Read Besoa Matiu 18 Bible Online

Matiu 18 - Besoa bible

Matiu 18

¹I tempó iti, topeguruna Iesu laoheꞌ mekuneꞌ i Hia, rauliꞌ, “Pueꞌ, heáná to melumbuꞌ kamahilena tueꞌna i lalu popárentána Pueꞌ Ala?”

²Hangko ionoꞌ, Iesu mokióꞌ miꞌi hadua ánángkóiꞌ, Napopeángkáꞌ i tangaꞌraꞌ,

³haneꞌi Nahángáꞌáheꞌ, “Toꞌu ntepuꞌu laluitaNgkuꞌ deꞌe: ane tiꞌara nibáliki pekirimi hai mewaliꞌkou nodo ánángkóiꞌ deꞌe, tiꞌarakou ina mewaliꞌ taunána Pueꞌ Ala i lalu popárentáNa.

⁴Heáná to mengkaiwóiꞌ laluna hai mewaliꞌ nodo ánángkóiꞌ deꞌe, ia miꞌi to tepamahileá ntepuꞌu tueꞌna hangko i upu-upu taunána Pueꞌ Ala i lalu popárentáNa.

⁵Heáná to motarima hadua tauna i lalu hangaꞌKuꞌ, tepasuaꞌ tauna to i wóiꞌ tueꞌna nodo ánángkóiꞌ deꞌe, lempóna Kódóꞌ miꞌi to natarima,

⁶agáiáná heáná to mopakanawoꞌ hadua tauna to mengkaiwóiꞌ tueꞌna álána tiꞌara piꞌi mepoinálái i Kódóꞌ, ina rumihi ntepuꞌu pehukuna Pueꞌ Ala i tauna iti. Rángina miꞌi hambuaꞌ watu pogiliá to mahile[180] ratóe i tambólóna haneꞌi ia ratibe i lalu tahiꞌ.

⁷Hurewuꞌmoheꞌ tauna i duniáꞌ deꞌe, láwiꞌ mampopengaa to rabábehi bona mopakanawoꞌheꞌ taunána Pueꞌ Ala haneꞌi madósáheꞌ. Agáiáná hurewuꞌ ntepuꞌuheꞌ tauna to mepakanawoꞌ.

⁸Onoꞌ miꞌi haneꞌi kómu to mewaliꞌ taunána Pueꞌ Ala, hangaa-ngaa maingáꞌ-ingáꞌkou, bona ineeꞌkou madósá moliu apa to niꞌita ba apa to nibábehi. Ane rápáꞌna taemi hambali ba bitimi hambali to moántikou mobábehi dósá, rángina miꞌi nibóhóki hai nitibe. Maroꞌa mani hambali peá taemi ba bitimi, hai molámbiꞌkou katueꞌ to maroꞌa hingkakani hai Pueꞌ Ala, haneꞌi rombali taemi hai bitimi, agáiáná kahópóꞌána ratiberakou i lalu api to roreꞌ oaꞌ.

⁹Hai ane rápáꞌna mátámi hambali to moántikou mobábehi dósá, rángina miꞌi nidungkiki hai nitibe. Maroꞌa mani hambali peá mátámi hai molámbiꞌkou katueꞌ to maroꞌa hingkakani hai Pueꞌ Ala, haneꞌi rombali mátámi, agáiáná kahópóꞌána ina ratiberakou i lalu naraka.”

¹⁰Iesu mopaliliu wopiꞌi laluitaNa, Nauliꞌ, “Mewaliꞌ, maingáꞌ-ingáꞌ ntepuꞌukou. Ineeꞌ niuliꞌ tauna to i wóiꞌ tueꞌraꞌ to nodo ánángkóiꞌ deꞌe, tiꞌaraheꞌ mobunduꞌ. Láwiꞌ toꞌu ntepuꞌu to Kuhángáꞌáꞌákou: malaꞌeka to mokámpáiheꞌ[181] to noꞌonoꞌ, araheꞌ oaꞌ i surugáꞌ hai peisáheꞌ mopahaweꞌ i Pueꞌ Ala apa to mewaliꞌ i tauna to rakámpái. [

