Read Besoa Lukasi 15 Bible Online

Lukasi 15 - Besoa bible

Lukasi 15

¹Hangkani tempó, handaꞌ toperóróꞌ ásele hai tauna ntániꞌna lao i Iesu láwiꞌ mampoinaoheꞌ mampehádingi laluitaNa. Tauna iti rarekeꞌheꞌ “tauna to tiꞌara maroꞌa”.[187]

²Araheꞌ woꞌo toParisi hai guru-guru agama to moitaheꞌ. Mohume-humemoheꞌ, rauliꞌ, “Tauna deꞌe motarima tauna to madósá, hai Napohingkakaniáheꞌ mandeꞌ!”

³Onoꞌ miꞌi haneꞌi Iesu mopahaweꞌ ngkóráꞌ pándiriꞌ deꞌe i hira,

⁴Nauliꞌ, “Ane rápáꞌna hadua hangko i oloꞌmi ara dimbána hangatu báꞌána, hai matántá hambaꞌa, apa to ina nabábehi? Bateꞌna ina napálehi dimbána to hahioꞌ puloꞌna hai hahioꞌ báꞌána i pádá, haneꞌi lao mampeliꞌ hambaꞌa to matántá duuꞌna nalámbiꞌ.

⁵Ane nalámbiꞌi huleꞌ, ina góeꞌ ntepuꞌu. Ánti kagóeꞌna, ia ina mohámpá dimbána iti haneꞌi naꞌánti huleꞌ.

⁶Roo onoꞌ, ia ina mokióꞌ balena hai rángána, haneꞌi nahángáꞌáheꞌ, ‘Maikeꞌ mosusa, láwiꞌ dimbángkuꞌ to matántá, kulámbiꞌ miꞌi huleꞌ.’ ”

⁷Napahópóꞌ Iesu laluitaNa, Nauliꞌ, “Kuhángáꞌáꞌákou: noꞌonoꞌ woꞌo i surugáꞌ, ane hadua tauna to madósá menosoꞌ hangko i dósána, melumbuꞌ kagóeꞌna Pueꞌ Ala i tauna iti hangko i taunáNa to hahioꞌ puloꞌna hai hahioꞌ to manótó to tiꞌara paraluu menosoꞌ.”

⁸Iesu mopaliliu laluitaNa hai ngkóráꞌ pándiriꞌ deꞌe, Nauliꞌ, “Ane rápáꞌna ara hadua towawine to ara dóiꞌna hampuloꞌ pepaꞌna peráꞌ,[188] hai matántá hampepaꞌ, apa to ina nabábehi? Ia bateꞌna lao motótó palita haneꞌi moháiri támbina mampeliꞌ dóiꞌna duuꞌna nahumba.

⁹Kanahumbana peá dóiꞌna iti, ia mokióꞌ ádáꞌna hai rángánaheꞌ, haneꞌi nauliꞌ, ‘Maikeꞌ mosusa! Góeꞌ ntepuꞌuaꞌ, láwiꞌ kuhumba miꞌi huleꞌ dóiꞌkuꞌ to matántá.’ ”

¹⁰Napahópóꞌ Iesu laluitaNa, Nauliꞌ, “Kuhángáꞌáꞌákou, noꞌonoꞌ woꞌo kagóeꞌraꞌ malaꞌekana Pueꞌ Ala i hadua tauna to madósá to menosoꞌ hangko i dósána.”

¹¹Hangko ionoꞌ, Iesu mopaliliu wopiꞌi laluitaNa hai ngkóráꞌ pándiriꞌ deꞌe, Nauliꞌ, “Ara hadua umaꞌ, roduaheꞌ ánáꞌna, paka tobaleilo.

¹²Toadi molaluita i umána, nauliꞌ, ‘Umaꞌ, nuweꞌimoꞌ deꞌe-deꞌe to mewaliꞌ gáláꞌkuꞌ hangko i párewámu hai tampoꞌmu.’ Mewaliꞌ, nagáláꞌ-gáláꞌ mpuꞌumoheꞌ párewána hai tampoꞌna i ánáꞌna to rodua iti.[189]

¹³Bahangapa alona hangko ionoꞌ, ánáꞌna to adi mampobaluꞌ miꞌi gáláꞌna haneꞌi pohuꞌ lao i tampoꞌ to karaoꞌ. Ionoꞌ, ia mopopu-popu peá dóiꞌna.

¹⁴Kahópóꞌána, upu miꞌi dóiꞌna. Haweꞌ miꞌi tempó rimi to rumihi i tampoꞌ iti, duuꞌna meahiahiꞌ tueꞌna.

¹⁵Mewaliꞌ lao miꞌi mampedurei i hadua tauna i tampoꞌ iti bona molámbiꞌ peá pandeꞌna. Tauna iti mohuoꞌ lao mokámpái boeꞌna.[190]

¹⁶Ánti kamarimina, napoinao woia mandeꞌ pandeꞌ boeꞌ. Tiꞌara ara haweꞌ hadua to mampoweꞌi pandeꞌ.

