Read Besoa Danieli 11 Bible Online

Danieli 11 - Besoa bible

Danieli 11

¹{Malaꞌeka to nahuoꞌ lao i Danieli[70] mopaliliu laluitana, nauliꞌ,} “I pare kaꞌisáꞌ popárentána Datu Dáriu toMedia, kódóꞌ woꞌo to meángkáꞌaꞌ i hintáiꞌna malaꞌeka Mikaeli. Kupakaróhó hai kukámpái {bona tiꞌara manangi}.”

²Malaꞌeka iti manguliꞌ, “Deꞌe-deꞌe ina kuhángáꞌáꞌákoꞌ apa to ina mewaliꞌ i katoꞌu-toꞌuána. Bona nuisá: i kadatuá Peresia, ina ara wopiꞌi tálu datu,[71] hai datu to kaꞌibána[72] ina molámbiꞌ kapebuku to melumbuꞌ hangko i datu to tálu iti. Ánti kapebukuna, ia ina makuasaꞌ ntepuꞌu, hai ina napári-pári moewaꞌ kadatuá Iunani.

³Hangko ionoꞌ, ina ara wopiꞌi hadua datu to keate ntepuꞌu.[73] Ia ina mopárentá hambuaꞌ kadatuá to mahile ntepuꞌu, hai ina mouláꞌ peá peundeꞌána haduduána.

⁴Agáiáná kamakuasaꞌna iti tiꞌara ina marue. I tempóna maróhó ntepuꞌu kuasaꞌna, kadatuána iti ina tegáláꞌ iba boloꞌna mouláꞌ mata angi, hai to ina mepárentá, tiꞌara hangko i pemuleꞌána, ngkáliꞌna riꞌi tauna ntaniꞌ.[74] Agáiáná kamaróhóna kuasaꞌraꞌ to iba iti tiꞌara ina hibali hai kuasaꞌna.

⁵Datu to hangko i tampoꞌ Másiriꞌ, to tándáꞌ i wóiꞌ,[75] ina maróhó. Agáiáná hadua hangko i oloꞌraꞌ tadulako surudadoꞌna[76] ina melumbuꞌ kamaróhóna hangko i hia. Tauna iti ina mopárentái hambuaꞌ kadatuá, hai kadatuá iti ina mahile ntepuꞌu.

⁶Bahanoumbá parena hangko ionoꞌ, datu i tampoꞌ Másiriꞌ ina mohintuwuꞌ hai datu i Siria, ia miꞌi datu tándáꞌ i wongko. Tandaꞌ pohintuwuꞌraꞌ, datu i Másiriꞌ ina mampopohamboko ánáꞌna towawine hai datu i Siria.[77] Agáiáná pohintuwuꞌraꞌ iti tiꞌara ina marue, láwiꞌ towawine iti, ia miꞌi ánáꞌna daturaꞌ toMásiriꞌ, ina rapapate, noꞌonoꞌ woꞌo ánáꞌna, hai toámána, hai upu-upu hawiꞌna to moántiheꞌ hangko i tampoꞌ Másiriꞌ lao i tampoꞌ Siria.

⁷Tiꞌara marue hangko ionoꞌ, halaluna towawine to rapapate iti ina mewaliꞌ datu i tampoꞌ Másiriꞌ mopaháwángi umána. Mewaliꞌ datu to woꞌu iti[78] ina lao mampombealaꞌá daturaꞌ toSiria.[79] Ia ina mesuaꞌ i lalu kótáraꞌ to rabente, hai ia ina menangi.

⁸I pesuleꞌna lao i tampoꞌ Másiriꞌ, ia ina moánti lenggeꞌna ánituraꞌ toSiria hai mampopengaa párewá to rabábehi hangko i buláwá hai peráꞌ. Hangko ionoꞌ, bahanoumbá parena kamaruena, ia ina mengkaroo mampombealaꞌá toSiria.

⁹Roo onoꞌ, daturaꞌ toSiria ina lao i tampoꞌ Másiriꞌ, haneꞌi ina mesuleꞌ peá huleꞌ lao i tampoꞌna.

