Read Besoa Matiu 28 Bible Online

Matiu 28 - Besoa bible

Matiu 28

¹Liu miꞌi alo penómbáꞌá toIahudiꞌ, mepulo-pulo alo Minggu, Maria toMadalena hai Maria to ntániꞌna laoheꞌ mampeita popatawuána Iesu.

²Hangkaꞌ-hangkaꞌ perái mewaliꞌ linu to rumihi, láwiꞌ hadua malaꞌekana Pueꞌ mendáulu mai hangko i surugáꞌ mogesuꞌ watu popetuko popatawuá, hai mehoda i wongkona.

³Lenggeꞌna mewangkaꞌ nodo kiláꞌ, hai waruꞌna bulá ntepuꞌu.

⁴Surudadoꞌ to mekámpái ionoꞌ, malááꞌ ntepuꞌumoheꞌ, moridiꞌheꞌ, hai madungkáheꞌ, nodo peramoheꞌ tauna to mate.

⁵Agáiáná nauliꞌ malaꞌeka i towawineheꞌ iti, “Ineeꞌkou malááꞌ. Kuisá to nipeliꞌ Ia miꞌi Iesu to rapakuꞌ i kau mombehape.

⁶Ia tiꞌara piꞌi ara ieneꞌ. Ia tueꞌ miꞌi huleꞌ nodo to Nahángáꞌáꞌámokou.[358] Mai nipeita karawoliáNa.

⁷Upu onoꞌ, hawiáꞌkou lao nipahaweꞌ i topeguruNaheꞌ: ‘Iesu tueꞌ miꞌi huleꞌ. Ia ina moioru lao i tampoꞌ Galilea, hai ina nipohidupaꞌá ionoꞌ.’[359] Hangaa-ngaa nibuhinao apa to kuhángáꞌáꞌákou deꞌe!”

⁸Hawiáꞌ mpuꞌumoheꞌ towawine iti pohuꞌ hangko i popatawuá. Malááꞌ ntepuꞌuheꞌ, agáiáná góeꞌheꞌ woꞌo. I tempóraꞌ manggagu melangka ina lao mopahaweꞌ apa to pewaliꞌ i topeguruna Iesu,

⁹iaperái Iesu mampohidupaꞌheꞌ hai Natabeheꞌ. Lao miꞌi rahungkuki hai rakápui bitiNa, tandaꞌ penómbáraꞌ i Hia.

¹⁰Nahángáꞌáheꞌ Iesu, “Ineeꞌkou malááꞌ! Laomokou hai nihángáꞌáꞌáheꞌ halaluNgkuꞌ bona laoheꞌ i Galilea, ina mohidupaꞌangkaiꞌ ionoꞌ.”

¹¹I tempóraꞌ towawine iti mesuleꞌ, bahangapa surudadoꞌ to mokámpái popatawuá laoheꞌ i lalu kótá mopahaweꞌ i kapalaꞌ-kapalaꞌ tadulako menómbá upu-upu to mewaliꞌ i popatawuá.

¹²Onoꞌ miꞌi haneꞌi mogómbóheꞌ kapalaꞌ-kapalaꞌ tadulako menómbá hai totosaeraꞌ toIahudiꞌ to ntániꞌna. I pogómbóáraꞌ iti, himpuduheꞌ, mampoweꞌi dóiꞌ to handaꞌ i surudadoꞌ to mokámpái popatawuá rapopotuko humeraꞌ bona ineeꞌ rauliꞌ-uliꞌ.

¹³Hai rahángáꞌáheꞌ surudadoꞌ iti, “Nipolaluita i tauna node: ‘I tangaꞌ káindi tangaꞌkiꞌ letaꞌ, wátámandoꞌna Iesu rapanako topeguruNa.’

¹⁴Ane laluitami iti nahádi Mágáuꞌ Pilatu, kaiꞌ rái to molaluita i hia bona ineeꞌkou rahuku.”[360]

¹⁵Surudadoꞌ iti motarimaheꞌ dóiꞌ to raweꞌiheꞌ, hai mopahaweꞌheꞌ apa to roomoheꞌ rapaturoꞌá. Duuꞌna haweꞌ deꞌe-deꞌe, tebámbári oaꞌ laluita iti i toIahudiꞌ.

¹⁶Topeguruna Iesu to hampuloꞌ hai hadua, laoheꞌ i tampoꞌ Galilea, i buluꞌ to napakanótóámoheꞌ ami Iesu.

¹⁷Ionoꞌ, mohidupaꞌ mpuꞌumoheꞌ hai Iesu, haneꞌi menómbáheꞌ i Hia. Agáiáná ara woꞌo to bata-bata mani laluraꞌ.

¹⁸Nahungkukiheꞌ Iesu, haneꞌi Nahángáꞌáheꞌ, “Upu-upu kuasaꞌ i surugáꞌ hai i duniáꞌ naweꞌiMoꞌ Pueꞌ Ala.

¹⁹Mewaliꞌ, iumbá peá kalaoámi i humalele duniáꞌ, nipaturoꞌheꞌ upu-upu tauna bona mepoináláiheꞌ i Kódóꞌ. Niriuheꞌ i lalu hangaꞌna Umaꞌ, Ánáꞌ hai Inao to Magasaꞌ.

²⁰Nipaturoꞌmoheꞌ bona mampeuláꞌiheꞌ upu-upu to Kuhawaꞌámokou. Hai hangaa-ngaa nibuhinao: ina Kuporángákou oaꞌ duuꞌna haweꞌ i kahópóꞌána duniáꞌ.”[361]