Read Besoa Lukasi 12 Bible Online

Lukasi 12 - Besoa bible

Lukasi 12

¹I tempó iti woꞌo, i sábuna tauna to haweꞌ láwiꞌ mampoinaoheꞌ moita Iesu. Mombegihiꞌ-gihiꞌmoheꞌ álána mombekada-kadaheꞌ. I tempó iti, mantepuꞌu miꞌi Iesu mepaturoꞌ, rungu-runguna i topeguruNa, Nauliꞌ, “Maingáꞌ-ingáꞌkou i toParisi, láwiꞌ mampe to maroꞌa peheꞌ. Hira nodoheꞌ ragiꞌ. Agáiáná, upu-upu to ara i laluraꞌ ina tebungkáhi, hai upu-upu to tewuniángi ina tongawaꞌ.

³Maingáꞌ-ingáꞌkou woꞌo, láwiꞌ apa to nipolaluita i tangaꞌ káindi, bateꞌna ina rahádi mabaa. Hai apa to nikuwiá rángámi i lalu lintuꞌmi to tetuko, bateꞌna ina rabámbári i humalele wánuá.”

⁴“Halalu-halalu, nipehádingi maroꞌa laluitaNgkuꞌ: ineeꞌkou mampokalááꞌ tauna to mampoinaoheꞌ mopapatekou, láwiꞌ wátámi peá to peisá rapapate. Upu onoꞌ, tiꞌara piꞌi ara to peisá rabábehi i kómu.

⁵Agáiáná to hangaa-ngaa nipokalááꞌ ia miꞌi Pueꞌ Ala, láwiꞌ Ia to makuasaꞌ moala peinaomi, hai makuasaꞌ woꞌo motibekou i lalu naraka. Toꞌu ntepuꞌu to Kuhángáꞌákou deꞌe: Ia peá to hangaa-ngaa nipokalááꞌ.

⁶Lima báꞌána dena peisá rapobaluꞌ rompepaꞌ peá dóiꞌ see. Agáiáná kehapiꞌ noꞌonoꞌ, tiꞌara ara haweꞌ hambaꞌa to tiꞌara nakádipurá Pueꞌ Ala.

⁷Pelumbuꞌna mani kómu taunáNa. Mogalo riꞌi imbaꞌna weluáꞌmi, naisá Pueꞌ Ala kahandaꞌna. Mewaliꞌ ineeꞌkou malááꞌ. Melumbuꞌ pekádipurána Pueꞌ Ala i kómu haneꞌi pokádipuráNa dena to handaꞌ.”

⁸“Nipehádingi maroꞌa laluitaNgkuꞌ: heáná to mopangákuꞌ i lindoꞌraꞌ tauna peuláꞌna i Kódóꞌ Ánáꞌ Mánusiá, ia woꞌo ina Kupangákuꞌ i UmáNgkuꞌ i lindoꞌraꞌ malaꞌekana Pueꞌ Ala.

⁹Agáiáná heáná to mosápuákaꞌAꞌ i lindoꞌraꞌ tauna, ia woꞌo ina Kusápuáka i lindoꞌraꞌ malaꞌekana Pueꞌ Ala.

¹⁰Heáná to mosápuáka kaKódóꞌna Ánáꞌ Mánusiá, salaꞌ iti peisá mani raꞌámpungi. Agáiáná heáná to mosápuáka Inao to Magasaꞌ, tiꞌara ara ámpungina.[164]

¹¹Ane raꞌántikou i lindoꞌraꞌ tadulako agama ba i topopárentá wánuá ánti peuláꞌmi i Kódóꞌ, ineeꞌkou malááꞌ ba apa to ina nihángáꞌáheꞌ ba noumbá pehániꞌmi,

¹²láwiꞌ i tempó iti woꞌo, Inao to Magasaꞌ ina mopakanótóákou apa to ina niuliꞌ.”

¹³Ara hadua tauna hangko i oloꞌraꞌ tauna to handaꞌ to mohungkuki Iesu, nauliꞌ, “Guru, Nuhángáꞌá halalungkuꞌ to wutuꞌ, bona naweꞌiaꞌ gáláꞌkuꞌ hangko i sosorana umángkiꞌ.”

¹⁴Agáiáná nahániki Iesu, “Halalu, heáná to moángkáꞌAꞌ mewaliꞌ topotangaꞌ-tangaꞌi pogálá sosorana umámi?”

¹⁵Roo onoꞌ, nauliꞌ Iesu i tauna to handaꞌ, “Maingáꞌ-ingáꞌkou hai maroꞌa-roꞌakou, ineeꞌkou mampoinao morámpu párewá ngkáduniáꞌ, láwiꞌ kehapiꞌ handaꞌ párewámi, tiꞌara iti to mopakanótó kamaroꞌana katueꞌtaꞌ.”

