Read Besoa Marakusi 5 Bible Online

Marakusi 5 - Besoa bible

Marakusi 5

¹Hangko ionoꞌ, Iesu hai topeguruNa haweꞌmoheꞌ i hambali rano i tampoꞌ Gerasa.

²Hangko kapendáuluraꞌmoto hangko i duanga, haweꞌ miꞌi hadua tauna to napesuaꞌi tokadake mampohidupaꞌá Iesu. Tauna iti toroꞌ peá i popatawuá[59] láwiꞌ tiꞌara piꞌi ara to mobuku mohakaꞌ ánti kamaróhóna.

⁴Handaꞌ kánina bitina hai taena ratimpuku. Kehapiꞌ miꞌi gulaꞌ hai rante, nabuku peá nadepuꞌ-depuꞌ. Onoꞌ miꞌi haneꞌi tiꞌara ara tauna to pebáiꞌ mohakaꞌ.

⁵Alo-alona hai wengi-wengina, ia molulumao peá i popatawuá hai i wongko buluꞌ, monganga-nganga hai mobebelái wátána hai watu.[60]

⁶Kamoitána peá Iesu hangko karaoꞌ, melangka miꞌi lao medupaꞌ, haneꞌi molingkudu i bitiNa, mobiláꞌ Iesu.

⁷Mantepuꞌu miꞌi Iesu mohuoꞌ tokadake to mampesuaꞌi tauna iti, Nauliꞌ, “Mesuwuꞌmokoꞌ hangko i tauna deꞌe!” Agáiáná monganga-nganga riꞌi tauna iti napasimbuku, nauliꞌ, “Iesu, Ánáꞌna Pueꞌ Ala to i Surugáꞌ! Apa riꞌi urusiáMu i kódóꞌ? Kupembiáꞌ i lalu hangaꞌna Pueꞌ Ala, ineeꞌaꞌ ina Nupopeahiahiꞌ.”

⁹Napekuneꞌ Iesu, “Heáná hangaꞌmu?” Nahániki, “Hangaꞌkuꞌ Legio,[61] láwiꞌ handaꞌangkaiꞌ to mesuaꞌ i tauna deꞌe.” Hangaꞌna Legio iti, lempóna: i sábuna.

¹⁰Rapembiáꞌ tokadake iti i Iesu bona ineeꞌheꞌ Napopelóhóꞌ hangko i tampoꞌ iti.

¹¹Tiꞌara karaoꞌ hangko ionoꞌ, araheꞌ boeꞌ to handaꞌ harómbóngá, to tangaꞌraꞌ masungkiꞌ-sungkiꞌ i bátána buluꞌ.

¹²Rapembiáꞌ tokadake iti i Iesu, rauliꞌ, “Nuhuoꞌangkaiꞌ mesuaꞌ i boeꞌheꞌ doꞌo.”

¹³Napokana Iesu pembiáꞌraꞌ iti, Nauliꞌ, “Laomokou ionoꞌ!” Mewaliꞌ mesuwuꞌ mpuꞌumoheꞌ tokadake iti hai liliuheꞌ mesuaꞌ i boeꞌ. Pesuaꞌraꞌ i boeꞌ, melangkamoheꞌ boeꞌ iti hai manawoꞌheꞌ i pingke lao i lalu rano, álána mateheꞌ humpu. Kahandaꞌraꞌ to mate rekeꞌ-rekeꞌna rosábu báꞌána.

¹⁴Karaitána tauna to mokámpái boeꞌ iti[62] apa to pewaliꞌ, liliuheꞌ melangka lao i wánuá-wánuá hai i hinoe to hungkuꞌ mopahaweꞌ apa to raita iti. Onoꞌ miꞌi haneꞌi laomoheꞌ pueꞌ wánuá mampeita apa to pewaliꞌ.

¹⁵Kahaweꞌraꞌ i Iesu, raita tauna to napesuaꞌi setáꞌ to handaꞌ ininá, mehoda nodo miꞌi tauna biásá, mewaruꞌ, hai manótó miꞌi pekirina. Onoꞌ miꞌi haneꞌi malááꞌheꞌ.

¹⁶Tauna to moita apa to nabábehi Iesu i tempó iti mampodaritaꞌá wopaheꞌ pueꞌ wánuá apa to mewaliꞌ i tauna to napesuaꞌi setáꞌ, hai apa to mewaliꞌ i boeꞌ.

¹⁷Kamohádiraꞌ apa to pewaliꞌ iti, rapembiáꞌ pueꞌ wánuá iti bona Iesu pohuꞌ hangko i tampoꞌ Gerasa iti.[63]

¹⁸Tangaꞌna Iesu mengkaheꞌ i duanga, tauna to napesuaꞌi setáꞌ ininá membiáꞌ bona meuláꞌ i Hia,

¹⁹agáiáná tiꞌara Napaliu. Nahángáꞌá riꞌi, “Mesuleꞌmokoꞌ lao i támbimu, nupolaluita i tauna to hambámbánuámu hai halalumu apa to nabábehi Pueꞌ Ala hai noumbá ahiꞌNa i hio.”[64]

²⁰Lao mpuꞌu miꞌi tauna iti i tampoꞌ Dekapoli,[65] mopahaweꞌ apa to nabábehi Iesu i hia.[66] Tingkáráꞌheꞌ upu-upu tauna to mohádi bámbári iti.

