Read Besoa Lukasi 16 Bible Online

Lukasi 16 - Besoa bible

Lukasi 16

¹Roo onoꞌ, Iesu mopahaweꞌ wopiꞌi ngkóráꞌ pándiriꞌ i topeguruNa, Nauliꞌ, “Ara hadua tauna to mewaliꞌ topokádipurá dóiꞌ hai párewána hadua topebuku. Agáiáná araheꞌ tauna to lao mampehángáꞌá topobágóꞌna iti i pueꞌna, rauliꞌ, ‘Topokádipurá dóiꞌmu iti mopopu-popu peá dóiꞌmu!’

²Onoꞌ miꞌi haneꞌi topebuku iti mokióꞌ miꞌi topokádipurá dóiꞌna, haneꞌi nahángáꞌá, ‘Kuhádi miꞌi bámbárina katiꞌárána maroꞌa pobágóꞌmu. Mewaliꞌ, upu-upu suramu hangaa-ngaa nuánti mai i kódóꞌ, láwiꞌ io, tiꞌarapokoꞌ mewaliꞌ topokádipurá dóiꞌkuꞌ hai párewángkuꞌ.’

³Nauliꞌ topokádipurá dóiꞌ iti i laluna, ‘Ee, apa miꞌi to hangaa-ngaa kubábehi? Nakábáhámoꞌ pueꞌkuꞌ hangko i bágóꞌkuꞌ. Ane mohinoeaꞌ, tiꞌara kubuku, hai mahiliaꞌ woꞌo mewaliꞌ topembiáꞌ-mbiáꞌ.’

⁴Hangko ionoꞌ, nauliꞌ i laluna, ‘Aa, deꞌe-deꞌe kuisá miꞌi apa to hangaa-ngaa kubábehi ane rakábáhámoꞌ hangko i bágóꞌkuꞌ. Rángina miꞌi mampeliꞌaꞌ rárá, bona handaꞌ tauna ina motarimaꞌaꞌ i lalu támbiraꞌ.’

⁵Mewaliꞌ upu-upu tauna to moindá i pueꞌna, nakióꞌheꞌ hadua-hadua. I tauna to rungu-runguna haweꞌ, napekuneꞌ, ‘Hangapa indámu i pueꞌkuꞌ?’

⁶Nahániki tauna iti, ‘Iba sábuna lite lana saitu.’ Nauliꞌ topokádipurá dóiꞌ iti, ‘Deꞌe miꞌi sura indámu. Mehodamokoꞌ. Hawiáꞌ miꞌi nuꞌukiꞌ i hinti rosábu peá lite!’

⁷Roo onoꞌ, haweꞌ miꞌi tauna to haduána. Napekuneꞌ topokádipurá dóiꞌ iti, ‘Io, hangapa indámu?’ Nahániki, ‘Hasábu karuꞌna pare.’ Nauliꞌ topokádipurá dóiꞌ iti, ‘Deꞌe miꞌi sura indámu. Mehodamokoꞌ. Nuꞌukiꞌ i hinti uwalu peá átuna karuꞌna.’ Noꞌonoꞌ oaꞌ ia mobábehi i upu-upu tauna to ara indáraꞌ i pueꞌna.

⁸Kanahádina topebuku iti apa to nabábehi topokádipurá dóiꞌna, natóiá riꞌi, láwiꞌ kehapiꞌ motengkoꞌ bábehiána, agáiáná naisá mampekiri karaoꞌ bona maroꞌa katueꞌna. Kupahaweꞌákou ngkóráꞌ pándiriꞌ deꞌe láwiꞌ tauna to i duniáꞌ to tiꞌara mengkoruꞌ i Pueꞌ Ala, moisá mampekiri karaoꞌ bona maroꞌa katueꞌraꞌ i alo to ina haweꞌ. Kamapánderaꞌ melumbuꞌ hangko i kamapánderaꞌ tauna to mengkoruꞌ i Pueꞌ Ala.

