Read Besoa Matiu 24 Bible Online

Matiu 24 - Besoa bible

Matiu 24

¹Roo molaluita, Iesu mopálehi Támbina Pueꞌ Ala. TopeguruNa mohungkukiheꞌ bona motudeꞌá kamababena hai kamaróhóna támbi iti.[264]

²Nahángáꞌáheꞌ Iesu, “Niꞌita miꞌi upu-upuna iti? Bona niꞌisá: ina haweꞌ tempóna, tiꞌara haweꞌ hambuaꞌ watu to ina mentárá i katoroꞌána, bateꞌna ina ragero upu-upu.”[265]

³Roo onoꞌ, Iesu hai topeguruNa pohuꞌheꞌ lao i buluꞌ Saitu.[266] Tangaꞌna Iesu mehoda haduduáNa, laomoheꞌ topeguruNa mekuneꞌ i Hia, “Guru, impirá Támbina Pueꞌ Ala ina ragero nodo to Nuꞌuliꞌ ininá?” Hai mekuneꞌ wopaheꞌ, rauliꞌ, “Apa tandaꞌna kaꞌina haweꞌMu hai kahópóꞌána duniáꞌ?”

⁴Nahániki Iesu, “Maingáꞌ-ingáꞌkou, bona tiꞌarakou rapakanawoꞌ,

⁵láwiꞌ handaꞌ tauna ina haweꞌ hai ina manguliꞌ kahirana Datu Topehómpóꞌ, álána handaꞌ tauna ina rapakanawoꞌ.

⁶Ina nihádi topombeala, hai ina nihádi woꞌo bámbári iumbá-umbá peá ara to mombeala, agáiáná ineeꞌkou malááꞌ. Upu-upu iti bateꞌna ina mewaliꞌ {láwiꞌ napakanótó miꞌi Pueꞌ Ala}. Agáiáná upu-upuna iti tiꞌara mopakanótó kahópóꞌána miꞌi duniáꞌ.

⁷Tampoꞌ ina mombeala hai tampoꞌ ntániꞌna, kadatuá ina moewaꞌ kadatuá, hai iumbá-umbá peá ina ara rimi hai linu.

⁸Upu-upuna iti hangko pantepuꞌuána, agáiáná kapári iti ina tetámbái mani karumihina nodo kapári to nahádi towawine to tangaꞌna humádi.

⁹I tempó iti, ánti peuláꞌmi i Kódóꞌ, tauna i humalele duniáꞌ ina mokáhihiꞌkou. Ina rahuhuꞌkou i topopárentá bona rapopeahiahiꞌkou hai rapapatekou.

¹⁰Handaꞌ tauna ina mosápuáka peuláꞌraꞌ i Kódóꞌ. Ara to ina mohuhuꞌ halalu hampepepoináláiraꞌ i ewáliraꞌ, hai handaꞌ tauna to ina mombekáhihiꞌ.

¹¹Ina haweꞌheꞌ woꞌo handaꞌ nabiꞌ to ina mopakanawoꞌ handaꞌ tauna.

¹²I tempó iti, ina tetámbái kakadakeraꞌ tauna, duuꞌna tiꞌara piꞌi ara kamaꞌahiꞌraꞌ i hángká rángáraꞌ.

¹³Agáiáná tauna to mepoinálái oaꞌ i Kódóꞌ haweꞌ i kahópóꞌána, ina molámbiꞌheꞌ katueꞌ to maroꞌa to tiꞌara mokahópóꞌá.

¹⁴Ane bámbári kana i popárentána Pueꞌ Ala rabámbári miꞌi i humalele duniáꞌ, hai upu-upu tauna mehádi miꞌi, hangko haweꞌ riꞌi kahópóꞌána duniáꞌ.”

¹⁵Iesu mopaliliu wopiꞌi laluitaNa, Nauliꞌ, “Hangkoia, nabiꞌ Danieli mampolaluita kaꞌina haweꞌna ‘To Kadake to Megero’ to mopakedái Támbina Pueꞌ Ala.[267] Heáná to mobásá laluita deꞌe, hangaa-ngaa napekiri maroꞌa apa lempóna! Ane niꞌita to natunggái Danieli iti meángkáꞌ i Támbina Pueꞌ Ala,

¹⁶rángina miꞌi tauna to toroꞌ i tampoꞌ Iudá[268] mengkatueꞌheꞌ melangka lao i buluꞌ.

¹⁷Tauna to tangaꞌraꞌ mehoda mengkakaroo i atuꞌ to hirante, ineeꞌmoheꞌ lebaꞌ mesuaꞌ i lalu támbiraꞌ moala apa-apa, láwiꞌ tiꞌara piꞌi ina ara tempó!

¹⁸Tauna to tangaꞌraꞌ i hinoe, ineeꞌmoheꞌ lebaꞌ mesuleꞌ lao i wánuá moala kumbáraꞌ. Hangaa-ngaa liliumoheꞌ melangka!

