Read Besoa Matiu 15 Bible Online

Matiu 15 - Besoa bible

Matiu 15

¹Hangkani tempó, bahangapaheꞌ toParisi hai guru-guru agama toIahudiꞌ to hangko i Ierusale lao mampohidupaꞌá Iesu. Rapekuneꞌ,

²“Moapa riꞌi haneꞌi topeguruMu moliungiheꞌ ádáraꞌ toioruntaꞌ? Rápáꞌna, ane mandeꞌheꞌ, tiꞌaraheꞌ sieruꞌ membahoꞌ mouláꞌ áturá ágámántaꞌ.”[155]

³Nahániki Iesu, “Moapa riꞌi haneꞌi niliungi párentána Pueꞌ Ala i kamampeuláꞌimi ádáraꞌ toiorumi?

⁴Rápáꞌna, nauliꞌ Pueꞌ Ala, ‘Hangaa-ngaa nubiláꞌ umámu hai inámu.’[156] Hai Nauliꞌ wopiꞌi, ‘Heáná to motundaꞌ umána ba inána hangaa-ngaa rahuku mate.’[157]

⁵Agáiáná kómu mepaturoꞌkou node: Ane haweꞌ tosaemi membiáꞌ tulungi, peisákou manguliꞌ node: ‘Apa to ara i kódóꞌ to ina kupakeꞌ mokádipurákou, upu miꞌi kudándi ina kupopenómbá i Pueꞌ Ala.’

⁶Mewaliꞌ, ngkóráꞌna Pueꞌ Ala to manguliꞌ hangaa-ngaa nibiláꞌ umámi hai inámi, tiꞌara iti to nipeuláꞌi; ádámi peá to nipomahile.

⁷Mampe to maroꞌa pekou! Toꞌu ntepuꞌu laluitana nabiꞌ Iesaia hangkoia[158] mokana i kómu to manguliꞌ node:

⁸Nauliꞌ Pueꞌ Ala: ‘Taunaheꞌ iti, i humeraꞌ peá mobiláꞌAꞌ, agáiáná laluraꞌ karaoꞌ hangko i Kódóꞌ.

⁹Tiꞌara mobunduꞌ penómbáraꞌ i Kódóꞌ, láwiꞌ paturoꞌraꞌ paturoꞌ hangko i tauna peá, tiꞌara paturoꞌ hangko i Kódóꞌ.’ ” [159]

¹⁰Roo onoꞌ, Iesu mokióꞌmoheꞌ tauna to handaꞌ, haneꞌi Napopahaweꞌáheꞌ ngkóráꞌ pándiriꞌ deꞌe, Nauliꞌ, “Nipehádingi bona niꞌisá.

¹¹Tiꞌara pandeꞌ to mesuaꞌ i ngángántaꞌ to mopakedáikeꞌ i peitána Pueꞌ Ala. Ngkáliꞌna riꞌi, laluita to mesuwuꞌ i humentaꞌ, iti to mopakedáikeꞌ i peitána Pueꞌ Ala.”

¹²Hangko ionoꞌ, laoheꞌ topeguruNa mengkahungkuꞌ i Hia, rauliꞌ, “Tiꞌara paꞌi Nuisá kakóiꞌna inaoraꞌ toParisi mohádi laluitaMu ininá?”

¹³Nahániki Iesu, “Nipatodáhi peheꞌ! ToParisi iti, nodoheꞌ tudaꞌ-tudaꞌ to tiꞌara natudaꞌ UmáNgkuꞌ to ara i surugáꞌ, hai bateꞌraꞌ ina rarebuki. {Pakaheꞌ manguliꞌ mopaturoꞌheꞌ tobilo, mole} hira riꞌi tadulako to bilo, {láwiꞌ tiꞌaraheꞌ moisá rárá to manótó lao i Pueꞌ Ala}. Hai ane tobilo moteteꞌ hangka tobilona, bateꞌraꞌ ina manawoꞌheꞌ sangkani i lao.”

¹⁵Nauliꞌ Peturuꞌ, “Guru, Nupakanótóáꞌangkaiꞌ ngkóráꞌ pándiriꞌ to Nupahaweꞌ ininá.”

¹⁶Mehániꞌ Iesu, “Tiꞌara mani ripaꞌi niꞌisá lempóna?

¹⁷Pandeꞌ to mesuaꞌ i lalu ngángántaꞌ, lao i taꞌintaꞌ, haneꞌi liliu mesuwuꞌ. {Tiꞌara iti to mopakedáikeꞌ i peitána Pueꞌ Ala.}

¹⁸Ngkáliꞌna riꞌi, laluita to kadake to mentóáꞌ hangko i laluntaꞌ hai mesuwuꞌ i humentaꞌ, onoꞌ riꞌi to mopakedáikeꞌ i peitána Pueꞌ Ala.

¹⁹Láwiꞌ hangko i laluntaꞌ mesuwuꞌ mampopengaa pekiri to kadake, álána ara to mepapate, mebualosi, mobábehi bábehiá to metitidiꞌi, manako, mosabiki dongkoꞌ hai mopakóiꞌ tauna ntániꞌna.

²⁰Bábehiá to noꞌonoꞌ, iti to mopakedáikeꞌ i peitána Pueꞌ Ala. Agáiáná ane mandeꞌkeꞌ hai tiꞌarakeꞌ sieruꞌ membahoꞌ, tiꞌara iti to mopakedáikeꞌ i peitána Pueꞌ Ala.”

²¹Hangko ionoꞌ, Iesu pohuꞌ hangko i tampoꞌ Genesare, lao i tampoꞌ to hungkuꞌ i kótá Tiru hai Sido,[160] hai topeguruNa meuláꞌheꞌ.

