Read Besoa Lukasi 11 Bible Online

Lukasi 11 - Besoa bible

Lukasi 11

¹Hangkani tempó, Iesu lao mekakae. KarooNa mekakae, hadua hangko i oloꞌraꞌ topeguruNa membiáꞌ bona Iesu mopaturoꞌheꞌ mekakae, nodo Iohane Toperiu mopaturoꞌheꞌ woꞌo topeguruna.

²Nahángáꞌáheꞌ Iesu, “Ane mekakaekou, niuliꞌ node: Umaꞌ, kipomahile hangaꞌMu to magasaꞌ. Kipembiáꞌ bona Nupatongawaꞌ popárentáMu i duniáꞌ.

³Nuweꞌiangkaiꞌ pandeꞌkiꞌ i alo-alona i kagáná-gánáꞌána,

⁴hai Nuámpungiangkaiꞌ hangko i kamasalaꞌkiꞌ, láwiꞌ kaiꞌ woꞌo moámpungi hángká rángángkiꞌ to masalaꞌ i kaiꞌ. Hai ineeꞌangkaiꞌ Nupatodáhi nakeloꞌ to kadake.”

⁵Nahángáꞌá wopaheꞌ Iesu, “Rápáꞌna, ara hadua hangko i oloꞌmi to lao i rángána tangaꞌ káindi. Nauliꞌ, ‘Ale, nuweꞌi wongkódóꞌá tálu wuaꞌna rótiꞌ,

⁶láwiꞌ ara torarengkuꞌ to hangko haweꞌ, hai tiꞌara ara apa-apa i támbingkuꞌ to peisá kuweꞌi.’

⁷Agáiáná ia mehániꞌ node: ‘Ineeꞌaꞌ nuganggu. Tegili miꞌi babaꞌ. Kódóꞌ hai ánáꞌkuꞌ, letaꞌmongkaiꞌ. Tiꞌaraꞌaꞌ peisá mearó ina mampoweꞌikoꞌ to nupembiáꞌ.’

⁸Mewaliꞌ ane noꞌonoꞌi, noumbá miꞌi? Kehapiꞌ ia rángámu, tiꞌara iti to ina mewaliꞌ álásána bona mearó mampoweꞌikoꞌ ba apa-apa. Ngkáliꞌna riꞌi, ia ina mearó ánti katiꞌárána nuisá mahili membiáꞌ oaꞌ apa to nuparaluu.

⁹Mewaliꞌ Kuhángáꞌákou: hangaa-ngaa nipembiáꞌ oaꞌ i Pueꞌ Ala, hai bateꞌna ina Naweꞌikou. Nipeliꞌ miꞌi apa to niparaluu, hai bateꞌna ina nilámbiꞌ. Nikadoꞌ babaꞌ moliu pekakaemi, hai Pueꞌ Ala ina mobungkáhiákou rárá molámbiꞌ apa to niparaluu.

¹⁰Láwiꞌ heáná to membiáꞌ ina raweꞌi. Heáná to mampeliꞌ ina molámbiꞌ. Heáná to mokadoꞌ babaꞌ, ina rabungkáhiá.

¹¹Ba arakou to mampoweꞌi lelótó i ánáꞌmi ane ánáꞌmi membiáꞌ bouꞌ?

¹²Ba arakou to mampoweꞌi kalajengki ane membiáꞌ tulu manuꞌ? Tiꞌara!

¹³Kehapiꞌkou kadake, niꞌisá mani mampoweꞌi apa to maroꞌa i ánáꞌmi. Pelumbuꞌna mani Umámi to ara i surugáꞌ, bateꞌna ina mampoweꞌi Inao to Magasaꞌ i tauna to membiáꞌ i Hia.”

