Read Besoa Eteꞌ 8 Bible Online

Eteꞌ 8 - Besoa bible

Eteꞌ 8

¹Alo iti woꞌo, Datu Ahasiwero mampeweꞌi i Eteꞌ datu towawine upu-upu to ara i Haman ewáliraꞌ toIahudiꞌ. Hai napahaweꞌ miꞌi woꞌo Eteꞌ i datu, Modekai iti halaluna. Mewaliꞌ mantepuꞌu hangko ionoꞌ, Modekai rapaliu miꞌi lao mampombelámbiꞌá datu kehapiꞌ tiꞌara rakióꞌ.

²Mewaliꞌ datu moposu hingkoliꞌna to naꞌala miꞌi huleꞌ hangko i Haman, haneꞌi napeweꞌi i Modekai, hai Eteꞌ moángkáꞌ Modekai mewaliꞌ topokádipurá upu-upu to ara i Haman.

³Hangko ionoꞌ, Eteꞌ lao wopiꞌi mampombelámbiꞌá datu. Ia molingkudu hai teriaꞌ ngkalao membiáꞌ bona upu-upu poliwona Haman to kadake iti, nadiiꞌ huleꞌ datu.

⁴Datu moꞌodo laiꞌ buláwá to i taena i Eteꞌ. Hangko ionoꞌ, meángkáꞌ miꞌi Eteꞌ haneꞌi molaluita, nauliꞌ,

⁵“Ane nupokanai datu, hai ane nupomahileaꞌ, maroꞌa miꞌi datu mopasuwuꞌ hambuaꞌ párentá to modiiꞌ huleꞌ sura párentána Haman ánáꞌna Hamedata, muleꞌna Agaꞌ iti. Surana iti to moꞌóntóꞌ párentá mopatuna upu-upu toIahudiꞌ i upu-upu poropensi i kadatuá deꞌe.

⁶Tiꞌara kubuku mampeita upu-upuheꞌ halalungkuꞌ hai hangka toIahudiꞌkuꞌ rapatuna.”

⁷Molaluita miꞌi Datu Ahasiwero i Eteꞌ datu towawine hai i Modekai toIahudiꞌ iti, nauliꞌ, “Toꞌu, Haman kupehawaꞌá miꞌi ratóe láwiꞌ ia ina mopatuna toIahudiꞌ, hai upu-upu to ara i hia kuweꞌi miꞌi Eteꞌ.

⁸Mewaliꞌ deꞌe-deꞌe, kupaliukou moukiꞌ hampákáꞌ mani sura ntániꞌna mokana i toIahudiꞌ mouláꞌ apa peá to maroꞌa i pekirimi. Niukiꞌ miꞌi sura iti moliu hangaꞌkuꞌ hai hangaa-ngaa nitandaꞌi hai petándái kadatuá, láwiꞌ sura to teukiꞌ moliu hangaꞌkuꞌ, hai ratandaꞌi hai petándái datu, tiꞌara peisá radiiꞌ huleꞌ.”

⁹Alo iti woꞌo, ia miꞌi imbaꞌna rompuloꞌ hai tálu wulá katálu to rauliꞌ wulá Siwa,[9] Modekai mokióꞌ upu-upu guruntulisiꞌna datu. Napohawaꞌámoheꞌ bona moukiꞌheꞌ sura to ina rapakatu i topopárentá to motibaaꞌ poropensi, hai upu-upu biti mágáuꞌ, hai tuá-tuá mahile i hangatu rompuloꞌ hai pitu poropensi, mantepuꞌu hangko i India haweꞌ i Etiopia. Upu-upu sura iti raukiꞌ mouláꞌ ukiꞌna básáraꞌ hambuaꞌ-hambuaꞌ poropensi. Modekai moukiꞌ woꞌo sura haweꞌ i toIahudiꞌ mouláꞌ ukiꞌna básáraꞌ.

¹⁰Upu-upu sura iti natandaꞌ tae Modekai moliu hangaꞌna Datu Ahasiwero hai ratandaꞌi hai petándái datu. Roo onoꞌ, Modekai mohuoꞌmoheꞌ tauna lao moánti sura-sura iti i hambuaꞌ-hambuaꞌ poropensi kadatuá mosaweꞌiheꞌ dárá kadatuá to magásiꞌ pelangkaraꞌ.

¹¹Óntóꞌna sura iti mopakanótó kanapaliuraꞌ datu iti toIahudiꞌ hirámpu bona mampetawaꞌi katueꞌraꞌ hangko i ewáliraꞌ ane rapombealaꞌáheꞌ. Peisáheꞌ meꞌewaꞌ hai mopapate upu-upu tauna to laoheꞌ mampombealaꞌá, maroꞌa toináraꞌ, maroꞌa ánáꞌraꞌ, hangko i upu-upu poropensi i kadatuá Bábeli. Hira woꞌo peisáheꞌ mopatuna ewáliraꞌ hai mamperampaꞌi párewáraꞌ.

¹²Párentá iti hangaa-ngaa ina mewaliꞌ i humalele kadatuá Peresia i alo to napakanótó miꞌi Haman upu-upu toIahudiꞌ ina rapapate, ia miꞌi imbaꞌna hampuloꞌ hai tálu wulá kahampuloꞌ hai duá to rauliꞌ wulá Adara.[10]

¹³Sura párentá iti hangaa-ngaa rapopasuwuꞌ, bona mewaliꞌ hambuaꞌ hawaꞌ to tepakanótó miꞌi hai hangaa-ngaa rapahaweꞌ i tauna to ara i upu-upu poropensi, bona toIahudiꞌ timamaheꞌ moewaꞌ ewáliraꞌ alo iti.

¹⁴Mewaliꞌ ánti hawaꞌna datu, pohuꞌ mpuꞌumoheꞌ tauna to rahuoꞌ iti, mosaweꞌiheꞌ dárá to magásiꞌ. Noꞌonoꞌ woꞌo i bente Susana, pehodaꞌána topopárentá Bábeli, rabásá woꞌo iti sura párentá.

¹⁵Hangko ionoꞌ, Modekai pohuꞌ miꞌi hangko i támbi kadatuá, mopakeꞌ waruꞌ kadatuá to makákámumu hai to bulá, mekumbá to makákámumu to rabábehi hangko i báná to meálu ntepuꞌu, hai mopakeꞌ tatali hangko i buláwá to mababe ntepuꞌu. Upu-upu tauna to ara i kótá Susana mohoraꞌ-horaꞌheꞌ ánti kagóeꞌraꞌ.

¹⁶ToIahudiꞌ to ara i kótá iti, maroꞌa miꞌi katueꞌraꞌ, tinda laluraꞌ hai góeꞌheꞌ.

¹⁷Noꞌonoꞌ woꞌo i upu-upu kótá i upu-upu poropensi, hai iumbá-umbá sura párentána datu iti rabásá. Mewaliꞌ upu-upu toIahudiꞌ góeꞌ-góeꞌheꞌ hai mosusaheꞌ. Mogaloraheꞌ tauna to ntániꞌna, ánti kamalááꞌraꞌ, handaꞌmoheꞌ to mesuaꞌ i toIahudiꞌ.