Read Besoa Matiu 14 Bible Online

Matiu 14 - Besoa bible

Matiu 14

¹I tempó iti, Herode Antipa[148] to mepárentá i tampoꞌ Galilea. Kanahádina Herode iti apa to nabábehi Iesu,

²ia mohángáꞌáheꞌ topobágóꞌna, nauliꞌ, “Iesu ia miꞌi Iohane Toperiu to tueꞌ huleꞌ hangko i kapate, onoꞌ miꞌi haneꞌi ara kuasaꞌNa mobábehi tandaꞌ to mehelei!”

³Deꞌe miꞌi daritakáná kamatena Iohane Toperiu. Herodia ia miꞌi toinána Pilipu, agáiáná Datu Herode mobualosi Pilipu halaluna, láwiꞌ moala miꞌi Herodia napotoina. Handaꞌ kánina Iohane mokámbáróá Herode mokana i bábehiána iti, nahángáꞌá, “Tiꞌarakoꞌ peisá moala toinána halalumu mewaliꞌ toinámu, láwiꞌ bábehiámu iti moliungi Paturoꞌna Musa!”[149] Onoꞌ miꞌi haneꞌi Herode mohuoꞌ surudadoꞌna lao mohakaꞌ Iohane, ratimpuku hai rapopesuaꞌ i lalu tarungku.

⁵Katoꞌuána, napoinao Herode ina mopapate Iohane, agáiáná mampokalááꞌ tauna to handaꞌ, láwiꞌ rauliꞌ Iohane hadua nabiꞌ.

⁶Hangko ionoꞌ, i tempóna Herode mopaꞌara posusa pambuhinaona alo karapoánákana, ánáꞌna Herodia towawine monariꞌ i lindoꞌraꞌ torare. Góeꞌ ntepuꞌu Herode mampeita ponariꞌna.

⁷Ánti kagóeꞌna, ia mopaꞌara dándi i ánáꞌntawine iti, nauliꞌ, “Apa peá to nupembiáꞌ, ina kuweꞌikoꞌ!”

⁸Kanahádina Herodia laluitana, ia mogágáꞌ ánáꞌna bona membiáꞌ wuáꞌna Iohane Toperiu. Mewaliꞌ, nauliꞌ ánáꞌntawine iti i Herode, “To kupembiáꞌ, wuáꞌna Iohane Toperiu rawoli i bakiꞌ, raꞌánti mai i kódóꞌ!”

⁹Kanahádina Herode pembiáꞌna iti, masusa laluna, agáiáná dándina iti tiꞌara piꞌi peisá nadiiꞌ huleꞌ, láwiꞌ rahádi miꞌi torarena. Onoꞌ miꞌi haneꞌi napepárentáiá Herode bona pembiáꞌna ánáꞌntawine iti rabukeki.

¹⁰Ia mohuoꞌ miꞌi surudadoꞌna lao i lalu tarungku mobóhóki tambólóna Iohane.[150]

¹¹Mewaliꞌ lao mpuꞌumoheꞌ surudadoꞌ mobóhóki tambólóna, haneꞌi wuáꞌna rawoli i bakiꞌ, raꞌánti lao i ánáꞌntawine iti, haneꞌi ánáꞌntawine iti moánti lao i Herodia inána.

¹²Karahádina topeguruna Iohane apa to pewaliꞌ iti, laomoheꞌ moala wátámandoꞌna Iohane haneꞌi ratawu. Roo onoꞌ, laomoheꞌ mobámbáriá Iesu.[151]

¹³[152] Kanahádina Iesu bámbári kamatena Iohane Toperiu, Ia pohuꞌ hangko ionoꞌ, {hai topeguruNa meuláꞌheꞌ woꞌo i Hia}. Mengkaheꞌheꞌ i duanga lao i katoroꞌá to tepataniꞌá. Tunggáiána Iesu bona karaoꞌ hangko i tauna to handaꞌ. Agáiáná handaꞌ tauna mohádi bámbári kapohuꞌNa, onoꞌ miꞌi haneꞌi laoheꞌ metutuhá, mouláꞌheꞌ rárá to mewiwi rano.

¹⁴Pendáuluna Iesu hangko i duanga, Ia moita tauna to handaꞌ mepegiámoheꞌ. Maꞌahiꞌ laluNa moitaheꞌ, hai i oloꞌraꞌ tauna to handaꞌ iti araheꞌ tauna to maduꞌa, mewaliꞌ Napakauriꞌheꞌ.

¹⁵Kalumbaꞌ miꞌi, topeguruNa laoheꞌ mengkahungkuꞌ i Hia haneꞌi ara to mohángáꞌá, “Guru, deꞌe katoroꞌá to tepataniꞌá, hai ina támpu miꞌi alo. Rángina Nuhuoꞌmoheꞌ tauna to handaꞌ lao i wánuá to hungkuꞌ bona mohólóheꞌ pandeꞌraꞌ.”

