Read Besoa Marakusi 7 Bible Online

Marakusi 7 - Besoa bible

Marakusi 7

¹Hangkani tempó, araheꞌ toParisi hai guru-guru agama toIahudiꞌ to hangko i Ierusale lao mampohidupaꞌá Iesu.

²Tauna iti moitaheꞌ bahangapa topeguruna Iesu mandeꞌ, agáiáná tiꞌaraheꞌ sieruꞌ membahoꞌ mouláꞌ ádáraꞌ toIahudiꞌ.[92]

³ToParisi hai toIahudiꞌ ntániꞌna, maróhó ntepuꞌu pampeuláꞌiraꞌ ádá toioruraꞌ. Rápáꞌna, tiꞌara maniheꞌ mandeꞌ ane tiꞌara maniheꞌ membahoꞌ mouláꞌ ádá,

⁴hai ane mesuleꞌheꞌ hangko i pobaluꞌ-baluꞌá, hangaa-ngaa membahoꞌheꞌ sieruꞌ. Hai handaꞌ mani ádá to ratarima hangko i toioruraꞌ to rapeuláꞌi mpuꞌu, to nodo ádá pobahoꞌi mangku, kori hai párewá ntániꞌna to rabábehi hangko i tembaga.

⁵Onoꞌ miꞌi haneꞌi toParisi hai guru-guru agama iti mekuneꞌheꞌ i Iesu, rauliꞌ, “Moapa riꞌi haneꞌi topeguruMu tiꞌaraheꞌ mampeuláꞌi ádáraꞌ toioruntaꞌ? Moapa riꞌi ane mandeꞌheꞌ, tiꞌaraheꞌ sieruꞌ membahoꞌ?”

⁶Nauliꞌ Iesu, “Ane kómui, peuláꞌmi i Pueꞌ Ala mowongkoi pekou! Toꞌu ntepuꞌu laluitana nabiꞌ Iesaia hangkoia[93] mokana i kómu to manguliꞌ node: Nauliꞌ Pueꞌ Ala: ‘Taunaheꞌ iti, i humeraꞌ peá mobiláꞌAꞌ, agáiáná laluraꞌ karaoꞌ hangko i Kódóꞌ.

⁷Tiꞌara mobunduꞌ penómbáraꞌ i Kódóꞌ, láwiꞌ paturoꞌraꞌ hangko i tauna peá, tiꞌara paturoꞌ hangko i Kódóꞌ.’ [94]

⁸Noꞌonoꞌ woꞌo kómu. Maróhó mani potibaaꞌmi ádá haneꞌi pampeuláꞌimi hawaꞌna Pueꞌ Ala.”

⁹Hangko ionoꞌ, nahángáꞌá wopaheꞌ Iesu, “Kómu, ba nipekiri paꞌi mapánde ntepuꞌukou mopakaraoꞌ hawaꞌna Pueꞌ Ala hangko i katueꞌmi bona mopaioru pekou ádámi haduduámi?

¹⁰Rápáꞌna, i lalu Hawaꞌna Musa teukiꞌ node: ‘Hangaa-ngaa nubiláꞌ umámu hai inámu.’[95] Hai teukiꞌ woꞌo: ‘Heáná to motundaꞌ umána ba inána, hangaa-ngaa rahuku mate.’[96]

¹¹Agáiáná kómu mepaturoꞌkou node: Ane haweꞌ tosaemi membiáꞌ tulungi, peisákou manguliꞌ node: ‘Apa to ara i kódóꞌ to ina kupakeꞌ mokádipurákou, upu miꞌi kudándi ina kupopenómbá i Pueꞌ Ala.’ Lempóna, moliu pepaturoꞌmi to noꞌonoꞌ, nikóntó tauna álána tiꞌaraheꞌ motulungi tosaeraꞌ.

¹³Mewaliꞌ, ngkóráꞌna Pueꞌ Ala to manguliꞌ hangaa-ngaa nibiláꞌ umámi hai inámi, tiꞌara iti to nipeuláꞌi. Ádá to nitarima hangko i toiorumi, iti riꞌi to nipaturoꞌáheꞌ tauna to handaꞌ. Hai handaꞌ mani bábehiámi to noꞌonoꞌ.”

¹⁴Roo onoꞌ, Iesu mokióꞌ wopiꞌi tauna to handaꞌ, Nahángáꞌáheꞌ, “Nipehádingi maroꞌa-roꞌa bona niꞌisá apa katoꞌuána to mopakedái tauna. Tiꞌara pandeꞌ.

¹⁵Kehapiꞌ miꞌi mampopengaa to taꞌandeꞌ, tiꞌara iti to mopakedáikeꞌ i peitána Pueꞌ Ala, ngkáliꞌna riꞌi bábehiá to mesupaꞌ hangko i laluntaꞌ, iti to mopakedáikeꞌ i peitána Pueꞌ Ala.[97] [

¹⁶Maroꞌa ntepuꞌu ane ara tauna to mopailalu apa to nahádi!]”

¹⁷Hangko ionoꞌ, Iesu mopálehi tauna to handaꞌ, haneꞌi mesuaꞌ i lalu támbi. Mekuneꞌheꞌ topeguruNa i Hia ba apai tunggáiána ngkóráꞌ pándiriꞌ to Napahaweꞌ ininá.

