Read Besoa Danieli 5 Bible Online

Danieli 5 - Besoa bible

Danieli 5

¹Hangkani tempó, Datu Belesasa mokióꞌmoheꞌ hasábu tauna to mapángkáꞌ lántiꞌraꞌ bona mouláꞌheꞌ posusa mahile. I lalu posusa iti, ia mainu anggoroꞌ hingkakani hai torarena.

²Hangkoia, Datu Nebukanesa, ia miꞌi pueꞌna Datu Belesasa,[22] mamperampaꞌi párewá hangko i Támbina Pueꞌ Ala i Ierusale, naꞌánti lao i kótá Bábeli. Párewá iti rabábehi hangko i buláwá hai peráꞌ, tepasuaꞌ woꞌo mangku-mangku. Tempóna Datu Belesasa mantepuꞌu miꞌi malangu i posusa iti, ia mohuoꞌmoheꞌ topobágóꞌna bona moalaheꞌ mangku-mangku iti, bona rapakeꞌ upu-upu tauna to mapángkáꞌ lántiꞌraꞌ, upu-upu toináraꞌ, hai upu-upu towawine to rapiaraꞌ, ina mainuheꞌ hangko i mangku onoꞌ.

³Raꞌánti mpuꞌu miꞌi upu-upu mangku iti lao i hia, haneꞌi rapainui.

⁴Tangaꞌraꞌ mainu, motóiáheꞌ ánituraꞌ to rabábehi hangko i buláwá, peráꞌ, tembaga, besiꞌ, kau hai watu.

⁵Tempó onoꞌ, iaperái hangkaꞌ ara tae to moukiꞌ i rindi támbi kadatuá i kamahingkaaꞌána láwiꞌ nahimbaꞌi huluꞌ, onoꞌ miꞌi haneꞌi tongawaꞌ ntepuꞌu kanaitána datu tae to moukiꞌ iti.

⁶Lindoꞌna datu mewaliꞌ mabádáꞌ, hai masusa laluna. Bitina mewaliꞌ maledeꞌ, hai kuntuꞌna moridiꞌ ánti kamalááꞌna.

⁷Onoꞌ miꞌi haneꞌi ia molaluita napasimbuku bona upu-upu tauna to handaꞌ pangisáraꞌ, topebao hai upu-upu tauna to moisá mampeita betue, raꞌánti lao i hia. I kahaweꞌraꞌ peá, molaluita miꞌi datu, nauliꞌ, “Heáná peá to moisá mobásá ukiꞌ iti hai mopahaweꞌ lempóna, ina kuweꞌi kumbá kadatuá to makámumu,[23] hai awóló rante to hangko i buláwá, tandaꞌ pebiláꞌkuꞌ i hia. Hai ina kuángkáꞌ mewaliꞌ tauna to katálu mepárentá hangko i datu.”

⁸Mewaliꞌ lao mpuꞌumoheꞌ hadua-hadua mampehukáꞌ mobásá ukiꞌ iti, agáiáná tiꞌara ara haweꞌ hadua to peisá mobásá ba molempónga.

⁹Hangko ionoꞌ, masusa ntepuꞌu miꞌi laluna Datu Belesasa, haneꞌi mantámbái kamabádáꞌna lindoꞌna. Mogalo riꞌi topobágóꞌnaheꞌ to mapángkáꞌ lántiꞌraꞌ, malááꞌmoheꞌ woꞌo.

¹⁰Ánti kamasimbukuna polaluitana datu hai upu-upu tauna to mapángkáꞌ lántiꞌraꞌ, mesuaꞌ miꞌi inána datu i lintuꞌ posusaꞌá, haneꞌi molaluita, nauliꞌ, “Ee datu, hampóáꞌworia maroꞌa tueꞌmu haweꞌ i rue-ruena! Nupatinda miꞌi lalumu, hai ineeꞌkoꞌ malááꞌ haneꞌi mabádáꞌ lindoꞌmu.

