Read Besoa Matiu 23 Bible Online

Matiu 23 - Besoa bible

Matiu 23

¹Hangko ionoꞌ, Iesu mohángáꞌáheꞌ topeguruNa hai tauna to handaꞌ, Nauliꞌ,

²“Guru-guru agama hai toParisi, hira miꞌi to ara kuasaꞌraꞌ mopaturoꞌákou Paturoꞌna Musa,[248]

³onoꞌ miꞌi haneꞌi hangaa-ngaa niuláꞌ upu-upuna to rapaturoꞌákou, agáiáná ineeꞌ nipeuláꞌi bábehiáraꞌ, láwiꞌ hira haduduáraꞌ tiꞌaraheꞌ mampeuláꞌi apa to rapaturoꞌákou.

⁴Hira mampoweꞌi kilinga to matimi i tauna, láwiꞌ ratámbái mani párentá hai ádá agama to matimi,[249] agáiáná hira haduduáraꞌ, mogalo riꞌi hangkau karaweꞌraꞌ tiꞌara rapakeꞌ motulungi tauna.

⁵Upu-upu to rabábehi, rabábehi i lindoꞌraꞌ tauna bona raita. Rápáꞌna, mouláꞌ ádá ágámántaꞌ, upu-upukeꞌ tobaleilo toIahudiꞌ mopatakaꞌkeꞌ pamboliá i kirentaꞌ hai i tae kabeoꞌtaꞌ. I lalu pamboliá iti, ara sura to rapoukiꞌi bahangapa wátiꞌ hangko i Sura Magasaꞌ.[250] Agáiáná toParisi iti mopamahile pamboliá iti bona raita peá tauna hai ratóiá nodo tauna to mengkoruꞌ ntepuꞌu i Pueꞌ Ala. Noꞌonoꞌ woꞌo rendá-rendá to rapatakaꞌ i kumbáraꞌ,[251] rapakalóe bona rauliꞌ peá tauna ntániꞌna maróhó ntepuꞌu poágámáraꞌ. Mampe to magasaꞌ peheꞌ!

⁶Góeꞌheꞌ ane rapopehoda i pehodaꞌá to i lindoꞌ i posusaꞌá hai i támbi penómbáꞌá.

⁷Góeꞌheꞌ ane rabiláꞌ tauna iumbá-umbá peá kahirámpuá, hai ane rakióꞌheꞌ ‘Guru.’[252]

⁸Agáiáná kómu topeguruNgkuꞌ, ineeꞌkou mampoinao rabiláꞌ hai rakióꞌ ‘Guru’, láwiꞌ hadua peá Gurumi. Mewaliꞌ kómu upu-upu, hibali pekou nodo topohalalu.

⁹Ineeꞌ woꞌo nikióꞌ tauna i duniáꞌ deꞌe ‘Umaꞌ’, tandaꞌ pebiláꞌmi, láwiꞌ Umámi hadua peá, ia miꞌi Pueꞌ Ala to ara i surugáꞌ.

¹⁰Hai ineeꞌkou woꞌo mampoinao rakióꞌ ‘tadulako’, láwiꞌ Tadulakomi hadua peá, ia miꞌi Datu Topehómpóꞌ.

¹¹Heáná to mampoinao bona i reá tueꞌna, hangaa-ngaa mengkaiwóiꞌ hai mewaliꞌ nodo topekádipurá.

¹²Tauna to mampepemahile ina rapaiwóiꞌ, hai tauna to mengkaiwóiꞌ ina napomahile Pueꞌ Ala.

¹³Hurewuꞌmokou guru-guru agama hai toParisi! Bateꞌna ina molámbiꞌkou rugiꞌ, láwiꞌ mampe to maroꞌa pekou! Kómu, motukokou rárá mesuaꞌ i lalu popárentána Pueꞌ Ala láwiꞌ kómu haduduámi, tiꞌara niundeꞌ mewaliꞌ taunáNa, hai tauna ntániꞌna to moundeꞌ, nikóntóheꞌ.[253] [

¹⁴Hurewuꞌmokou guru-guru agama hai toParisi! Mampe to maroꞌa pekou! Mobagiuꞌkou towawine to bembaꞌ bona nirámpáki támbiraꞌ hai óntóꞌna, haneꞌi mekakaekou nipakarue motámbungi bábehiámi to kadake iti. Ina matimi ntepuꞌu karahukumi!][254]

¹⁵Hurewuꞌmokou guru-guru agama hai toParisi! Mampe to maroꞌa pekou! Madota ntepuꞌukou mopaturoꞌ tauna ntániꞌna bona mampeuláꞌiheꞌ paturoꞌmi. Nipenoꞌongi miꞌi molumao karaoꞌ mengkalimba i tahiꞌ, bona molámbiꞌ pekou hadua tauna to mewaliꞌ topegurumi. Hai ane ia mesuaꞌ i poágámámi, nipaturoꞌ bona mampeuláꞌi paturoꞌ to salaꞌ, álána hintotoꞌ ntepuꞌu rahuku i naraka láwiꞌ rumihi mani kakadakena bábehiána hangko i kómu.

