Read Besoa Eteꞌ 9 Bible Online

Eteꞌ 9 - Besoa bible

Eteꞌ 9

¹Haweꞌ mpuꞌu miꞌi alo to tepakanótó, imbaꞌna hampuloꞌ hai tálu wulá kahampuloꞌ hai duá to rauliꞌ wulá Adara,[11] alo to rapakanótó miꞌi ina mampopolumao hawaꞌna datu, ia miꞌi ina mopapateheꞌ upu-upu toIahudiꞌ. Alo iti rapepegiá miꞌi ewáliraꞌ toIahudiꞌ to ina mokuasaꞌiheꞌ. Mole riꞌi katongawaꞌána, toIahudiꞌraheꞌ to menangi.

²I upu-upu kótá, upu-upu toIahudiꞌ hirámpumoheꞌ bona moewaꞌ tauna to ina mopatunaheꞌ. Onoꞌ miꞌi haneꞌi tauna iumbá-umbá peá mewaliꞌheꞌ malááꞌ i toIahudiꞌ. Mewaliꞌ tiꞌara ara haweꞌ hadua to pebáiꞌ meꞌewaꞌ.

³Mogaloraheꞌ to mapángkáꞌ lántiꞌraꞌ i poropensi, upu-upu topopárentá to motibaaꞌ poropensi, biti mágáuꞌ, hai to mobágóꞌ i kadatuá, moróhóngiheꞌ toIahudiꞌ láwiꞌ malááꞌheꞌ i Modekai.

⁴Ánti kamakuasaꞌna ntepuꞌu Modekai i lalu kadatuá, tebámbári ntepuꞌu hangaꞌna. Hai kuasaꞌna iti katetetámbáiá oaꞌ.

⁵Onoꞌ miꞌi haneꞌi upu-upu toIahudiꞌ peisáheꞌ mobábehi apa peá mouláꞌ peundeꞌáraꞌ i ewáliraꞌ, hai mopapateheꞌ ewáliraꞌ hai pihoꞌ.

⁶I bente Susana pehodaꞌána kadatuá, toIahudiꞌ mopapateheꞌ ewáliraꞌ kahandaꞌna lima áturaꞌ.

⁷I oloꞌraꞌ to rapapate iti, telámbiꞌheꞌ hampuloꞌ ánáꞌna Haman ánáꞌna Hamedata ewáliraꞌ toIahudiꞌ. Hangaꞌraꞌ ánáꞌna iti iamoheꞌ: Pasadata, Dapo, Asapata, Porata, Adalia, Aridata, Paramasata, Arisai, Aridai, hai Waisata. Agáiáná toIahudiꞌ tiꞌaraheꞌ morámpáki párewáraꞌ tauna to rapapate.[12]

¹¹Alo iti woꞌo tauna mopahaweꞌ i datu kahandaꞌraꞌ tauna to rapapate i bente Susana.

¹²Molaluita miꞌi datu Ahasiwero i Eteꞌ, nauliꞌ, “I bente Susana peá, toIahudiꞌ mopapate lima átuna tauna, tepasuaꞌmoheꞌ ánáꞌna Haman to hampuloꞌ, apa mani i upu-upu poropensi! Tiꞌara mani kuisá apa to rabábehi toIahudiꞌ ionoꞌ. Mewaliꞌ apa mani to ina nupembiáꞌ? Uliꞌ peá hai bateꞌna ina kuweꞌikoꞌ.”

¹³Nahániki Eteꞌ, “Ane nupomaroꞌai datu, maroꞌa miꞌi toIahudiꞌ to toroꞌ i kótá Susana deꞌe napaliuheꞌ datu bona kahalo mopaliliuheꞌ apa to rabábehi i alo dehangaloá, hai wátámandoꞌraꞌ ánáꞌna Haman ratóeheꞌ i kau petóeá.”

¹⁴Hangko ionoꞌ, datu mampopesuwuꞌ wopiꞌi párentá bona mampopolumaoheꞌ pembiáꞌna Eteꞌ. Hira ara woꞌo sura párentá to rapopesuwuꞌ i kótá Susana bona ánáꞌna Haman to hampuloꞌ ratóeheꞌ.

¹⁵Mewaliꞌ i imbaꞌna hampuloꞌ hai iba wulá Adara[13] upu-upu toIahudiꞌ to toroꞌheꞌ i kótá Susana hirámpuheꞌ huleꞌ. Hai i alo iti mopapateheꞌ tálu áturaꞌ ewáliraꞌ hai tempó onoꞌ woꞌo tiꞌaraheꞌ morámpáki párewáraꞌ.

¹⁶ToIahudiꞌ to toroꞌ i upu-upu poropensi, hirámpuheꞌ bona mampetawaꞌiheꞌ katueꞌraꞌ. Pombealaraꞌ i alo iti, mopapateheꞌ ewáliraꞌ kahandaꞌna pitu puloꞌna hai lima sáburaꞌ tauna to mokáhihiꞌheꞌ. Agáiáná párewáraꞌ tiꞌaranto raperampaꞌi.

¹⁷To pewaliꞌ iti, mewaliꞌ i imbaꞌna hampuloꞌ hai tálu wulá Adara. Kahalona imbaꞌna hampuloꞌ hai iba, tiꞌara piꞌi ara haweꞌ hadua to rapapate, ngkáliꞌna riꞌi alo iti mopaꞌaraheꞌ susa kagóeꞌ.

