Read Besoa Eteꞌ 6 Bible Online

Eteꞌ 6 - Besoa bible

Eteꞌ 6

¹Káindi iti, datu tiꞌara peisá letaꞌ, mewaliꞌ napehawaꞌá bona raꞌalaꞌá sura poukiꞌá daritakáná kadatuána, hai napembiáꞌ bona rabásáꞌá.

²I lalu sura iti telámbiꞌ mokana daritakáná Bita hai Teresi. Tauna to rodua iti to napoinaláiheꞌ datu mokámpái lintuꞌ paturuána. Agáiáná Modekai mampehángáꞌá i datu poliworaꞌ kaꞌina mopapateraꞌ datu.

³Napekuneꞌ datu, “Apa háwángina to raweꞌi miꞌi Modekai tandaꞌ karabiláꞌna?” Mehániꞌheꞌ topobágóꞌna iti, rauliꞌ, “Tiꞌara mani ara apa-apa to raweꞌi Modekai.”

⁴Mewaliꞌ mekuneꞌ wopiꞌi datu, nauliꞌ, “Heáná topohawaꞌ to ara i lintuꞌ potarimaꞌá torare deꞌe-deꞌe?” Tempó iti woꞌo Haman hangko kapesuaꞌna i tangabaa támbi kadatuá. Tunggáiána ina lao i datu membiáꞌ bona Modekai ina ratóe i petóeá to nabábehi miꞌi.

⁵Mehániꞌheꞌ topobágóꞌ iti, “Deꞌe-deꞌe ara Haman i támbi kadatuá ina mampombelámbiꞌá datu.” Nauliꞌ datu, “Nihuoꞌ mai mesuaꞌ!”

⁶Kapesuaꞌna Haman, molaluita miꞌi datu, nauliꞌ, “Ara hadua tauna to ina kupoweꞌi pebiláꞌ to mahile. Mewaliꞌ apa to maroꞌa to hangaa-ngaa kubábehi i hia?” Nauliꞌ Haman i laluna, “Heáná mani paꞌi ntaniꞌ to ina napoweꞌi datu pebiláꞌ to mahile ntepuꞌu? Hangaa-ngaa kódóꞌ!”

⁷Onoꞌ miꞌi haneꞌi nahániki Haman node: “Tauna iti hangaa-ngaa rapopopakeꞌá waruꞌ kadatuá to paka napakeꞌ datu, hai ia hangaa-ngaa mosaweꞌi dárána datu to rabungaꞌi hai párewá kadatuá.

⁹Hadua tauna to mapángkáꞌ lántiꞌna to ara i lalu kadatuá hangaa-ngaa lao mowaruꞌi tauna to ina nabiláꞌ datu hai tauna iti hangaa-ngaa molumao ioru modiiꞌ dárá to nasaweꞌi tauna to nabiláꞌ datu moliu i tanalapa hai molaluita ngkalao napasimbuku, nauliꞌ, ‘Nodeꞌe miꞌi rárána datu mobiláꞌ tauna to hintotoꞌ nabiláꞌ!’ ”

¹⁰Molaluita miꞌi datu i Haman, nauliꞌ, “Hawiáꞌmokoꞌ lao moala waruꞌ kadatuá hai dárángkuꞌ, hai pebiláꞌkuꞌ deꞌe hangaa-ngaa nuweꞌi Modekai toIahudiꞌ iti. Upu-upuna hangaa-ngaa nubábehi hiolaꞌ hai apa to nuꞌuliꞌ ininá. Ineeꞌ mpuꞌu ara kamakuraꞌna hangko i upu-upu to nuꞌuliꞌ iti. Deꞌe-deꞌe lao miꞌi nutunggái, ia aranto mehoda-hoda i babaꞌá támbi kadatuá.”

¹¹Mewaliꞌ lao mpuꞌu miꞌi Haman moala waruꞌ kadatuá hai dárána datu. Waruꞌ iti napakeꞌá Modekai. Kamesaweꞌna Modekai i dárá iti, moioru miꞌi Haman modiiꞌ dárá to nasaweꞌi Modekai, moliu tanalapa hai molaluita ngkalao napasimbuku, nauliꞌ, “Peita, nodeꞌe miꞌi rárána datu mobiláꞌ tauna to hintotoꞌ nabiláꞌ.”

¹²Roo onoꞌ, mesuleꞌ miꞌi Modekai lao i babaꞌá támbi kadatuá. Agáiáná Haman manggagu mesuleꞌ lao i támbina láwiꞌ mahili ntepuꞌu miꞌi hai tiꞌara mau raita tauna. Mogalo riꞌi lindoꞌna naháláꞌ.

¹³Kahaweꞌna i támbina, napolaluita miꞌi i Seresi toinána hai i balenaheꞌ mokana i apa to pewaliꞌ i hia. Hangko ionoꞌ, toinána hai balenaheꞌ to mapánde, molaluitamoheꞌ i Haman, rahángáꞌá, “Mantepuꞌumokoꞌ manangi hangko i Modekai. Ánti kaꞌiana toIahudiꞌ, tongawaꞌ miꞌi katiꞌárána nubuku moewaꞌ. Ina marugiꞌkoꞌ.”

¹⁴Tangaꞌraꞌ mani molaluita, haweꞌmoheꞌ bahangapa tauna to mobágóꞌ i kadatuá, manggaguheꞌ lao moala Haman láwiꞌ ina laomoheꞌ hai datu i posusa pandeꞌ to napaꞌara Eteꞌ.