Read Besoa Marakusi 3 Bible Online

Marakusi 3 - Besoa bible

Marakusi 3

¹Hangkani tempó, lao wopiꞌi Iesu i támbi penómbáꞌá. Ionoꞌ, ara hadua tauna to mate taena hambali.

²Araheꞌ woꞌo toParisi to molelemata Iesu, babilaꞌ ina mepakauriꞌ i alo penómbáꞌá. Onoꞌ miꞌi haneꞌi rapeita ntepuꞌu apa to ina nabábehi Iesu.

³Nauliꞌ Iesu i tauna to mate taena hambali, “Maikoꞌ! Meángkáꞌkoꞌ i lindoꞌ,”

⁴haneꞌi Iesu mokuneꞌheꞌ toParisi, “Mouláꞌ áturá ágámántaꞌ, apa to peisá tabábehi i alo penómbáꞌá: mobábehikeꞌ to maroꞌa ba to kadake? Motulungikeꞌ tauna ba mopapatekeꞌ tauna?” Agáiáná, tiꞌaraheꞌ mehániꞌ, maniiꞌ-niiꞌ peheꞌ.

⁵Mewaliꞌ masusa laluna Iesu láwiꞌ matuꞌa gaga laluraꞌ. {Rapaioru mani áturá haneꞌi motulungi tauna.} Ánti kamabukoꞌNa, Natótóiheꞌ mantoleli haneꞌi Nahángáꞌá iti tauna to mate taena hambali, “Ónáꞌ taemu!” Kanaónáꞌna taena, kásáliu mauriꞌ.

⁶{I karaitána toParisi, Iesu mopakauriꞌ tauna i alo penómbáꞌá,} pohuꞌmoheꞌ hangko i támbi penómbáꞌá, haneꞌi laoheꞌ mohawaꞌ ngkábuni hai taunána Datu Herode,[34] mampeliꞌheꞌ rárá bona Iesu rahuku mate.

⁷Roo onoꞌ, Iesu hai topeguruNa pohuꞌheꞌ lao i wiwi rano Galilea. Handaꞌ toGalilea to meuláꞌ i Hia. Handaꞌ woꞌo tauna to haweꞌ hangko i tampoꞌ Iudá,

⁸tepasuaꞌ kótá Ierusale, hangko i tampoꞌ Idumea,[35] hangko i hambali uwai Iarade, hai ara woꞌo to hangko i kótá Tiru hai Sido.[36] Handaꞌ ntepuꞌu tauna to lao i Iesu láwiꞌ mohádimoheꞌ bámbári kana i upu-upu to Nabábehi.

⁹Handaꞌ tauna to tiꞌara ralalu Napakauriꞌ, álána mombegaeꞌ-gaeꞌmoheꞌ tauna lao mohungkuki bona mampekamaꞌheꞌ Iesu. Ánti kahandaꞌraꞌ tauna, onoꞌ miꞌi haneꞌi Iesu mohuoꞌ topeguruNa mopatimama duanga ina Napengkaheꞌi, bona ineeꞌ ragihiꞌ-gihiꞌ tauna to handaꞌ.

¹¹Noꞌonoꞌheꞌ woꞌo tauna to napesuaꞌi setáꞌ. I poitáraꞌ Iesu, liu-liuheꞌ mopalumbá i bitiNa, hai setáꞌ iti monganga-ngangaheꞌ rapasimbuku, rauliꞌ, “Io miꞌi Ánáꞌna Pueꞌ Ala!”

¹²Agáiáná Iesu mokóntó ntepuꞌuheꞌ, bona ineeꞌ rapehángáꞌá kaheánáNa.

¹³Roo onoꞌ, Iesu lao i kaꞌaraꞌá to ara i buluꞌ-buluꞌna, haneꞌi mokióꞌ tauna to Naundeꞌ ina meuláꞌ i Hia.

¹⁴Kahaweꞌraꞌ ionoꞌ, Ia mopileꞌi hampuloꞌ hai rodua tauna hangko i oloꞌraꞌ bona mewaliꞌ suroNa. Nahángáꞌáheꞌ, “Kupilekiꞌou bona niporángáꞌAꞌ. Ina Kuhuoꞌkou lao mopahaweꞌ Ngkóráꞌ Marasa,

¹⁵hai ina Kuweꞌikou kuasaꞌ mampopesuwuꞌ setáꞌ.”