²²Ionoꞌ, haweꞌ miꞌi hadua towawine toKánáꞌá, to tiꞌara toIahudiꞌ, lao meraruaꞌ oaꞌ i Iesu, nauliꞌ, “Pueꞌ, pemuleꞌána Datu Daudiꞌ! Nupokaꞌahiꞌaꞌ wongkódóꞌá! Ánáꞌkuꞌ towawine napesuaꞌi tokadake, hai rumihi kamaduꞌana.”

²³Agáiáná Iesu tiꞌara mehániꞌ. Laoheꞌ topeguruNa mengkahungkuꞌ, hai ara to membiáꞌ, nauliꞌ, “Guru, Nuhuoꞌ miꞌi bona towawine iti pohuꞌ, láwiꞌ paka mekióꞌ-kióꞌ napasimbuku meuláꞌ i kitaꞌ.”

²⁴Nauliꞌ Iesu i towawine iti, “Pueꞌ Ala mohuoꞌAꞌ bona mai peAꞌ motulungi toSáráeliꞌ, láwiꞌ nodoheꞌ dimbá to tiꞌara ara to mampoewu.”

²⁵Agáiáná towawine iti lao peá molingkudu i bitina Iesu, nauliꞌ, “Pueꞌ, Nutulungiaꞌ, wongkódóꞌá!”

²⁶Nahániki Iesu, “Io toKánáꞌákoꞌ. Tiꞌara maroꞌa moala pandeꞌraꞌ ánángkóiꞌ, haneꞌi raweꞌi ahu.”[161]

²⁷Agáiáná mehániꞌ towawine iti, nauliꞌ, “Toꞌu ntepuꞌu Pueꞌ, agáiáná ara woꞌo ahu to mandeꞌ wutaꞌ to manawoꞌ hangko i mejá.”

²⁸Hangko ionoꞌ, nauliꞌ Iesu, “Maróhó ntepuꞌu pepoináláimu! Apa to nuhárungá, mewaliꞌ miꞌi mouláꞌ peundeꞌámu.” I tempó iti woꞌo, nalalu mpuꞌu miꞌi ánáꞌna towawine toKánáꞌá iti.

²⁹Roo onoꞌ, Iesu hai topeguruNa pohuꞌmoheꞌ hangko ionoꞌ, molumaoheꞌ mewiwi i rano Galilea, haneꞌiheꞌ mempanaiꞌ lao i buluꞌ-buluꞌna, hai Iesu mehoda mepaturoꞌ.

³⁰Tauna mobárárámoheꞌ lao i Iesu. Moántiheꞌ topaluꞌ, tauna to mongkuha, tobilo, to tiꞌara peisá molaluita hai to tiꞌara ralalu. Rapahungkuꞌheꞌ i lindoꞌna Iesu, hai Napakauriꞌheꞌ.

³¹Tingkáráꞌheꞌ tauna to handaꞌ moita upu-upu to napakauriꞌ Iesu: tauna to tiꞌara peisá molaluita, molaluitamoheꞌ, tauna to mongkuha mauriꞌ, topaluꞌ molumaomoheꞌ, hai to bilo meitamoheꞌ, mewaliꞌ rakamaleá ntepuꞌu apa to mewaliꞌ iti.[162] Onoꞌ miꞌi haneꞌi tauna to handaꞌ iti mampomahileheꞌ Pueꞌ Ala to rapenómbái toSáráeliꞌ.

³²Roo onoꞌ, Iesu mokióꞌheꞌ topeguruNa, Nahángáꞌáheꞌ, “Maꞌahiꞌ laluNgkuꞌ moitaheꞌ tauna to handaꞌ deꞌe. Tálu miꞌi aloraꞌ ieneꞌ, tiꞌara piꞌi ara pandeꞌraꞌ. Tiꞌara tuꞌu inaoNgkuꞌ mohuoꞌheꞌ mesuleꞌ tangaꞌraꞌ marimi. Holoheꞌ paꞌi i rárá.”

³³Rauliꞌ topeguruNa, “Iumbákeꞌ paꞌi ina molámbiꞌ pandeꞌ to magáná ina tapopaꞌandeꞌáheꞌ tauna to nodeꞌe kahandaꞌraꞌ, láwiꞌ karaoꞌkeꞌ hangko i wánuá hai kaꞌaraꞌántaꞌ deꞌe tiꞌara ara apa-apa.”

³⁴Iesu mekuneꞌ i hira, Nauliꞌ, “Hangapa wuaꞌna rótiꞌ to ara i kómu?” Ara to mohániki, “Pitu peá wuaꞌna, hai bouꞌ to kókóiꞌ bahangapa peá báꞌána.”

³⁵Hangko ionoꞌ, Iesu mohuoꞌmoheꞌ tauna to handaꞌ mehoda i tampoꞌ,

³⁶haneꞌi moala miꞌi rótiꞌ to pitu wuaꞌna hai bouꞌ to kókóiꞌ bahangapa báꞌána iti, mekakae i Pueꞌ Ala. Roo onoꞌ, Nabiseꞌ-biseꞌ miꞌi haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ.

³⁷Mandeꞌmoheꞌ upu-upu duuꞌraꞌ mabuhu. Karooraꞌ mandeꞌ, pelábiána pandeꞌ rarámpu topeguruna Iesu, pitu mani kárándina to mahile.[163]

³⁸Kahandaꞌraꞌ to mandeꞌ i tempó iti, iba sáburaꞌ tobaleilo, tiꞌara mani teimbaꞌ towawine hai ánángkóiꞌ.

³⁹Roo onoꞌ, Iesu mohuoꞌmoheꞌ tauna to handaꞌ mesuleꞌ lao i wánuáraꞌ, haneꞌi Ia hai topeguruNa moduangaheꞌ lao i tampoꞌ Magada.