⁹Onoꞌ miꞌi haneꞌi Kuhángáꞌákou: tauna to mengkoruꞌ i Pueꞌ Ala hangaa-ngaa woꞌo mampekiriheꞌ karaoꞌ. Párewámi i duniáꞌ deꞌe hangaa-ngaa nipakeꞌ motulungi hángká rángámi, bona ane haweꞌ tempóna párewámi iti tiꞌara piꞌi mobunduꞌ, ina ratarimakou i katoroꞌá to maroꞌa duuꞌna i rue-ruena.

¹⁰Tauna to peisá rapoinálái mokádipurá párewá to hantóiꞌ peá, peisá woꞌo rapoinálái mokádipurá párewá to handaꞌ. Agáiáná ane tiꞌara manoroꞌ pokádipurána párewá to hantóiꞌ, apa mani pokádipurána párewá to handaꞌ!

¹¹Mewaliꞌ, ane tiꞌara ara to mampoináláiákou mokádipurá maroꞌa apa to ara i kómu i duniáꞌ to kadake deꞌe, noumbá haneꞌikou peisá napoináláiá Pueꞌ Ala mokádipurá párewá i surugáꞌ?

¹²Hai ane tiꞌara niꞌisá mokádipurá maroꞌa apa to rapoináláiákou tauna ntániꞌna, heáná paꞌi to ina mampoweꞌikou párewá bona mewaliꞌ párewámi haduduámi?

¹³Tiꞌara ara hadua tauna to nabuku mobágóꞌ i rodua tauna, láwiꞌ hadua ina napokaꞌahiꞌ, hai to haduána tiꞌara. Hadua ina napeuláꞌi hawaꞌna, hai to haduána tiꞌara. Noꞌonoꞌ woꞌo kómu: tiꞌarakou peisá mampeuláꞌi peundeꞌána Pueꞌ Ala hai mampeliꞌ woꞌo párewá ngkáduniáꞌ.”

¹⁴Karahádina toParisi laluitana Iesu, matawa peheꞌ mopakóiꞌ Iesu, láwiꞌ raundeꞌ morámpu párewá ngkáduniáꞌ.

¹⁵Agáiáná nahángáꞌáheꞌ Iesu, “Mampe to maroꞌa pekou i lindoꞌraꞌ tauna, bona rauliꞌ kómu tauna to manótó! Agáiáná naisá miꞌi Pueꞌ Ala noumbá lalumi. Hangaa-ngaa nibuhinao: handaꞌ to naundeꞌ tauna, tiꞌara naundeꞌ Pueꞌ Ala.

¹⁶Marue miꞌi Paturoꞌna Musa hai suraraꞌ nabiꞌ-nabiꞌ rabámbári hai rapaturoꞌákou, bona niꞌisá rárá ngkatueꞌ. Agáiáná mantepuꞌu i kahaweꞌna Iohane Toperiu, bámbári to maroꞌa kana i popárentána Pueꞌ Ala rapahaweꞌ oaꞌ. Onoꞌ miꞌi haneꞌi handaꞌ tauna mohárungá ntepuꞌu bona Pueꞌ Ala peisá mepárentá i laluraꞌ.

¹⁷Madoli mani langiꞌ hai tampoꞌ magero haneꞌi hambuaꞌ hurupu to kókóiꞌ peá matántá hangko i Paturoꞌna Musa. {Lempóna: Sura Áturána Pueꞌ Ala tiꞌara ara katebálikiána, mobunduꞌ oaꞌ.}

¹⁸Rápáꞌna, heáná to mampogááka toinána hai mampotoina towawine to ntániꞌna, ia mebualosi. Hai tobaleilo to mampotoina towawine to napogááki toámána, ia woꞌo mebualosi.”[191]

¹⁹Hangko ionoꞌ, Iesu mopaliliu wopiꞌi laluitaNa, Nauliꞌ, “Ara hadua topebuku. Waruꞌna makámumu, hibali hai waruꞌ to napakeꞌ datu, maꞌálusuꞌ bánána hai masuliꞌ hólóna. Ane katueꞌna alo-alona, nodo toposusa oaꞌ.

