Read Besoa Marakusi 8 Bible Online

Marakusi 8 - Besoa bible

Marakusi 8

¹[103] Tiꞌara marue hangko ionoꞌ, handaꞌ wopaheꞌ tauna to hirámpu. Marimimoheꞌ láwiꞌ tiꞌara ara pandeꞌraꞌ, onoꞌ miꞌi haneꞌi Iesu mokióꞌheꞌ topeguruNa, Nahángáꞌáheꞌ,

²“Maꞌahiꞌ laluNgkuꞌ moitaheꞌ tauna to handaꞌ deꞌe. Tálu miꞌi aloraꞌ ieneꞌ, tiꞌara piꞌi ara pandeꞌraꞌ.

³Tiꞌara tuꞌu inaoNgkuꞌ ina mohuoꞌheꞌ mesuleꞌ tangaꞌraꞌ marimi. Holoheꞌ paꞌi i rárá, láwiꞌ araheꞌ to haweꞌ mai hangko karaoꞌ.”

⁴Rauliꞌ topeguruNa, “Iumbákeꞌ paꞌi ina molámbiꞌ pandeꞌ to magáná ina tapopaꞌandeꞌáheꞌ, láwiꞌ karaoꞌkeꞌ hangko i wánuá hai kaꞌaraꞌántaꞌ deꞌe tiꞌara ara apa-apa?”

⁵Nakuneꞌheꞌ Iesu, “Hangapa wuaꞌna rótiꞌ to ara i kómu?” Rahániki, “Pitu peá wuaꞌna.”

⁶Hangko ionoꞌ, Iesu mohuoꞌmoheꞌ tauna to handaꞌ mehoda i tampoꞌ. Ia moala miꞌi rótiꞌ to pitu wuaꞌna iti haneꞌi mekakae i Pueꞌ Ala. Roo onoꞌ, Nabiseꞌ-biseꞌ miꞌi haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ.

⁷Ara woꞌo bahangapa báꞌána bouꞌ to kókóiꞌ. Napekakaeá woꞌo haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ.

⁸Mewaliꞌ mandeꞌmoheꞌ upu-upu duuꞌraꞌ mabuhu. Karooraꞌ mandeꞌ, pelábiána pandeꞌ rarámpu topeguruna Iesu, pitu mani kárándina to mahile.[104]

⁹Kahandaꞌraꞌ to mandeꞌ i tempó iti, rekeꞌ-rekeꞌna iba sáburaꞌ. Roo onoꞌ, tauna to handaꞌ iti nahuoꞌmoheꞌ Iesu mesuleꞌ lao i támbiraꞌ,

¹⁰haneꞌi Ia hai topeguruNa moduangaheꞌ lao i tampoꞌ Dalamanuta.

¹¹Bahangapaheꞌ toParisi lao mampohidupaꞌá Iesu. Mantepuꞌumoheꞌ mekuneꞌ-kuneꞌ láwiꞌ mampeliꞌ peheꞌ kamanawoꞌáNa i lindoꞌraꞌ tauna to handaꞌ. Rahángáꞌá, “Nupopaitaꞌangkaiꞌ tandaꞌ kuasaꞌ hangko i surugáꞌ bona tongawaꞌ i kaiꞌ kahangko i Pueꞌ AlaMu.”

¹²Kanahádina Iesu laluitaraꞌ, masusa laluna haneꞌi Nauliꞌ, “Moapa riꞌi haneꞌi tauna to tueꞌ tempó deꞌe membiáꞌ tandaꞌ kuasaꞌ? Kuhángáꞌákou, tiꞌarakou ina Kupopaitaꞌá tandaꞌ kuasaꞌ nodo to nipembiáꞌ.”

¹³Hangko ionoꞌ, Napálehimoheꞌ hai mengkaheꞌ wopiꞌi i duanga lao tándáꞌ i hambali rano.

¹⁴I kapohuꞌraꞌ iti, topeguruna Iesu mokáláliꞌáheꞌ moánti boku, bateꞌna peá hambuaꞌ rótiꞌ to ara i lalu duangaraꞌ.