¹⁸Agáiáná toIahudiꞌ to ara i kótá Susana mopaꞌaraheꞌ susa mahile i imbaꞌna hampuloꞌ hai lima, láwiꞌ roomoheꞌ mopapate ewáliraꞌ i imbaꞌna hampuloꞌ hai tálu hai hampuloꞌ hai iba, hai mengkarooheꞌ i imbaꞌna hampuloꞌ hai lima.[14]

¹⁹Onoꞌ miꞌi haneꞌi haweꞌ deꞌe-deꞌe toIahudiꞌ to toroꞌheꞌ i wánuá-wánuá to kókóiꞌ mamposusaiheꞌ imbaꞌna hampuloꞌ hai iba. Alo iti mewaliꞌ alo mahile kagóeꞌ, hai i posusa iti momberórá-róráheꞌ.

²⁰Roo onoꞌ, Modekai moukiꞌ upu-upu daritakáná apa to pewaliꞌ iti, haneꞌi napakatu i upu-upu toIahudiꞌ to i kadatuá Peresia, maroꞌa to karaoꞌ maroꞌa to hungkuꞌ.

²¹Naukiꞌ daritakáná iti bona i pare-parena mamposusaiheꞌ imbaꞌna hampuloꞌ hai iba hai imbaꞌna hampuloꞌ hai lima wulá Adara,

²²láwiꞌ i rongalo iti, hira monangimoheꞌ ewáliraꞌ, hai kamapárina katueꞌraꞌ menggoli mewaliꞌ kagóeꞌ-góeꞌ. Onoꞌ miꞌi haneꞌi alo to rongalo iti raposusai ntepuꞌu, hai i tempóraꞌ mandeꞌ sangkani, hangaa-ngaa momberóráheꞌ hai mampegáláꞌáheꞌ párewá i tauna to meahiahiꞌ tueꞌraꞌ.

²³ToIahudiꞌ mampeuláꞌi ntepuꞌuheꞌ párentána Modekai iti, hai posusa iti mewaliꞌ ádá kabiásáꞌáraꞌ i pare-parena.

²⁴Mewaliꞌ i posusáraꞌ iti, mampambuhinaoiheꞌ tempóna Haman ánáꞌna Hamedata muleꞌna Agaꞌ ewali mahileraꞌ upu-upu toIahudiꞌ mobolobiaꞌ miꞌi impirá tempóna kaꞌina rapatunaraꞌ toIahudiꞌ. Mouláꞌ básáraꞌ toPeresia, motendeheꞌ “Pur”.

²⁵Agáiáná kanapahaweꞌna Eteꞌ i Datu Ahasiwero, Haman miꞌi to moliwo to tiꞌara maroꞌa i toIahudiꞌ, napehawaꞌá miꞌi datu bona raukiꞌ sura párentá, bona poliwona Haman ina mopatuna toIahudiꞌ iti rapopasuleꞌ i hia. Onoꞌ miꞌi haneꞌi Haman hai hampuloꞌ ánáꞌna tobaleilo ratóeheꞌ i kau petóeá.

²⁶Mewaliꞌ alo to rongalo iti rauliꞌ Alo Posusa Mahile Purim, láwiꞌ mambuhinaoheꞌ alo karatendena pur,[15] to mopakanótó tempó kaꞌina rapatunaraꞌ toIahudiꞌ. Mewaliꞌ, ánti óntóꞌna surana Modekai iti, hai ánti upu-upuna to mewaliꞌ miꞌi i toIahudiꞌ,

²⁷iti mewaliꞌ ádáraꞌ toIahudiꞌ duuꞌna haweꞌ i pemuleꞌáraꞌ hai upu-upu tauna to ina mesuaꞌ i toIahudiꞌ. I pare-parena hangaa-ngaa mamposusaiheꞌ oaꞌ alo to napakanótó miꞌi Modekai.

²⁸Rapakanótó woꞌo haweꞌ i rue-ruena, alo karabolobiaꞌna miꞌi mopakanótó tempó kaꞌina rapatunaraꞌ toIahudiꞌ, hangaa-ngaa rabuhinao hantámbi-hantámbi hai raposusai oaꞌ haweꞌ-haweꞌ i pemuleꞌáraꞌ i upu-upu poropensi hai i upu-upu kótá.

²⁹I rawa surana Modekai, Eteꞌ datu towawine ánáꞌna Abihai moukiꞌ woꞌo sura moliu hangaꞌna datu moróhóngi surana Modekai mokana i alo Purim.

³⁰Sura iti rapakatu i upu-upu toIahudiꞌ to ara i hangatu rompuloꞌ hai pitu poropensi i kadatuá Peresia. I lalu sura iti raukiꞌ woꞌo tabeá bona toIahudiꞌ araheꞌ oaꞌ i katinda lalu hai bona tiꞌaraheꞌ moapa-apa.

³¹I lalu sura iti raukiꞌ bona alo karabolobiaꞌna miꞌi tempó kaꞌina rapatunaraꞌ hangaa-ngaa raposusai i tempó to rapakanótó miꞌi iti, nodo kamambuhinaoraꞌ kamopuasaꞌraꞌ hai kamapárina katueꞌraꞌ. Onoꞌ miꞌi óntóꞌ surana Modekai hai Eteꞌ datu towawine.

³²Noꞌonoꞌ miꞌi párentána Eteꞌ mopakátidi hawaꞌ mokana i alo Puri. Upu-upuna iti raukiꞌ i lalu sura daritakáná.