¹⁶Deꞌe miꞌi hangaꞌraꞌ to hampuloꞌ hai rodua iti:[37] Simoꞌ to nahangaꞌ Iesu Peturuꞌ;[38] roo onoꞌ, Iakobu, ánáꞌna Sebedeu, hai Iohane ádina Iakobu. Iesu mohangaꞌheꞌ Boanege, lempóna: ánáꞌ gumpataꞌ;[39] roo onoꞌ, Andaria, Pilipu, Bartolomeu,[40] Matiu,[41] Tómá, Iakobu ánáꞌna Alapeu, Tadeu,[42] Simoꞌ toSeloꞌ,[43] hai Iudasiꞌ Isikarioꞌ[44] to mampobaluꞌ Iesu i ewáliNa.

²⁰Karoona Iesu mopileꞌi topeguruNa, Ia mesuleꞌ {lao i wánuá Kapenau} haneꞌi mesuaꞌ i lalu támbi. Handaꞌ woꞌo tauna lao metolelingi, álána Iesu hai topeguruNa tiꞌaraheꞌ nampakaꞌ mandeꞌ.

²¹Araheꞌ woꞌo tauna ionoꞌ to molaluita kana i Iesu, rauliꞌ “Ia tiꞌara piꞌi manótó!” Onoꞌ miꞌi haneꞌi ádiNaheꞌ ina lao moala Iesu.

²²Araheꞌ woꞌo guru agama toIahudiꞌ to haweꞌ hangko i kótá Ierusale. Rauliꞌ guru agama iti, “Ia napesuaꞌi Belesebu, daturaꞌ upu-upu setáꞌ.[45] Ia mopakeꞌ kuasaꞌ datu setáꞌ iti mampopelóhóꞌ setáꞌ.”

²³Onoꞌ miꞌi haneꞌi nakióꞌheꞌ Iesu haneꞌi Napolaluitaꞌá moliu bahangapa pákáꞌna ngkóráꞌ pándiriꞌ. Nauliꞌ, “Peisá paꞌi setáꞌ mampopelóhóꞌ hangka setáꞌna?

²⁴Rápáꞌna, ane arai hadua datu, hai tauna to handaꞌ i lalu kadatuána mosisalaꞌheꞌ oaꞌ hai mombeꞌewaꞌheꞌ, kadatuá iti ina magero.

²⁵Ane tauna hampohalaluá pakaheꞌ mosisalaꞌ, ina magero pohalaluraꞌ iti.

²⁶Noꞌonoꞌ woꞌo i kadatuá setáꞌ. Ane Datu Tokadake moewaꞌ hangka tokadakena, lempóna setáꞌ moewaꞌ hangka setáꞌna, áláraꞌ magero kadatuá setáꞌ iti.

²⁷Datu Tokadake peisá rapándiriꞌ nodo tauna to maróhó. Ane mesuaꞌkeꞌ i lalu támbina tauna to maróhó hai mampoinaokeꞌ mamperampaꞌi párewá to ara i támbina, hangaa-ngaa tatimpuku sieruꞌ pueꞌ támbi iti, hangko peisárakeꞌ moala párewána. {Noꞌonoꞌ woꞌo, ane Kódóꞌ mampopelóhóꞌAꞌ setáꞌ, lempóna, Kunangi miꞌi Datu Tokadake.}[46]

²⁸Toꞌu to Kuꞌuliꞌ, hai Kuhángáꞌákou: upu-upu dósá hai laluita pesápuáka peisá raꞌámpungi,

²⁹agáiáná heáná to mosápuáka Inao to Magasaꞌ,[47] tiꞌara ara ámpungina, láwiꞌ bábehiá iti ina naposalaꞌ duuꞌna i rue-ruena.”

³⁰Iesu manguliꞌ noꞌonoꞌ láwiꞌ ara to manguliꞌ Ia napesuaꞌi tokadake.[48]

³¹Tiꞌara marue hangko ionoꞌ, haweꞌmoheꞌ inána hai ádina Iesu,[49] agáiáná meángkáꞌ peheꞌ i rawa támbi, hai mohuoꞌheꞌ tauna lao mokióꞌ Iesu, láwiꞌ rapoinao ina rapolaluitaꞌá.

³²I tempó iti, handaꞌ tauna to mehoda motolelingi Iesu. Rahángáꞌá, “Guru. InáMu hai ádiMu araheꞌ i rawa, maiKoꞌ rapeliꞌ.”

³³Napekuneꞌ Iesu, “Heáná ináNgkuꞌ hai halaluNgkuꞌ?”

³⁴Haneꞌi Iesu motótói tauna to metolelingi, Nauliꞌ, “Kómu riꞌi ináNgkuꞌ hai halaluNgkuꞌ.

³⁵Heáná peá to mobábehi peundeꞌána Pueꞌ Ala, hira miꞌi ináNgkuꞌ hai halaluNgkuꞌ.”