¹⁰Hangko ionoꞌ, ánáꞌna datu toSiria paka tobaleilo[80] ina mopatimamaheꞌ lao mombeala, hai ina morámpuheꞌ surudadoꞌ to handaꞌ. Hadua hangko i oloꞌraꞌ ina motadulakoiheꞌ lao mampombealaꞌá datu toMásiriꞌ to tándáꞌ i wóiꞌ. Ina nodoheꞌ pelábóꞌna uwai láwiꞌ handaꞌ ntepuꞌuheꞌ, hai i karongkánina deꞌe, ina haweꞌheꞌ i benteraꞌ ewáliraꞌ.

¹¹Onoꞌ miꞌi haneꞌi ina mabukoꞌ daturaꞌ toMásiriꞌ,[81] hai ina lao mampombealaꞌá daturaꞌ toSiria[82] to handaꞌ surudadoꞌna. Hai surudadoꞌ to handaꞌ iti ina ranangiheꞌ hai ratawaniheꞌ.[83]

¹²I kamenangina daturaꞌ toMásiriꞌ, ia ina mampepemahile láwiꞌ handaꞌ ewálina to mate, agáiáná ia tiꞌara ina makuasaꞌ oaꞌ.

¹³I karongkánina daturaꞌ toSiria[84] ina morámpu surudadoꞌna, ina melumbuꞌ kahandaꞌraꞌ hangko i rungu-runguna. Hai ane haweꞌ tempóna, ia ina lao mombeala hai daturaꞌ toMásiriꞌ.[85] Surudadoꞌna ina handaꞌ ntepuꞌu, noꞌonoꞌ woꞌo párewá pombeala to ina raꞌánti.

¹⁴Tempó onoꞌ, handaꞌheꞌ tauna to ina moewaꞌ daturaꞌ toMásiriꞌ,[86] noꞌonoꞌ woꞌo hangko i hangka toSáráeliꞌmu Danieli. Bahangapa tauna to maseke ina mampepemahile woꞌo meꞌewaꞌ, láwiꞌ ara to ina moita hambuaꞌ pampetudeꞌá, agáiáná bateꞌraꞌ ina manangi.

¹⁵Roo onoꞌ, daturaꞌ toSiria hai surudadoꞌna ina laoheꞌ mosuaki tampoꞌ Másiriꞌ, hai ina ralibuꞌ kótá to rabente, hai ina menangiheꞌ. Surudadoꞌ toMásiriꞌ, tiꞌaraheꞌ ina mantaha. Mogalo riꞌi surudadoꞌ to tepileꞌi láwiꞌ keate ntepuꞌu, tiꞌaraheꞌ woꞌo ina mantaha moewaꞌ toSiria.

¹⁶Datu to hangko i Siria ina mobábehi apa peá mouláꞌ peundeꞌána, hai tiꞌara ina ara to mobuku moewaꞌ. Ia ina mokatoroꞌi tampoꞌ Sáráeliꞌ, tampoꞌ to meawaꞌ, hai upu-upuna ina ara i lalu kuasaꞌna.

¹⁷Hangko ionoꞌ, ia ina mopári-pári bona peisá mokuasaꞌi humalele kadatuá to i wóiꞌ. Ia ina mopaꞌara podándi, hai ina mampopohamboko ánáꞌna towawine[87] hai datu toMásiriꞌ, {tandaꞌ popakaróhóna podándiraꞌ}. Tunggáiána bona mopamarugiꞌ kadatuá Másiriꞌ, agáiáná tunggáiána iti tiꞌara ina nalámbiꞌ.

¹⁸Hangko ionoꞌ, ia ina lao wopiꞌi mampombealaꞌá kadatuá to ara i wiwi tahiꞌ,[88] hai handaꞌ ntepuꞌuheꞌ to ina nanangi. Agáiáná ina haweꞌ hadua tadulako hangko i tampoꞌ ntániꞌna,[89] hai ia ina mampopengkaroo pepopeahiahiꞌna iti, hai pepopeahiahiꞌna iti ina rapopesuleꞌá woꞌo i hia.