²⁰Hadua tauna to meahiahiꞌ tueꞌna, paka raꞌánti lao i babaꞌ támbina topebuku iti. Hangaꞌna topeahiahiꞌ iti Lasaru. Wátána motomahái hai kenanaꞌ.

²¹Ánti kamarimina, napoinao miꞌi woia mandeꞌ wutaꞌ to manawoꞌ hangko i wongko mejána topebuku iti, agáiáná tiꞌara rapaliu. Tangaꞌna mehoda ionoꞌ, mogaloraheꞌ ahu haweꞌ molilaꞌi tomaháina.

²²Marue-rue, Lasaru iti mate, hai tánuánáꞌna raꞌánti malaꞌeka lao i pehodaꞌá to maroꞌa i hintáiꞌna Burahima. Tiꞌara marue hangko ionoꞌ, mate miꞌi woꞌo topebuku iti, haneꞌi ratawu.

²³Agáiáná tánuánáꞌna topebuku iti raꞌánti i naraka. Ionoꞌ ia mantódihá oaꞌ kapári. I kamengoaꞌna, ia moita ngkaraoꞌ Burahima, hai Lasaru mehoda i hintáiꞌna.

²⁴Topebuku iti mokióꞌ Burahima, nauliꞌ, ‘Umaꞌ! Nupokaꞌahiꞌaꞌ wongkódóꞌá! Nuhuoꞌ Lasaru moeme karaweꞌna i uwai bona mai motudohi lilaꞌkuꞌ, láwiꞌ mapári ntepuꞌu kuhádi i lalu api deꞌe!’

²⁵Agáiáná nahániki Burahima, ‘Ánáꞌkuꞌ, ba nubuhinao maniꞌi katueꞌmu i duniáꞌ? Maroꞌa ntepuꞌu katueꞌmu ionoꞌ, agáiáná Lasaru molámbiꞌ peá kapári. Deꞌe-deꞌe huleꞌ. Katueꞌna Lasaru maroꞌa miꞌi ieneꞌ, agáiáná io to molámbiꞌ kapári.

²⁶I hiliꞌtaꞌ ara hambuaꞌ pingke to tindáꞌ ntepuꞌu, to tiꞌara peisá rapoliui. Onoꞌ miꞌi haneꞌi tauna to toroꞌ ieneꞌ tiꞌara peisá lao i katoroꞌámi. Noꞌonoꞌ woꞌo kómu: tiꞌarakou peisá mai ieneꞌ.’

²⁷Roo onoꞌ, nauliꞌ wopiꞌi topebuku iti, ‘Ane noꞌonoꞌi, kupembiáꞌ ntepuꞌu bona nuhuoꞌ Lasaru lao i támbina umángkuꞌ,

²⁸láwiꞌ ara maniheꞌ lima halalungkuꞌ to toroꞌ ionoꞌ. Nuhuoꞌ Lasaru mampopaingáꞌáheꞌ kana i apa to mewaliꞌ i kódóꞌ, bona menosoꞌheꞌ, hai tiꞌaraheꞌ woꞌo haweꞌ i katoroꞌá to bukeꞌ pepopeahiahiꞌ deꞌe.’

²⁹Agáiáná nahániki wopiꞌi Burahima, ‘Ara miꞌi surana Musa hai suraraꞌ nabiꞌ-nabiꞌ to raukiꞌáheꞌ. Patodáhimoheꞌ mampeuláꞌi apa to teukiꞌ i lalu sura iti.’

³⁰Nauliꞌ topebuku iti i Burahima, ‘Umaꞌ, tiꞌara magáná ane iti peá! Agáiáná ane nuhuoꞌ hadua tomate to tueꞌ huleꞌ, haneꞌi lao molaluita i hira, hangko ina mampenosoꞌiraheꞌ dósáraꞌ!’

³¹Agáiáná nauliꞌ Burahima, ‘Ane tiꞌara ratarima laluitana Musa hai laluitaraꞌ nabiꞌ-nabiꞌ, kehapiꞌ miꞌi ara tomate to tueꞌ huleꞌ, bateꞌna tiꞌara woꞌo ina rapoinálái.’ ”