Read Besoa Matiu 9 Bible Online

Matiu 9 - Besoa bible

Matiu 9

¹Hangko ionoꞌ, mengkaheꞌ miꞌi Iesu i duanga hingkakani hai topeguruNa, haneꞌi mengkalimbamoheꞌ mesuleꞌ lao i katoroꞌáraꞌ i wánuá Kapenau.

²Kahaweꞌraꞌ ionoꞌ, araheꞌ tauna to mopakowaꞌ hadua topaluꞌ to rapopaturu i aleꞌ, laoheꞌ motunggái Iesu. Kanaitána Iesu kamahilena pehárungáraꞌ kaꞌina mauriꞌna rángáraꞌ iti, Ia molaluita miꞌi i topaluꞌ iti, Nauliꞌ, “ÁnáꞌKuꞌ, nupakaróhó lalumu! Teámpungi miꞌi dósámu.”

³Bahangapa guru agama to mohádi laluitana Iesu iti manguliꞌ i laluraꞌ, “Tauna deꞌe mopahibali kuasaꞌNa hai Pueꞌ Ala! {Bateꞌna peá Pueꞌ Ala to mobuku moámpungi dósá.}”

⁴Agáiáná naisá ntepuꞌu Iesu apa to ara i laluraꞌ, onoꞌ miꞌi haneꞌi Nahángáꞌáheꞌ, “Moapa riꞌi haneꞌi kadake ntepuꞌu pekirimi?

⁵Umbána to magampaꞌ rauliꞌ, ‘Teámpungi miꞌi dósámu,’ ba ‘Pearó, molumaomokoꞌ’.

⁶Deꞌe-deꞌe ina Kupatongawaꞌákou kaꞌárána kuasaꞌna Ánáꞌ Mánusiá moámpungi dósá i duniáꞌ.” Hangko ionoꞌ, mehaileꞌ miꞌi Iesu i topaluꞌ iti, haneꞌi Nahángáꞌá, “Mearómokoꞌ, nulóló miꞌi aleꞌmu hai mesuleꞌmokoꞌ lao i támbimu!”

⁷Mearó mpuꞌu miꞌi topaluꞌ iti, haneꞌi mesuleꞌ lao i támbina.

⁸Karaitána tauna to handaꞌ apa to pewaliꞌ iti, rapotingkáráꞌ haneꞌi motóiáheꞌ Pueꞌ Ala, rauliꞌ, “Kipomahile Pueꞌ Ala láwiꞌ Ia mopatongawaꞌ kuasaꞌNa i tauna!”

⁹Roo onoꞌ, pohuꞌ miꞌi Iesu hangko ionoꞌ. I tangaꞌ rárá, Ia moita hadua tauna to rahangaꞌ Matiu[87] i lalu kantóróna. Matiu iti tangaꞌna mampopolumao bágóꞌna moróróꞌ ásele.[88] Nauliꞌ Iesu i hia, “Meuláꞌmokoꞌ i Kódóꞌ!” Kásáliu meángkáꞌ miꞌi Matiu, haneꞌi meuláꞌ i Iesu.

¹⁰Roo onoꞌ, Iesu hai topeguruNa laoheꞌ i támbina Matiu bona mandeꞌheꞌ hingkakani. Tangaꞌraꞌ mandeꞌ, handaꞌ toperóróꞌ ásele hai tauna ntániꞌna haweꞌheꞌ woꞌo hai mandeꞌheꞌ hingkakani. Tauna iti rarekeꞌheꞌ tauna to tiꞌara maroꞌa.[89]

¹¹Araheꞌ toParisi to moitaheꞌ mandeꞌ hingkakani, onoꞌ miꞌi haneꞌi rapekuneꞌ i topeguruna Iesu to ntániꞌna, rauliꞌ, “Moapa riꞌi haneꞌi gurumi mandeꞌ hingkakani hai tauna to tiꞌara maroꞌa?”

¹²Nahádi Iesu pekuneꞌraꞌ iti, onoꞌ miꞌi haneꞌi Nahángáꞌáheꞌ, “Tauna to tiꞌara maduꞌa, tiꞌara paraluu mampeliꞌ sando. Ngkáliꞌna riꞌi, tauna to maduꞌa to paraluu mampeliꞌ sando.

