Read Besoa Danieli 7 Bible Online

Danieli 7 - Besoa bible

Danieli 7

¹I pare to kaꞌisáꞌ Datu Belesasa mepárentá i Bábeli,[28] tangaꞌkuꞌ letaꞌ i paturuángkuꞌ, kódóꞌ Danieli molámbiꞌaꞌ pampetudeꞌá moliu paturu. Mewaliꞌ upu-upu to kuita moliu pampetudeꞌá iti, kuꞌukiꞌ. Deꞌe miꞌi pampetudeꞌá to kuita:

²Tangaꞌ káindi tangaꞌkuꞌ letaꞌ, iaperámoꞌ mopaturuá. I lalu paturungkuꞌ, moitaꞌaꞌ wui to rumihi hangko i iba mai boloꞌna. Wui to rumihi iti mopaꞌara bálumbá to mahile ntepuꞌu i tahiꞌ.

³Hangko ionoꞌ, kuita ara iba báꞌáraꞌ binataꞌ to mahile ntepuꞌu mesupaꞌ hangko i lalu tahiꞌ, hai binataꞌ to iba báꞌáraꞌ iti montaniꞌ-ntaniꞌ lenggeꞌraꞌ.

⁴Binataꞌ to rungu-runguna kuita, lenggeꞌna nodo singá[29] hai mokapi nodo kápina koꞌaaꞌ. Tangaꞌna mani kupepeita, iaperái mawehángi upu-upu kápina. Hangko ionoꞌ binataꞌ iti rapopeángkáꞌ nodo peángkáꞌna tauna, hai tempó iti woꞌo ia rapoweꞌi pekiri nodo pekiri tauna.

⁵Binataꞌ to karombáꞌána, lenggeꞌna nodo beruá. Binataꞌ iti motubeiꞌ peángkáꞌna,[30] hai mampokalahika mani tálu tepóꞌna buꞌu óhóꞌ. Ara to mohángáꞌá node: “Anaꞌ, mandeꞌkoꞌ bauꞌ nupahandaꞌ.”

⁶Hangko ionoꞌ, kuita wopiꞌi binataꞌ to ntániꞌna, lenggeꞌna nodo sóeꞌ lómpu to mahile,[31] agáiáná i káduꞌna binataꞌ iti ara iba wuaꞌna kapi tádáhi.[32] Binataꞌ iti mowuáꞌ iba[33] hai raweꞌi kuasaꞌ mepárentá.

⁷Roo onoꞌ, kuita i pampetudeꞌá, iaperái hangkaꞌ mesupaꞌ binataꞌ to kaꞌiba to melááꞌ-lááꞌi,[34] hai binataꞌ iti maróhó ntepuꞌu. Ia mampongihi besiꞌ to mahile. Upu-upu to nahakaꞌ narupuꞌ sieruꞌ hangko naꞌandeꞌ riꞌi. Pelábiána naꞌandeꞌ, nakada-kada. Binataꞌ iti montaniꞌ hangko i binataꞌ to mesupaꞌ ioru, hai binataꞌ iti motánduꞌ hampuloꞌ.

⁸Tangaꞌna kupepeita tánduꞌna binataꞌ iti, iaperái mesupaꞌ tánduꞌ to ntániꞌna hangko i hiliꞌna tánduꞌ to hampuloꞌ. Tánduꞌ to mesupaꞌ iti kókóiꞌ. I kamesupaꞌna peá tánduꞌ iti, tálu wuaꞌna tánduꞌ to ioru mapupuhi, hai tánduꞌ to kókóiꞌ iti pomata hai pohume nodo tauna. Upu-upu laluita to nahuwárá, laluita to maꞌángkáꞌ.

⁹I kakupeitána mani pampetudeꞌá, kuita ara bahangapa pehodaꞌá datu rawoli i surugáꞌ. Hangko ionoꞌ, Ia to Tueꞌ Duuꞌna i Rue-ruena mehoda i hambuaꞌ pehodaꞌá. Waruꞌ to Napakeꞌ, bulá ntepuꞌu nodo kabulána gawu mepulo, hai weluáꞌNa woꞌo bulá nodo wulu dimbá. Pehodaꞌána ara rodaꞌna hai roreꞌ nodo karoreꞌna api.

¹⁰Hai api to roreꞌ oaꞌ mendele hangko i pehodaꞌána, hai i sábuna tauna meángkáꞌ i lindoꞌNa, timamaheꞌ ina mampeuláꞌi hawaꞌNa. Hangko ionoꞌ, pobutusi kara-kara ratepuꞌu miꞌi, hai sura poukiꞌá upu-upu bábehiá[35] rabungkáhi miꞌi.

¹¹I kakupeitána oaꞌ apa to mewaliꞌ iti, kuhádi tánduꞌ to kókóiꞌ iti mohuwárá mani laluita to maꞌángkáꞌ. Kahópóꞌána, binataꞌ to kaꞌiba iti rapapate hai wátána ratibe i lalu api to roreꞌ duuꞌna tuna naꞌandeꞌ api.

¹²Mewaliꞌ binataꞌ to ntániꞌna to kuita, tiꞌarapoheꞌ raweꞌi kuasaꞌ, hai tempó katueꞌraꞌ tepakanótó miꞌi.

¹³Moliu pampetudeꞌá iti woꞌo, kuita wopiꞌi to nodo ánáꞌ mánusiá[36] hai kahaweꞌna tauna iti, kuita napótóꞌ gawu.[37] Ia liu-liu lao monóntóhi Ia to Tueꞌ Duuꞌna i Rue-ruena,[38] haneꞌi ia raꞌánti lao i lindoꞌNa.