¹⁹Roo onoꞌ, daturaꞌ toSiria iti ina mesuleꞌ lao i tampoꞌna haduduána, to rabente upu-upu kótána, agáiáná ia ina ranangi duuꞌna mate.[90]

²⁰I kamatena daturaꞌ toSiria iti, ia ina rapaháwángi. Hai tauna to mepaháwángi iti[91] ina mohuoꞌ topobágóꞌna bona mopasaꞌheꞌ tauna mohuhuꞌ ásele. Tunggáiána bona motámbái kapebukuna datu to woꞌu iti. Agáiáná tiꞌara marue hangko ionoꞌ, datu iti ina mate, hai rárá kamatena iti, tiꞌara mate i pombealaꞌá agáiáná ia ina mate ngkániiꞌ-niiꞌ.”[92]

²¹[93] Molaluita wopiꞌi malaꞌeka iti, nauliꞌ, “Datu to ina mepaháwángi i kadatuá Siria, ia miꞌi hadua tauna to tiꞌara raundeꞌ-undeꞌ tauna, hai ia woꞌo tiꞌara hintotoꞌ mewaliꞌ datu.[94] Agáiáná hangkaꞌ-hangkaꞌ perái ia ina haweꞌ hai moala kadatuá iti moliu peákálángi, onoꞌ miꞌi haneꞌi ia peisá mewaliꞌ datu i kadatuá iti.

²²Upu-upu surudadoꞌ to meꞌewaꞌ, ina napatunaheꞌ, mogalo riꞌi hadua Tadulako Menómbá Mahile to mopaꞌara podándi ina napapate.[95]

²³I tempóna mopaꞌara podándi, ia woꞌo ina mantepuꞌu mampopolumao ákálána bona molingkaꞌi podándiraꞌ iti. Ia ina mantámbái kamaróhóna kuasaꞌna, kehapiꞌ hantóiꞌ peá tauna to tándáꞌ i hia.

²⁴Mewaliꞌ i tempó dame iti, hangkaꞌ-hangkaꞌ ia ina meákálángi hai mamperampaꞌi upu-upu ngamba to maruduꞌ tampoꞌna. Ia woꞌo ina mobábehi bábehiá to tiꞌara haweꞌ hangkani rabábehi toioruna, ia miꞌi, ina mogáláꞌ-gáláꞌ i tauna to moundeꞌ upu-upu párewá to naperampaꞌi, hai kapebuku to nalámbiꞌ i pombealaꞌána. Ia ina moliwo monangi kótá to mobente, agáiáná tempóna mepárentá tiꞌara ina marue.

²⁵Ánti kamaróhóna hai kapebáiꞌna, ia ina morámpu surudadoꞌ to handaꞌ bona moewaꞌ daturaꞌ toMásiriꞌ.[96] Agáiáná kehapiꞌ daturaꞌ toMásiriꞌ ina timama woꞌo lao mombeala hai handaꞌ ntepuꞌuheꞌ surudadoꞌna to maróhó, tiꞌaraheꞌ ina mantaha, láwiꞌ ia ina rapakanawoꞌ taunána haduduána.

²⁶Mogalo riꞌi tauna to molámbiꞌ pandeꞌraꞌ hangko i datu iti, ina mopakanawoꞌ. Handaꞌheꞌ surudadoꞌna daturaꞌ toMásiriꞌ ina rapapate hai rapatuna.

²⁷Hangko ionoꞌ, datu Másiriꞌ hai daturaꞌ toSiria ina moliwoheꞌ mobábehi bábehiá to kadake ntepuꞌu. Tangaꞌraꞌ mandeꞌ hingkakani, ina mombepodongkoꞌáheꞌ, agáiáná tunggáiáraꞌ iti tiꞌara ina mewaliꞌ láwiꞌ tiꞌara mani haweꞌ tempóna to tepakanótó.