¹¹I lalu kadatuá deꞌe, ara hadua tauna to naporángá oaꞌ kuasaꞌ to magasaꞌ! I tempóna pueꞌmu mepárentá hangkoia, tauna iti tongawaꞌ ntepuꞌu kamanótóna laluna hai kamapándena nodo kamapánderaꞌ ánitu. Datu Nebukanesa pueꞌmu, moángkáꞌ tauna iti mewaliꞌ tadulakoraꞌ upu-upu tauna to handaꞌ pangisáraꞌ, topebao, hai tauna to moisá mampeita betue.

¹²Tauna iti mapánde ntepuꞌu hai bukeꞌ pekiri. Ia mapánde woꞌo molempónga paturu, mowungkeꞌ upu-upu to tewuniángi, hai naisá mopakanótó lempóna apa to maꞌángkárá rapekiri. Hangaꞌna tauna iti Danieli, agáiáná pueꞌmu hangkoia mobáliki hangaꞌna mewaliꞌ Beletasaꞌ. Maroꞌa ane nukióꞌ mai Danieli. Ia ina mopakanótó i datu apa lempóna ukiꞌ iti.”

¹³Mewaliꞌ hawiáꞌ mpuꞌu miꞌi Danieli raꞌánti lao mampombelindoꞌá datu. Mekuneꞌ miꞌi datu i Danieli, nauliꞌ, “Io miꞌi paꞌi to rahangaꞌ Danieli, hadua to ratawani to naꞌánti mai Datu Nebukanesa pueꞌkuꞌ hangko i tampoꞌ Iudá.

¹⁴Kuhádi miꞌi daritakáná mokana i hio. Io naporángákoꞌ oaꞌ inaoraꞌ ánitu, hai io hadua tauna to mapánde ntepuꞌu, bukeꞌ timbá, hai kaladu pekirimu.

¹⁵Upu-upu tauna to handaꞌ pangisáraꞌ hai topebao, kukióꞌmoheꞌ bona mobásáheꞌ ukiꞌ deꞌe hai mohángáꞌáꞌáꞌaꞌ lempóna ukiꞌ iti, agáiáná tiꞌara ara to moisá.

¹⁶Agáiáná kuhádi miꞌi mokana i hio. Nubuku mopatongawaꞌ upu-upu to tewuniángi, hai nuisá mopakanótó lempóna apa to maꞌángkárá rapekiri. Mewaliꞌ, ane nubuku mobásá ukiꞌ iti, hai nuhángáꞌáꞌáꞌaꞌ woꞌo lempóna, ina kuweꞌikoꞌ badu kadatuá to rabábehi hangko i báná to makámumu, hai awóló rante to hangko i buláwá, hai ina kuángkáꞌkoꞌ mewaliꞌ topopárentá to katálu hangko i kódóꞌ.”

¹⁷Nauliꞌ Danieli, “Ee pueꞌkuꞌ datu, maroꞌa miꞌi parasee to ina nuweꞌiaꞌ, nuweꞌimoheꞌ tauna to ntániꞌna, hai kehapiꞌ noꞌonoꞌ, bateꞌna ina kubásá ukiꞌ iti hai ina kuhángáꞌáꞌákoꞌ lempóna.

¹⁸Datu, Pueꞌ Ala to i Surugáꞌ mampoweꞌi miꞌi Datu Nebukanesa pueꞌmu, kamakuasaꞌ, pebiláꞌ hai kapeawaꞌ.

¹⁹Ánti kamahilena kuasaꞌna to naweꞌi Pueꞌ Ala i hia, onoꞌ miꞌi haneꞌi upu-upu tauna i duniáꞌ hai upu-upu pueꞌ básá moridiꞌ ánti kamalááꞌraꞌ i hia. Ane naundeꞌ mampehuóꞌa tauna bona rapapate, bateꞌna rapapate. Ane naundeꞌ bona tauna rapatodáhi tueꞌ, bateꞌna rapatodáhi. Ia moángkáꞌ hai mampopendáulu heáná peá tauna to mobágóꞌ i lalu kadatuána mouláꞌ peundeꞌána.