¹⁴Ia raweꞌi kuasaꞌ mepárentá bona rabiláꞌ, onoꞌ miꞌi haneꞌi upu-upu tauna hangko iumbá-umbá peá kaꞌaraꞌáraꞌ, hai upu-upu básá, mouláꞌheꞌ hawaꞌna. Kamakuasaꞌna iti ina ara duuꞌna i rue-ruena, hai kadatuána tiꞌara ina tuna.

¹⁵Upu-upu pampetudeꞌá to kuita iti mopawuli hai mopakasusa lalungkuꞌ.

¹⁶Laoaꞌ mohungkuki hadua tauna to meángkáꞌ ionoꞌ, hai kupembiáꞌ bona nahángáꞌáꞌáꞌaꞌ apa lempóna upu-upu to kuita iti. Mewaliꞌ nahángáꞌáꞌá mpuꞌumoꞌ lempóna iti,

¹⁷nauliꞌ, “Iba báꞌáraꞌ binataꞌ to mahile iti, lempóna iba kadatuá to ina ara i duniáꞌ.

¹⁸Agáiáná taunána Pueꞌ Ala to i Surugáꞌ, ina raweꞌiheꞌ woꞌo kuasaꞌ mepárentá, hai popárentáraꞌ iti ina ara duuꞌna i rue-ruena.”

¹⁹Hangko ionoꞌ, kupoinao mani kuisá lempóna binataꞌ to kaꞌiba to montaniꞌ hangko i binataꞌ to ntániꞌna, láwiꞌ binataꞌ iti melááꞌ-lááꞌi ntepuꞌu, hai ngihina hangko i besiꞌ, hai kánuna hangko i tembaga. Upu-upu to nahakaꞌ, narupuꞌ sieruꞌ hangko naꞌandeꞌ riꞌi hai pelábiána nakada-kada.

²⁰Kupoinao woꞌo kuisá apa lempóna tánduꞌ to hampuloꞌ to ara i wuáꞌna, hai mokana tánduꞌ to kókóiꞌ to mesupaꞌ i bókóꞌ hai mowehángi tálu wuaꞌna tánduꞌ to mesupaꞌ rungu-runguna. Tánduꞌ to kókóiꞌ iti pomata hai pohume. Upu-upu laluita to nahuwárá, laluita to maꞌángkáꞌ, hai tánduꞌ to kókóiꞌ iti melumbuꞌ periringkuꞌina hangko i tánduꞌ to ntániꞌna.

²¹Kuita tánduꞌ to kókóiꞌ iti moewaꞌ taunána Pueꞌ i lalu pombeala, hai hungkuꞌheꞌ ina nanangi tánduꞌ to kókóiꞌ iti.

²²Agáiáná tangaꞌraꞌ mombeala, Ia to Tueꞌ Duuꞌna i Rue-ruena haweꞌ mai mobutusi kárá-káráraꞌ taunáNa. Mewaliꞌ katongawaꞌána upu-upuna taunána Pueꞌ Ala tiꞌara ara katesalaꞌiáraꞌ, láwiꞌ manótó bábehiáraꞌ. Hangko ionoꞌ, taunána Pueꞌ Ala to i Surugáꞌ ina mantepuꞌu miꞌi mepárentá.

²³Mewaliꞌ tauna iti mohánikiaꞌ node: “Binataꞌ to kaꞌiba iti ia miꞌi kadatuá to kaꞌiba to ina mokuasaꞌi humalele duniáꞌ. Kadatuá iti ina montaniꞌ hangko i kadatuá to ntániꞌna. Ina moropuꞌ upu-upu óntóꞌ duniáꞌ, hai pelábiána ina napopeahiahiꞌheꞌ hai nagero.

²⁴Tánduꞌ to hampuloꞌ iti ia miꞌi hampuloꞌ datu to ina mepárentá i kadatuá iti. Roo onoꞌ, ina ara wopiꞌi hadua datu. Ia ina montaniꞌ ntepuꞌu hangko i datu to rungu-runguna, hai tálu datu ina nanangiheꞌ.

²⁵Ia ina mohuwárá laluita to mopakóiꞌ Pueꞌ Ala to i Surugáꞌ, hai ina mampopeahiahiꞌ taunána Pueꞌ Ala. Ia ina mopári-pári mobáliki áturá-áturá poagama hai alo posusaꞌáraꞌ taunána Pueꞌ Ala, hai ia ina makuasaꞌ tálu parena hantangaꞌ.

²⁶Kanahópóꞌna peá tálu parena hantangaꞌ, Pueꞌ Ala to i Surugáꞌ ina mopaꞌara pobutusi kara-kara. Mewaliꞌ pobutusiNa, kamakuasaꞌna datu iti ina raꞌala, hai ia ina raropuꞌ duuꞌna tuna.

²⁷Upu-upu kadatuá hai kamakuasaꞌ i duniáꞌ ina napeweꞌi Pueꞌ Ala to i Surugáꞌ i taunáNa, hai kamakuasaꞌraꞌ mepárentá tiꞌara ina mokahópóꞌá. Upu-upu to makuasaꞌ to ara i duniáꞌ ina mampeuláꞌi hawaꞌraꞌ.”

²⁸Eneꞌ miꞌi daritakáná mokana i pampetudeꞌá to rapetudeꞌá i kódóꞌ, Danieli. Mewaliꞌ maꞌángkárá ntepuꞌu kuhádi haneꞌi kupepekiri, onoꞌ miꞌi haneꞌi lindoꞌkuꞌ mewaliꞌ mabádáꞌ, hai upu-upuna iti kupailalu.