Read Besoa Danieli 6 Bible Online

Danieli 6 - Besoa bible

Danieli 6

¹I kamatena Belesasa, Dáriu toMedia mewaliꞌ datu i tampoꞌ Bábeli.[26] Tempó iti, umuruꞌna ini puloꞌna hai rompare.

²Dáriu mogáláꞌ kadatuána mewaliꞌ hangatu rompuloꞌ poropensi, hai hambuaꞌ-hambuaꞌ poropensi natadulakoi hadua biti mágáuꞌ.

³Hai naꞌángkáꞌheꞌ woꞌo tálu tauna to mewaliꞌ to i reáraꞌ biti mágáuꞌ, tepasuaꞌ woꞌo Danieli.[27] Hira miꞌi iti to mokámpái pobágóꞌraꞌ biti mágáuꞌ bona tiꞌaraheꞌ ara to mopakanawoꞌ datu.

⁴Tongawaꞌ kamaroꞌana pobágóꞌna Danieli, melumbuꞌ hangko i upu-upu tauna to mapángkáꞌ lántiꞌraꞌ hai upu-upu biti mágáuꞌ, láwiꞌ ia mapánde ntepuꞌu hai bukeꞌ pekiri. Onoꞌ miꞌi haneꞌi datu mampoinao ina moángkáꞌ Danieli mewaliꞌ to mahile kuasaꞌna i upu-upu kadatuána.

⁵Hangko ionoꞌ, upu-upu biti mágáuꞌ hai tauna to mapángkáꞌ lántiꞌraꞌ mopári-pári mampeliꞌ salaꞌna Danieli i lalu pampopolumaona bágóꞌna, agáiáná tiꞌara ralámbiꞌ láwiꞌ Danieli hadua tauna to peisá rapoinálái, to manoroꞌ hai tiꞌara mampomáleꞌá bágóꞌna.

⁶Haneꞌi rauliꞌ tauna to handaꞌheꞌ iti, “Tiꞌara ina talámbiꞌ salaꞌna Danieli moliu pobágóꞌna, agáiáná peisá talámbiꞌ salaꞌna moliu poágámána.”

⁷Mewaliꞌ pohuꞌ mpuꞌumoheꞌ lao mampohidupaꞌá datu haneꞌi rahángáꞌá, “Ee Datu Dáriu. Hampóáꞌworia maroꞌa tueꞌmu haweꞌ i rue-ruena.

⁸Upu-upu tauna to mapángkáꞌ lántiꞌraꞌ i kadatuá deꞌe, upu-upu tadulako, biti mágáuꞌ, hai topobágóꞌ ntániꞌna, himpudumongkaiꞌ. Onoꞌ miꞌi haneꞌi maiangkaiꞌ mampombelámbiꞌá datu, bona datu mopaꞌara hambuaꞌ párentá to hangaa-ngaa rapeuláꞌi ntepuꞌu. Maroꞌa miꞌi datu mopaꞌara párentá to tiꞌara peisá radiiꞌ huleꞌ, bona i lalu tálu puloꞌna alona, tiꞌara ara haweꞌ hadua tauna rapaliu menómbá i ánitu ba i tauna, ngkáliꞌna riꞌi mekakae peheꞌ i datu. Hai heáná peá to moliungi hawaꞌ iti, ina ranawoꞌ i lalu balamba, katoroꞌá singá.

⁹Kipembiáꞌ bona datu motandaꞌ tae sura párentá iti, bona mewaliꞌ hambuaꞌ sura párentá to tiꞌara peisá radiiꞌ huleꞌ, mouláꞌ áturá toMedia hai toPeresia.”

¹⁰Mewaliꞌ Datu Dáriu motandaꞌ tae mpuꞌu miꞌi sura iti.

¹¹Kanahádina peá Danieli sura párentá iti rabábehi miꞌi, ia mesuleꞌ lao i támbina. I lalu támbina ara lintuꞌ to i wongko, hai sungkekeꞌna melindoꞌ tándáꞌ i Ierusale. Ionoꞌ, Danieli molingkudu mekakae hai motóiá Pueꞌ Alana tálu kánina i lalu hangaloá, nodo to biásána paka nabábehi.

¹²Mewaliꞌ tauna to mampoewaliá Danieli iti manggaguheꞌ lao i támbina Danieli. Kapesuaꞌraꞌ peá, rahumba Danieli tangaꞌna mekakae i Pueꞌ Alana.

¹³Karaitána Danieli mekakae i Pueꞌ Alana, liliuheꞌ lao i datu. Mekuneꞌheꞌ, “Tiꞌara paꞌi datu motandaꞌ tae miꞌi sura párentá, bona tiꞌara ara haweꞌ hadua tauna rapaliu mekakae i ánitu ba i tauna, ngkáliꞌna peá i datu? Hai heáná peá to moliungi hawaꞌ iti ina ranawoꞌ i lalu balamba singá.” Nahániki datu, “Toꞌu! Iti mewaliꞌ miꞌi sura párentá to tiꞌara peisá radiiꞌ huleꞌ mouláꞌ áturá toMedia hai toPeresia.”

