Read Besoa Danieli 9 Bible Online

Danieli 9 - Besoa bible

Danieli 9

¹Hangkani tempó, Dáriu ánáꞌna Ahasiwero[54] toMedia, mewaliꞌ datu i Bábeli.[55] I pare to kaꞌisáꞌ popárentána,[56] kódóꞌ Danieli, mobásáꞌaꞌ apa to naukiꞌ nabiꞌ Ieremia mokana i kamagerona kótá Ierusale. Hai to kubásá, kamagerona kótá iti ina mewaliꞌ pitu puloꞌna parena kamaruena.[57] Mewaliꞌ kupekiri oaꞌ apa to napahaweꞌ Pueꞌ i nabiꞌ Ieremia iti {láwiꞌ hungkuꞌ miꞌi hópóꞌ tempó pehuku}.

³Mewaliꞌ mekakaeaꞌ i Pueꞌ Ala hangko i lalungkuꞌ ntepuꞌu, kupembiáꞌ bona Napatongawaꞌ mpuꞌu kamaꞌahiꞌNa. Mopuasaꞌaꞌ hai mopakeꞌaꞌ waruꞌ ngkasusa to rabábehi hangko i karuꞌ haneꞌi mehodaꞌaꞌ i awu, tandaꞌ kamasusangkuꞌ.

⁴Upu-upu dósáraꞌ hangka toIahudiꞌkuꞌ kupangákuꞌ i Pueꞌ Ala to kupenómbái. Kuꞌuliꞌ node: “Ó Pueꞌ to Makuasaꞌ, kubiláꞌKoꞌ láwiꞌ Nubukeki miꞌi dándiMu, hai kamaꞌahiꞌMu tiꞌara ara katebálikiána i tauna to mampokaꞌahiꞌKoꞌ hai mampeuláꞌi párentáMu.

⁵Kaiꞌ mobábehimongkaiꞌ kamasalaꞌ. Madósámongkaiꞌ. Kadake pambiárángkiꞌ. PárentáMu hai áturáMu kiliungi,

⁶hai tiꞌaraꞌangkaiꞌ mampoinálái laluitana nabiꞌ-nabiꞌMu to rapahaweꞌ i upu-upu datungkiꞌ, i tadulakongkiꞌ, i totosaengkiꞌ, hai i upu-upu toSáráeliꞌ ntániꞌna.

⁷Ó Pueꞌ! Upu-upu to Nubábehi hintotoꞌ hai manótó. Bábehiángkiꞌ kipokahili haduduángkiꞌ, kaiꞌ to toroꞌ i tampoꞌ Iudá hai i kótá Ierusale, hai upu-upu toSáráeliꞌ to mahawuꞌangkaiꞌ iumbá-umbá peá kaꞌaraꞌángkiꞌ, láwiꞌ tiꞌaraꞌangkaiꞌ tetidaꞌ i Hio.

⁸Ó PUEꞌ! Upu-upuangkaiꞌ, tepasuaꞌ datungkiꞌ hai upu-upu tadulakongkiꞌ, hai totosaengkiꞌ, mobábehiangkaiꞌ bábehiá to mehihiliꞌi, hai madósáꞌangkaiꞌ i Hio.

⁹Pueꞌ! Kehapiꞌangkaiꞌ meꞌewaꞌ, agáiáná Io to bukeꞌ peámpungi hai kamaꞌahiꞌ.

¹⁰Tiꞌaraꞌangkaiꞌ mouláꞌ laluitaMu i tempóngkiꞌ Nuhuoꞌ mampeuláꞌi hawaꞌMu. Paturoꞌ iti Nuweꞌimongkaiꞌ moliu huoꞌámu, ia miꞌi nabiꞌ-nabiꞌ.

