Read Besoa Lukasi 10 Bible Online

Lukasi 10 - Besoa bible

Lukasi 10

¹Roo onoꞌ, Pueꞌ Iesu mopileꞌi pitu puloꞌna tauna ntániꞌna hangko i oloꞌraꞌ topeuláꞌNa, hai ina Nahuoꞌheꞌ rodua-rodua moioru hangko i Hia lao i upu-upu wánuá to ina Nakalaoi.

²Agáiáná hangko tiꞌara maniheꞌ pohuꞌ, Nauliꞌ, “Handaꞌheꞌ tauna to peisá rapándiriꞌ nodo pare to mangka, láwiꞌ timamamoheꞌ mepoinálái i Kódóꞌ, agáiáná tiꞌara handaꞌ to peisá motulungiheꞌ mai i Kódóꞌ. Mewaliꞌ, mekakaekou i Pueꞌ Ala bona mantámbái tauna to ina moánti Ngkóráꞌ Marasa bona, handaꞌ tauna to ina mepoinálái i Kódóꞌ.

³Laomokou, agáiáná maingáꞌ-ingáꞌkou láwiꞌ Kuhuoꞌkou lao i oloꞌraꞌ tauna to kadake, nodokou ánáꞌ dimbá i oloꞌraꞌ serigala.[132]

⁴Ineeꞌkou moánti dóiꞌ ba tasi ba sandale i rawa to nipakeꞌ miꞌi. Ane mohidupaꞌkou hai tauna i tangaꞌ rárá, gánámoheꞌ nitabe, ineeꞌmokou lebaꞌ molaluita marue-rue.

⁵Ane mesuaꞌkou i lalu támbi, hangaa-ngaa nihángáꞌá pueꞌ támbi, ‘Tabeá! Hampóáꞌworia ina nawátiꞌkou Pueꞌ!’

⁶Ane bulá laluna pueꞌ támbi motarimakou, bateꞌna ina nawátiꞌheꞌ Pueꞌ Ala. Agáiáná ane tiꞌara bulá laluraꞌ motarimakou, tiꞌaraheꞌ ina molámbiꞌ pewátiꞌ hangko i Pueꞌ Ala.

⁷Ane pueꞌ támbi motarimakou, ineeꞌkou melimbá-limbá. Toroꞌkou i támbi iti duuꞌmi pohuꞌ lao i wánuá ntániꞌna. Apa to raweꞌikou, niandeꞌ hai niꞌinu, láwiꞌ hintotoꞌ ntepuꞌu topobágóꞌ i bondena Pueꞌ motarima apa to raparaluu, háwángina petulungiraꞌ.[133]

⁸Ane mesuaꞌkou i lalu hambuaꞌ wánuá hai ratarimakou, niandeꞌ apa to raweꞌikou.

⁹Nipakauriꞌ tauna to tiꞌara nalalu to ara i lalu wánuá iti, hai nihángáꞌáheꞌ pueꞌ wánuá: ‘Popárentána Pueꞌ Ala haweꞌ miꞌi i oloꞌmi.’

¹⁰Agáiáná ane mesuaꞌkou i lalu hambuaꞌ wánuá hai tiꞌarakou ratarima, laomokou i karadaa, hai i lindoꞌraꞌ tauna to handaꞌ, nihángáꞌáheꞌ:

¹¹‘Mogalo awu hangko i wánuámi to mentakaꞌ i pálántáꞌ bitingkiꞌ, kitarónta i lindoꞌmi, tandaꞌna kaꞌina nahukumi Pueꞌ Ala. Haweꞌ miꞌi popárentána Pueꞌ Ala.’

¹²Hai Kuhángáꞌáꞌákou: i alo pobutusi i kahópóꞌána duniáꞌ, ina melumbuꞌ kamatimina pehukuna Pueꞌ Ala i tauna iti hangko pehukuNa i toSodomo hangkoia.”

¹³“Hurewuꞌmokou toKorasi! Hurewuꞌmokou toBesaida,[134] Handaꞌ ntepuꞌu tandaꞌ kuasaꞌ to Kubábehi i wánuámi, agáiáná tiꞌarakou mampenosoꞌi dósámi. Ane rápáꞌna tandaꞌ kuasaꞌ iti Kubábehiꞌi i kótá Tiru hai Sido,[135] bateꞌna maruemoheꞌ menosoꞌ hangko i dósáraꞌ, kehapiꞌ hira tiꞌaraheꞌ toIahudiꞌ. Ina moalamoheꞌ waruꞌ ngkasusa to rabábehi hangko i karuꞌ rapowaruꞌ, hai moawuiheꞌ tutuꞌ wuáꞌraꞌ, tandaꞌ katebálikina miꞌi laluraꞌ.

¹⁴I alo pobutusi i kahópóꞌána duniáꞌ, ina melumbuꞌ kamatimina pehukuna Pueꞌ Ala i kómu haneꞌi pehukuNa i toTiru hai toSido.

