Read Besoa Danieli 8 Bible Online

Danieli 8 - Besoa bible

Danieli 8

¹I katáluna parena popárentána Datu Belesasa,[39] kódóꞌ Danieli molámbiꞌ wopaꞌaꞌ pampetudeꞌá to karompákáꞌna.

²I lalu pampetudeꞌá iti, kódóꞌ araꞌaꞌ i kótá Susana to natolelingi bente to maróhó, to ara i poropensi Elam. I lalu pampetudeꞌá iti, kódóꞌ meángkáꞌaꞌ i wiwi uwai Ulai.

³I wiwi uwai iti, kuita hambaꞌa dimbá laki[40] meángkáꞌ, hai tánduꞌna rombuaꞌ kálángá, agáiáná hangkau melosoꞌ kakálángána. To melosoꞌ kakálángána iti, i bókóꞌ tueꞌ.

⁴Kuita dimbá iti metánduꞌ melindoꞌ tándáꞌ i katámpuá alo, tándáꞌ i wongko, hai tándáꞌ i wóiꞌ.[41] Binataꞌ iti maróhó ntepuꞌu, onoꞌ miꞌi haneꞌi tiꞌara ara binataꞌ to monangi, hai tiꞌara ara haweꞌ hambaꞌa binataꞌ to peisá tekábáhá hangko i kamakuasaꞌna. Binataꞌ iti maꞌángkáꞌ ntepuꞌu hai mouláꞌ peá peundeꞌána haduduána.

⁵Tangaꞌkuꞌ mani mampeita binataꞌ iti, iaperái hangkaꞌ mesuwuꞌ hambaꞌa bekeꞌ laki[42] hangko tándáꞌ i katámpuá alo. Ia melangka duuꞌna haweꞌ i pembetoá alo. Ánti kamagásiꞌna, bitina tiꞌara piꞌi tóá i tampoꞌ. Tánduꞌna bekeꞌ iti hangkau peá hai mahile ntepuꞌu, tueꞌ i hiliꞌ mátána.

⁶I kahaweꞌna bekeꞌ iti, liliu mohungkuki dimbá to kuita meángkáꞌ i wiwi uwai. Bekeꞌ iti masodo ntepuꞌu. Ia kásáliu moewaꞌ dimbá iti.

⁷Kuita bekeꞌ iti mohungkuki dimbá iti, hai ánti kamasodona, ia motánduꞌ dimbá iti duuꞌna matepóꞌ tánduꞌna to rombuaꞌ. Láwiꞌ tiꞌara piꞌi ara róhóna meꞌewaꞌ, dimbá iti nahepenga bekeꞌ i tampoꞌ haneꞌi nakada-kada. Tiꞌara ara haweꞌ hadua to nabuku mamperuruꞌi dimbá iti.

⁸Ánti kamenangina bekeꞌ iti, mantámbái kamaꞌángkáꞌna hai kamakuasaꞌna. Agáiáná i tempóna maróhó ntepuꞌu kuasaꞌna, matepóꞌ tánduꞌna to mahile, haneꞌi i katepóꞌána tánduꞌ iti, nakatueꞌi iba wuaꞌna tánduꞌ to mahile, hambuaꞌ-hambuaꞌ montaniꞌ pelindoꞌána mouláꞌ mata angi.

⁹Hangko i hambuaꞌ tánduꞌ to iba iti, mesupaꞌ hambuaꞌ tánduꞌ to kókóiꞌ,[43] hai tueꞌ duuꞌna mahile ntepuꞌu. Kamakuasaꞌna haweꞌ-haweꞌ tándáꞌ i wóiꞌ, tándáꞌ i pembetoá alo, hai haweꞌ woꞌo tándáꞌ i tampoꞌ Sáráeliꞌ, tampoꞌ to meawaꞌ.

¹⁰Tánduꞌ iti kamahile-hileá hai maróhó, onoꞌ miꞌi haneꞌi nabuku moewaꞌ surudadoꞌ surugáꞌ.[44] Hantángáꞌ surudadoꞌ surugáꞌ iti nanawoꞌheꞌ i tampoꞌ haneꞌi nakada-kada.

¹¹Mogalo riꞌi Tadulako Surudadoꞌ i Surugáꞌ,[45] naewaꞌ, hai popenómbá to rahuhuꞌ alo-alona i Pueꞌ, napekóntói. Noꞌonoꞌ woꞌo Támbina Pueꞌ Ala to magasaꞌ ina nagero.

¹²Tánduꞌ to kókóiꞌ iti mopaliu surudadoꞌna mampopengkaroo pohuhuꞌ popenómbá to raintu alo-alona, tandaꞌ peꞌewaꞌna, hai apa to manótó natitibei.[46] Upu-upuna to naundeꞌ nabábehi, ina mewaliꞌ.

¹³Hangko ionoꞌ, kuhádi rodua malaꞌeka mombekuneꞌheꞌ, rauliꞌ, “Hangapa mani kamaruena hangko mewaliꞌ riꞌi pampetudeꞌá deꞌe? Hangapa mani kamaruena dósá ina mokuasaꞌiheꞌ tauna to mohuhuꞌ popenómbáraꞌ i Pueꞌ?[47] Hai hangapa mani kamaruena Pueꞌ Ala ina mopatodáhi támbi penómbáꞌá hai surudadoꞌ surugáꞌ ina nakada-kada tánduꞌ to kókóiꞌ iti?”