¹⁴Hangkani tempó, ara hadua tauna to raꞌánti lao i Iesu. Tauna iti tiꞌara peisá molaluita láwiꞌ napesuaꞌi setáꞌ. Iesu mampopesuwuꞌ miꞌi setáꞌ iti hangko i wátána, álána peisá molaluita. Tingkáráꞌmoheꞌ tauna to handaꞌ,

¹⁵agáiáná araheꞌ woꞌo tauna to manguliꞌ, “KuasaꞌNa iti hangko i Belesebu,[147] daturaꞌ upu-upu setáꞌ, onoꞌ miꞌi haneꞌi Ia peisá mampopelóhóꞌ setáꞌ.”

¹⁶Araheꞌ woꞌo to mampoinao mampehukáꞌ Iesu. Membiáꞌheꞌ i Iesu bona Napopaitaꞌáheꞌ tandaꞌ kuasaꞌ bona tongawaꞌ kahangko i Pueꞌ AlaNa.

¹⁷Agáiáná naisá miꞌi Iesu apa tunggáiána laluraꞌ, onoꞌ miꞌi haneꞌi Nahángáꞌáheꞌ, “Rápáꞌna, ane arai hadua datu, hai tauna to handaꞌ i lalu kadatuána mosisalaꞌheꞌ oaꞌ hai mombeꞌewaꞌheꞌ, kadatuá iti ina magero. Ane tauna hampohalaluá pakaheꞌ mosisalaꞌ, ina magero pohalaluraꞌ iti.

¹⁸Noꞌonoꞌ woꞌo i kadatuá setáꞌ. Niuliꞌ, mampopelóhóꞌAꞌ setáꞌ hai kuasaꞌ to hangko i Belesebu, daturaꞌ upu-upu setáꞌ. Agáiáná ane Datu Tokadake moewaꞌ hangka tokadakena, bateꞌna ina magero kadatuána.

¹⁹Niuliꞌ mampopelóhóꞌAꞌ setáꞌ hai kuasaꞌ hangko i Belesebu, agáiáná ara woꞌo topeuláꞌmi to mampopelóhóꞌ setáꞌ. Kuasaꞌ apa to rapakeꞌ topeuláꞌmi iti mampopelóhóꞌ setáꞌ? Manótó kuasaꞌ to hangko i Pueꞌ Ala. Mewaliꞌ, hangko i bábehiáraꞌ topeuláꞌmi iti, tongawaꞌ miꞌi katiꞌárána toꞌu laluitami to manguliꞌ Kódóꞌ mampopelóhóꞌAꞌ setáꞌ hangko i kuasaꞌna Datu Tokadake.

²⁰Lempóna: mampopelóhóꞌAꞌ setáꞌ hangko i kuasaꞌna Pueꞌ Ala.[148] Hai iti miꞌi to mopatongawaꞌ Pueꞌ Ala mepárentá miꞌi i oloꞌmi.

²¹Datu Tokadake peisá rapándiriꞌ nodo hadua tobaleilo to maróhó to mokámpái támbina. Handaꞌ párewá pombealana,[149] onoꞌ miꞌi haneꞌi óntóꞌ támbina[150] tiꞌara peisá raperampaꞌi.

²²Agáiáná, ane haweꞌMoꞌ hai melumbuꞌ kamaróhóngkuꞌ, tauna to mokámpái támbi iti peisá Kuewaꞌ hai Kunangi. Párewá pombeala to naporóhó pueꞌ támbi iti ina Kuperampaꞌi, hai upu-upu óntóꞌ támbi iti ina Kuala hai Kupegáláꞌ-gáláꞌá.

²³Heáná to tiꞌara hingkakani hai Kódóꞌ, ia miꞌi to hingkakani hai Datu Tokadake. Heáná to tiꞌaraꞌAꞌ motulungi mampeliꞌ tauna bona mewaliꞌheꞌ taunána Pueꞌ Ala, ia miꞌi to moewaꞌAꞌ.”

