Read Besoa Matiu 12 Bible Online

Matiu 12 - Besoa bible

Matiu 12

¹I alo penómbáꞌáraꞌ to Iahudiꞌ,[121] Iesu hai topeguruNa melempóheꞌ i hamboloꞌ hinoe. Marimimoheꞌ, onoꞌ miꞌi haneꞌi mopudókiheꞌ wuaꞌ pare, rapiroroꞌ haneꞌi raꞌandeꞌ.

²I karaitána toParisi apa to rabábehi iti, rahángáꞌá Iesu, “Peita! TopeguruMu moliungiheꞌ áturá ágámántaꞌ. Mobágóꞌheꞌ i alo penómbáꞌá!”[122]

³Mehániꞌ Iesu, “Tiꞌara paꞌi nibásá i Ngkóráꞌna Pueꞌ apa to rabábehi Datu Daudiꞌ hai rángánaheꞌ hangkoia i tempóraꞌ marimi?

⁴Ia mesuaꞌ i lalu bambaruꞌ penómbáꞌá, haneꞌi mandeꞌheꞌ rótiꞌ to rapopenómbá i Pueꞌ Ala.[123] Mouláꞌ áturá ágámántaꞌ, tadulako-tadulako menómbá peá to peisá mandeꞌ rótiꞌ iti.[124] {Agáiáná kehapiꞌ Daudiꞌ moliungi áturá ágámántaꞌ, bábehiána iti tiꞌara rasalaꞌi.}

⁵Hai tiꞌara paꞌi nibásá apa to teukiꞌ i lalu Paturoꞌna Musa: tadulako menómbá i lalu Támbina Pueꞌ Ala, mobágóꞌheꞌ oaꞌ, kehapiꞌ i alo penómbáꞌá,[125] agáiáná tiꞌaraheꞌ rasalaꞌi.

⁶Mewaliꞌ Kuhángáꞌákou, i oloꞌmi ara hadua to melumbuꞌ kuasaꞌNa hangko i Támbina Pueꞌ Ala,[126]

⁷láwiꞌ Ánáꞌ Mánusiá makuasaꞌ mopakanótó apa to peisá rabábehi i alo penómbáꞌá. I lalu Sura Magasaꞌ, Pueꞌ Ala manguliꞌ node: ‘Tiꞌara binataꞌ to Kuꞌundeꞌ nipopenómbá i Kódóꞌ, agáiáná to Kuꞌundeꞌ ia miꞌi bona maꞌahiꞌkou i hángká rángámi.’ [127] Mewaliꞌ, ane keniꞌisá lempóna laluita iti, ketiꞌarakou mosalaꞌi tauna to tiꞌara masalaꞌ.”

⁸

⁹Iesu pohuꞌ hangko ionoꞌ lao i támbi penómbáꞌá.

¹⁰Ionoꞌ, ara hadua tauna to mate taena hambali. Bahangapaheꞌ tauna molelemata Iesu, mewaliꞌ mekuneꞌheꞌ, rauliꞌ, “Guru, ba peisákeꞌ mopakauriꞌ to tiꞌara nalalu i alo penómbáꞌá?”

¹¹Nahánikiheꞌ Iesu, “Ane rápáꞌna ara hangko i oloꞌmi to ara dimbána to manawoꞌ i lalu taroboꞌ i alo penómbáꞌá, ba ina napatodáhi peá i lalu taroboꞌ, ba ina nahore, kehapiꞌ i alo penómbáꞌá? Hangaa-ngaa nahore.

¹²Pelumbuꞌna mani tauna, láwiꞌ melumbuꞌ tueꞌraꞌ haneꞌi dimbá, mewaliꞌ hangaa-ngaa tatulungi, kehapiꞌ miꞌi i alo penómbáꞌá.”

¹³Roo onoꞌ, Iesu mohuoꞌ tauna to mate taena hambali iti, Nauliꞌ, “Ónáꞌ taemu!” Naónáꞌ mpuꞌu miꞌi taena. Kásáliu mauriꞌ hai maróhó huleꞌ nodo taena to hambalina.

¹⁴Agáiáná karaitána toParisi apa to pewaliꞌ iti, pohuꞌmoheꞌ hangko i támbi penómbáꞌá, hai mampeliꞌheꞌ rárá bona Iesu rahuku mate.

