Read Besoa Matiu 17 Bible Online

Matiu 17 - Besoa bible

Matiu 17

¹Ini alona hangko ionoꞌ, Iesu moánti Peturuꞌ, Iakobu, hai Iohane ádina, mempanaiꞌheꞌ lao i wongko buluꞌ to mapángkáꞌ.[172]

²Tangaꞌraꞌ ionoꞌ, tebáliki miꞌi lenggeꞌna Iesu mewaliꞌ meawaꞌ.[173] LindoꞌNa mewangkaꞌ nodo alo, hai waruꞌNa mengkilaꞌ.

³Hangkaꞌ-hangkaꞌ perái topeguruNa moitaheꞌ rodua nabiꞌ molaluita hai Iesu. Nabiꞌ to rodua iti ia miꞌi Musa hai Eliá.[174]

⁴Hangko ionoꞌ, Peturuꞌ mohángáꞌá Iesu, “Pueꞌ, maroꞌa ntepuꞌu kihádi kitaꞌ arakeꞌ ieneꞌ! Ane Nuꞌundeꞌi Pueꞌ, ina kubábehi tálu wuaꞌna bambaruꞌ ieneꞌ: hambuaꞌ i Hio Pueꞌ, hambuaꞌ i Musa, hai hambuaꞌ woꞌo i Eliá.”

⁵Tangaꞌna mani Peturuꞌ molaluita, iaperái napótóꞌheꞌ gawu to mewangkaꞌ,[175] hai hangko i lalu gawu iti rahádi miꞌi wambaꞌna Pueꞌ Ala to manguliꞌ, “Deꞌe miꞌi ÁnáꞌKuꞌ to Kupokaꞌahiꞌ hai Kupokagóeꞌ. Nipehádingi miꞌi laluitaNa!”[176]

⁶Karahádina topeguruNa wambaꞌna Pueꞌ Ala iti, malááꞌmoheꞌ, haneꞌi liliuheꞌ mopalumbá.

⁷Agáiáná Iesu lao mohungkuki hai Nakamaꞌheꞌ, haneꞌi Nahángáꞌáheꞌ, “Pearó, ineeꞌkou malááꞌ!”

⁸Rapeita riꞌi, Iesu perái haduduáNa.

⁹Pendáuluraꞌ hangko i wongko buluꞌ iti, nahángáꞌáheꞌ Iesu, “Ineeꞌ sieruꞌ niuliꞌ-uliꞌ i heáná peá apa to niꞌita ininá hangko tiꞌara mani Ánáꞌ Mánusiá rapatueꞌ huleꞌ hangko i kapate.”

¹⁰Mekuneꞌheꞌ topeguruNa, rauliꞌ, “Wuliangkaiꞌ. Mouláꞌ paturoꞌraꞌ guru agama, nabiꞌ Eliá hangaa-ngaa haweꞌ ioru, hangko haweꞌ riꞌi Datu Topehómpóꞌ.[177] Noumbá riꞌi haneꞌi noꞌonoꞌ?”

¹¹Nahániki Iesu, “Toꞌu to rapaturoꞌákou. Eliá hangaa-ngaa haweꞌ ioru, láwiꞌ ia to mopatimama upu-upuna.

¹²Hai Kuhángáꞌákou: haweꞌ mpuꞌu miꞌi Eliá, agáiáná tiꞌara raisá tauna kaheánána. Ia rapopeahiahiꞌ mouláꞌ peundeꞌáraꞌ. Noꞌonoꞌ woꞌo Ánáꞌ Mánusiá ina rapopeahiahiꞌ mouláꞌ peundeꞌáraꞌ.”

¹³Tempó onoꞌ, hangko raisá riꞌi topeguruNa lempóna laluitana Iesu ininá: to rapándiriꞌ nodo nabiꞌ Eliá ia miꞌi Iohane Toperiu.

¹⁴I pendáuluraꞌ Iesu hai topeguruNa to tálu iti hangko i buluꞌ, mampohidupaꞌáheꞌ tauna to handaꞌ. Ara hadua tobaleilo to lao molingkudu i bitina Iesu, nauliꞌ,

¹⁵“Pueꞌ, Nupokaꞌahiꞌ woia ánáꞌkuꞌ tobaleilo. Ia kana hakiꞌ mate mataꞌ, hai ane haweꞌ wopiꞌi hakiꞌna, paka malimpu. Hangkani-hangkani madungká i api, hangkani-hangkani woꞌo madungká i lalu uwai.