²⁴Iesu mopaliliu laluitaNa, Nauliꞌ, “Ane ara tokadake to rapopesuwuꞌ miꞌi hangko i tauna, tokadake iti lao i pádá loriꞌ mampeliꞌ katoroꞌána, agáiáná tiꞌara nalámbiꞌ. Nauliꞌ tokadake iti, ‘Rángina miꞌi mesuleꞌ peaꞌ lao i katoroꞌá to kupálehi iaꞌo.’

²⁵I pesuleꞌna, naita tauna iti nodo támbi to tehairi hai tekádipurá mpakaroꞌa.[151]

²⁶Onoꞌ miꞌi haneꞌi lao mokióꞌ pitu hangka tokadakena to melumbuꞌ kakadakeraꞌ hangko i hia. Lao mpuꞌumoheꞌ mesuaꞌ i tauna to napálehi miꞌi iaꞌo, hai mokuasaꞌi tauna iti, álána rumihi ntepuꞌu kamapárina hangko i rungu-runguna.”

²⁷Karoona Iesu molaluita noꞌonoꞌ, ara hadua towawine i oloꞌraꞌ tauna to handaꞌ to molaluita napasimbuku, nauliꞌ, “Morasiꞌ ináMu to mokádipuráKoꞌ hangko i kanapoánákaMu!”

²⁸Agáiáná nahániki Iesu, Nauliꞌ, “Toꞌu to nuꞌuliꞌ, agáiáná morasiꞌ mani tauna to mampehádingi ngkóráꞌna Pueꞌ Ala hai mampeuláꞌi.”

²⁹Tangaꞌraꞌ tauna to handaꞌ motolelingi Iesu, Napaliliu miꞌi laluitaNa i hira, Nauliꞌ, “Kadake ntepuꞌukou to tueꞌ tempó deꞌe, láwiꞌ nihuoꞌAꞌ bona Kupopaitaꞌákou tandaꞌ kuasaꞌ, bona tongawaꞌ kahangko i Pueꞌ AlaNgkuꞌ. Agáiáná tiꞌara ara tandaꞌ kuasaꞌ to ina Kupopaitaꞌákou, bateꞌna peá tandaꞌ nodo to mewaliꞌ i nabiꞌ Iunu hangkoia.

³⁰Ia mewaliꞌ tandaꞌ i toNiniwe,[152] {láwiꞌ tekábáhá hangko i kapate hai tueꞌ bona mopahaweꞌ laluitana Pueꞌ Ala i hira}. Noꞌonoꞌ woꞌo, apa to ina mewaliꞌ i Ánáꞌ Mánusiá ina mewaliꞌ tandaꞌ i tauna to tueꞌ deꞌe-deꞌe.

³¹Hangkoia, datu towawine haweꞌ hangko i tampoꞌna to karaoꞌ, to rahangaꞌ tampoꞌ Seba, láwiꞌ napoinao mampehádingi laluitana kamapándena Datu Salomo.[153] Deꞌe-deꞌe ara miꞌi i oloꞌmi Hadua to melumbuꞌ kamahilena tueꞌNa hangko i Datu Salomo, agáiáná kómu to tueꞌ deꞌe-deꞌe, tiꞌara nipoinálái laluitaNa. Mewaliꞌ i alo pobutusi i kahópóꞌána duniáꞌ, datu towawine iti ina meángkáꞌ i lindoꞌmi, hai ina mosalaꞌikou.