¹⁶Nauliꞌ Iesu, “Tiꞌaraheꞌ paraluu pohuꞌ. Kómu riꞌi to hangaa-ngaa mopaꞌandeꞌheꞌ.”

¹⁷Ara to mohániki, “To ara i kaiꞌ, lima peá wuaꞌna rótiꞌ hai rombaꞌa bouꞌ.”

¹⁸Nahániki Iesu, “Ánti mai.”

¹⁹Hangko ionoꞌ, Nahuoꞌmoheꞌ tauna to handaꞌ mehoda i wongko rumpuꞌ, haneꞌi Iesu moala rótiꞌ to lima wuaꞌna hai bouꞌ to rombaꞌa, hai mengoaꞌ i langiꞌ mekakae i Pueꞌ Ala. Roo onoꞌ, Nabiseꞌ-biseꞌ miꞌi rótiꞌ iti, haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ.

²⁰Mandeꞌmoheꞌ upu-upu duuꞌraꞌ mabuhu. Karooraꞌ mandeꞌ, pelábiána pandeꞌ rarámpu topeguruna Iesu, hampuloꞌ mani hai rongkárándi.

²¹Kahandaꞌraꞌ tauna to mandeꞌ tempó iti rekeꞌ-rekeꞌna lima sábuna tobaleilo, tiꞌara teimbaꞌ towawine hai ánángkóiꞌ.

²²Roo onoꞌ, Iesu mohuoꞌmoheꞌ topeguruNa moduanga moioru lao tándáꞌ i hambali rano Galilea, hai Ia mohuoꞌmoheꞌ woꞌo tauna to handaꞌ mesuleꞌ lao i wánuáraꞌ.

²³Kapesuleꞌraꞌ tauna iti, mempanaiꞌ miꞌi Iesu i buluꞌ, lao mekakae haduduáNa ionoꞌ duuꞌna káindi.

²⁴I tempó iti, topeguruNa karaoꞌmoheꞌ hangko i lorena, i tangaꞌ ranomoheꞌ.[153] Duangaraꞌ iti narumpa bálumbá, láwiꞌ mampohidupaꞌáheꞌ wui to rumihi hangko i lindoꞌ.

²⁵Hungkuꞌ mabaa, mendáulu miꞌi Iesu hangko i buluꞌ haneꞌi lao molumao i wongko uwai monóntóhiheꞌ.

²⁶Karaitána ara tauna to molumao i wongko uwai, malááꞌmoheꞌ, haneꞌi monganga-ngangaheꞌ, rauliꞌ, “Louꞌ mai tometánuánáꞌ!”

²⁷Agáiáná kásáliu nahángáꞌáheꞌ Iesu, “Pakaróhó lalumi! Ineeꞌkou malááꞌ! Kódóꞌnto.”[154]

²⁸Nauliꞌ Peturuꞌ, “Ane Iomonto noiti Pueꞌ, Nukióꞌaꞌ bona molumaoaꞌ woꞌo i wongko uwai.”

²⁹Nahániki Iesu, “Maimokoꞌ!” Mendáulu mpuꞌu miꞌi Peturuꞌ hangko i lalu duanga, hai molumao i wongko uwai ina lao i Iesu.

³⁰Agáiáná i kamoitána bálumbá, malááꞌ miꞌi haneꞌi mantepuꞌu tiri. Ia mekióꞌ, nauliꞌ, “Pueꞌ! Tulungiaꞌ wongkódóꞌá!”

³¹Naónáꞌ miꞌi Iesu taeNa modiiꞌ Peturuꞌ, Nahángáꞌá, “Makuraꞌ mani pepoináláimu! Moapa riꞌi haneꞌi bata-bata mani lalumu?”

³²Hangko ionoꞌ, mengkaheꞌmoheꞌ i lalu duanga, hai wui woꞌo mengkaroo.

³³Mewaliꞌ upu-upuheꞌ topeguruNa to i lalu duanga iti menómbáheꞌ i Iesu, rauliꞌ, “Toꞌu-toꞌu mpuꞌu, kaꞌIona Ánáꞌna Pueꞌ Ala!”

³⁴Roo onoꞌ, Iesu hai topeguruNa mengkalimbamoheꞌ haweꞌ i hambali rano i tampoꞌ to rauliꞌ Genesare.

³⁵Karaisána pueꞌ wánuá kaꞌIana miꞌi Iesu to haweꞌ i wánuáraꞌ, rabámbári miꞌi i wánuá-wánuá to hungkuꞌ, álána upu-upu tauna to maduꞌa raꞌánti i Iesu.

³⁶Rapembiáꞌ i Iesu ba peisái, hubaꞌ wuntu kumbáNa rapetóbóꞌ. Mewaliꞌ upu-upu tauna to mampetóbóꞌ kumbáNa kasáliuheꞌ mauriꞌ.