¹¹Upu-upuangkaiꞌ toSáráeliꞌ moliungimongkaiꞌ áturáMu, hai salaꞌ rárámongkaiꞌ láwiꞌ tiꞌaraꞌangkaiꞌ mampehádingi laluitaMu. Kaiꞌ madósámongkaiꞌ i Hio, onoꞌ miꞌi haneꞌi Nuhukumongkaiꞌ hiolaꞌ hai apa to teukiꞌ i lalu surana Musa huoꞌáMu.[58]

¹²Upu-upuna iti mewaliꞌ hiolaꞌ hai popakanótóMu, onoꞌ miꞌi haneꞌi kaiꞌ hai upu-upu to mopárentáꞌangkaiꞌ molámbiꞌmongkaiꞌ pehuku. Kótá Ierusale molámbiꞌ miꞌi pehuku to melumbuꞌ hangko i kótá ntániꞌna to ara i duniáꞌ.

¹³Hiolaꞌ hai apa to naukiꞌ Musa, hinángkáꞌ kapári morampemongkaiꞌ tandaꞌ pehukuMu, agáiáná kehapiꞌ noꞌonoꞌ, tiꞌara mani kiꞌisá membiáꞌ ahiꞌ i Hio PUEꞌ Ala, hai upu-upu kamasalaꞌkiꞌ, tiꞌara kipenosoꞌi. Tiꞌaraꞌangkaiꞌ woꞌo mampeuláꞌi paturoꞌMu.

¹⁴Ó PUEꞌ Ala to kipenómbái, Nuhukumongkaiꞌ hai kapári to Nupatimama miꞌi ami. Upu-upuna to Nubábehi hintotoꞌ hai manótó, agáiáná tiꞌara maniangkaiꞌ mampehádingi laluitaMu.

¹⁵Ó PUEꞌ Ala to kipenómbái, kamakuasaꞌMu Nupatongawaꞌámongkaiꞌ i kamampopesuwuꞌMu taunáMu hangko i tampoꞌ Másiriꞌ, hai hangaꞌMu iti rabuhinao oaꞌ hai rapomahile haweꞌ deꞌe-deꞌe. Pueꞌ, masalaꞌmongkaiꞌ hai madósámongkaiꞌ i Hio.

¹⁶Ó Pueꞌ, hintotoꞌ hai kamaꞌahiꞌMu, Nupeámpáráimongkaiꞌ hangko i ewálingkiꞌ. Mewaliꞌ ineeꞌ miꞌi Nupaliliu poliwoMu ina mohuku Ierusale, kótá to Nukatoroꞌi, buluꞌ Sio to magasaꞌ.[59] Ánti kamasalaꞌkiꞌ hai kakadakeraꞌ toiorungkiꞌ, onoꞌ miꞌi haneꞌi tauna ntániꞌna mopakóiꞌheꞌ kótá Ierusale hai taunáMu.

¹⁷Ó Pueꞌ Ala to kipenómbái, kupembiáꞌ bona Nupehádingi pekakaengkuꞌ hai pembiáꞌkuꞌ. Kódóꞌ deꞌe huoꞌáMu. Kupembiáꞌ bona TámbiMu to magasaꞌ Nupopesuleꞌ huleꞌ hangko i karagerona, bona raisá upu-upu tauna kaꞌIona Pueꞌ Ala.

¹⁸Ó Pueꞌ Ala, Nupehádingiangkaiꞌ, Nupeitaꞌangkaiꞌ, Nupelaeangkaiꞌ hingkakani hai kótá to rauliꞌ kótáMu to magasaꞌ. Ó Pueꞌ, mekakaeangkaiꞌ i Hio, tiꞌara ánti bábehiángkiꞌ to manótó i peitáMu, agáiáná ánti kamahilena kamaꞌahiꞌMu.

¹⁹Ó Pueꞌ, Nupehádingiangkaiꞌ, Nuámpungiangkaiꞌ. Nupahawiáꞌ miꞌi petulungiMu bona upu-upu tauna ina moisá Io miꞌi Pueꞌ Ala, láwiꞌ Ierusale hai upu-upu taunána, Io miꞌi to mampopueꞌ.”

²⁰Mewaliꞌ mekakaeaꞌ oaꞌ mopangákuꞌ i PUEꞌ Ala dósángkuꞌ hai dósáraꞌ hangka toSáráeliꞌkuꞌ. Hai kupembiáꞌ woꞌo bona TámbiNa to ara i buluꞌ Sio to magasaꞌ, ina raꞌaró huleꞌ.