¹⁶Hangko ionoꞌ, napahaweꞌ Iesu ngkóráꞌ pándiriꞌ deꞌe, Nauliꞌ, “Ara hadua topebuku, maeláꞌ tampoꞌna hai to natudaꞌ handaꞌ ntepuꞌu wuaꞌna.

¹⁷Nauliꞌ topebuku iti i laluna, ‘Apa to hangaa-ngaa kubábehi, láwiꞌ tiꞌara piꞌi gáná buhoꞌkuꞌ kupamboliꞌi parengkuꞌ?’

¹⁸Kahópóꞌána, nauliꞌ, ‘Rángina miꞌi buhoꞌ to kókóiꞌ deꞌe kugero, haneꞌiaꞌ moaró to mahile, bona peisá kupamboliꞌi upu-upu parengkuꞌ hai párewángkuꞌ.

¹⁹Roo onoꞌ ina kuꞌuliꞌ: tiꞌarapoꞌ paraluu mobágóꞌ, láwiꞌ handaꞌ pambolingkuꞌ. Gáná miꞌi kupakeꞌ bahangapai parena. Ina mengkaroomoꞌ mobágóꞌ, ina mandeꞌ peaꞌ hai mainu i lalu kagóeꞌ-góeꞌ!’

²⁰Agáiáná nahángáꞌá riꞌi Pueꞌ Ala, ‘Ee tobebe! Káindi deꞌe, ina matemokoꞌ, mewaliꞌ upu-upu to nurámpu iti, heáná miꞌi pueꞌna?’ ”

²¹KarooNa mopahaweꞌ ngkóráꞌ pándiriꞌ iti, Iesu manguliꞌ, “Noꞌonoꞌ miꞌi pewaliꞌna i tauna to mohárungá peá kapebukuraꞌ, ane tiꞌaraheꞌ mehárungá bukeꞌ-bukeꞌ i Pueꞌ Ala.”

²²Roo onoꞌ, Iesu molaluita i topeguruNaheꞌ, Nauliꞌ, “Onoꞌ miꞌi haneꞌi Kuhángáꞌákou: ineeꞌ nipokaraoꞌ inao kana i katueꞌmi ba niuliꞌ, ‘Apa miꞌi to taꞌandeꞌ?’ ba ‘Apa miꞌi to tapowaruꞌ?’

²³Láwiꞌ katueꞌmi melumbuꞌ hangko i pandeꞌ hai wátámi melumbuꞌ mani hangko i pewaruꞌ.

²⁴Nipeita tádáhi kaaꞌ. Tiꞌaraheꞌ mowiáꞌ, tiꞌaraheꞌ mepare, tiꞌara woꞌo ara buhoꞌraꞌ, agáiáná kehapiꞌ noꞌonoꞌ, pandeꞌraꞌ bateꞌna napatimama Pueꞌ Ala. Apa mani kómu. Melumbuꞌ mani pekádipurána Pueꞌ Ala i kómu hangko i tádáhi.

²⁵Apa miꞌi pobunduꞌána handaꞌ to nipekiri? Kehapiꞌ karaoꞌ inaomi mampekiri mampopengaa, tiꞌarakou peisá motámbái tinuwuꞌmi, kehapiꞌ hambengiá peá.

²⁶Mewaliꞌ, ane tiꞌara nibuku mobábehi to manangkoꞌ iti, moapa riꞌi haneꞌi nipokalááꞌ mampopengaa?

²⁷Peita bungaꞌ to tueꞌ i pádá. Tiꞌaraheꞌ mobágóꞌ, tiꞌaraheꞌ woꞌo mandau, agáiáná Kuhángáꞌákou, mogalo riꞌi Datu Salomo to pebuku ntepuꞌu, waruꞌna tiꞌara hibali hai peraeꞌna bungaꞌ iti.

²⁸Rumpuꞌ tueꞌ deꞌe-deꞌe i pádá hai kahalona rahunu, agáiáná kehapiꞌ noꞌonoꞌ, Pueꞌ Ala mampoperaeꞌ oaꞌ rumpuꞌ iti. Apa mani kómu! Melumbuꞌ ntepuꞌu pekádipurána Pueꞌ Ala i kómu. Mewaliꞌ, moapa riꞌi haneꞌi tiꞌara nihárungá pekádipuráNa iti?

²⁹Ineeꞌ karaoꞌ inaomi ba niuliꞌ, ‘Apa miꞌi to taꞌandeꞌ hai tainu, hai apa miꞌi woꞌo to tapowaruꞌ?’

³⁰Upu-upuna iti rapepekiri oaꞌ tauna to tiꞌara moisá Pueꞌ Ala. Agáiáná kómu, ineeꞌ nipokaraoꞌ inao, láwiꞌ upu-upu to niparaluu i lalu katueꞌmi, naisá miꞌi aha Umámi to i surugáꞌ.