¹¹Ánáꞌ Mánusiá mai miꞌi i duniáꞌ bona mampeliꞌ tauna to karaoꞌ hangko i Pueꞌ Ala hai mohómpókiheꞌ hangko i huku dósáraꞌ.][182]

¹²Noumbá pekirimi ane rápáꞌna ara i oloꞌmi to ara dimbána hangatu báꞌána, agáiáná hambaꞌa matántá? Apa to ina nabábehi? Bateꞌna ina napálehi dimbána to hahioꞌ puloꞌna hai hahioꞌ báꞌána i buluꞌna, haneꞌi lao mampeliꞌ dimbána to hambaꞌa to matántá.

¹³Ina napogóeꞌ ntepuꞌu dimbána to matántá iti láwiꞌ nalámbiꞌ huleꞌ, hangko i dimbána to hahioꞌ puloꞌna hai hahioꞌ to tiꞌara matántá.

¹⁴Noꞌonoꞌ woꞌo Umámi to ara i surugáꞌ, tiꞌara Naundeꞌ ane ara hadua hangko i oloꞌmi to karaoꞌ hangko i Hia.”

¹⁵Nauliꞌ wopiꞌi Iesu, “Ane ara halalu hampepepoináláimu to masalaꞌ i hio, hangaa-ngaa lao nupombelámbiꞌá, nupolaluita kamasalaꞌna, hai bateꞌna peá kómu rodua, bona tiꞌara ara tauna to moisá posisalaꞌmi. Ane napehádingi laluitamu, hai napenosoꞌi kamasalaꞌna, pohintuwuꞌmi ina maroꞌa huleꞌ.

¹⁶Agáiáná ane tiꞌara naundeꞌ mampehádingi laluitamu, nuántiheꞌ hadua ba rodua sabiꞌ, láwiꞌ teukiꞌ miꞌi i lalu Sura Magasaꞌ node: ‘Ane ara tauna to rasalaꞌi, hangaa-ngaa ara rodua ba tálu tauna to mosabiki katoꞌuna kamasalaꞌna, bona manótó kárá-kárána.’[183]

¹⁷Ane tiꞌara wopiꞌi naundeꞌ mampehádingi laluitaraꞌ sabiꞌ iti, nupahaweꞌ miꞌi salaꞌna iti i lindoꞌna jemaꞌa. Ane tiꞌara mani napehádingi, kehapiꞌ miꞌi upu-upu halalu hampepepoináláimi mokámbáróá, patodáhimode. Nirekeꞌ miꞌi nodo tauna to tiꞌara moisá Pueꞌ Ala hai kadake bábehiána.[184]

¹⁸Toꞌu to Kuꞌuliꞌ, hai Kuhángáꞌákou: apa to nipekóntói i duniáꞌ, iti miꞌi woꞌo to napekóntói Pueꞌ Ala, hai apa to nipokana i duniáꞌ, iti woꞌo to napokana Pueꞌ Ala i surugáꞌ.

¹⁹Kuhángáꞌá wopakou: ane arakou rodua i duniáꞌ deꞌe to hingkakani mekakae membiáꞌ apa peá i UmáNgkuꞌ to ara i surugáꞌ, pekakaemi iti bateꞌna ina Nabukeki {hiolaꞌ hai peundeꞌáNa},

²⁰láwiꞌ iumbá tauna hirámpu i lalu hangaꞌKuꞌ, kehapiꞌ rodua ba tálu peheꞌ, Kódóꞌ ionoꞌAꞌ woꞌo hingkakani hai hira.”

²¹Roo onoꞌ, Peturuꞌ mohungkuki Iesu hai mekuneꞌ i Hia, nauliꞌ, “Pueꞌ, ane halalu hampepepoináláingkuꞌ masalaꞌ i kódóꞌ, hangapa kánina hangaa-ngaa kuámpungi? Ba gáná miꞌi pitu kánina?”[185]

²²Nahániki Iesu, “Tiꞌara peá pitu kánina. Kehapiꞌ miꞌi i átuna kánina tauna masalaꞌ i hio,[186] hangaa-ngaa nuámpungi.