²¹Tangaꞌkuꞌ mekakae, Gábáráeliꞌ to hangkani miꞌi kuita iaꞌo i lalu pampetudeꞌá,[60] membara mai i kódóꞌ i tempó pohuhuꞌ popenómbá kalumbaꞌ.

²²Mewaliꞌ napatuntuáꞌaꞌ Gábáráeliꞌ, nauliꞌ, “Danieli, kódóꞌ deꞌe maiaꞌ motulungikoꞌ bona nuisá apa to ina mewaliꞌ.

²³Tempómu membiáꞌ tulungi i Pueꞌ Ala, pembiáꞌmu iti Nahániki. Onoꞌ miꞌi haneꞌi maiaꞌ i hio bona peisá kupahaweꞌ hánikina pembiáꞌmu láwiꞌ napokaꞌahiꞌ ntepuꞌukoꞌ Pueꞌ Ala. Mewaliꞌ nupehádingi mpakaroꞌa apa to kupakanótóákoꞌ, pehániꞌna Pueꞌ Ala mokana i apa to Natudeꞌámokoꞌ.

²⁴Pitu puloꞌna kánina pitu parena {ia miꞌi iba átuna hai hahioꞌ puloꞌna parena} to napakanótó Pueꞌ Ala, Ia ina mampelae hangka toSáráeliꞌmu hai kótámu to magasaꞌ iti hangko i dósá hai bábehiá to kadake. Hinángkáꞌ dósá ina raꞌámpungi, hai Pueꞌ Ala ina mepárentá i kanótó-nótóána haweꞌ i rue-ruena. Iti ina mewaliꞌ bona tongawaꞌ pampetudeꞌá iti, hai laluitana nabiꞌ-nabiꞌ ina tebukeki. Hai támbina Pueꞌ Ala ina rapamagasaꞌ huleꞌ.

²⁵Mewaliꞌ hangaa-ngaa nuisá hai nupailalu: mantepuꞌu hangko i karapopesuwuꞌna párentá kótá Ierusale hangaa-ngaa raꞌaró huleꞌ,[61] duuꞌna kahaweꞌna hadua Tadulako to napileꞌi Pueꞌ Ala ina mewaliꞌ Datu,[62] ina ara tempó iba puloꞌna hai hahioꞌ parena[63] motámbái iba átuna tálu puloꞌna hai iba parena.[64] Hai kótá iti ina raꞌaró huleꞌ. Upu-upu rárána hai bentena kótá Ierusale ina rapakaroꞌangi, agáiáná iti ina mewaliꞌ i tempó kapári.[65]

²⁶I kahópóꞌána tempó to tepakanótó iti, tadulako to napileꞌi Pueꞌ Ala ina rapapate, kehapiꞌ tiꞌaranto masalaꞌ. Hai ina haweꞌ surudadoꞌna datu to maróhó, haneꞌiheꞌ ina mogero kótá Ierusale hai Támbina Pueꞌ Ala. Kahópóꞌána iti ina mewaliꞌ hangkaꞌ-hangkaꞌ nodo pelábóꞌna uwai. Hai haweꞌ i kahópóꞌána duniáꞌ, ina ara oaꞌ pombeala hai kamaropuꞌ. Upu-upuna iti ina mewaliꞌ hiolaꞌ hai apa to tepakanótó miꞌi.

²⁷Datu iti ina mopaꞌara podándi hai tauna to handaꞌ. Dándi iti ina mewaliꞌ i lalu pitu parena kamaruena. I laentangaꞌna pare podándi iti, ia ina mampopengkaroo popaꞌara popenómbá to rasambale hai popenómbá to ntániꞌna. Hangko ionoꞌ, hampákáꞌ to meriringkuꞌi to rauliꞌ To Kadake to Megero,[66] ina rapatoroꞌ i Támbina Pueꞌ Ala duuꞌna haweꞌ tempó to napakanótó Pueꞌ Ala, datu iti ina rapapate.”