¹⁵Iesu moisá kaꞌárána tunggáiáraꞌ toParisi to kadake i Hia, onoꞌ miꞌi haneꞌi Ia pohuꞌ hangko ionoꞌ. Handaꞌ tauna ntániꞌna meuláꞌ woꞌo i Hia, hai Ia mopakauriꞌ upu-upu tauna to maduꞌa.

¹⁶Nakóntóheꞌ bona ineeꞌ rapehángáꞌá kaheánáNa.

¹⁷Nauliꞌ noꞌonoꞌ bona tebukeki laluitana Pueꞌ Ala to napahaweꞌ nabiꞌ Iesaia hangkoia {mokana i Datu Topehómpóꞌ}. Nauliꞌ Pueꞌ Ala node:

¹⁸“Deꞌe miꞌi huoꞌáNgkuꞌ to Kupileꞌi, to Kupokaꞌahiꞌ, hai to mopagóeꞌ laluNgkuꞌ. Ina Kuweꞌi InaoNgkuꞌ i Hia. Ia ina mopahaweꞌ párentáNgkuꞌ to manótó i upu-upu tauna.

¹⁹Ia tiꞌara ina mombeheheꞌ, tiꞌara ina monganga-nganga, hai tiꞌara ina molaluita Napasimbuku i rárá-rárá to mahile.

²⁰Biroꞌ to maluntuꞌ, tiꞌara ina Nadepu, hai palita to mowáá-wáá peá pewangkaꞌna, tiꞌara ina Napapate. Noꞌonoꞌ woꞌo ina Napalindó tauna to maledeꞌ pepoináláiraꞌ hai Ia ina mobágóꞌ oaꞌ duuꞌna tongawaꞌ kamanótóna Pueꞌ Ala.

²¹Iumbá-umbá i duniáꞌ, araheꞌ tauna to ina mehárungá i Hia.” [128]

²²Roo onoꞌ, ara hadua tauna to raꞌánti lao i Iesu. Tauna iti bilo hai tiꞌara peisá molaluita, láwiꞌ napesuaꞌi setáꞌ. Mewaliꞌ napakauriꞌ Iesu, álána peisá meita hai molaluita.

²³Tingkáráꞌheꞌ tauna to moita apa to pewaliꞌ iti, hai mombekuneꞌ-kuneꞌheꞌ, rauliꞌ, “Ba Ia mpuꞌu miꞌi Datu Topehómpóꞌ, pemuleꞌána Datu Daudiꞌ[129] to nadándi Pueꞌ Ala hangkoia?”

²⁴Agáiáná karahádina toParisi laluitaraꞌ iti, rauliꞌ, “KuasaꞌNa iti hangko i Belesebu,[130] daturaꞌ upu-upu setáꞌ. Onoꞌ miꞌi haneꞌi tauna doꞌo peisá mampopelóhóꞌ setáꞌ.”

²⁵Agáiáná naisá miꞌi Iesu pekiriraꞌ toParisi iti, onoꞌ miꞌi haneꞌi Nahángáꞌáheꞌ, “Rápáꞌna, ane arai hadua datu, hai tauna to handaꞌ i lalu kadatuána mosisalaꞌheꞌ oaꞌ hai mombeꞌewaꞌheꞌ, kadatuá iti ina magero. Ane tauna to hambánuá ba tauna to hampohalaluá pakaheꞌ mosisalaꞌ, ina magero pohintuwuꞌraꞌ iti.

²⁶Noꞌonoꞌ woꞌo i kadatuá setáꞌ. Ane Datu Tokadake moewaꞌ hangka tokadakena, lempóna setáꞌ moewaꞌ hangka setáꞌna, hai ina magero kadatuáraꞌ setáꞌ iti.