¹⁵Hai kómu woꞌo toKapenau! Ba nipekiri ina naꞌángkáꞌkou Pueꞌ Ala haweꞌ i surugáꞌ? Tiꞌara! Ngkáliꞌna riꞌi ina Natibekou i lalu naraka!”

¹⁶Roo onoꞌ, Iesu molaluita wopiꞌi i topeguruNa, Nauliꞌ, “Heáná to mampoinálái laluitami, hibali miꞌi hai mampoinálái laluitaNgkuꞌ. Agáiáná heáná to mosápuákakou, hibali miꞌi hai Kódóꞌ to nasápuáka. Hai heáná to mosápuákaꞌAꞌ, hibali miꞌi hai mosápuáka Pueꞌ Ala to mohuoꞌAꞌ mai.” {Roo onoꞌ, pohuꞌmoheꞌ topeguruna Iesu to pitu puloꞌraꞌ.}

¹⁷Bahangapa kamaruena hangko ionoꞌ, mesuleꞌmoheꞌ topeguruNa to pitu puloꞌraꞌ iti. Góeꞌ ntepuꞌuheꞌ, hai rahángáꞌáꞌá Iesu, “Pueꞌ, mogalo riꞌi setáꞌ mengkoruꞌheꞌ woꞌo i kaiꞌ, hai kipopesuwuꞌheꞌ i lalu hangaꞌMu.”

¹⁸Nauliꞌ Iesu, “Kuita Datu Tokadake manawoꞌ hangko i langiꞌ nodo kiláꞌ![136]

¹⁹Nipehádingi laluitaNgkuꞌ: Kuweꞌimokou kuasaꞌ mopangka lelótó ba kalajengki,[137] hai moliu kuasaꞌ iti nibuku monangi upu-upu kuasaꞌna Datu Tokadake to mewaliꞌ ewálintaꞌ. Onoꞌ miꞌi haneꞌi tiꞌara ara to peisá mopakarugiꞌkou.

²⁰Agáiáná kehapiꞌ noꞌonoꞌ, ineeꞌ nipokagóeꞌ pengkoruꞌraꞌ setáꞌ i kómu. Rángina riꞌi nipokagóeꞌ kateukiꞌna miꞌi hangaꞌmi i lalu surugáꞌ.”[138]

²¹I tempó iti, Iesu nakuasaꞌi Inao to Magasaꞌ, hai hangko i kagóeꞌna laluNa, Nauliꞌ, “Ó Umaꞌ, Pueꞌ langiꞌ hai duniáꞌ hai upu-upu óntóꞌna! KutóiáKoꞌ, láwiꞌ upu-upu to tewuniángi hangkoia Nupopaisáꞌámoheꞌ tauna to mengkaiwóiꞌ, agáiáná Nuwuniángiáheꞌ tauna to mampekiri hira miꞌi to mapánde.[139] Ó Umaꞌ! Upu-upuna iti Nubábehi láwiꞌ iti miꞌi peundeꞌáMu.”

²²Roo onoꞌ, nauliꞌ wopiꞌi Iesu i tauna to handaꞌ, “Upu-upu naweꞌiMoꞌ UmáNgkuꞌ. Tiꞌara ara hadua to moisá kaKódóꞌna Ánáꞌna Pueꞌ Ala, bateꞌna peá UmáNgkuꞌ to moisá ntepuꞌuAꞌ. Noꞌonoꞌ woꞌo, tiꞌara ara to moisá UmáNgkuꞌ, bateꞌna peá Kódóꞌ ÁnáꞌNa hai heáná peá to Kupopaisáꞌáheꞌ kaheánána UmáNgkuꞌ.”[140]

²³Hangko ionoꞌ, bona tiꞌara rahádi tauna ntániꞌna, Iesu mehaileꞌ i topeguruNa, Nahángáꞌáheꞌ, “Morasiꞌ ntepuꞌukou, láwiꞌ niꞌita miꞌi upu-upu deꞌe.

²⁴Kuhángáꞌákou: hangkoia handaꞌheꞌ nabiꞌ hai datu to mampoinaoheꞌ moita apa to niꞌita deꞌe-deꞌe, {ia miꞌi apa to Kubábehi,} agáiáná tiꞌara raita. Mampoinao ntepuꞌuheꞌ mampehádingi apa to nihádi, {ia miꞌi paturoꞌKuꞌ,} agáiáná tiꞌara rahádi {láwiꞌ maruemoheꞌ mate}.”

²⁵Ara hadua guru agama toIahudiꞌ to mampoinao mampampeitai Iesu, napekuneꞌ, “Guru, apa to hangaa-ngaa kubábehi bona molámbiꞌaꞌ katueꞌ to maroꞌa to tiꞌara mokahópóꞌá?”

²⁶Nauliꞌ Iesu, “Apa to teukiꞌ i lalu Paturoꞌna Musa? Apa to nubásá ionoꞌ?”