¹³Mewaliꞌ, hangaa-ngaa nipekiri maroꞌa apa lempóna ngkóráꞌna Pueꞌ Ala to teukiꞌ node: ‘Tiꞌara binataꞌ to Kuꞌundeꞌ nipopenómbá i Kódóꞌ, agáiáná to Kuꞌundeꞌ ia miꞌi bona maꞌahiꞌkou i hángká rángámi.’ ” [90] Lempóna: tiꞌaraꞌAꞌ mai mokióꞌ tauna to mampekiri manótó bábehiáraꞌ, agáiáná maiAꞌ mokióꞌ tauna to moisá kamadósáraꞌ hai menosoꞌheꞌ.

¹⁴Hangko ionoꞌ, haweꞌmoheꞌ bahangapa topeguruna Iohane Toperiu, laoheꞌ mekuneꞌ i Iesu, rauliꞌ, “Moapa riꞌi haneꞌi kaiꞌ hai toParisi pakaꞌangkaiꞌ mopuasaꞌ, agáiáná topeguruMu tiꞌara?”

¹⁵Iesu mohánikiheꞌ moliu ngkóráꞌ pándiriꞌ, Nauliꞌ node: “Tauna to i posusaꞌá petauna, ba masusa laluraꞌ i tempóna tobaleilo to ratauna ara mani i oloꞌraꞌ? Tiꞌara. Agáiáná ina haweꞌ tempóna, tobaleilo to ratauna ina raꞌala hangko i oloꞌraꞌ. I tempó iti riꞌi hangko ina mopuasaꞌraheꞌ.”[91]

¹⁶Roo onoꞌ, Iesu mopahaweꞌ wopiꞌi rompákáꞌ ngkóráꞌ pándiriꞌ, Nauliꞌ, “Tiꞌara ara hadua tauna to motámpelei badu to sae hai báná to woꞌu, láwiꞌ báná to woꞌu ina mengkuruꞌ duuꞌna mohepaꞌ badu to sae iti, álána mantámbái riꞌi kamahepaꞌna.

¹⁷Noꞌonoꞌ woꞌo, tiꞌara maroꞌa mokándó anggoroꞌ to woꞌu i pemboliá to sae to rabábehi hangko i koliꞌ binataꞌ, láwiꞌ ane háwóái, ina mahepaꞌ pemboliá to sae iti, álána mabubu anggoroꞌ, hai marugiꞌ woꞌo pemboliána. Mewaliꞌ anggoroꞌ to woꞌu hangaa-ngaa rakándó i pemboliá to woꞌu, bona anggoroꞌ hai pamboliána maroꞌa.”[92]

¹⁸Tangaꞌna mani Iesu molaluita hai topeguruna Iohane Toperiu, haweꞌ miꞌi hadua tadulako támbi penómbáꞌáraꞌ toIahudiꞌ[93] lao molingkudu i bitina Iesu membiáꞌ tulungi. Nahángáꞌá, “Pueꞌ! Ánáꞌkuꞌ towawine hangko kamatena. Kupembiáꞌ bona laokeꞌ i támbingkuꞌ, Nupekamaꞌ bona tueꞌ huleꞌ.”

¹⁹Mewaliꞌ meuláꞌ mpuꞌu miꞌi Iesu i hia, hingkakani hai topeguruNaheꞌ.

²⁰Tangaꞌraꞌ molumao, hadua towawine mohungkuki Iesu hangko i taleuꞌNa bona motóbóꞌ wuntu kumbáNa. Towawine iti, hampuloꞌ miꞌi hai rompare nahumba oaꞌ.[94]

²²Iesu mampehaileꞌ towawine iti haneꞌi Nahángáꞌá, “ÁnáꞌKuꞌ, nupakaróhó lalumu! Ánti pepoináláimu i Kódóꞌ, mauriꞌmokoꞌ.” Tempó iti woꞌo, towawine iti mauriꞌ.

²³Roo onoꞌ, Iesu mopaliliu polumaoNa lao i támbina tadulako támbi penómbáꞌá. KahaweꞌNa ionoꞌ, Naita handaꞌmoheꞌ tauna to rasaro bona motulali, hai araheꞌ woꞌo tauna to handaꞌ to metatangi.

