Read Besoa Lukasi 19 Bible Online

Lukasi 19 - Besoa bible

Lukasi 19

¹I polumaoNa Iesu lao i Ierusale,[206] Ia moliu i kótá Ieriko.

²I kótá iti, ara hadua kapalaꞌraꞌ toperóróꞌ ásele to pebuku, hangaꞌna Sakeu.

³Ia mampoinao ina moita Iesu, agáiáná ánti karerembena, ia tiꞌara peisá moita Iesu, láwiꞌ handaꞌ ntepuꞌu tauna.

⁴Onoꞌ miꞌi haneꞌi ia melangka lao moioru hangko i tauna to handaꞌ hai mengkaheꞌ i hampóꞌá kau ara bona peisá peá moita Iesu ane moliu ionoꞌ.

⁵Hungkuꞌ miꞌi Iesu i kau pengkaheꞌána Sakeu, Ia mengoaꞌ haneꞌi Nauliꞌ, “Sakeu, hawiáꞌkoꞌ mendáulu, láwiꞌ alo deꞌe Kuparaluu hambengi i támbimu.”

⁶Sakeu kásáliu mendáulu, hai góeꞌ laluna ina motarima Iesu i támbina.

⁷Karaitána tauna to handaꞌ apa to mewaliꞌ iti, mohume-humemoheꞌ, rauliꞌ, “Moapa haneꞌi Ia lao riꞌi menóntó i támbina tauna to madósá iti?”[207]

⁸Tangaꞌraꞌ mandeꞌ, meángkáꞌ miꞌi Sakeu, mohángáꞌá Iesu, “Pueꞌ, kudándi, hantangaꞌ hangko i upu-upu párewángkuꞌ ina kuweꞌiheꞌ tauna to meahiahiꞌ tueꞌraꞌ. Hai heáná peá to kubagiuꞌ, ina kupopesuleꞌáheꞌ iba kánina kahandaꞌna hangko i apa to kubagiuꞌáheꞌ.”[208]

⁹Nauliꞌ Iesu, “I alo deꞌe, teámpungi miꞌi dósámu hai dósáraꞌ hantámbiámu, láwiꞌ pemuleꞌánakoꞌ woꞌo Burahima.[209]

¹⁰Tunggáiána Ánáꞌ Mánusiá mai i duniáꞌ deꞌe bona mampeliꞌ tauna to karaoꞌ hangko i Pueꞌ Ala hai mohómpókiheꞌ hangko i huku dósáraꞌ.”

¹¹Hungkuꞌmoheꞌ i Ierusale, tauna to mampehádingi laluitana Iesu mampekiriheꞌ ba Ia ina raꞌángkáꞌ mewaliꞌ datu i Ierusale haneꞌi popárentána Pueꞌ Ala ina hawiáꞌ mewaliꞌ i duniáꞌ. Mewaliꞌ, Iesu mopaliliu miꞌi laluitaNa moliu ngkóráꞌ pándiriꞌ deꞌe,

¹²Nauliꞌ, “Ara hadua tuꞌáná to ina lao i tampoꞌ to karaoꞌ bona nalántiꞌ Datu Mahile mewaliꞌ datu, hai roo onoꞌ, ina mesuleꞌ huleꞌ lao i tampoꞌna bona mepárentá ionoꞌ.

¹³Mewaliꞌ, hangko tiꞌara mani pohuꞌ, mokióꞌ miꞌi hampuloꞌ hawiꞌna, haneꞌi naweꞌiheꞌ hadua-hadua hampepaꞌ dóiꞌ buláwá.[210] Nauliꞌ miꞌi tuꞌáná iti i hawiꞌnaheꞌ, ‘Dóiꞌ deꞌe kuweꞌikou, nipakeꞌ mobaluꞌ-baluꞌ haweꞌ i kapesuleꞌángkuꞌ mai.’

¹⁴Agáiáná i wánuána tuꞌáná iti, araheꞌ woꞌo tauna to mokáhihiꞌ. Mewaliꞌ i kapohuꞌna, rahawaꞌ miꞌi bona bahangapaheꞌ tauna lao mopahaweꞌ i Datu Mahile node: ‘Datu, ineeꞌ miꞌi nulántiꞌ tauna iti mewaliꞌ datungkiꞌ, láwiꞌ tiꞌara kiundeꞌ!’

¹⁵Agáiáná kehapiꞌ noꞌonoꞌ, tuꞌáná iti ralántiꞌ peá, haneꞌi mesuleꞌ huleꞌ lao i tampoꞌna. I pesuleꞌna, nakióꞌmoheꞌ hawiꞌna, napekuneꞌ noumbá karapopolumaona dóiꞌna.

¹⁶To rungu-runguna lao i hia, nauliꞌ, ‘Datu, to nuweꞌiaꞌ hangkoia, hampepaꞌ dóiꞌ buláwá. Deꞌe-deꞌe moánáꞌ miꞌi mewaliꞌ hampuloꞌ pepaꞌna.’

¹⁷Nauliꞌ datu iti, ‘Maroꞌa ntepuꞌu kanupopolumaona bágóꞌ to kuweꞌikoꞌ. Io miꞌi hawiꞌ to maroꞌa. Mewaliꞌ ánti katetidaꞌmu i bágóꞌ to manangkoꞌ, kupoináláiákoꞌ motadulakoi hampuloꞌ kótá.’