²¹Iesu hai topeguruNa mengkaheꞌmoheꞌ i duanga, mesuleꞌ wopaheꞌ lao i hambali rano Galilea. I kahaweꞌraꞌ ionoꞌ, handaꞌ tauna to lao motolelingi Iesu. TangaꞌNa mani i wiwi rano,

²²haweꞌ miꞌi hadua tauna to rahangaꞌ Iairu. Ia hadua tadulako támbi penómbáꞌáraꞌ toIahudiꞌ.[67] Kamoitána peá Iesu, liliu pemiꞌi lao mopalumbá i bitiNa

²³membiáꞌ tulungi, nauliꞌ, “Pueꞌ! Ánáꞌkuꞌ towawine tangaꞌna maduꞌa hai hungkuꞌ miꞌi ina mate. Kupembiáꞌ bona laokeꞌ i támbingkuꞌ. Nupekamaꞌ woia, bona limba peá.”

²⁴Mewaliꞌ meuláꞌ mpuꞌu miꞌi Iesu i hia, hai handaꞌ woꞌo tauna to meuláꞌ duuꞌna Iesu tiꞌara piꞌi peisá mokale.

²⁵I oloꞌraꞌ tauna to handaꞌ iti, ara hadua towawine to hampuloꞌ miꞌi hai rompare nahumba oaꞌ, tiꞌara mengkakaroo.

²⁶Handaꞌ kánina membiáꞌ bona rapákupui i sando, duuꞌna upu óntóꞌ támbina napobaluꞌ napopobaiari. Agáiáná tiꞌara ara kamauriꞌána, tetámbái riꞌi hakiꞌna iti.

²⁷Kamohádina apa to rapolaluita tauna kana i Iesu, ia mohungkuki Iesu hangko i taleuꞌNa, hai mampetóbóꞌ kumbáNa.

²⁹Kanatóbóꞌna peá, kásáliu mengkaroo waheꞌna. Toꞌu-toꞌu nahádi kamauriꞌna miꞌi hakiꞌna.

³⁰I tempó iti woꞌo, nahádi Iesu ara kuasaꞌ pepakauriꞌ to mesuwuꞌ hangko i wátáNa. Mehaileꞌ miꞌi i tauna to handaꞌ haneꞌi Napekuneꞌ, “Heáná to motóbóꞌ kumbáNgkuꞌ?”

³¹Rauliꞌ topeguruNa, “Guru. Handaꞌ ntepuꞌu tauna to mombegihiꞌ-gihiꞌ mogaguKoꞌ. Moapa riꞌi haneꞌi Nupekuneꞌ heáná to motóbóꞌ kumbáMu?”

³²Agáiáná Iesu mehaileꞌ mampeliꞌ heáná tauna to mampetóbóꞌ kumbáNa.

³³Naisá towawine iti apa to mewaliꞌ i wátána. Moridiꞌ miꞌi ánti kamalááꞌna,[68] haneꞌi ia lao mopalumbá i bitina Iesu hai mopangákuꞌ apa to nabábehi.

³⁴Nauliꞌ Iesu i towawine iti, “ÁnáꞌKuꞌ! Ánti pepoináláimu i Kódóꞌ, mauriꞌmokoꞌ. Mesuleꞌmokoꞌ i lalu roꞌa ngkatueꞌ. Tekábáhámokoꞌ hangko i pantódihámu.”

³⁵Tangaꞌna mani Iesu molaluita, haweꞌmoheꞌ bahangapa tauna hangko i támbina Iairu mohángáꞌá Iairu, rauliꞌ, “Tuá, ánáꞌmu mate miꞌi. Ineeꞌmokoꞌ mopakasusa Guru.”

³⁶Kanahádina peá Iesu apa to rauliꞌ tauna iti, Nahángáꞌá Iairu, “Ineeꞌkoꞌ malááꞌ! Mepoináláimokoꞌ!”

³⁷Napaliliu miꞌi Iesu polumaoNa agáiáná tiꞌaraheꞌ Napaliu tauna to handaꞌ meuláꞌ i Hia, ngkáliꞌna riꞌi Peturuꞌ, Iakobu hai Iohane ádina Iakobu.

³⁸Kahaweꞌraꞌ i támbina Iairu, naita Iesu handaꞌ tauna to mahewo, teriaꞌ metatangi.[69]

³⁹PesuaꞌNa i lalu támbi, Nahángáꞌáheꞌ, “Moapa riꞌi haneꞌi mahewokou hai rumihi kateriaꞌmi? Ia tiꞌaranto mate, agáiáná letaꞌ peá.”[70]

⁴⁰Agáiáná rapatawai riꞌi. Hangko ionoꞌ, nahuoꞌmoheꞌ Iesu upu-upu tauna mengkairawa, haneꞌi mesuaꞌ miꞌi i lintuꞌna ánángkóiꞌ iti hingkakani hai inána, umána, hai topeguruNa to tálu iti.

⁴¹Tinuwuꞌna ánángkóiꞌ iti hampuloꞌ hai rompare. Natibaaꞌ miꞌi Iesu taena,[71] haneꞌi Nahángáꞌá, “Mearómokoꞌ, ánáꞌKuꞌ!” I lalu básáraꞌ toIahudiꞌ, node laluitaNa: “Talita kum!” Mearó miꞌi ánángkóiꞌ iti hai liu-liu molumao. Tingkáráꞌ ntepuꞌuheꞌ upu-upu tauna to manginta.

⁴³Agáiáná Iesu mokóntó ntepuꞌuheꞌ bona ineeꞌ rapolaluita apa to Nabábehi iti, hai Nahuoꞌheꞌ bona ánángkóiꞌ iti rapaꞌandeꞌ.