¹⁸Nahángáꞌáheꞌ, “Mogalo ripaꞌi woꞌo kómu, tiꞌara niꞌisá lempóna? Tiꞌara pandeꞌ to mesuaꞌ i ngángántaꞌ to mopakedáikeꞌ i peitána Pueꞌ Ala,

¹⁹láwiꞌ pandeꞌ tiꞌara mesuaꞌ i laluntaꞌ, mesuaꞌ peá i taꞌintaꞌ, haneꞌi liliu mesuwuꞌ.” Moliu laluita iti, Iesu mopakanótó katiꞌárána piꞌi ara pandeꞌ to rapáliá.[98]

²⁰Nahángáꞌá wopaheꞌ Iesu, “Agáiáná apa to mesuwuꞌ hangko i laluntaꞌ, iti riꞌi to mopakedáikeꞌ i peitána Pueꞌ Ala,

²¹láwiꞌ hangko i laluna tauna, mesupaꞌ hinángkáꞌ pekiri to kadake, álána: araheꞌ to mobábehi bábehiá to metitidiꞌi, araheꞌ to manako, to mepapate,

²²to mebualosi, to mampokaelu párewána rángána, hai to mobábehi mampopengaa to kadake. Mepakanawoꞌheꞌ, nakuasaꞌiheꞌ peundeꞌána laluraꞌ haduduáraꞌ, mahiniꞌheꞌ, metitibeiheꞌ, mampepemahileheꞌ, hai tiꞌaraheꞌ mau rapaturoꞌ.

²³Upu-upu bábehiá to kadake iti mesupaꞌ hangko i laluna tauna. Iti miꞌi to mopakedái tauna i peitána Pueꞌ Ala.”

²⁴Hangko ionoꞌ, pohuꞌmoheꞌ Iesu hai topeguruNa hangko i tampoꞌ Galilea lao i tampoꞌ to hungkuꞌ i kótá Tiru, hai liliuheꞌ mesuaꞌ i lalu támbi. Tunggáiána Iesu bona tiꞌara raisá tauna kahaweꞌNa, agáiáná kahaweꞌNa iti tiꞌara peisá tewuniángi.

²⁵I wánuá iti, ara hadua towawine. Ánáꞌna towawine napesuaꞌi tokadake. Kamohádina peá bámbári kahaweꞌna Iesu, kásáliu lao mampombelámbiꞌá haneꞌi mopalumbá i bitiNa membiáꞌ tulungi, nauliꞌ, “Pueꞌ, Nupopesuwuꞌá wongkódóꞌá setáꞌ to mampesuaꞌi ánáꞌkuꞌ!” Towawine iti tiꞌara toIahudiꞌ, ia iti toPenisia to hangko i tampoꞌ Siria.

²⁷Agáiáná nahániki Iesu, Nauliꞌ, “Rapatodáhiheꞌ hampaiꞌ ánángkóiꞌ mandeꞌ haweꞌ mabuhu. Tiꞌara maroꞌa moala pandeꞌraꞌ ánángkóiꞌ, haneꞌi raweꞌi ahu.”[99]

²⁸Mehániꞌ towawine iti, nauliꞌ, “Toꞌu ntepuꞌu Pueꞌ, agáiáná ahu to ara i wóiꞌ mejá pandeꞌá, mandeꞌheꞌ woꞌo wutaꞌ, pandeꞌna ánángkóiꞌ to manawoꞌ hangko i wongko mejá.”

²⁹KaNahádina laluitana iti, nauliꞌ wopiꞌi Iesu, “Maroꞌa. Tongawaꞌ hangko i pehániꞌmu, maróhó pepoináláimu. Mewaliꞌ mesuleꞌmokoꞌ, láwiꞌ mesuwuꞌ miꞌi setáꞌ to mampesuaꞌi ánáꞌmu.”

³⁰Mesuleꞌ mpuꞌu miꞌi towawine iti. Haweꞌ i támbina, naita ánáꞌna maturu-turu i paturuána, hai nalalu miꞌi láwiꞌ setáꞌ to mesuaꞌ i ánáꞌna iti mesuwuꞌ miꞌi.

³¹Hangko ionoꞌ, Iesu hai topeguruNa mopálehimoheꞌ roboꞌ Tiru mopaliliu polumaoraꞌ, hai moliuheꞌ i kótá Sido.[100] Mesuleꞌ wopaheꞌ lao i rano Galilea, haweꞌ i tampoꞌ Dekapoli.[101]

³²Ionoꞌ, ara hadua tauna to bongoꞌ hai tiꞌara peisá molaluita. Ia raꞌánti tauna lao i Iesu hai rapembiáꞌ bona Napekamaꞌ.

³³Iesu mopataniꞌ tauna iti hangko i oloꞌraꞌ tauna to handaꞌ. Karoona Napataniꞌ, Napopesuaꞌ miꞌi karaweꞌNa i lalu talingana tauna to bongoꞌ iti, haneꞌi metinudu, hai motóbóꞌ woꞌo lilaꞌna tauna iti.

³⁴Roo onoꞌ, Iesu mengoaꞌ miꞌi i langiꞌ, mobusá peinaoNa, haneꞌi Nauliꞌ, “Tebungkáhi miꞌi!” I lalu básáraꞌ toIahudiꞌ, node laluitaNa: “Efata!”

³⁵Kásáliu mehádi mpuꞌu miꞌi tauna iti, hai maledeꞌ miꞌi lilaꞌna. Maroꞌa miꞌi polaluitana.

³⁶Hangko ionoꞌ, Nakóntóheꞌ Iesu tauna to handaꞌ bona ineeꞌ rapolaluita i heáná peá apa to mewaliꞌ. Agáiáná kehapiꞌ noꞌonoꞌ kaNakóntóraꞌ, bámbári iti rapahaweꞌ peá oaꞌ.

³⁷Tauna to handaꞌ mokamaleá ntepuꞌuheꞌ moita apa to mewaliꞌ, onoꞌ miꞌi haneꞌi rauliꞌ, “Upu-upu to Nabábehi, maroꞌa. Tauna to bongoꞌ, mehádimoheꞌ! Tauna to tiꞌara peisá molaluita, molaluitamoheꞌ!”[102]