¹⁵Iesu mopahaweꞌ laluita deꞌe i hira, Nauliꞌ, “Maroꞌa-roꞌakou, hai maingáꞌ-ingáꞌkou i ragiꞌraꞌ toParisi hai ragiꞌna Datu Herode!”

¹⁶Agáiáná tiꞌara raisá tunggáiáNa molaluita noꞌonoꞌ, onoꞌ miꞌi haneꞌiheꞌ molaluita hadua hai hadua, rauliꞌ, “Nauliꞌ noꞌonoꞌ láwiꞌ tiꞌarakeꞌ ara to moánti rótiꞌ.”

¹⁷Naisá Iesu apa to rauliꞌ topeguruNa, mewaliꞌ Nahángáꞌáheꞌ, “Moapa riꞌi haneꞌi nipolaluita katiꞌárámi moánti rótiꞌ? Tiꞌara mani niꞌisá lempóna apa to Kubábehi? Tiꞌara paꞌi manótó i pekirimi mokana i Kódóꞌ?[105]

¹⁸Handaꞌ kánimi mohádi paturoꞌKuꞌ, hai handaꞌ kánimi moita kuasaꞌKuꞌ. Pomata hai potalingantokou, agáiáná tiꞌara niꞌisá apa lempóna to niꞌita hai to nihádi.[106]

¹⁹Tiꞌara paꞌi nibuhinao? TempóNgkuꞌ mopaꞌandeꞌ tauna to lima sáburaꞌ hangko i rótiꞌ to lima wuaꞌna to Kubiseꞌ-biseꞌ, hangapa mani kárándina pelábiána to nirámpu?” Rahániki topeguruNa, “Hampuloꞌ hai rongkárándi.”

²⁰Napekuneꞌ wopiꞌi Iesu, “Hai tempóNgkuꞌ mopaꞌandeꞌ tauna to iba sáburaꞌ hangko i rótiꞌ to pitu wuaꞌna, hangapa mani woꞌo kárándina pelábiána to nirámpu?” Rauliꞌ, “Pitu kárándina.”

²¹Nahángáꞌá wopaheꞌ, “Mewaliꞌ moapa riꞌi haneꞌi tiꞌara mani niꞌisá apa tunggáiáNgkuꞌ?”[107]

²²Kahópóꞌána, Iesu hai topeguruNa haweꞌheꞌ i wánuá Besaida.[108] Ionoꞌ, araheꞌ tauna to moánti hadua tobilo i Iesu, rapembiáꞌ bona Napekamaꞌ.

²³Natibaaꞌ miꞌi Iesu taena tobilo iti, haneꞌi Nateteꞌ lao i rawa wánuá. Hangko ionoꞌ, Natinuduhi mátána haneꞌi Nakamaꞌ. Roo onoꞌ, Napekuneꞌ, “Ara to nuita?”

²⁴Tobilo iti mampehukáꞌ mampeita apa to ara i lindoꞌna, hai nauliꞌ, “Kuitaheꞌ tauna molumao, agáiáná nodo peheꞌ kau, láwiꞌ mowáá-wáá peheꞌ kuita.”

²⁵Haneꞌi Nakamaꞌ wopiꞌi Iesu mátána karongkánina. Mauriꞌ mpuꞌu miꞌi. Upu-upu to naita, tongawaꞌ miꞌi.

²⁶Roo onoꞌ, Nahuoꞌ miꞌi Iesu mesuleꞌ lao i támbina, Nauliꞌ, “Mesuleꞌmokoꞌ lao i támbimu, agáiáná ineeꞌkoꞌ mesuaꞌ i lalu wánuá Besaida deꞌe-deꞌe.”

²⁷Iesu hai topeguruNa laomoheꞌ i wánuá-wánuá to hungkuꞌ i kótá Kaisarea Pilipi.[109] I tangaꞌ rárá, mekuneꞌ miꞌi Iesu, Nauliꞌ, “Mouláꞌ panguliꞌraꞌ tauna to handaꞌ, Kódóꞌ deꞌe, heánáꞌAꞌ?”

²⁸Mehániꞌheꞌ topeguruNa, “Araheꞌ to manguliꞌ Iohane Toperiu to tueꞌ huleꞌ. Araheꞌ woꞌo to manguliꞌ nabiꞌ Eliá to haweꞌ wopiꞌi hangko i surugáꞌ nodo to nadándi Pueꞌ Ala.[110] Araheꞌ woꞌo to manguliꞌ Io hadua nabiꞌ hangkoia to tueꞌ huleꞌ.”