¹⁴Haneꞌi rapolaluita i datu, rauliꞌ, “Danieli, hadua to ratawani hangko i tampoꞌ Iudá hangkoia, tiꞌara mobiláꞌ datu, hai tiꞌara mampeuláꞌi hawaꞌna datu. Ia mekakae oaꞌ i Pueꞌ Alana tálu kánina i lalu hangaloá.”

¹⁵Kanahádina datu mokana i Danieli, masusa ntepuꞌu laluna, hai napeliꞌ rárá ina mokábáhá Danieli. Duuꞌna haweꞌ támpu alo, napári-pári mani mampeliꞌ rárá ina motulungi Danieli.

¹⁶Taunaheꞌ iti manggagu lao i datu, haneꞌi rauliꞌ, “Ee datu! Maroꞌa miꞌi datu mambuhinao huleꞌ, sura párentá to napopesuwuꞌ miꞌi datu tiꞌara peisá radiiꞌ huleꞌ mouláꞌ áturá toMedia hai toPeresia.”

¹⁷Hangko ionoꞌ, datu mampehawaꞌiá bona Danieli rahakaꞌ hai ranawoꞌ i lalu balamba singá. Molaluita miꞌi datu i Danieli, nauliꞌ, “Hampóáꞌworia paꞌi Pueꞌ Ala to nupenómbái hangko i lalumu ntepuꞌu ina mampelaekoꞌ.”

¹⁸Kaupuna ranawoꞌ, rapoanaꞌi miꞌi watu to mahile i babaꞌ balamba singá, haneꞌi watu iti natandaꞌi datu hai hingkoliꞌ petándái kadatuá, hai ratandaꞌi woꞌo upu-upu tauna to mapángkáꞌ lántiꞌraꞌ to mobágóꞌ i kadatuá, bona tiꞌara ara haweꞌ hadua to peisá motulungi Danieli hangko i singá to handaꞌ iti.

¹⁹Hangko ionoꞌ, mesuleꞌ miꞌi datu lao i támbi kadatuána. Ia tiꞌara mau mandeꞌ, tiꞌara woꞌo mau mokióꞌ to mepalindó, hai tiꞌara letaꞌ hambengiá.

²⁰Hungkuꞌ mabaa, mearó miꞌi datu haneꞌi manggagu lao i balamba singá.

²¹Kahungkuꞌna peá ionoꞌ, mekióꞌ miꞌi iti datu hai kabata-bata lalu, nauliꞌ, “Danieli huoꞌána Pueꞌ Ala to tueꞌ! Ba nabuku mpuꞌui Pueꞌ Ala to nupenómbái mampelaekoꞌ hangko i singá to handaꞌ iti?”

²²Nahániki Danieli, nauliꞌ, “Hampóáꞌworia maroꞌa tueꞌna datu haweꞌ i rue-ruena.

²³Pueꞌ Ala to kupenómbái, mohuoꞌ miꞌi mai malaꞌekaNa, bona moparauꞌ humeraꞌ singá haneꞌi tiꞌaraꞌaꞌ rapopoapa, láwiꞌ Naisá tiꞌaraꞌaꞌ masalaꞌ i lindoꞌNa hai tiꞌaraꞌaꞌ woꞌo masalaꞌ i lindoꞌna datu.”

²⁴Góeꞌ ntepuꞌu laluna datu haneꞌi napehawaꞌiá bona Danieli radiiꞌ mai hangko i balamba singá iti. Katebuáꞌna Danieli, tongawaꞌ ntepuꞌu tiꞌara ara to belána haweꞌ hantódiꞌ ánti pepoináláina i Pueꞌ Alana.

²⁵Hangko ionoꞌ, datu mampehawaꞌiá miꞌi bona tauna to mampehángáꞌá Danieli rahakaꞌ hingkakani hai toináraꞌ hai ánáꞌraꞌ, haneꞌi ranawoꞌ i lalu balamba singá iti. Tiꞌara maniheꞌ tóá i tampoꞌ, nahintákimoheꞌ singá. Mogalo buꞌu-buꞌuraꞌ marupuꞌ.

²⁶Roo onoꞌ, Datu Dáriu mopakatu sura i upu-upu roboꞌ hai i upu-upu pueꞌ básá i humalele tampoꞌ to nakuasaꞌi. Óntóꞌna sura node: “Tabeá. Hampóáꞌworia ina mantámbái kamaroꞌana katueꞌmi.

²⁷Bona niꞌisá: kuweꞌikou párentá. Upu-upu tauna i humalele kadatuángkuꞌ hangaa-ngaa mengkoruꞌ hai mobiláꞌ Pueꞌ Ala to napenómbái Danieli, láwiꞌ Ia miꞌi Pueꞌ Ala to tueꞌ haweꞌ i rue-ruena, hai popárentáNa tiꞌara ina tuna, kuasaꞌNa tiꞌara ina mokahópóꞌá.

²⁸Ia mepelae hai metulungi. Ia nabuku mobábehi tandaꞌ kuasaꞌ i langiꞌ hai i tampoꞌ. Ia miꞌi to mokábáhá Danieli hangko i singá to handaꞌ.”

²⁹Hangko ionoꞌ, Danieli mewaliꞌ tauna to mapángkáꞌ ntepuꞌu lántiꞌna i popárentána Datu Dáriu hai popárentána Koresi toPeresia.