¹⁹Ina masusa ntepuꞌu rahádi towawine to morodua hai to mopahuhu ánáꞌna.

²⁰Mekakaekou i Pueꞌ Ala bona alo pelangkaꞌámi iti ineeꞌ mewaliꞌ i tempó udá[269] ba i alo penómbáꞌá.[270]

²¹I tempó iti, ina haweꞌ kapári to rumihi ntepuꞌu to tiꞌara mani hangkani mewaliꞌ mantepuꞌu hangko i pewaliꞌána duniáꞌ duuꞌna haweꞌ deꞌe-deꞌe, hai tiꞌara woꞌo ara to ina mewaliꞌ noꞌonoꞌ i alo to ina haweꞌ.[271]

²²Agáiáná tempó kapári iti ina napahawiáꞌ Pueꞌ Ala, láwiꞌ ane tiꞌara Napahawiáꞌ, tiꞌara ara haweꞌ hadua to ina rapelae. Agáiáná ánti kamaꞌahiꞌNa i tauna to Napileꞌi, onoꞌ miꞌi haneꞌi ina Napahawiáꞌ tempó kapári iti.[272]

²³I tempó iti, ane ara to mohángáꞌáꞌákou, ‘Peita, demiꞌe Datu Topehómpóꞌ!’ ba ‘Domi maiꞌo!’ ineeꞌheꞌ nipoinálái,

²⁴láwiꞌ ina haweꞌ handaꞌ tauna to mepakanawoꞌ to manguliꞌ kahirana miꞌi Datu Topehómpóꞌ, ba to manguliꞌ kahirana miꞌi nabiꞌ. Ina mobábehiheꞌ tandaꞌ kuasaꞌ hai tandaꞌ to metingkáráki, bona mopakanawoꞌheꞌ handaꞌ tauna. Mogalo riꞌi tauna to napileꞌi Pueꞌ Ala, ina rapehukáꞌ rapakanawoꞌ.

²⁵Upu-upuna iti Kuhángáꞌámokou ami bona ane mewaliꞌi, tiꞌarakou ina rapakanawoꞌ.

²⁶Mewaliꞌ, ane ara to mohángáꞌákou, ‘Datu Topehómpóꞌ ara i pádá loriꞌ,’[273] ineeꞌkou lao! Ane rauliꞌ, ‘Datu Topehómpóꞌ ara i lalu támbi, mentabuni i lintuꞌ,’ ineeꞌ nipoinálái!

²⁷Láwiꞌ ane haweꞌ huleꞌ Ánáꞌ Mánusiá, ina tongawaꞌ ntepuꞌu kahaweꞌNa. Ina raita i humalele duniáꞌ, nodo pewangkaꞌ kiláꞌ to mesupaꞌ i pembetoá alo hai mewangkaꞌ haweꞌ-haweꞌ i katámpuána alo.

²⁸Pándiriꞌ, ane moitakou handaꞌ tádáhi kóngká hirámpu, niꞌisá kaꞌárána to mate ionoꞌ. Noꞌonoꞌ woꞌo, ina tongawaꞌ ntepuꞌu kahaweꞌna huleꞌ Ánáꞌ Mánusiá mai i duniáꞌ.”

²⁹“Ane liu miꞌi tempó kapári iti, ‘alo ina mambáliꞌ mewaliꞌ makáindi, wulá tiꞌara piꞌi ina mewangkaꞌ, betue ina manawoꞌ hangko i langiꞌ, hai Pueꞌ Ala ina mampopoenggo upu-upu to ara i langiꞌ.’[274] [275]

³⁰I tempó iti, ina mesupaꞌ tandaꞌ i langiꞌ to molempónga kahaweꞌna miꞌi Ánáꞌ Mánusiá, hai upu-upu tauna i duniáꞌ ina teriaꞌ, láwiꞌ ina moitaheꞌ Ánáꞌ Mánusiá i wongko gawu mendáulu mai hangko i langiꞌ. Ina tongawaꞌ ntepuꞌu kuasaꞌNa hai peawaꞌna tueꞌNa.

³¹Tamburuꞌ to maoniꞌ ntepuꞌu pokániꞌna ina ratawueꞌ rapasimbuku, hai Ánáꞌ Mánusiá ina mohuoꞌ malaꞌekaNa lao morámpu tauna to Napileꞌi hangko i humalele duniáꞌ, mantepuꞌu hangko i pembetoá alo duuꞌna haweꞌ i katámpuána alo.”

³²Roo onoꞌ, Iesu molaluita i topeguruNa, Nauliꞌ, “Nipailalu apa to ina Kupaturoꞌákou moliu pándiriꞌ hangko i kau ara. Ane niꞌita dáꞌána motumbeꞌ hai mantepuꞌu motaweꞌ, niꞌisá miꞌi kaꞌina haweꞌna tempó alo.

