Read Besoa Danieli 12 Bible Online

Danieli 12 - Besoa bible

Danieli 12

¹Malaꞌeka to mewaruꞌ to bulá iti, mopaliliu laluitana,[102] nauliꞌ, “I tempó onoꞌ, ina haweꞌ Mikaeli, malaꞌeka to mokámpái tampoꞌ Sáráeliꞌ. Hangko ionoꞌ, ina ara kapári to rumihi to tiꞌara mani hangkani mewaliꞌ, mantepuꞌu i tempóna tauna mopakeꞌ básá to montaniꞌ-ntaniꞌ.[103] Agáiáná i tempó iti, upu-upu hangka toSáráeliꞌmu to teukiꞌ hangaꞌraꞌ i Surana Pueꞌ, ia miꞌi Sura Ngkatueꞌ,[104] ina rapelaeheꞌ.

²Handaꞌ tauna to matemoheꞌ, ina tueꞌheꞌ huleꞌ hai ina molámbiꞌheꞌ katueꞌ to maroꞌa to tiꞌara mokahópóꞌá. Hai hantángáꞌheꞌ woꞌo ina tueꞌheꞌ huleꞌ hai molámbiꞌheꞌ kapári to meriringkuꞌi to tiꞌara mokahópóꞌá.

³Tauna to manótó laluraꞌ ina mewangkaꞌheꞌ nodo pewangkaꞌna langiꞌ. Hira to ina mopaturoꞌ handaꞌ tauna bona mobábehiheꞌ apa to manótó i peitána Pueꞌ Ala. Peisáheꞌ woꞌo rapándiriꞌ nodo betue to mewangkaꞌ haweꞌ i rue-ruena.”

⁴Nauliꞌ wopiꞌi malaꞌeka iti i kódóꞌ, “Danieli, nutuko miꞌi hampaiꞌ sura iti, hai nutandaꞌi hai petándái bona óntóꞌna tewuniángi haweꞌ i kahópóꞌána duniáꞌ. Handaꞌ tauna ina mampoinao mampegurui sura iti bona raisá apa to ina mewaliꞌ, hai kapánderaꞌ tauna ina mantámbái.”

⁵Hangko ionoꞌ, kuita rodua tobaleilo. Hadua meángkáꞌ i wiwi uwai tándáꞌ i kódóꞌ, hai to haduána meángkáꞌ tándáꞌ i hambali.

⁶To haduána mekuneꞌ i to mopakeꞌ báná to meálu hai bulá,[105] to meángkáꞌ tándáꞌ i uluna uwai, nauliꞌ, “Impirá kaꞌina hópóꞌána upu-upu to metingkáráki deꞌe?”

⁷Tauna iti moángkáꞌ taena rombali i langiꞌ, modándi i lalu hangaꞌna Pueꞌ Ala to tueꞌ duuꞌna i rue-ruena, nauliꞌ, “Upu-upu to mewaliꞌ deꞌe, ina mewaliꞌ tálu parena hantangaꞌ kamaruena. Ane upu-upu taunána Pueꞌ Ala mehárungá i Hia, tiꞌara piꞌi mehárungá i kuasaꞌraꞌ haduduáraꞌ, hangko hópóꞌ riꞌi pepopeahiahiꞌ to metingkáráki iti.”

⁸Upu-upu to nauliꞌ iti manótó kakuhádina, agáiáná tiꞌara kuisá apa tunggáiána. Mewaliꞌ kupekuneꞌ, “Tuá, noumbá kahópóꞌána upu-upuna iti?”

⁹Agáiáná nahániki node: “Deꞌe-deꞌe, pohuꞌmokoꞌ Danieli, láwiꞌ upu-upu laluita deꞌe hangaa-ngaa ratuko hai rawuniángi haweꞌ-haweꞌ i kahópóꞌána duniáꞌ.

¹⁰Handaꞌ tauna ina rapampehukáꞌi pepoináláiraꞌ bona mewaliꞌheꞌ magasaꞌ. Upu-upu tauna to kadake bábehiáraꞌ, tiꞌara ina raisá tunggáiána Pueꞌ Ala i pampopeahiahiꞌ iti, onoꞌ miꞌi haneꞌi ina mobábehi peheꞌ oaꞌ bábehiá to kadake. Agáiáná tauna to kaladu pekiriraꞌ ina moisáheꞌ tunggáiána Pueꞌ Ala iti.

¹¹Mantepuꞌu hangko i karapopengkaroona pohuhuꞌ popenómbá alo-alona,[106] hai poaróna lenggeꞌ ánitu to meriringkuꞌi, to rauliꞌ woꞌo To Kadake to Megero,[107] ara hasábu rongatu hai hahioꞌ puloꞌna alona.[108]

¹²Morasiꞌheꞌ tauna to tetidaꞌ oaꞌ haweꞌ i alo kahasábu tálu átuna tálu puloꞌna hai lima.

¹³Agáiáná io Danieli, pohuꞌmokoꞌ i katinda lalu. Io ina matekoꞌ, agáiáná ina tueꞌkoꞌ huleꞌ, hai ina nutarima háwángina i kahópóꞌána duniáꞌ.”