³²Noꞌonoꞌ woꞌo toNiniwe. Hangkoia, menosoꞌmoheꞌ hangko i dósáraꞌ i pampehádingiraꞌ laluitana nabiꞌ Iunu.[154] Deꞌe-deꞌe, ara miꞌi i oloꞌmi Hadua to melumbuꞌ kamahilena tueꞌNa hangko i nabiꞌ Iunu, agáiáná kómu to tueꞌ deꞌe-deꞌe, tiꞌarakou menosoꞌ hangko i dósámi i kanihádina laluitaNa. Mewaliꞌ i alo pobutusi i kahópóꞌána duniáꞌ, toNiniwe iti ina meángkáꞌ i lindoꞌmi hai ina mosalaꞌikou.”[155]

³³Iesu mopaliliu laluitaNa, Nauliꞌ, “Tiꞌara ara hadua tauna to motótó palita haneꞌi nahumbáki. Palita iti bateꞌna nawoli i kamapángkáꞌána bona pewangkaꞌna raita upu-upu tauna to mesuaꞌ i lalu támbi. {Noꞌonoꞌ woꞌo, tiꞌara Kuwuniángi ngkóráꞌna Pueꞌ Ala i kómu.}

³⁴Mátámi ia miꞌi huluꞌna wátámi, láwiꞌ ane maroꞌa mátámi, pewangkaꞌ hangko i Pueꞌ ina mesuaꞌ i lalumi, mowangkaꞌikou. Agáiáná ane kegawu mátámi, makáindi ntepuꞌu lalumi.[156]

³⁵Onoꞌ miꞌi haneꞌi hangaa-ngaa maingáꞌ-ingáꞌkou, bona lalumi to napamabaa miꞌi Pueꞌ Ala, ineeꞌ wopiꞌi nipamakáindi.

³⁶Mewaliꞌ, ane lalumi nawangkaꞌi miꞌi pewangkaꞌna Pueꞌ álána tiꞌara piꞌi ara to makáindi, upu-upu katueꞌmi ina mabaa nodo huluꞌ to mowangkaꞌi kakáindiána.”[157]

³⁷Karoona Iesu mepaturoꞌ, ara hadua toParisi to mowáwáhá Iesu bona laoheꞌ mandeꞌ i támbina. Mewaliꞌ lao mpuꞌu miꞌi Iesu.

³⁸KahaweꞌNa i támbi, Ia liliu pemiꞌi mandeꞌ, tiꞌara lebaꞌ membahoꞌ. Tingkáráꞌ toParisi iti moita Iesu mandeꞌ, tiꞌara sieruꞌ membahoꞌ mouláꞌ ádá ágámáraꞌ.

³⁹Onoꞌ miꞌi haneꞌi Iesu mohángáꞌá, “Kómu toParisi nodokou tauna to mobahoꞌi painuá hai taboꞌ i rawana peá, láwiꞌ nipekiri ádá to i rawana peá, mole lalumi bukeꞌ to kadake hai mampokaelu pekou oaꞌ párewána tauna ntániꞌna.

⁴⁰Tiꞌara mpuꞌu niꞌisá apa to maroꞌa! Tiꞌara wátántaꞌ peá to napopewaliꞌ Pueꞌ Ala, agáiáná Ia mampoweꞌikeꞌ pekiri.

⁴¹Apa to ara i kómu, hangaa-ngaa niweꞌiheꞌ tauna to meahiahiꞌ tueꞌraꞌ hangko i lalumi ntepuꞌu. Ane noꞌonoꞌ to nibábehi, ina mewaliꞌ ntepuꞌukou tauna to magasaꞌ.

⁴²Hurewuꞌmokou toParisi! Madota ntepuꞌukou mampeuláꞌi párentá to manangkoꞌ. Mogalo riꞌi tudaꞌ-tudaꞌ i kintáꞌmi to nodo háre hai kulaꞌ, nipopenómbá hanggáláꞌ hampuloꞌ i Pueꞌ Ala mouláꞌ Paturoꞌna Musa.[158] Agáiáná párentá to matimi to manguliꞌ hangaa-ngaa nibábehi apa to maroꞌa hai hintotoꞌ i rángámi, hai hangaa-ngaa nipokaꞌahiꞌ Pueꞌ Ala,[159] tiꞌara iti to nipeuláꞌi. Katoꞌuána párentá to matimi iti to hangaa-ngaa nipeuláꞌi ntepuꞌu, hai ineeꞌ woꞌo nikábáhá pampeuláꞌimi párentá to manangkoꞌ.

