Read Besoa Danieli 1 Bible Online

Danieli 1 - Besoa bible

Danieli 1

¹I pare katálu Datu Ioiaki mepárentá i tampoꞌ Iudá,[1] Nebukanesa datu i Bábeli laoheꞌ molibuꞌ toIerusale.[2]

²Pueꞌ mopatodáhi Nebukanesa[3] monangi Datu Ioiaki hai mamperampaꞌi hantángáꞌ párewá to rapakeꞌ i Támbina Pueꞌ Ala. Upu-upuna naꞌánti lao i tampoꞌ Bábeli[4] hai nawoli i lalu támbi ánituna.

³Hangko ionoꞌ, mohawaꞌ miꞌi datu i Asepena to motadulakoi támbi kadatuána, bona mampileꞌi bahangapa ánáꞌntomoane to pemuleꞌánaheꞌ tuꞌáná hai pemuleꞌána datu-datu hangko i oloꞌraꞌ toSáráeliꞌ to ratawani.

⁴Hira iti ánáꞌntomoane to maroꞌa powátáraꞌ, malápákáheꞌ, mapángkáꞌ posikolaꞌraꞌ, mapándeheꞌ, handaꞌ ntepuꞌu to raisá, hai hintotoꞌheꞌ mobágóꞌ i támbi kadatuá. Asepena rahuoꞌ mopaturoꞌheꞌ mobásá hai moukiꞌ i lalu básáraꞌ toBábeli.[5]

⁵Hai mouláꞌ popakanótóna datu, pandeꞌraꞌ hai painuraꞌ alo-alona, hangaa-ngaa hibali hai datu. Hira hangaa-ngaa rapaturoꞌheꞌ tálu parena kamaruena. Roo onoꞌ, hangaa-ngaa mobágóꞌheꞌ i datu.

⁶I oloꞌraꞌ ánáꞌntomoane iti, araheꞌ woꞌo bahangapa tauna to hangko i tampoꞌ Iudá, iamoheꞌ: Danieli, Hanaia, Misaeli, hai Asaria.

⁷Asepena to motadulakoi támbi kadatuá, mobáliki hangaꞌraꞌ hadua-hadua: Danieli mewaliꞌ Beletasaꞌ,[6] Hanaia mewaliꞌ Sadara,[7] Misaeli mewaliꞌ Mesaꞌ,[8] hai Asaria mewaliꞌ Abeꞌnego.[9]

⁸Danieli mopakanótó bona tiꞌara mopakedái wátána moliu pandeꞌ to hangko i datu, noꞌonoꞌ woꞌo hai anggoroꞌ to biásá nainu datu. Mewaliꞌ napolaluita mpuꞌu miꞌi tunggáiána iti i Asepena to motadulakoi támbi kadatuá.

⁹Pueꞌ Ala mowátiꞌ Danieli, hai ia molámbiꞌ pepokaꞌahiꞌ hangko i Asepena, tadulakoraꞌ topobágóꞌ i támbi kadatuá iti.

¹⁰Agáiáná ánti kamalááꞌna Asepena i datu, onoꞌ haneꞌi molaluita miꞌi i Danieli, nauliꞌ, “Datu haduduána to mopakanótó pandeꞌ hai painumi. To kupokalááꞌ ia miꞌi, ane mouláꞌ i pampeitána datu, tiꞌara maroꞌa powátámu hangko i ánáꞌntomoane to ntániꞌna, hangaa-ngaa ina napapateaꞌ.”

¹¹Hangko ionoꞌ, molaluita miꞌi Danieli i topekámpái to napohawaꞌá miꞌi Asepena bona mokádipuráheꞌ Danieli, Hanaia, Misaeli hai Asaria.

¹²Nauliꞌ Danieli node: “Nupehukáꞌ miꞌi sieruꞌ i kaiꞌ hawiꞌmu. Hampuloꞌ alona kamaruena, nupoweꞌi peangkaiꞌ haloꞌ-haloꞌ kiandeꞌ hai uwai ntooꞌ kiꞌinu.

¹³Hópóꞌ miꞌi hampuloꞌ alona, nupampeitai powátángkiꞌ, nupahibali hai wátáraꞌ ánáꞌntomoane to ntániꞌna to mandeꞌ pandeꞌ hai painu to hangko i datu, bona nuisá heáná to maroꞌa powátána. Hai hangko ionoꞌ, nubábehi miꞌi i kaiꞌ apa peá to maroꞌa mouláꞌ popakanótómu.”

¹⁴Mewaliꞌ napokana mpuꞌu miꞌi pembiáꞌraꞌ iti. Hangko ionoꞌ, napampehukáꞌi mpuꞌumoheꞌ hampuloꞌ alona kamaruena.

¹⁵Hópóꞌ miꞌi tempó to tepakanótó, tongawaꞌ kamaroꞌana riꞌi wátáraꞌ, hai tongawaꞌ woꞌo kamaruduꞌraꞌ hangko i ánáꞌntomoane to molámbiꞌ pandeꞌ hai painu hangko i datu.

¹⁶Mewaliꞌ to mokádipurá ánáꞌntomoane to iba iti, tiꞌarapoheꞌ napoweꞌi pandeꞌ hai painu to hangko i datu, ngkáliꞌna riꞌi napoweꞌi peramoheꞌ oaꞌ haloꞌ-haloꞌ hai uwai ntooꞌ.

¹⁷I ánáꞌntomoane to ibaheꞌ iti, Pueꞌ Ala mampoweꞌi kapánde, bona peisáheꞌ molempónga darita to teukiꞌ, hai handaꞌ to raisá kana i duniáꞌ. Hai Pueꞌ woꞌo mampoweꞌi kapánde i Danieli bona naisá molempónga mampopengaa paturu hai pampetudeꞌá.

¹⁸Hópóꞌ miꞌi tálu parena, tempó to napakanótó datu,[10] upu-upu ánáꞌntomoane iti naꞌántiheꞌ Asepena bona laoheꞌ mampombelindoꞌá Datu Nebukanesa.

¹⁹Datu molaluita hai hira upu-upu, hai tongawaꞌ hangko i pehániꞌraꞌ, tiꞌara ara to hibali kamapánderaꞌ nodo Danieli, Hanaia, Misaeli hai Asaria. Hangko ionoꞌ, mantepuꞌumoheꞌ mobágóꞌ i támbi kadatuá.

²⁰I pákáꞌ-pákáꞌna to mewaliꞌ to moparaluu kanótó lalu hai kapánde, datu mekuneꞌ i hira, hai tongawaꞌ ntepuꞌu kamapánderaꞌ to ibaheꞌ iti melumbuꞌ hampuloꞌ kánina hangko i upu-upu tauna to handaꞌ pangisáraꞌ i humalele kadatuá.

²¹Danieli mobágóꞌ oaꞌ i támbi kadatuá, haweꞌ-haweꞌ i tempóna Datu Koresi hangko i Peresia monangiheꞌ toBábeli.[11]