²⁷Nahániki guru agama iti, “To kubásá, node: ‘Nipokaꞌahiꞌ Pueꞌ Ala Pueꞌmi i sukáꞌna kabulána lalumi, i sukáꞌna pekirimi, i sukáꞌna róhómi, hai i sukáꞌna kapándemi.’ [141] Hai teukiꞌ woꞌo: ‘Nipokaꞌahiꞌ hángká rángámi nodo pampokaꞌahiꞌmi wátámi haduduámi.’ ”[142]

²⁸Nauliꞌ Iesu, “Kana to nuꞌuliꞌ iti. Ane onoꞌ to nubábehi, ina molámbiꞌkoꞌ katueꞌ to maroꞌa.”

²⁹Agáiáná guru agama iti mampoinao mopakanótó bábehiána, onoꞌ miꞌi haneꞌi napekuneꞌ wopiꞌi, “Heáná tauna to hangaa-ngaa kupokaꞌahiꞌ?”

³⁰Nahániki Iesu, “Hangkani tempó, ara hadua tobaleilo to molumao hangko i Ierusale ina lao i kótá Ieriko. I tangaꞌ rárá, tauna iti mampohidupaꞌáheꞌ tauna to masilaka. Mamperampaꞌimoheꞌ párewána hai waruꞌna, hai wátána rapapahái duuꞌna malimpu. Upu onoꞌ, rapálehi peá i tangaꞌ rárá.

³¹I tempó iti, ara hadua tadulako menómbá to moliu ionoꞌ. Kamoitána tauna to hurewuꞌ iti, naleliki peá.

³²Noꞌonoꞌ woꞌo ara hadua toLewi, topobágóꞌ i Támbina Pueꞌ Ala, to moliu ionoꞌ. Kamoitána tauna to hurewuꞌ iti, naleliki peá woꞌo.

³³Tiꞌara marue hangko ionoꞌ, moliu woꞌo hadua toSamaria[143] i rárá iti. Maꞌahiꞌ ntepuꞌu laluna moita tauna to hurewuꞌ iti,

³⁴onoꞌ miꞌi haneꞌi lao nahungkuki, to belána nabahoꞌi hai anggoroꞌ haneꞌi napákupui hai lana saitu.[144] Upu onoꞌ, nawewehi. Roo onoꞌ, napopesaweꞌ i kalidena, naꞌánti lao i támbi kahambengiáraꞌ torare, hai nakádipurá ionoꞌ.

³⁵Kahalona, ia moala miꞌi rompepaꞌ dóiꞌ peráꞌ,[145] naweꞌi pueꞌ támbi, haneꞌi nahángáꞌá, ‘Kupembiáꞌ tulungi, bona nukádipurá sieruꞌ tauna deꞌe. Ane mesuleꞌaꞌ, hai dóiꞌ to kuweꞌikoꞌ deꞌe tiꞌara mani gáná, ina kutámbái.’ ”

³⁶Upu miꞌi Iesu modarita, Napekuneꞌ i guru agama iti, Nauliꞌ, “Mouláꞌ polámbiꞌmu, hangko i tauna to tálu ininá, heáná to mewaliꞌ rángána tauna to hurewuꞌ iti?”

³⁷Nahániki guru agama, “Tauna to motulungi tauna to hurewuꞌ iti.” Nauliꞌ Iesu, “Toꞌu pehániꞌmu. Mewaliꞌ, mantepuꞌu deꞌe-deꞌe, iti woꞌo to hangaa-ngaa nubábehi.”

³⁸Hangko ionoꞌ, Iesu mopaliliu miꞌi polumaoNa hingkakani hai topeguruNa, ina laoheꞌ i Ierusale. I polumaoraꞌ iti, mehupeꞌheꞌ i hambuaꞌ wánuá.[146] I lalu wánuá iti, ara hadua towawine to rahangaꞌ Marita, to mampotorare Iesu i támbina.

³⁹Marita iti ara woꞌo ádina to rahangaꞌ Maria. Maria iti mehoda i hintáiꞌ bitina Iesu mampehádingi laluitaNa.

⁴⁰I tempó iti, Marita masisiáká ntepuꞌu láwiꞌ handaꞌ bágóꞌna mokádipurá torare. Onoꞌ miꞌi haneꞌi kóiꞌ inaona i Maria, láwiꞌ Maria lao peá mehoda. Mewaliꞌ lao miꞌi Marita i Iesu, nahángáꞌá, “Pueꞌ, ádingkuꞌ deꞌe, tiꞌaraꞌaꞌ nadurei. Napatodáhi peaꞌ haduduángkuꞌ mobágóꞌ! Nuhángáꞌá bona maiaꞌ nadurei.”

⁴¹Nauliꞌ Pueꞌ Iesu, “Marita! Masisiáká ntepuꞌukoꞌ, hai mampopengaa to nupekiri.

⁴²Katoꞌuána, hampákáꞌ peá to paraluu ntepuꞌu nupekiri, {ia miꞌi, hangaa-ngaa mampehádingikoꞌ paturoꞌKuꞌ}. Iti miꞌi to maroꞌa ntepuꞌu, hai iti miꞌi to napileꞌi Maria. Hai pewátiꞌ to ina nalámbiꞌ tiꞌara peisá raꞌala hangko i hia.”