³¹Mewaliꞌ, hangaa-ngaa nipaioru popárentána Pueꞌ Ala i lalu katueꞌmi, hai upu-upuna to niparaluu bateꞌna ina Naweꞌikou.”

³²Iesu mopaliliu wopiꞌi laluitaNa, Nauliꞌ, “Kómu to meuláꞌ i Kódóꞌ, kehapiꞌ tiꞌarakou handaꞌ, ineeꞌkou malááꞌ, láwiꞌ Pueꞌ Ala Umámi góeꞌ ntepuꞌu mokámpáikou hai motarimakou i lalu popárentáNa.[165]

³³Onoꞌ miꞌi haneꞌi Kuhángáꞌákou: nipobaluꞌ miꞌi párewámi, hai hólóna niweꞌiheꞌ tauna to meahiahiꞌ tueꞌraꞌ. Láwiꞌ ane nibábehi noꞌonoꞌ, lempóna, párewámi niwoli i lalu pemboliá to tiꞌara peisá marugiꞌ, ia miꞌi, i lalu surugáꞌ. Párewámi to ionoꞌ tiꞌara ina matántá, láwiꞌ tiꞌara peisá rapanako hai tiꞌara woꞌo peisá naꞌandeꞌ bubuꞌ.

³⁴Láwiꞌ apa to nipaioru i lalu katueꞌmi, bateꞌna iti oaꞌ to nipekiri.”[166]

³⁵Roo onoꞌ, napahaweꞌ Iesu ngkóráꞌ pándiriꞌ deꞌe, Nauliꞌ, “Hangaa-ngaa maingáꞌ-ingáꞌkou oaꞌ hai hangaa-ngaa timama ntepuꞌukou, bona ineeꞌkou napatingkáráꞌ ba apa peá to morampekou. Kómu hangaa-ngaa nodokou hawiꞌ to mampegiáheꞌ pueꞌraꞌ mesuleꞌ hangko i posusaꞌá petauna. Hawiꞌ iti, timamaheꞌ oaꞌ ina mobágóꞌ,[167] hai huluꞌraꞌ tueꞌ oaꞌ. Ane haweꞌ miꞌi pueꞌraꞌ mokadoꞌ babaꞌ, kásáliu lao rabungkáhi.

³⁶

³⁷Morasiꞌheꞌ hawiꞌ to timama oaꞌ mampegiá duuꞌna pueꞌraꞌ haweꞌ. Toꞌu to Kuhángáꞌáꞌákou deꞌe: pueꞌraꞌ iti ina moala waruꞌ hawiꞌ, napakeꞌ, haneꞌi hawiꞌnaheꞌ napopehoda, hai ia haduduána to ina moróráheꞌ.[168]

³⁸Morasiꞌ ntepuꞌuheꞌ hawiꞌ to mepegiá hai timama i kaꞌina haweꞌna huleꞌ pueꞌraꞌ, kehapiꞌ i tangaꞌ káindi ba impirái kahaweꞌána.

³⁹Hangaa-ngaa nipailalu ngkóráꞌ pándiriꞌ deꞌe: ane kenaisái ami pueꞌ támbi impirá kaꞌina haweꞌna topanako, bateꞌna ina maingáꞌ-ingáꞌ; tiꞌara ina napatodáhi mesuaꞌ i lalu támbina.

⁴⁰Onoꞌ miꞌi haneꞌi kómu woꞌo hangaa-ngaa timamakou oaꞌ, láwiꞌ kaꞌina haweꞌna huleꞌ Ánáꞌ Mánusiá, tiꞌara niꞌisá impirá tempóna.”

⁴¹Napekuneꞌ Peturuꞌ i Iesu, “Pueꞌ, heáná to Nutunggái i lalu ngkóráꞌ pándiriꞌ iti, kaiꞌ peá ba upu-upu woꞌo tauna?”

⁴²Nahániki Pueꞌ Iesu, “Nipailalu ngkóráꞌ pándiriꞌ deꞌe: ara hadua hawiꞌ to manótó laluna hai peisá napoinálái pueꞌna. Ia naꞌángkáꞌ pueꞌna bona motadulakoi hawiꞌ ntániꞌna hai mokádipurá pandeꞌraꞌ alo-alona.

⁴³Morasiꞌ ntepuꞌu hawiꞌ iti ane i pesuleꞌna pueꞌna, ia ralámbiꞌ tangaꞌna mampopolumao bágóꞌna.

⁴⁴Hai Kuhángáꞌáꞌákou: hawiꞌ iti bateꞌna ina naꞌángkáꞌ pueꞌna mewaliꞌ to mokádipurá upu-upu párewána.