²⁷Niuliꞌ mampopelóhóꞌAꞌ setáꞌ hai kuasaꞌ hangko i Belesebu, agáiáná ara woꞌo topeuláꞌmi to mampopelóhóꞌ setáꞌ. Kuasaꞌ apa to rapakeꞌ? Manótó kuasaꞌ to hangko i Pueꞌ Ala, tiꞌara kuasaꞌna Datu Tokadake. Mewaliꞌ, hangko i bábehiáraꞌ topeuláꞌmi iti, tongawaꞌ miꞌi katiꞌárána toꞌu laluitami to manguliꞌ Kódóꞌ mampopelóhóꞌAꞌ setáꞌ hangko i kuasaꞌna Datu Tokadake.

²⁸Lempóna: mampopelóhóꞌAꞌ setáꞌ hangko i kuasaꞌna Inaona Pueꞌ Ala. Hai iti miꞌi to mopatongawaꞌ Pueꞌ Ala mepárentá miꞌi i oloꞌmi.

²⁹Datu Tokadake peisá rapándiriꞌ nodo hadua tauna to maróhó. Ane mesuaꞌkeꞌ i lalu támbina tauna to maróhó hai mampoinaokeꞌ mamperampaꞌi párewá to ara i támbina, hangaa-ngaa tatimpuku sieruꞌ pueꞌ támbi iti, hangko peisárakeꞌ moala párewána. {Noꞌonoꞌ woꞌo, ane Kódóꞌ mampopelóhóꞌ setáꞌ, lempóna, Kunangi miꞌi Datu Tokadake.}

³⁰Heáná to tiꞌara hingkakani hai Kódóꞌ, ia miꞌi to hingkakani hai Datu Tokadake. Heáná to tiꞌara motulungiAꞌ mampeliꞌ tauna bona mewaliꞌheꞌ taunána Pueꞌ Ala, ia miꞌi to moewaꞌAꞌ.

³¹Mewaliꞌ, bona niꞌisá: upu-upu dósá hai laluita pesápuáka peisá raꞌámpungi. Ane ara tauna to mosápuáka kaKódóꞌna Ánáꞌ Mánusiá, salaꞌ iti peisá mani raꞌámpungi. Agáiáná ane ara tauna to mosápuáka Inao to Magasaꞌ, tiꞌara ara ámpungina, maroꞌa i tempó deꞌe, maroꞌa i alo pobutusi.”[131]

³²

³³Nauliꞌ wopiꞌi Iesu i toParisi, “Ane kau to maroꞌa, maroꞌa woꞌo wuaꞌna. Ane kau to tiꞌara maroꞌa, tiꞌara woꞌo maroꞌa wuaꞌna. Kamaroꞌana ba katiꞌárána maroꞌa kau, taisá hangko i wuaꞌna.

³⁴Kómu tauna to kadake! Tiꞌara mpuꞌukou peisá mohuwárá laluita to maroꞌa ánti kakadakena lalumi, láwiꞌ apa to ara i laluntaꞌ, iti woꞌo to mesuwuꞌ i humentaꞌ.

³⁵Tauna to maroꞌa, bateꞌraꞌ mohuwárá apa to maroꞌa, láwiꞌ laluraꞌ bukeꞌ to maroꞌa. Tauna to kadake, bateꞌraꞌ mohuwárá apa to kadake, láwiꞌ laluraꞌ woꞌo kadake.

³⁶Mewaliꞌ, bona niꞌisá: i alo pobutusi i kahópóꞌána duniáꞌ, upu-upu tauna hangaa-ngaa mopangákuꞌ upu-upu laluitaraꞌ. Kehapiꞌ laluita to tiꞌara mobunduꞌ, hangaa-ngaa rapangákuꞌ.

³⁷Láwiꞌ laluitami haduduámi to ina mopatongawaꞌ kamasalaꞌmi ba kamanótómi.”

³⁸Roo onoꞌ, bahangapa guru agama hai toParisi membiáꞌ i Iesu bona mobábehi tandaꞌ kuasaꞌ, rauliꞌ, “Guru, kipoinao moita tandaꞌ kuasaꞌ to Nubábehi, bona tongawaꞌ i kaiꞌ kahangko i Pueꞌ Alana kuasaꞌMu.”

³⁹Agáiáná nauliꞌ Iesu, “Kadake ntepuꞌukou! Tiꞌarakou moisá Pueꞌ Ala! {Handaꞌ miꞌi tandaꞌ kuasaꞌ to niꞌita,} agáiáná nipembiáꞌ wopiꞌi. Tiꞌara ara tandaꞌ kuasaꞌ to ina rapopaitaꞌákou, bateꞌna peá tandaꞌ to mewaliꞌ miꞌi i nabiꞌ Iunu hangkoia.