¹⁶Kuánti miꞌi i topeguruMu, agáiáná tiꞌara rabuku rapakauriꞌ.”

¹⁷Nauliꞌ Iesu, “Noumbárakou noeneꞌ? Moapa riꞌi haneꞌi tiꞌara manikou mepoinálái? Nisápuáka mani peundeꞌána Pueꞌ Ala! Hangapa mani kamaruena ina hingkakaniAꞌ hai kómu? Hangapa mani kamaruena hangaa-ngaa sabaraꞌAꞌ i kómu hangko mepoináláirakou? Ánti mai ánángkóiꞌ iti!”

¹⁸Raꞌánti mpuꞌu miꞌi ánángkóiꞌ iti i Iesu. Hangko ionoꞌ, Nakámbáróá mpuꞌu miꞌi iti setáꞌ to mopakasusa ánángkóiꞌ iti. Mesuwuꞌ mpuꞌu miꞌi setáꞌ iti, haneꞌi kásáliu mauriꞌ ánángkóiꞌ iti.

¹⁹Tiꞌara marue hangko ionoꞌ, tempóna Iesu haduduáNa, laomoheꞌ topeguruNa mekuneꞌ i Hia, “Guru, moapa riꞌi haneꞌi tiꞌara kibuku mampopesuwuꞌ setáꞌ iti?”

²⁰Nahániki Iesu, “Onoꞌ miꞌi, láwiꞌ makuraꞌ mani pepoináláimi. Toꞌu to Kuꞌuliꞌ, hai Kuhángáꞌákou: kehapiꞌ pepoináláimi nodo peá kamahilena lihu duiꞌá, peisákou mopárentá buluꞌ deꞌe, ‘Ee, buluꞌ! Melimbámokoꞌ hangko i hindeꞌe!’ hai buluꞌ deꞌe bateꞌna ina melimbá. Nibuku nibábehi ane mepoináláikou. [

²¹Agáiáná ane niundeꞌ mampopesuwuꞌ setáꞌ to noꞌonoꞌ, hangaa-ngaa mekakaekou hai mopuasaꞌ.]”[178]

²²I tempóna Iesu hai topeguruNa hirámpu i tampoꞌ Galilea, Nahángáꞌáheꞌ, “Ánáꞌ Mánusiá ina rapehuhuꞌá i taeraꞌ tauna.

²³Ina rapapate, agáiáná i katáluna alona ina tueꞌ huleꞌ.” Karahádina peá laluitaNa iti, masusa ntepuꞌu laluraꞌ.

²⁴Kahaweꞌraꞌ Iesu hai topeguruNaheꞌ i wánuá Kapenau, haweꞌ miꞌi hadua to mampesingaraꞌi ásele to rapakeꞌ mokádipurá Támbina Pueꞌ Ala.[179] Napekuneꞌ i Peturuꞌ, “Ba mobaiariꞌi woꞌo ásele Támbina Pueꞌ Ala iti Gurumi, ba tiꞌara?”

²⁵Nahániki Peturuꞌ, “Hangaa-ngaa Nabaiari!” Hangko ionoꞌ, mesuleꞌ miꞌi Simoꞌ Peturuꞌ lao i támbi to rakatoroꞌi. I kahaweꞌna ionoꞌ, tiꞌara mani nampakaꞌ molaluita, ioru miꞌi Iesu mekuneꞌ, “Simoꞌ, noumbá polámbiꞌmu? Hangko i heáná datu-datu i duniáꞌ ina moróróꞌ ásele, hangko i taunáraꞌ haduduáraꞌ ba hangko i tauna i tampoꞌ to nakuasaꞌi?”

²⁶Nahániki Peturuꞌ, “Hangaa-ngaa moróróꞌheꞌ ásele hangko tauna i tampoꞌ to rakuasaꞌi.” Nauliꞌ Iesu, “Ane noꞌonoꞌi, tiꞌarakeꞌ paraluu mobaiari.

²⁷Agáiáná kehapiꞌ noꞌonoꞌ, maroꞌa mani ane mobaiarikeꞌ, bodana kóiꞌ inaoraꞌ i kitaꞌ. Mewaliꞌ, laomokoꞌ mopeká i rano Galilea. Bouꞌ to kana pekámu rungu-runguna, nubengká ngángána. Ionoꞌ ina nupohumbai dóiꞌ bona iti nupakeꞌ mobaiari áselentaꞌ rodua.”