Read Besoa Matiu 1 Bible Online

Matiu 1 - Besoa bible

Matiu 1

¹Deꞌe miꞌi daritakáná Iesu, pemuleꞌána Datu Daudiꞌ, pemuleꞌána Burahima. Mantepuꞌu hangko i Burahima haweꞌ i Datu Daudiꞌ, hangaꞌraꞌ toioruna Iesu, deꞌemoheꞌe:

²Burahima momuleáka Isakiꞌ; Isakiꞌ momuleáka Iako; Iako momuleáka Iudá hai halalunaheꞌ;[1]

³Iudá momuleáka Peresi hai Sera (ináraꞌ rahangaꞌ Tama);[2] Peresi momuleáka Hesero; Hesero momuleáka Rama;

⁴Rama momuleáka Aminadaꞌ; Aminadaꞌ momuleáka Nahaso; Nahaso momuleáka Salomo;

⁵Salomo momuleáka Boasi (inána rahangaꞌ Raha);[3] Boasi momuleáka Obeꞌ (inána rahangaꞌ Ruti);[4] Obeꞌ momuleáka Isai;

⁶hai Isai momuleáka Datu Daudiꞌ. Mantepuꞌu hangko i Datu Daudiꞌ haweꞌ i karatawaniáraꞌ toIahudiꞌ lao i kótá Bábeli, hangaꞌraꞌ to toioruraꞌ Iesu, deꞌemoheꞌe: Daudiꞌ momuleáka Salomo (inána Salomo rahangaꞌ Batseba, bembaꞌna Uria);[5]

⁷Salomo momuleáka Rehabea;[6] Rehabea momuleáka Abia; Abia momuleáka Asa;

⁸Asa momuleáka Iosapaꞌ; Iosapaꞌ momuleáka Iora; Iora momuleáka Usia;

⁹Usia momuleáka Iota; Iota momuleáka Ahasi; Ahasi momuleáka Sikia;

¹⁰Sikia momuleáka Manase; Manase momuleáka Amo; Amo momuleáka Iosia;

¹¹Iosia momuleáka Iekonia hai halalunaheꞌ. I tempó iti toIahudiꞌ ratawani raꞌánti lao i tampoꞌ Bábeli.[7]

¹²Mantepuꞌu hangko i karatáwániraꞌ toIahudiꞌ i Bábeli haweꞌ i karapoánákana Iesu, hangaꞌraꞌ toioruna Iesu, deꞌemoheꞌe: Iekonia momuleáka Sealatie; Sealatie momuleáka Serubabe;

¹³Serubabe momuleáka Abihuꞌ; Abihuꞌ momuleáka Eliaki; Eliaki momuleáka Asó;

¹⁴Asó momuleáka Sadoꞌ; Sadoꞌ momuleáka Akimi; Akimi momuleáka Eliuꞌ;

¹⁵Eliuꞌ momuleáka Eleásá; Eleásá momuleáka Mata; Mata momuleáka Iako;

¹⁶hai Iako momuleáka Iusupu to mewaliꞌ toámána Maria. Maria iti to moánáka Iesu to rauliꞌ Kerisitu.[8]

¹⁷Mewaliꞌ, mantepuꞌu hangko i Burahima haweꞌ i Daudiꞌ, kahandaꞌraꞌ to momuleáka Iesu hampuloꞌ hai iba lápina. Mantepuꞌu hangko i Daudiꞌ haweꞌ i karatáwániraꞌ toIahudiꞌ lao i tampoꞌ Bábeli, hampuloꞌ woꞌo hai iba lápina, haneꞌi mantepuꞌu hangko i karatáwániraꞌ toIahudiꞌ i Bábeli haweꞌ i karapoánákana Kerisitu, hampuloꞌ woꞌo hai iba lápina.

¹⁸Deꞌe miꞌi daritakáná karapoánákana Iesu Kerisitu, Datu Topehómpóꞌ. Tempóna Maria ináNa nakaróhói ngkóráꞌ hai hadua tobaleilo to rahangaꞌ Iusupu, agáiáná hangko tiꞌara maniheꞌ mohamboko, ambiꞌna miꞌi Maria káláꞌeá, hai kakáláꞌeána iti ánti kuasaꞌna Inao to Magasaꞌ.

¹⁹Iusupu iti tauna to manótó laluna, onoꞌ miꞌi haneꞌi nauliꞌ i laluna, “Ina kupogááka ngkániiꞌ-niiꞌ Maria,” láwiꞌ tiꞌara naundeꞌ mopakahiliá Maria.

²⁰Tangaꞌna Iusupu mampepekiri, ia letaꞌ. I kaletaꞌna iti, mampaturuá. Ia moita hadua malaꞌekana Pueꞌ to mohángáꞌá, “Iusupu, pemuleꞌána Datu Daudiꞌ! Ineeꞌkoꞌ malááꞌ moala Maria mewaliꞌ toinámu, láwiꞌ Ánángkóiꞌ iti nakákáláꞌeánga ánti kuasaꞌna Inao to Magasaꞌ.

²¹Maria ina moánáka hadua ánángkóiꞌ tobaleilo, hai Ánángkóiꞌ iti ina nuhangaꞌ ‘Iesu’,[9] láwiꞌ Ia to ina mohómpóki taunáNa hangko i huku dósáraꞌ.”

²²Upu-upuna iti mewaliꞌ bona tebukeki Ngkóráꞌna Pueꞌ to naukiꞌ nabiꞌ Iesaia hangkoia:[10]

²³“Hadua ánáꞌntawine ina káláꞌeá hai moánáka hadua ánángkóiꞌ tobaleilo. Ánángkóiꞌ iti ina rahangaꞌ Imanueꞌ.” [11] Lempóna, “Pueꞌ Ala mamporángákeꞌ.”

²⁴Mearó miꞌi Iusupu hai mampeuláꞌi upu-upu to nahángáꞌá malaꞌekana Pueꞌ Ala iti. Mewaliꞌ napohambokoá mpuꞌu miꞌi iti Maria,

²⁵agáiáná tiꞌara maniheꞌ moiluhi duuꞌna Maria moánáꞌ. I kapesupaꞌna Ánángkóiꞌ iti, Iusupu mohangaꞌ “Iesu”.[12]