¹⁶Hurewuꞌmokou! Nodokou tobilo to moteteꞌ tauna ntániꞌna! Kómu miꞌi to mewaliꞌ guru agama, agáiáná mopakanawoꞌ pekou tauna moliu paturoꞌmi to tiꞌara toꞌu. Rápáꞌna, mepaturoꞌkou, niuliꞌ: ane tauna modándi mokábelái Támbina Pueꞌ Ala, tiꞌara tetakaꞌ hai dándina iti. Agáiáná ane mokábelái párewá buláwá to i lalu Támbina Pueꞌ Ala, ia tetakaꞌ hai dándina iti.

¹⁷Bebe hai bilo ntepuꞌukou! Ba niuliꞌ mahile mani bunduꞌna buláwá haneꞌi Támbina Pueꞌ Ala? Katoꞌuána, Támbina Pueꞌ Ala iti to mopamagasaꞌ párewá buláwá to ara ionoꞌ.

¹⁸Mepaturoꞌkou woꞌo, niuliꞌ: ane tauna modándi mokábelái paintuá popenómbá to i lalu Támbina Pueꞌ Ala, tiꞌara tetakaꞌ hai dándina iti. Agáiáná ane mokábelái popenómbá to raintu i wongko paintuá iti, bateꞌna tetakaꞌ hai dándina iti.

¹⁹Bilo ntepuꞌukou! Ba niuliꞌ mahile mani bunduꞌna popenómbá haneꞌi paintuá popenómbá? Hangaa-ngaa tiꞌara, láwiꞌ paintuá iti miꞌi to mopamagasaꞌ popenómbá to ara i wongkona.

²⁰Mewaliꞌ heáná to modándi mokábelái paintuá popenómbá, lempóna tepasuaꞌ miꞌi woꞌo popenómbá to raintu i wongkona.

²¹Hai heáná to modándi mokábelái Támbina Pueꞌ Ala, lempóna ia modándi miꞌi woꞌo i lalu hangaꞌna Pueꞌ Ala to toroꞌ ionoꞌ.

²²Hai heáná to modándi mokábelái surugáꞌ, lempóna ia mokábelái pehodaꞌá kadatuána Pueꞌ Ala. Hai melumbuꞌ hangko i onoꞌ, Pueꞌ Ala mosabiki dándina.

²³Hurewuꞌmokou guru-guru agama hai toParisi! Mampe to maroꞌa pekou! Madota ntepuꞌukou mampeuláꞌi párentá to manangkoꞌ. Mogalo riꞌi tudaꞌ-tudaꞌ to kókóiꞌ to nodo háre, siderei hai rampaꞌ-rampaꞌ ntániꞌna to ara i hinoemi, nipopenómbá hanggáláꞌ hampuloꞌ i Pueꞌ Ala mouláꞌ Paturoꞌna Musa.[255] Agáiáná párentá to matimi tiꞌara nipeuláꞌi. Rápáꞌna, hangaa-ngaa hintotoꞌ pobutusimi i tauna ntániꞌna, hangaa-ngaa mampokaꞌahiꞌkou hángká rángámi, hai mobukekikou dándimi.[256] Katoꞌuána, párentá to matimi iti to hangaa-ngaa nipeuláꞌi ntepuꞌu, hai ineeꞌ woꞌo nikábáhá pampeuláꞌimi párentá to manangkoꞌ.

²⁴Agáiáná tiꞌara iti to nibábehi. Madotakou mowehángi daliꞌ hangko i uwai to niꞌinu, láwiꞌ rapáliá. Agáiáná untá to rapáliá woꞌo,[257] nipahiameꞌ. Daliꞌ iti nodo párentá to manangkoꞌ peá, hai madotakou mampeuláꞌi párentá iti, agáiáná párentá to matimi to hangaa-ngaa nipeuláꞌi ntepuꞌu, tiꞌara nipailalu. Kómu mewaliꞌkou tadulako agama, agáiáná bilokou.

²⁵Hurewuꞌmokou guru-guru agama hai toParisi! Mampe to maroꞌa pekou! Kómu nodokou tauna to mobahoꞌi painuá hai taboꞌ i rawana peá, mole lalumi bukeꞌ to kadake hai mampokaelu pekou oaꞌ párewána tauna ntániꞌna!