¹⁷Kahópóꞌána, ia mampenosoꞌi miꞌi bábehiána iti haneꞌi mambuhinao miꞌi umána. Nauliꞌ i laluna, ‘Handaꞌ ntepuꞌu tauna to nasaro umángkuꞌ mobágóꞌ i támbina, hai pandeꞌraꞌ melábi-lábi, agáiáná kódóꞌ deꞌe, ina mate peaꞌ holo ieneꞌ.

¹⁸Mewaliꞌ, ina mesuleꞌaꞌ huleꞌ lao i umángkuꞌ, hai ina kuhángáꞌá: Umaꞌ, masalaꞌmoꞌ i Pueꞌ Ala hai i hio.

¹⁹Deꞌe-deꞌe tiꞌarapoꞌ hintotoꞌ nukióꞌ ánáꞌmu. Rángina miꞌi nurekeꞌmoꞌ topobágóꞌmu.’

²⁰Hangko ionoꞌ, ia mesuleꞌ miꞌi lao i umána. Karaoꞌ mani hangko i támbina, ia naita miꞌi umána. Ánti kamaꞌahiꞌna, melangka miꞌi lao mampohidupaꞌá, nakápui hai naꞌángki.

²¹Nauliꞌ ánáꞌna iti, ‘Umaꞌ, masalaꞌmoꞌ i Pueꞌ Ala hai i hio. Tiꞌarapoꞌ hintotoꞌ nukióꞌ ánáꞌmu.’

²²Agáiáná umána mokióꞌraheꞌ hawiꞌna, haneꞌi nahángáꞌáheꞌ, ‘Hawiáꞌkou moánti mai waruꞌ to mababe, nibaduiá ánáꞌkuꞌ deꞌe. Nihingkoliꞌi hai nisapatuꞌi.

²³Roo onoꞌ, laomokou moala ánáꞌ gapiꞌ to maruduꞌ haneꞌi nisambale. Ina mosusakeꞌ hai mandeꞌkeꞌ i kagóeꞌ-góeꞌ,

²⁴láwiꞌ ánáꞌkuꞌ deꞌe nodo to mate, hai deꞌe-deꞌe tueꞌ huleꞌ. Ia matántá, agáiáná deꞌe-deꞌe mesuleꞌ miꞌi huleꞌ.’ Mewaliꞌ mosusamoheꞌ i kagóeꞌ-góeꞌ.

²⁵I tempó iti, ánáꞌna towutuꞌ mobágóꞌ mani i hinoe. I pesuleꞌna hangko i hinoe, hungkuꞌ miꞌi i támbi, nahádi miꞌi topotulali hai toponariꞌ.

²⁶Onoꞌ haneꞌi nakióꞌ miꞌi hadua topobágóꞌna umána, haneꞌi napekuneꞌ. ‘Apa riꞌi to pewaliꞌ i támbi?’

²⁷Nahániki topobágóꞌ iti, ‘Ádimu mesuleꞌ miꞌi huleꞌ! Umámu mohuoꞌ miꞌi tauna mosambale ánáꞌ gapiꞌ to maruduꞌ, láwiꞌ ánáꞌna to matántá mesuleꞌ miꞌi huleꞌ i lalu kamaroꞌa-roꞌa.’

²⁸Mabukoꞌ ntepuꞌu ánáꞌna towutuꞌ iti, hai tiꞌara piꞌi mau mesuaꞌ i lalu támbi. Mewaliꞌ umána lao monáráhi bona mau mesuaꞌ i támbi.

²⁹Agáiáná nauliꞌ riꞌi ánáꞌna iti, ‘Mampapare-paremoꞌ mobágóꞌ i hio, umaꞌ. Tiꞌara haweꞌ hangkani hawaꞌmu tiꞌara kuꞌuláꞌ. Kehapiꞌ miꞌi noꞌonoꞌ, apa to nuweꞌiaꞌ? Mogalo riꞌi hambaꞌa bekeꞌ, tiꞌara ara wongkódóꞌá to nuweꞌi, bona mobábehiaꞌ woꞌo susa hingkakani hai balengkuꞌheꞌ.

³⁰Agáiáná ánáꞌmu to hangko mesuleꞌ mai, to lao peá motibe-tibe mbero párewámu i towawine to mampobaluꞌ wátáraꞌ, nuposambaleá ánáꞌ gapiꞌ to maruduꞌ!’

³¹Nahániki umána, ‘Ánáꞌkuꞌ, io toroꞌkoꞌ oaꞌ hingkakani hai kódóꞌ. Upu-upu to ara i kódóꞌ, io woꞌo pueꞌna.

³²Kehapiꞌ noꞌonoꞌ, hintotoꞌ ntepuꞌukeꞌ mosusa i kagóeꞌ-góeꞌ, láwiꞌ ádimu to nodo miꞌi to mate, deꞌe-deꞌe tueꞌ miꞌi huleꞌ. Ia matántá, agáiáná deꞌe-deꞌe mesuleꞌ miꞌi huleꞌ.’ ”