⁴⁰Nodo Iunu iti tálu alona tálu wengina i lalu taꞌi bouꞌ to mahile, noꞌonoꞌ woꞌo Ánáꞌ Mánusiá ina tálu alona tálu wengina i lalu popatawuá.

⁴¹Hangkoia, toNiniwe menosoꞌmoheꞌ hangko i dósáraꞌ i pampehádingiraꞌ laluitana nabiꞌ Iunu.[132] Deꞌe-deꞌe ara miꞌi i oloꞌmi Hadua to melumbuꞌ kamahilena tueꞌNa hangko i nabiꞌ Iunu, agáiáná kómu to tueꞌ deꞌe-deꞌe, tiꞌarakou menosoꞌ hangko i dósámi i kanihádina laluitaNa. Mewaliꞌ i alo pobutusi i kahópóꞌána duniáꞌ, toNiniwe iti ina meángkáꞌ i lindoꞌmi hai ina mosalaꞌikou.

⁴²Hangkoia, datu towawine haweꞌ hangko i tampoꞌna to karaoꞌ, tampoꞌ Seba[133] láwiꞌ napoinao mampehádingi polaluitana Datu Salomo, láwiꞌ nahádi miꞌi mokana i kamapándena. Deꞌe-deꞌe ara miꞌi i oloꞌmi Hadua to melumbuꞌ kamahilena tueꞌNa hangko i Datu Salomo, agáiáná kómu to tueꞌ deꞌe-deꞌe, tiꞌara nipoinálái laluitaNa. Mewaliꞌ i alo pobutusi i kahópóꞌána duniáꞌ, datu towawine iti ina meángkáꞌ i lindoꞌmi hai ia woꞌo ina mosalaꞌikou.”[134]

⁴³Iesu molaluita wopiꞌi i toParisi, Nauliꞌ, “Ane tokadake to rapopesuwuꞌ miꞌi hangko i tauna, tokadake iti lao i pádá loriꞌ mampeliꞌ katoroꞌá. Ánti katiꞌárána ara to nalámbiꞌ,

⁴⁴onoꞌ miꞌi haneꞌi nauliꞌ, ‘Rángina miꞌi mesuleꞌ peaꞌ lao i katoroꞌá to kupálehi iaꞌo.’ I pesuleꞌna, naita tauna iti nodo támbi to ragenggáhi hai tiꞌara mani ara to mokatoroꞌi.

⁴⁵Onoꞌ miꞌi haneꞌi lao mokióꞌ pitu hangka tokadakena to melumbuꞌ kakadakeraꞌ hangko i hia. Lao mpuꞌumoheꞌ upu-upu mesuaꞌ i tauna iti. Kahópóꞌána, tetámbái miꞌi kamapárina tueꞌna tauna iti hangko i rungu-runguna. Noꞌonoꞌ woꞌo kómu to tueꞌ deꞌe-deꞌe.”[135]

⁴⁶Tangaꞌna mani Iesu molaluita hai tauna to handaꞌ, haweꞌmoheꞌ ináNa hai ádiNa.[136] Meángkáꞌheꞌ i rawa támbi, rapoinao ina mampolaluitaꞌá Iesu.

⁴⁷Ara hadua tauna to lao mohángáꞌá Iesu, “Guru, ináMu hai ádiMuheꞌ, araheꞌ i rawa. Rapoinao mampohidupaꞌáKoꞌ.”

⁴⁸Nahániki Iesu, “Heáná ináNgkuꞌ? Heáná halaluNgkuꞌ?”

⁴⁹Haneꞌi Iesu motudoꞌheꞌ tauna to meuláꞌ i Hia, Nauliꞌ, “Ane ináNgkuꞌ hai halaluNgkuꞌ, hira miꞌi deꞌe,

⁵⁰láwiꞌ heáná peá to mampeuláꞌi peundeꞌána UmáNgkuꞌ to ara i surugáꞌ, hira miꞌi ináNgkuꞌ hai halaluNgkuꞌ.”