²⁶Kómu toParisi, tobilo mpuꞌukou! Nodo laluna mangku hangaa-ngaa rabahoꞌi, noꞌonoꞌ woꞌo lalumi hangaa-ngaa rapamagasaꞌ bona bábehiámi hintotoꞌ hai peundeꞌána Pueꞌ Ala.[258]

²⁷Hurewuꞌmokou guru-guru agama hai toParisi! Mampe to maroꞌa pekou! Nodokou popatawuá to rawone to bulá.[259] Rawana mababe raita, agáiáná laluna moꞌóntóꞌ buꞌu tomate hai handaꞌ pákáꞌna to mopakedái.

²⁸Noꞌonoꞌ woꞌo kómu. Raita maroꞌa bábehiámi, agáiáná lalumi tiꞌara noꞌonoꞌ. Topodongkoꞌkou hai kadake bábehiámi.

²⁹Hurewuꞌmokou guru-guru agama hai toParisi! Mampe to maroꞌa pekou! Nikádipurá oaꞌ popatawuáraꞌ nabiꞌ-nabiꞌ hai tauna to manótó to tueꞌ hangkoia.

³⁰Mampepemahilekou, láwiꞌ niuliꞌ, ‘Ane rápáꞌna aramongkaiꞌ hingkakani hai toiorungkiꞌ hangkoia, ketiꞌaraꞌangkaiꞌ mampeuláꞌi bábehiáraꞌ mopapate nabiꞌ-nabiꞌ.’

³¹Mewaliꞌ mouláꞌ laluitami iti, nipangákuꞌ mpuꞌu miꞌi kakómuna pemuleꞌáraꞌ to mopapate nabiꞌ-nabiꞌ,

³²hai ina nipaliliu bábehiáraꞌ toiorumi iti![260]

³³Pemuleꞌána mpuꞌukou to kadake! Humemi mobisa nodo lelótó láwiꞌ pakakou mopakanawoꞌ tauna moliu polaluitami. Ba nipekiri ina tekábáhákou hangko i karahukumi i lalu naraka?

³⁴Toiorumi hangkoia mopapateheꞌ handaꞌ tauna to manótó bábehiáraꞌ, mantepuꞌu hangko i kamopapateraꞌ Abeli, haweꞌ-haweꞌ i kamopapateraꞌ nabiꞌ Sakaria ánáꞌna Berekia.[261] Ia rawatui haweꞌ mate i tangabaa Támbina Pueꞌ Ala, i hiliꞌna támbi to magasaꞌ iti hai paintuá popenómbá. Onoꞌ miꞌi haneꞌi ina Kuhuoꞌheꞌ nabiꞌ-nabiꞌ, tauna to moisá ntepuꞌu ngkóráꞌna Pueꞌ, hai guru-guru agama, bona maiheꞌ i kómu to tueꞌ deꞌe-deꞌe mopaturoꞌákou laluitaNgkuꞌ {bona menosoꞌkou hangko i bábehiámi to kadake}. Agáiáná araheꞌ to ina nipapate, araheꞌ to ina nipakuꞌ i kau mombehape, araheꞌ to ina nipapahái i lalu támbi penómbáꞌámi, hai araheꞌ woꞌo to ina nidápáꞌ haweꞌ i wánuá ntániꞌna. Kahópóꞌána, kómu to tueꞌ deꞌe-deꞌe ina rahukukou ánti upu-upu dósáraꞌ toiorumi hangkoia láwiꞌ mopapateheꞌ tauna to manótó i peitána Pueꞌ Ala, {láwiꞌ kómu woꞌo kadake hibali hai hira}.

³⁵

³⁶Toꞌu ntepuꞌu to Kuꞌuliꞌ, hai Kuhángáꞌáꞌákou: kómu to tueꞌ deꞌe-deꞌe bateꞌmi ina rahuku ánti bábehiámi hai ánti bábehiáraꞌ toiorumi to kadake.”

³⁷“Óó toIerusale, toIerusale! Kómu miꞌi to mopapate nabiꞌ-nabiꞌ, hai mowatuikou huoꞌána Pueꞌ Ala to haweꞌ i kómu. Handaꞌ kánina Kupoinao mokámpáikou nodo manuꞌ moꞌóbóki ánáꞌna, agáiáná tiꞌaraꞌAꞌ nitarima.

³⁸Nipehádingi! Támbi penómbáꞌámi deꞌe ina napálehi Pueꞌ Ala.[262]

³⁹Bona niꞌisá: tiꞌaraPoꞌ ina niꞌita duuꞌna haweꞌ tempóna ina niuliꞌ, ‘Pueꞌ Ala mowátiꞌ tauna to haweꞌ, to mewaliꞌ huoꞌáNa!’ ”[263]