²⁴Molaluita miꞌi Iesu, Nauliꞌ, “Mesuwuꞌmokou upu-upu hangko ieneꞌ! Ánángkóiꞌ iti tiꞌara mate, agáiáná letaꞌ peá.” Karahádina peá laluitaNa iti, rapatawai riꞌi.

²⁵KaNapopesuwuꞌraꞌ hangko i támbi, mesuaꞌ miꞌi Iesu i lintuꞌna ánángkóiꞌ iti, haneꞌi Natibaaꞌ taena.[95] Ánángkóiꞌ iti kásáliu mearó láwiꞌ tueꞌ miꞌi huleꞌ.

²⁶Tandaꞌ kuasaꞌ to nabábehi Iesu iti tebámbári i humalele tampoꞌ Galilea.

²⁷Kapohuꞌna Iesu hangko ionoꞌ, ara rodua tobilo to meuláꞌ bókóꞌ hai mekióꞌ-kióꞌheꞌ oaꞌ, rauliꞌ, “Pemuleꞌána Datu Daudiꞌ,[96] Nupokaꞌahiꞌ wongkaiꞌkaa!”

²⁸I pesuaꞌna Iesu i lalu támbi, haweꞌmoheꞌ tobilo to rodua iti. Nakuneꞌheꞌ Iesu, “Ba nipoinálái kaꞌárána kuasaꞌKuꞌ mopakauriꞌkou?” Rahániki, “Kipoinálái, Pueꞌ!”

²⁹Hangko ionoꞌ, Nakamaꞌ miꞌi mátáraꞌ haneꞌi Nahángáꞌáheꞌ, “Ánti pepoináláimi, mauriꞌmokou.”

³⁰Kásáliu meitaheꞌ. Agáiáná napaingáꞌiheꞌ Iesu, Nauliꞌ, “Ineeꞌ nipolaluita i heáná peá apa to Kubábehi deꞌe.”[97]

³¹Agáiáná kehapiꞌheꞌ Nakóntó, bateꞌna peá lao rabámbári i humalele tampoꞌ iti apa to nabábehi Iesu i hira.

³²Kapohuꞌraꞌ peá tobilo iti, ara hadua tauna to raꞌánti lao i Iesu. Tauna iti tiꞌara peisá molaluita ánti kanapesuaꞌina setáꞌ.

³³I kanapopesuwuꞌna miꞌi Iesu setáꞌ iti, tauna iti mantepuꞌu molaluita. Rapotingkáráꞌ ntepuꞌu tauna to handaꞌ moita apa to pewaliꞌ iti, rauliꞌ, “Ee! Maróhó ntepuꞌu kuasaꞌNa! Tiꞌara mani hangkani mewaliꞌ to nodeꞌe i tampoꞌ Sáráeliꞌ!”

³⁴Agáiáná toParisi tiꞌaraheꞌ mampoinálái kahangko i Pueꞌ Alana kuasaꞌna Iesu. Rauliꞌ, “Tauna iti mopakeꞌ peá kuasaꞌna daturaꞌ setáꞌ mampopelóhóꞌ setáꞌ.”

³⁵Hangko ionoꞌ, Iesu hai topeguruNa molumao wopaheꞌ lao i kótá-kótá hai wánuá-wánuá {i tampoꞌ Galilea}. Iesu mopahaweꞌ Ngkóráꞌ Marasa mokana i popárentána Pueꞌ Ala, hai mepaturoꞌ i támbi penómbáꞌá. Ia mopakauriꞌ woꞌo upu-upu tauna to maduꞌa hai to tiꞌara masilolonga wátáraꞌ.

³⁶Maꞌahiꞌ laluNa moita tauna to handaꞌ iti, láwiꞌ handaꞌ kamapáriraꞌ. Tiꞌaraheꞌ ara to motulungi, nodoheꞌ dimbá[98] to tiꞌara rapoewu.

³⁷Nauliꞌ Iesu i topeguruNaheꞌ, “Handaꞌheꞌ tauna to peisá rapándiriꞌ nodo pare to mangka láwiꞌ timamamoheꞌ mepoinálái i Kódóꞌ, agáiáná tiꞌara handaꞌ to peisá motulungiheꞌ mai i Kódóꞌ.

³⁸Mewaliꞌ mekakaekou i Pueꞌ Ala bona mantámbái tauna to ina moánti Ngkóráꞌ Marasa bona handaꞌ tauna to ina mepoinálái i Kódóꞌ.”