⁴³Hurewuꞌmokou toParisi! Niundeꞌ ntepuꞌu ane rapopehodakou i pehodaꞌá to i lindoꞌ i lalu támbi penómbáꞌá. Góeꞌkou ane rabiláꞌkou tauna to handaꞌ i pobaluꞌ-baluꞌá.

⁴⁴Hurewuꞌmokou! Nodokou popatawuá to tiꞌara rapetándái. Tauna molumao i wongkona, láwiꞌ tiꞌara raisá kaꞌárána to mepakedái.[160] Noꞌonoꞌ woꞌo kómu: maroꞌa pekou i rawa, mole lalumi kadake.”

⁴⁵Hadua guru agama toIahudiꞌ molaluita i Iesu, nauliꞌ, “Ee Guru, ane noꞌonoꞌi laluitaMu, tepasuaꞌ miꞌi woꞌo kaiꞌ to Nusasalaꞌi!”

⁴⁶Nahániki Iesu, “Hurewuꞌmokou woꞌo guru-guru agama! Kómu miꞌi to mampoweꞌi kilinga to matimi i tauna, láwiꞌ nitámbái mani párentá hai ádá agama to matimi,[161] agáiáná kómu haduduámi, tiꞌarakou mampeuláꞌi áturá iti, hai tiꞌara woꞌo ara haweꞌ hantódiꞌ ahiꞌmi. Mogalo riꞌi hangkau karaweꞌmi, tiꞌara nipakeꞌ motulungiheꞌ.

⁴⁷Hurewuꞌmokou! Mopakaroꞌakou oaꞌ popatawuáraꞌ nabiꞌ-nabiꞌ {to marue miꞌi mate}, agáiáná hibali pekou hai toiorumi to mopapateheꞌ nabiꞌ iti. Bábehiámi iti mopatongawaꞌ peá kanipokanana bábehiáraꞌ toiorumi iti.

⁴⁸

⁴⁹Onoꞌ miꞌi haneꞌi Pueꞌ Ala to moisá upu-upuna, manguliꞌ node: ‘Ina Kuhuoꞌheꞌ nabiꞌ-nabiꞌ hai suro-suro lao i hira. Hantángáꞌheꞌ ina rapapate, hantángáꞌheꞌ ina rapopeahiahiꞌ.’

⁵⁰Ánti karapapateraꞌ handaꞌ nabiꞌ hungkáꞌna duniáꞌ deꞌe rapopewaliꞌ, mantepuꞌu hangko i karapapatena Abeli haweꞌ-haweꞌ i Sakaria to rapapate i tangabaa Támbina Pueꞌ Ala, i hiliꞌna támbi to magasaꞌ iti hai paintuá popenómbá,[162] onoꞌ miꞌi haneꞌi tauna to tueꞌ tempó deꞌe ina rahuku.

⁵¹

⁵²Hurewuꞌmokou guru-guru agama! Katoꞌuána, kekómu miꞌi to hangaa-ngaa mopaturoꞌ tauna ntániꞌna, bona moisáheꞌ noumbá rárána lao i Pueꞌ Ala. Agáiáná kómu riꞌi haduduámi, tiꞌara niundeꞌ mouláꞌ rárá iti,[163] hai mokóntókou woꞌo tauna to mampoinao moisá Pueꞌ Ala.”

⁵³Kapohuꞌna Iesu hangko i támbina toParisi iti, guru-guru agama hai toParisi mabukoꞌ ntepuꞌuheꞌ, onoꞌ miꞌi haneꞌi ratunggái mekuneꞌ-kuneꞌ oaꞌ i Hia,

⁵⁴láwiꞌ mampeliꞌheꞌ kamanawoꞌáNa moliu pehániꞌNa.