³³Noꞌonoꞌ woꞌo, ane niꞌita pewaliꞌna upu-upu to Kupahaweꞌákou ininá, niꞌisá katiꞌárána piꞌi marue ina haweꞌ miꞌi kahópóꞌána duniáꞌ.[276]

³⁴Toꞌu ntepuꞌu to Kuhángáꞌákou: upu-upu to Kuꞌuliꞌ ininá bateꞌna ina mewaliꞌ hangko tiꞌara mani mate upu-upu tauna to tueꞌ tempó deꞌe.[277]

³⁵Langiꞌ hai duniáꞌ ina magero, agáiáná laluitaNgkuꞌ bateꞌna ina ara oaꞌ haweꞌ i rue-ruena.”[278]

³⁶“Agáiáná alo hai jaa pewaliꞌna upu-upuna iti,[279] bateꞌna peá UmáNgkuꞌ to moisá. Tiꞌara ara haweꞌ hadua tauna to moisá. Mogalo malaꞌeka to i surugáꞌ, tiꞌara woꞌo raisá. Hai ÁnáꞌNa Pueꞌ Ala, tiꞌara woꞌo Naisá.

³⁷Apa to mewaliꞌ hangkoia i tempóna nabiꞌ Noho tueꞌ mani, ina mewaliꞌ woꞌo i alo kahaweꞌána huleꞌ Ánáꞌ Mánusiá.

³⁸I tempóna nabiꞌ Noho hangko tiꞌara mani duniáꞌ nalábóꞌ uwai, tauna mampomaleꞌaheꞌ, tiꞌara raisá apa to ina merampe. Mandeꞌ hai mainuheꞌ oaꞌ, mosambokoheꞌ hai mosusaheꞌ. Noꞌonoꞌ katueꞌraꞌ duuꞌna haweꞌ tempóna nabiꞌ Noho mesuaꞌ i lalu duanga to mahile.[280]

³⁹Nalábóꞌmoheꞌ uwai hangko raisá riꞌi apa to mewaliꞌ. Noꞌonoꞌ woꞌo kamampomaleꞌaraꞌ tauna i tempóna Ánáꞌ Mánusiá ina haweꞌ huleꞌ i duniáꞌ.

⁴⁰Rápáꞌna, rodua tauna ina mobágóꞌ i hinoe: hadua ina raꞌala hai to haduána rapálehi.

⁴¹Noꞌonoꞌ woꞌo rodua towawine to tangaꞌraꞌ mombau: hadua ina raꞌala hai to haduána rapálehi.

⁴²Onoꞌ miꞌi haneꞌi Kuꞌuliꞌ: hangaa-ngaa nipatimama lalumi, láwiꞌ tiꞌara niꞌisá impirá Pueꞌ ina haweꞌ!

⁴³Hangaa-ngaa nipailalu ngkóráꞌ pándiriꞌ deꞌe: Ane kenaisái ami pueꞌ támbi impirá kaꞌina haweꞌna topanako, bateꞌna maingáꞌ-ingáꞌ, tiꞌara ina napatodáhi mesuaꞌ i lalu támbina.

⁴⁴Noꞌonoꞌ woꞌo kómu: hangaa-ngaa timamakou oaꞌ, láwiꞌ kaꞌina haweꞌna huleꞌ Ánáꞌ Mánusiá, tiꞌara niꞌisá impirá tempóna.”

⁴⁵“Nipailalu ngkóráꞌ pándiriꞌ deꞌe: Ara hadua hawiꞌ to manótó laluna hai peisá napoinálái pueꞌna. Ia naꞌángkáꞌ pueꞌna bona motadulakoi hawiꞌ ntániꞌna hai mokádipurá pandeꞌraꞌ alo-alona.

⁴⁶Morasiꞌ ntepuꞌu hawiꞌ iti ane i pesuleꞌna pueꞌna, ia nalámbiꞌ pueꞌna tangaꞌna mampopolumao bágóꞌna.

⁴⁷Hai Kuhángáꞌáꞌákou: hawiꞌ iti bateꞌna ina naꞌángkáꞌ pueꞌna mewaliꞌ to mokádipurá upu-upu párewána.

⁴⁸Agáiáná noumbá ane tiꞌara maroꞌa pambiárána hawiꞌ iti? Ina nauliꞌ i laluna, ‘Pueꞌkuꞌ tiꞌara ina poloꞌ mesuleꞌ!’ Mewaliꞌ ia tiꞌara piꞌi ina mampopolumao bágóꞌna.

⁴⁹Ina natepuꞌu mopapaháiheꞌ hangka hawiꞌna, haneꞌi mandeꞌ hai mainu peheꞌ oaꞌ hingkakani hai tauna to malangu.

⁵⁰Agáiáná hangkaꞌ-hangkaꞌ perái ina haweꞌ pueꞌna i tempó to tiꞌara nasangka-sangka.

⁵¹Hawiꞌ iti ina napapahái pueꞌna hai ratibe i katoroꞌá tauna to mampe to maroꞌa. Ionoꞌ, tauna to rahuku ina teriaꞌ hai mapári ntepuꞌu rahádi.”