²⁸Hangko ionoꞌ, daturaꞌ toSiria ina mesuleꞌ lao i tampoꞌna, hai handaꞌ ntepuꞌu párewá to naꞌánti. To natunggái, ina mopatuna ágámáraꞌ tauna to mepoinálái i Pueꞌ Ala.[97] Ia ina mobábehi apa peá peundeꞌána i hira, hangko mesuleꞌ riꞌi lao i kadatuána.

²⁹I tempó to napakanótó Pueꞌ Ala, ia ina mosuaki huleꞌ tampoꞌ Másiriꞌ, agáiáná to ina nalámbiꞌ karongkánina deꞌe tiꞌara ina hibali hai to rungu-runguna,

³⁰láwiꞌ toRoma[98] ina haweꞌheꞌ hangko i puló Sipuru hai duanga-duanga tahiꞌ to mahile. Ina moewaꞌheꞌ daturaꞌ toSiria iti, onoꞌ miꞌi haneꞌi ia ina mesuleꞌ huleꞌ lao i tampoꞌna ánti kamalááꞌna.[99] I kamesuleꞌna, ia ina mabukoꞌ ntepuꞌu, mewaliꞌ ina napári-pári mopatuna ágámáraꞌ taunána Pueꞌ Ala. Ia ina mampeuláꞌi paturoꞌraꞌ tauna to mengkábáhámoheꞌ hangko i pepoináláiraꞌ i Pueꞌ Ala.

³¹Mewaliꞌ daturaꞌ toSiria ina mohuoꞌheꞌ surudadoꞌna lao i Ierusale bona mopakedái Támbina Pueꞌ Ala. Hira ina mampopengkarooheꞌ popenómbá alo-alona i Pueꞌ Ala, hai ina mobábehiheꞌ bábehiá to meriringkuꞌi ntepuꞌu, ia miꞌi ina moaró hampákáꞌ lenggeꞌ ánitu to rauliꞌ ‘To Kadake to Megero’.[100]

³²Hai upu-upu tauna to tiꞌarapoheꞌ mampeuláꞌi áturá poágámáraꞌ, ina naembaꞌ-embaꞌ hai laluita to mopamalulu laluraꞌ bona mauheꞌ medurei. Agáiáná tauna to mengkoruꞌ i Pueꞌ Ala, ina maróhóheꞌ oaꞌ hai ina meꞌewaꞌheꞌ woꞌo.

³³Upu-upu tauna to kaladu pekiriraꞌ hangko i oloꞌraꞌ taunána Pueꞌ Ala, ina mampoweꞌiheꞌ laluita i tauna bona moisáheꞌ lempóna apa to mewaliꞌ iti. Agáiáná bahangapa kamaruena hangko ionoꞌ, ara bahanoumbáheꞌ to ina mate ánti pombeala, hai ara to ina rahunu haweꞌ mate. Araheꞌ woꞌo to ina rarámpáki, hai to ina ratawani.

³⁴Tangaꞌna pepapate iti mewaliꞌ, ina ara hantóiꞌ peá petulungi i taunána Pueꞌ Ala. Handaꞌheꞌ tauna ina mohintuwuꞌ hai hira, agáiáná tiꞌara i katoꞌu-toꞌuána, láwiꞌ ina mampeliꞌ peheꞌ porasiꞌáraꞌ haduduáraꞌ.

³⁵Hanggááꞌheꞌ hangko i taunána Pueꞌ Ala to kaladu pekiriraꞌ iti ina rapapateheꞌ, agáiáná upu-upuna iti ina mewaliꞌ pampehukáꞌ i taunána Pueꞌ Ala bona mewaliꞌheꞌ magasaꞌ. Upu-upuna iti ina mewaliꞌ duuꞌna haweꞌ i kahópóꞌána duniáꞌ, ia miꞌi tempó to napakanótó miꞌi ami Pueꞌ Ala.”