²³Bona niꞌisá moapa riꞌi haneꞌi hangaa-ngaa moámpungikou rángámi, ina Kupahaweꞌákou ngkóráꞌ pándiriꞌ deꞌe. Pueꞌ Ala rapándiriꞌ nodo hadua datu to mopáresáꞌ indáraꞌ hawiꞌna.

²⁴Rungu-runguna, ara hadua hawiꞌ to raꞌánti i lindoꞌna, to handaꞌ ntepuꞌu indána, gáná rapoposaro hadua tauna mobágóꞌ hangatu lima puloꞌna parena kamaruena.[187]

²⁵Tongawaꞌ tauna iti tiꞌara nabuku mobaiari indána. Mewaliꞌ, nahawaka miꞌi datu, nauliꞌ, ‘Nipobaluꞌ miꞌi hawiꞌ deꞌe hingkakani hai ánáꞌna, toinána hai upu-upu párewána, bona tebaiari indána.’

²⁶Kásáliu molingkudu hawiꞌ iti i lindoꞌna datu, membiáꞌ ámpu, nauliꞌ, ‘Tuá, kupembiáꞌ bona sabaraꞌ manikoꞌ. Nuweꞌiaꞌ wongkódóꞌá tempó. Kudándi ina kubaiari upu-upu indángkuꞌ!’

²⁷Naisá miꞌi datu katiꞌárána nabuku mobaiari indána, mewaliꞌ maꞌahiꞌ laluna i hawiꞌ iti, haneꞌi nahángáꞌá, ‘Indámu kuwoe miꞌi, mewaliꞌ tiꞌara piꞌi paraluu nubaiari.’

²⁸Hangko ionoꞌ, pohuꞌ miꞌi hawiꞌ iti, lao mampohidupaꞌá hadua hangka hawiꞌna to moindá i hia hantóiꞌ peá, gáná rapoposaro hadua tauna iba peá wulána.[188] Kásáliu nahakaꞌ rángána iti haneꞌi naimeꞌ, nahángáꞌá, ‘Nubaiari upu-upu indámu!’

²⁹Molingkudu miꞌi rángána iti membiáꞌ ámpu, nauliꞌ, ‘Kupembiáꞌ bona sabaraꞌ manikoꞌ. Nuweꞌiaꞌ wongkódóꞌá tempó. Kudándi ina kubaiari indángkuꞌ!’

³⁰Agáiáná tiꞌara natarima pembiáꞌna iti. Napopesuaꞌ peá i lalu tarungku duuꞌna indána upu nabaiari.

³¹Karaitána hawiꞌ to ntániꞌna apa to pewaliꞌ iti, masusa ntepuꞌu laluraꞌ i tauna iti, haneꞌi laoheꞌ i datu mopahaweꞌ bábehiána hawiꞌ iti.

³²Kanahádina datu laluitaraꞌ iti, ia mohuoꞌ taunána lao mokióꞌ hawiꞌ to kadake bábehiána iti. Kahaweꞌna hawiꞌ iti, nahángáꞌá datu, ‘Io hawiꞌ to kadake ntepuꞌukoꞌ! Upu-upu indámu to handaꞌ ntepuꞌu kuwoe miꞌi hangko i surangkuꞌ, láwiꞌ membiáꞌkoꞌ ámpu i kódóꞌ.

³³Moapa riꞌi haneꞌi io tiꞌarakoꞌ mampokaꞌahiꞌ hangka hawiꞌmu, nodo kakupokaꞌahiꞌmu?’

³⁴Mabukoꞌ ntepuꞌu datu. Hawiꞌ to kadake bábehiána iti napopesuaꞌ i lalu tarungku, rapapahái oaꞌ duuꞌna tebaiari upu-upu indána.”[189]

³⁵Napahópóꞌ Iesu ngkóráꞌ pándiriꞌ iti, Nauliꞌ, “Iti woꞌo to ina nabábehiákou UmáNgkuꞌ i lalu surugáꞌ, ane tiꞌarakou moámpungi hángká rángámi hangko i lalumi ntepuꞌu.”