¹⁴Nahániki malaꞌeka to ntániꞌna, “Rosábu tálu átuna mani kánina, tiꞌaraheꞌ peisá mohuhuꞌ popenómbá alo-alona i Pueꞌ, ia miꞌi mepulo hai kalumbaꞌ. {Kamaruena iti hasábu hangatu lima puloꞌna alona.}[48] Liu riꞌi tempó iti, {hangko peisá wopaheꞌ mohuhuꞌ popenómbáraꞌ, láwiꞌ} Támbina Pueꞌ Ala ina rapamagasaꞌ huleꞌ.”

¹⁵Tangaꞌna mani kupepekiri apa lempóna pampetudeꞌá iti, iaperái hangkaꞌ meángkáꞌ i lindoꞌkuꞌ to nodo hadua tauna tobaleilo.

¹⁶Roo onoꞌ, kuhádi wopiꞌi wambaꞌ tauna to ntániꞌna hangko i uwai Ulai to molaluita, nauliꞌ node: “Gábáráeliꞌ, nupakanótóá miꞌi tobaleilo iti bona naisá apa lempóna pampetudeꞌá deꞌe.”

¹⁷Mewaliꞌ mai mpuꞌu miꞌi mengkahungkuꞌ i kódóꞌ. Kahungkuꞌna peá i kódóꞌ, malááꞌaꞌ, mewaliꞌ madungkáꞌaꞌ tepalumbá. Kanaitángkuꞌ peá tepalumbá, nahángáꞌáꞌáꞌaꞌ, “Bona nuisá, ánáꞌ mánusiá: pampetudeꞌá iti mokana i kahópóꞌána duniáꞌ.”

¹⁸Tangaꞌna mani molaluita i kódóꞌ, liliuaꞌ malimpu i katepambákáꞌángkuꞌ, agáiáná natibaaꞌaꞌ Gábáráeliꞌ bona kubuku peá meángkáꞌ, haneꞌi nauliꞌ,

¹⁹“Ina kuhángáꞌáꞌákoꞌ apa to ina mewaliꞌ i kahópóꞌána duniáꞌ i tempó kamabukoꞌna Pueꞌ Ala.

²⁰Mokana dimbá to nuita iti to motánduꞌ rombuaꞌ, molempónga rodua datu, ia miꞌi daturaꞌ toMedia hai daturaꞌ toPeresia.

²¹Bekeꞌ laki iti, molempónga kadatuá Iunani, hai tánduꞌ to mahile to tueꞌ i hiliꞌ mátána, molempónga datu to rungu-runguna i kadatuá iti.[49]

²²Iba wuaꞌna tánduꞌ to mesupaꞌ i katepóꞌána tánduꞌ to mahile,[50] lempóna, iba kadatuá ina mesupaꞌ hangko i kadatuána Iunani, agáiáná kamaróhóna tiꞌara ina hibali hai kadatuá to rungu-runguna.

²³I tempó kahópóꞌána kadatuá iti, bábehiá tauna ina mantámbái ntepuꞌu kakadakena. I tempó onoꞌ woꞌo, hadua datu to masodo ntepuꞌu hai mapánde meákálángi[51] ina mantepuꞌu mepárentá.

²⁴Ia ina mewaliꞌ maróhó, agáiáná kamaróhóna iti tiꞌara róhóna haduduána. Ia ina mopatuna upu-upu {to tiꞌara mouláꞌ párentána}. Hai apa peá to nabábehi, ina mewaliꞌ. Upu-upu tauna to makuasaꞌ ina napapate, noꞌonoꞌ woꞌo tauna to mepoinálái i Pueꞌ.

²⁵Ánti kamapándena meákálángi, handaꞌ tauna to tiꞌara mosangka-sangka kaꞌina napapateraꞌ. Apa peá to nabábehi hangaa-ngaa mewaliꞌ, onoꞌ miꞌi haneꞌi ia ina mewaliꞌ maꞌángkáꞌ ntepuꞌu, hai ina pebáiꞌ moewaꞌ Pueꞌ Ala, Datu to melumbuꞌ kamakuasaꞌNa hangko i upu-upu datu. Agáiáná ina haweꞌ tempóna datu iti ina manangi, agáiáná tiꞌara tauna to ina monangi.[52]

²⁶Mokana i pampetudeꞌá pohuhuꞌ popenómbá kalumbaꞌ hai mepulo,[53] pampetudeꞌá iti toꞌu kaꞌina mewaliꞌna, agáiáná hangaa-ngaa nuwuniángi i heáná peá láwiꞌ pewaliꞌána deꞌe marue mani hangko mewaliꞌ riꞌi.”

²⁷Karoongkuꞌ molámbiꞌ pampetudeꞌá moliu paturungkuꞌ, kódóꞌ Danieli maledeꞌ ntepuꞌuaꞌ hai tiꞌara kulalu bahanoumbá alona kamaruena. I kakulaluna miꞌi, timama wopaꞌaꞌ mampopolumao bágóꞌ to nahawaꞌiáꞌaꞌ Datu Belesasa, agáiáná masusa oaꞌ lalungkuꞌ mampekiri apa lempóna pampetudeꞌá iti.