²⁹Nakuneꞌ wopaheꞌ, Nauliꞌ, “Ane kómu, mouláꞌ polámbiꞌmi, Kódóꞌ deꞌe, heánáꞌAꞌ?” Nahániki Peturuꞌ, “Io miꞌi toMásehi, Datu Topehómpóꞌ!”

³⁰Hangko ionoꞌ, Nahángáꞌáheꞌ, “Ineeꞌ riꞌi niuliꞌ-uliꞌ i heáná peá kaheánáNgkuꞌ.”[111]

³¹Hangko ionoꞌ, natepuꞌu miꞌi Iesu mopahaweꞌ i topeguruNa apa to hangaa-ngaa ina mewaliꞌ i wátáNa haduduáNa, Nauliꞌ, “Ánáꞌ Mánusiá hangaa-ngaa molámbiꞌ handaꞌ kapári.[112] Ia ina rasápuáka kapalaꞌ-kapalaꞌ tadulako menómbá, guru-guru agama, hai totosaeraꞌ toIahudiꞌ to ntániꞌna, hai ina rahuku mate. Agáiáná i katáluna alona, Ia ina tueꞌ huleꞌ.”[113]

³²Upu-upuna iti Napakanótóáheꞌ, agáiáná Peturuꞌ modiiꞌ Iesu lao i hintáiꞌna haneꞌi nakámbáróá {láwiꞌ Iesu mampolaluita kaꞌina mateNa}.

³³Mehaileꞌ miꞌi Iesu motótói topeguruNa, haneꞌi mokabukoꞌi Peturuꞌ, Nahángáꞌá, “Pobaeꞌ! Io nodokoꞌ Datu Tokadake, {láwiꞌ mampehukáꞌkoꞌ mokeloꞌAꞌ bona tiꞌaraꞌAꞌ mampeuláꞌi peundeꞌána Pueꞌ Ala}.[114] Pekirimu iti pekiri tauna peá, tiꞌara pekirina Pueꞌ Ala.”[115]

³⁴Roo onoꞌ, Iesu mokióꞌ tauna to handaꞌ hai topeguruNa, Nahángáꞌáheꞌ, “Heáná to mampoinao meuláꞌ i Kódóꞌ, hangaa-ngaa mokábáhá peundeꞌána haduduána hai hangaa-ngaa timama mantódihá kapári,[116] haneꞌi meuláꞌ i Kódóꞌ.

³⁵Láwiꞌ heáná to mokábáhá peundeꞌána haduduána ánti peuláꞌna i Kódóꞌ hai ánti Ngkóráꞌ Marasa, kehapiꞌ rapapate, ia miꞌi to ina molámbiꞌ katehómpóꞌ. Agáiáná heáná to mampeuláꞌi peundeꞌána haduduána, tiꞌara ina molámbiꞌ katueꞌ to maroꞌa to tiꞌara mokahópóꞌá.

³⁶Apa bunduꞌna morámpukou upu-upu kapebuku i duniáꞌ, agáiáná tiꞌarakou molámbiꞌ katehómpóꞌ i alo pobutusi?[117]

³⁷Tiꞌara ara apa-apa to peisá niweꞌi Pueꞌ Ala bona molámbiꞌkou katehómpóꞌ iti.

³⁸Tueꞌkou i oloꞌraꞌ tauna to kadake hai to tiꞌara meuláꞌ i Kódóꞌ. Ane heáná to mahili mopangákuꞌ peuláꞌna i Kódóꞌ hai mampokahili woꞌo paturoꞌKuꞌ, Kódóꞌ woꞌo ina mahiliAꞌ mopangákuꞌ kaꞌiana topeuláꞌKuꞌ ane haweꞌAꞌ huleꞌ hangko i surugáꞌ. I tempó iti, Ánáꞌ Mánusiá ina mendáulu mai hangko i surugáꞌ hingkakani hai malaꞌeka to magasaꞌ, hai ina meawaꞌ ánti kuasaꞌna UmáNa.”