²⁰Agáiáná i tempóna mewaliꞌ maꞌángkáꞌ, hai matuꞌa laluna álána masodo ntepuꞌu, ia rapopendáulu hangko i lántiꞌna, hai kapeawaꞌna raꞌala.

²¹Ia rawura hangko i oloꞌraꞌ tauna, hai pekirina mewaliꞌ hibali hai pekiri binataꞌ. Ia tueꞌ hingkakani hai kalide to maila. Pandeꞌna rumpuꞌ hibali hai gapiꞌ, hai wátána naloeꞌi namu to hangko i langiꞌ. Upu-upuna iti mewaliꞌ duuꞌna ia mopangákuꞌ Pueꞌ Ala to i Surugáꞌ to makuasaꞌ i kadatuá tauna, hai Ia peisá moángkáꞌ heáná peá tauna to Napileꞌi mewaliꞌ datu.

²²Upu-upu to mewaliꞌ i pueꞌmu, nuisánto, láwiꞌ io ueꞌnakoꞌ. Agáiáná kehapiꞌ noꞌonoꞌ, tiꞌara nuꞌundeꞌ mengkaiwóiꞌ.

²³Datu, maꞌángkáꞌmokoꞌ i lindoꞌna Pueꞌ to Makuasaꞌ i surugáꞌ. Mangku-mangku to rapakeꞌ i Támbina Pueꞌ Ala, nupopeánti mai i hio, haneꞌi datu hai upu-upu tauna to mapángkáꞌ lántiꞌraꞌ i kadatuá deꞌe, hai upu-upu toináraꞌ hai towawine to rapiaraꞌ, mainukou i mangku iti. Hai motóiákoꞌ ánitu to rabábehi peá hangko i peráꞌ, buláwá, tembaga, besiꞌ, kau hai watu. Ánitu iti tiꞌaraheꞌ peisá meita, tiꞌaraheꞌ peisá mehádi, hai tiꞌaraheꞌ woꞌo moisá apa-apa. Agáiáná Pueꞌ Ala to motibaaꞌ peinaomu hai mopakanótó rárá katueꞌmu, tiꞌara nubiláꞌ.

²⁴Onoꞌ miꞌi haneꞌi Pueꞌ Ala mopakanótó bona niꞌita tae iti to moukiꞌ apa to Napahaweꞌ.

²⁵Ukiꞌ iti ia miꞌi: ‘MENE, MENE, TEKEL, UFARSIN,’ ba: ‘Raimbaꞌ, raimbaꞌ, ratimbá, ragáláꞌ.’

²⁶Hai deꞌe miꞌi lempóna: MENE lempóna raimbaꞌ, láwiꞌ kamaruena popárentána datu naimbaꞌ miꞌi Pueꞌ Ala hai upu miꞌi tempóna.

²⁷TEKEL lempóna ratimbá, láwiꞌ bábehiána datu ratimbá miꞌi mopakeꞌ popetimbá, hai tongawaꞌ ara mani kamakuraꞌmu.

²⁸FARSIN lempóna ragáláꞌ, láwiꞌ kadatuána datu ragáláꞌ miꞌi mewaliꞌ ronggáláꞌ hai raweꞌimoheꞌ toMedia hai toPeresia.”[24]

²⁹Mewaliꞌ hawiáꞌ miꞌi Datu Belesasa mopárentái topobágóꞌna bona mobadui Danieli hai kumbá to malóe to rabábehi hangko i báná to makámumu, hai raꞌáwólói rante buláwá. Hai napahaweꞌ miꞌi datu i tauna to handaꞌ kamoángkáꞌna miꞌi Danieli mewaliꞌ tauna to katálu mepárentá hangko i datu.

³⁰Káindi iti woꞌo Datu Belesasa to mepárentá i Bábeli rapapate.[25]