³⁶Malaꞌeka mopaliliu polaluitana, nauliꞌ, “Datu hangko tándáꞌ i wongko iti[101] ina mampeuláꞌi peá peundeꞌána haduduána. Ánti kamaꞌángkáꞌna, ina nauliꞌ ia melumbuꞌ hangko i hinángkáꞌna ánitu to ara, hai ina mohuwárá woꞌo laluita to tiꞌara hintotoꞌ mokana i Pueꞌ Ala to melumbuꞌ kuasaꞌNa hangko i upu-upu to rapenómbái. Upu-upuna iti ina nabábehi duuꞌna hópóꞌ tempó kamabukoꞌna Pueꞌ Ala, láwiꞌ upu-upu to napakanótó miꞌi Pueꞌ Ala bateꞌna ina mewaliꞌ.

³⁷Noꞌonoꞌ woꞌo, datu iti tiꞌara ina mobiláꞌ apa to rapenómbái toiouruna, tepasuaꞌ woꞌo ánitu to rapenómbái towawine ba ánitu ntaniꞌ, láwiꞌ ina narekeꞌ ia to melumbuꞌ ntepuꞌu hangko i ánitu-ánitu iti.

³⁸Agáiáná ia ina mobiláꞌ ánitu to tiꞌara mani hangkani rapenómbái toioruna, ia miꞌi ánitu to mokámpái upu-upu bente. Ia ina mampopenómbá buláwá, peráꞌ, watu to masuliꞌ, hai popenómbá to ntániꞌna to meraeꞌ hai masuliꞌ hólóna.

³⁹Ánti petulungina ánitu to tiꞌara rapenómbái toioruna, ia ina mosuaki bahangapa kótá to maróhó bentena. Heáná peá to mobiláꞌ ánitu iti, ina nabiláꞌ woꞌo datu iti, hai ina naꞌángkáꞌheꞌ mewaliꞌ topobágóꞌ to mapángkáꞌ lántiꞌraꞌ, hai ina naweꞌiheꞌ tampoꞌ napopoparaseengiheꞌ.

⁴⁰Agáiáná i kahópóꞌána duniáꞌ, datu tándáꞌ i wóiꞌ ina lao mampombealaꞌá datu tándáꞌ i wongko. Agáiáná datu tándáꞌ i wongko ina timama woꞌo mombeala. Mewaliꞌ ia ina mopatimama handaꞌ kereta pombeala, surudadoꞌ topodárá, hai duanga-duanga tahiꞌ, haneꞌi ina laoheꞌ aha mombeala hai mosuaki handaꞌ tampoꞌ. Kahandaꞌraꞌ ina nodoheꞌ uwai to melábóꞌ.

⁴¹Mogalo riꞌi tampoꞌ Sáráeliꞌ, tampoꞌ to meawaꞌ, ina rasuaki. Handaꞌ ntepuꞌu tauna to ina rapapate. Agáiáná kadatuá Edom, kadatuá Moabiꞌ, hai hanggááꞌ hangko i kadatuá Amoni ina teliuheꞌ.

⁴²Ia ina mokuasaꞌi handaꞌ kadatuá, tepasuaꞌ Másiriꞌ.

⁴³Ia ina mokuasaꞌi párewá kapebuku nodo buláwá, peráꞌ, hai mampopengaa párewá to masuliꞌ hólóna i tampoꞌ Másiriꞌ. Hai ia ina radurei toLibia hai toEtiopia.

⁴⁴Hangko ionoꞌ, ia ina mohádi bámbári hangko tándáꞌ i mata alo hai hangko tándáꞌ i wongko to melááꞌ-lááꞌi. Onoꞌ miꞌi haneꞌi ina rumihi kamabukoꞌna, hai ia ina pohuꞌ bona lao mombeala hai mopapate handaꞌ tauna.

⁴⁵Ia ina moaró bambaruꞌ i hiliꞌna tahiꞌ hai buluꞌ Sio to magasaꞌ hai meawaꞌ, peángkáꞌána Támbina Pueꞌ Ala. Agáiáná ia ina mampohidupaꞌá dándina, hai tiꞌara ara haweꞌ hadua to ina motulungi.”