Read Besoa Eteꞌ 7 Bible Online

Eteꞌ 7 - Besoa bible

Eteꞌ 7

¹Mewaliꞌ i karongkánina miꞌi datu hai Haman mandeꞌ-mandeꞌ hai mainu hingkakani hai Eteꞌ.

²Tangaꞌraꞌ mainu anggoroꞌ, molaluita miꞌi datu i Eteꞌ, nauliꞌ, “Deꞌe-deꞌe nuꞌuliꞌ miꞌi apa to nupoinao! Kehapiꞌ nupembiáꞌ hanggáláꞌ hantangaꞌ hangko i kadatuángkuꞌ, bateꞌna ina kuweꞌikoꞌ.”

³Nahániki Eteꞌ, “Ane nupokana datu, kupembiáꞌ bona kódóꞌ hai hangka toIahudiꞌkuꞌ peisáꞌangkaiꞌ tueꞌ,

⁴láwiꞌ kaiꞌ toIahudiꞌ rapobaluꞌmongkaiꞌ bona rapapate. Ane rápáꞌna rapobaluꞌ peangkaiꞌ ina rapohawiꞌ, kupengkaniika peá hai ketiꞌarantoaꞌ mosalempori datu. Agáiáná kaiꞌ, raliwomongkaiꞌ ina rapatuna.”

⁵Mewaliꞌ mekuneꞌ miꞌi Datu Ahasiwero i Eteꞌ datu towawine, nauliꞌ, “Heáná to pebáiꞌ mobábehi noꞌonoꞌ? Iumbá miꞌi tauna iti?”

⁶Mehániꞌ Eteꞌ, “Haman miꞌi deꞌe to kadake i kaiꞌ toIahudiꞌ. Ia miꞌi ewálingkiꞌ to mampopeahiahiꞌangkaiꞌ.” Ánti kamalááꞌna miꞌi Haman, ia motótói datu hai Eteꞌ.

⁷Kamohádina laluitana Eteꞌ, mabukoꞌ ntepuꞌu datu hai kásáliu meángkáꞌ mopálehi mejá pandeꞌá lao i rawa i hinoe bungaꞌ kadatuá. Naisá miꞌi Haman kaꞌina nahukuna datu, onoꞌ miꞌi haneꞌi ia roo-roo peá ionoꞌ hingkakani hai Eteꞌ datu towawine. Tunggáiána membiáꞌ bona napelae Eteꞌ.

⁸Ánti katiꞌárána ara pehárungána Haman, onoꞌ miꞌi haneꞌi mengkatiropaꞌ perái i Eteꞌ membiáꞌ ámpu. I tempó onoꞌ woꞌo, datu mesuaꞌ miꞌi huleꞌ hangko i hinoe bungaꞌ. I kanaitána datu iti Haman tangaꞌna mengkatiropaꞌ i Eteꞌ, ia monganga, nauliꞌ, “Apa? Pebáiꞌ ntepuꞌukoꞌ woꞌo ina mampogauꞌ toinángkuꞌ i lindoꞌkuꞌ hai i lalu támbi kadatuángkuꞌ!” Karoona peá datu molaluita, topobágóꞌna kásáliu laoheꞌ motótókungi mpiriꞌ lindoꞌna Haman {tandaꞌna ina nahuku mate}.

⁹Hangko ionoꞌ, molaluita miꞌi Habona hadua topobágóꞌ i kadatuá, nauliꞌ, “Datu! I hintáiꞌ támbina Haman ara kau petóeá to kamapángkáꞌna rompuloꞌ hai romete. Petóeá iti to naꞌaró Haman ina motóe Modekai, tauna to mampelae miꞌi katueꞌna datu iaꞌo.” Napehawaꞌá miꞌi datu, nauliꞌ, “Nitóe miꞌi Haman i petóeá iti!”

¹⁰Noꞌonoꞌ miꞌi karahukuna Haman i petóeá to naꞌaró ina motóe Modekai. Roo onoꞌ hangko maurá riꞌi kamabukoꞌna datu.