5 Bible Online

Eteꞌ 5 - Besoa bible

Eteꞌ 5

¹I katálu alona popuasaꞌraꞌ toIahudiꞌ, Eteꞌ mopakeꞌ miꞌi waruꞌ kadatuána, lao mesuaꞌ i lalu lintuꞌ potarimaꞌána datu torare, haneꞌi meángkáꞌ i lindoꞌna babaꞌ pogómbóá. I tempó iti, datu tangaꞌna mehoda i pehodaꞌá kadatuána to melindoꞌ i pogómbóá.

²Kanaitána datu, Eteꞌ meángkáꞌ i rawa, kásáliu naodo iti laiꞌ buláwá to i taena, ánti karumihina pepomahilena datu i Eteꞌ. Mewaliꞌ lao mpuꞌu miꞌi Eteꞌ mohungkuki datu iti, haneꞌi motóbóꞌ wuntu laiꞌ iti.

³Hangko ionoꞌ, mekuneꞌ miꞌi datu i Eteꞌ, nauliꞌ, “Apa riꞌi tunggáiámu Eteꞌ toinángkuꞌ? Apa to nupoinao? Nuꞌuliꞌ! Kehapiꞌ nupembiáꞌnto hanggáláꞌ hantangaꞌ kadatuángkuꞌ, bateꞌna ina kuweꞌikoꞌ.”

⁴Nahániki Eteꞌ, “Ane nupokana datu, kupembiáꞌ bona deiná datu hai Haman lao mandeꞌ i posusa to ina kupaꞌara i kaꞌaraꞌángkuꞌ.”

⁵Mewaliꞌ napehawaꞌiá miꞌi datu bona Haman hawiáꞌ haweꞌ, bona poloꞌheꞌ lao mobukeki pembiáꞌna Eteꞌ. Hangko ionoꞌ, lao mpuꞌumoheꞌ i posusa pandeꞌ to napaꞌara Eteꞌ.

⁶Tangaꞌna mainu anggoroꞌ, molaluita miꞌi datu i Eteꞌ, nauliꞌ, “Deꞌe-deꞌe, nuꞌuliꞌ miꞌi apa to nupoinao. Apa peá to nupembiáꞌ, kehapiꞌ riꞌi hanggáláꞌ hantangaꞌ kadatuángkuꞌ, bateꞌna ina kuweꞌikoꞌ.”

⁷Nahániki Eteꞌ, nauliꞌ, “Ane nupokana maniꞌi pembiáꞌkuꞌ, kahalo datu hai Haman mai manikeꞌ i posusa pandeꞌ to ina kupaꞌara mani. Ionoꞌ rái hangko kupahaweꞌ pembiáꞌkuꞌ i datu.”

⁹Pesuleꞌna Haman hangko i posusa pandeꞌ to napaꞌara Eteꞌ, ia góeꞌ ntepuꞌu. Agáiáná tempóna moliu i babaꞌá támbi kadatuá, ia moita Modekai tiꞌara mau meángkáꞌ tandaꞌ pebiláꞌna, mewaliꞌ mabukoꞌ iti Haman i Modekai.

¹⁰Agáiáná kamabukoꞌna iti nameeꞌ peá hai ia liliu lao i támbina. Kahaweꞌna i támbina ia mokióꞌ balenaheꞌ hai mokióꞌ woꞌo toinána to rahangaꞌ Seresi, bona mehoda-hodaheꞌ sangkani.

¹¹I kamehodaraꞌ peá, natepuꞌu miꞌi woꞌo Haman modarita mokana i kapebukuna, hai kahandaꞌna woꞌo ánáꞌna tobaleilo. Napolaluita woꞌo kamapángkáꞌna popárentána to napoináláiá datu, hai kamapángkáꞌna lántiꞌna hangko i upu-upu tauna to nalántiꞌ datu i kadatuá.

¹²Hai nauliꞌ, “Mogalo riꞌi Eteꞌ datu towawine iti, kódóꞌ peá hai datu to nakióꞌ lao mandeꞌ i posusa to napaꞌara i kaꞌaraꞌána, hai kahalona nakióꞌ wopangkaiꞌ lao mandeꞌ.

¹³Agáiáná upu-upuna iti tiꞌara ara bunduꞌna ane kuita maniꞌi Modekai toIahudiꞌ iti mehoda-hoda i babaꞌá támbi kadatuá.”

¹⁴Kamohádiraꞌ peá laluitana, Seresi toinána hai balenaheꞌ molaluitamoheꞌ i Haman, rauliꞌ node: “Nuhuoꞌ miꞌi tauna mobábehi kau potóeá tauna, hai kamapángkáꞌna rompuloꞌ hai romete. Kahalo mepulo-pulo, lao miꞌi nupesabiꞌ i datu bona Modekai iti ratóe. Mewaliꞌ ane nubábehiꞌi upu-upuna iti, hangko tinda riꞌi lalumu ane laokoꞌ hingkakani hai datu i posusa pandeꞌ to napaꞌara Eteꞌ.” Upu-upu laluitaraꞌ balenaheꞌ hai toinána napomaroꞌa Haman, onoꞌ miꞌi haneꞌi mohawaꞌ miꞌi bona mobábehiheꞌ kau petóeá.