⁴⁵Agáiáná noumbá ane tiꞌara maroꞌa pambiárána hawiꞌ iti? Ina nauliꞌ i laluna, ‘Pueꞌkuꞌ tiꞌara ina poloꞌ mesuleꞌ.’ Mewaliꞌ hawiꞌ iti tiꞌara piꞌi ina mampopolumao bágóꞌna. Ina natepuꞌu mopapaháiheꞌ hangka hawiꞌna, maroꞌa towawine, maroꞌa tobaleilo. Ia ina mandeꞌ hai mainu oaꞌ duuꞌna malangu.

⁴⁶Agáiáná hangkaꞌ-hangkaꞌ perái, ina haweꞌ pueꞌna i tempó to tiꞌara nasangka-sangka. Hawiꞌ iti ina napapahái pueꞌna duuꞌna mate hai napahibali hai tauna to tiꞌara mengkoruꞌ i pueꞌna.

⁴⁷Ane hawiꞌ to moisá miꞌi peundeꞌána pueꞌna, agáiáná tiꞌara mouláꞌ peundeꞌána pueꞌna iti, hai tiꞌara matimama i kahaweꞌna, hawiꞌ iti bateꞌna ina rapapahái ntepuꞌu.

⁴⁸Agáiáná ane ara hawiꞌ to tiꞌara moisá peundeꞌána pueꞌna hai mobábehi to salaꞌ, manangkoꞌ peá karapaháina. Láwiꞌ heáná to raweꞌi handaꞌ, handaꞌ woꞌo to ina rapembiáꞌ hangko i hia. Hai ane handaꞌ to rapoináláiá tauna, handaꞌ woꞌo to ina rahárungá hangko i hia.”[169]

⁴⁹Nauliꞌ Iesu, “MaiAꞌ i duniáꞌ deꞌe bona molámbiꞌkou kapári to ina mopamagasaꞌkou nodo api mopamagasaꞌ besiꞌ. Hai Kuhárungá haweꞌ miꞌi tempóna rapamagasaꞌmokou.

⁵⁰Agáiáná ara mani kapári to hangaa-ngaa morampeAꞌ. Ina masusa laluNgkuꞌ duuꞌna mewaliꞌ.[170]

⁵¹Ba nihárungá kamaiNgkuꞌ deꞌe bona moántiAꞌ pohintuwuꞌ i tauna. Tiꞌara! Ngkáliꞌna riꞌi kamaiNgkuꞌ deꞌe bona moántiAꞌ posisalaꞌ i oloꞌraꞌ tauna.

⁵²Mantepuꞌu deꞌe-deꞌe, tauna hantámbi ina mosisalaꞌheꞌ. Rápáꞌna, ane araheꞌ lima i lalu hantámbi, táluheꞌ ina moewaꞌ to rodua, hai to rodua iti ina moewaꞌheꞌ to tálu.

⁵³To rapouma ina moewaꞌ ánáꞌna tobaleilo, hai ánáꞌna tobaleilo ina moewaꞌ umána. To rapoina ina moewaꞌ ánáꞌna towawine, hai ánáꞌna towawine ina moewaꞌ inána. To rapopengantiꞌi ina moewaꞌ mániána, hai mániána ina moewaꞌ pengántiꞌina.”[171]

⁵⁴Nauliꞌ wopiꞌi Iesu i tauna to handaꞌ, “Ane niꞌita gawu tándáꞌ i katámpuá alo, niuliꞌ ina keudá, hai iti to mewaliꞌ.

⁵⁵Ane mewuiꞌi hangko tándáꞌ i wóiꞌ, niuliꞌ ina madiiꞌ, hai bateꞌna mewaliꞌ woꞌo.

⁵⁶Mampe to mapándekou! Niꞌisá mampeita tandaꞌ i langiꞌ hai tandaꞌ i duniáꞌ, agáiáná tiꞌara niꞌisá mampetándái apa lempóna to nabábehi Pueꞌ Ala deꞌe-deꞌe moliu Kódóꞌ.”

⁵⁷“Kómu deꞌe, moapa riꞌi haneꞌi tiꞌara niꞌisá apa to maroꞌa i peitána Pueꞌ Ala?

⁵⁸Ane rápáꞌna ara tauna to moántikoꞌ i lindoꞌna tadulako wánuá ina mosalaꞌikoꞌ, hangaa-ngaa modamekou tangaꞌmi mani i tangaꞌ rárá. Láwiꞌ ane tiꞌarakou modame, ina naꞌánti mpuꞌukoꞌ i lindoꞌna topobutusi, hai topobutusi iti ina mampeweꞌikoꞌ i pulisi, hai pulisi iti ina mopasuaꞌkoꞌ i lalu petarungkuá.

⁵⁹Toꞌu ntepuꞌu to Kuhángáꞌákou: tiꞌarakoꞌ ina mesuwuꞌ hangko i petarungkuá ane tiꞌara mani upu indámu nubaiari.”[172]