¹⁸Hawiꞌ to karoduána lao woꞌo i hia, nauliꞌ, ‘Datu, to nuweꞌiaꞌ hangkoia, hampepaꞌ dóiꞌ buláwá. Deꞌe-deꞌe moánáꞌ miꞌi mewaliꞌ lima pepaꞌna.’

¹⁹Nauliꞌ wopiꞌi datu i hawiꞌ to karoduána iti, ‘Maroꞌa miꞌi. Mewaliꞌ, ina kupoináláiákoꞌ motadulakoi lima kótá.’

²⁰Roo onoꞌ, haweꞌ miꞌi woꞌo hawiꞌ to hadua, nauliꞌ, ‘Deꞌmiꞌe dóiꞌmu, datu. Kuwolinto oaꞌ. Kupótóꞌ i lalu lesongkuꞌ.

²¹Malááꞌaꞌ i hio datu, láwiꞌ kuisá io hadua tauna to masodo. Nuisá peá motarima hangko i apa to tiꞌara nuwoli. Hai nuisá peá woꞌo moala wuaꞌna tudaꞌ-tudaꞌ to tiꞌara nupowonggoꞌ.’

²²Nahángáꞌá datu, ‘Io miꞌi hawiꞌ to kadake! Ina kuhukukoꞌ hintotoꞌ hai laluitamu haduduámu. Nuisá paꞌi kakódóꞌna deꞌe tauna to masodo ane mampopobagóꞌaꞌ hawiꞌkuꞌ! Nuisá paꞌi kakuhuoꞌmi mowoli hai mantudaꞌ, bona i kódóꞌ aha wuaꞌna pobágóꞌmi!

²³Ane noꞌonoꞌi, moapa riꞌi haneꞌi tiꞌara nupeweꞌi iti dóiꞌkuꞌ i tauna to mau mampopolumao? Ane kenoꞌonoꞌ to nubábehi, i pesuleꞌkuꞌ ketiꞌara hampepaꞌ peá dóiꞌ buláwá to kutarima, kehangaa-ngaa hante ánáꞌna woꞌo!’

²⁴Roo onoꞌ, nauliꞌ wopiꞌi datu i tauna to meángkáꞌ i hintáiꞌna, ‘Niala dóiꞌ to ara i hia, nipeweꞌi i hawiꞌkuꞌ to molámbiꞌ miꞌi hampuloꞌ pepaꞌna dóiꞌ buláwá.’

²⁵Wulimoheꞌ tauna to meángkáꞌ i hintáiꞌna, haneꞌi rauliꞌ, ‘Datu, moapa riꞌi haneꞌi i hia wopiꞌi? Ara miꞌi hampuloꞌ pepaꞌna i hia!’

²⁶Nahániki datu, ‘Bona niꞌisá: heáná to peisá rapoinálái, apa to ara i hia ina ratámbái wopiꞌi. Agáiáná heáná to tiꞌara peisá rapoinálái, kehapiꞌ hantóiꞌ peá to ara i hia, bateꞌna ina raꞌala huleꞌ.’[211]

²⁷Roo onoꞌ, nauliꞌ wopiꞌi datu iti, ‘Niántiheꞌ mai upu-upu ewálingkuꞌ to tiꞌara moundeꞌ karalántiꞌkuꞌ mewaliꞌ daturaꞌ. Nipapatemoheꞌ upu-upu ieneꞌ bona kuita!’ ”[212]

²⁸Karoona Iesu molaluita noꞌonoꞌ, mopaliliumoheꞌ polumaoraꞌ ina lao i kótá Ierusale, hai Iesu molumao ioru.[213]

²⁹Hungkuꞌmoheꞌ i wánuá Betania hai Betepage[214] i Buluꞌ Saitu,[215] Iesu mohuoꞌ miꞌi rodua topeguruNa lao moioru,

³⁰Nahángáꞌáheꞌ, “Laomokou i wánuá to talindoꞌ. Ane haweꞌkou ionoꞌ, ina niꞌita hambaꞌa kalide to maleheꞌ mani to ratakaꞌ, to tiꞌara mani haweꞌ hangkani rasaweꞌi. Nikekehi haneꞌi niántiáꞌAꞌ mai.

³¹Ane ara to mekuneꞌ i kómu moapa riꞌi haneꞌi nikekehi, nihániki node: ‘Pueꞌ moparaluu.’ ”

³²Kalaoraꞌ miꞌi topeguruNa to rodua iti, rahumba mpuꞌu miꞌi nodo to nahángáꞌáheꞌ Iesu.

³³Tangaꞌraꞌ mokekehi bárárá kalide iti, hadua hangko i pueꞌna kalide iti mekuneꞌ, “Moapa riꞌi haneꞌi nikekehi kalide deꞌe?”

³⁴Rahániki, “Pueꞌ moparaluu.”

³⁵Roo onoꞌ, kalide iti raꞌánti lao i Iesu, ralámpiꞌi hai kumbáraꞌ, haneꞌi Iesu rapopesaweꞌ.[216]

³⁶Poliuna Iesu, handaꞌ tauna mowálá kumbáraꞌ i tangaꞌ rárá tandaꞌ pampomahileraꞌ Iesu.

³⁷Hungkuꞌmoheꞌ i kótá Ierusale i pendáuluána hangko i Buluꞌ Saitu, upu-upu topeuláꞌNa góeꞌmoheꞌ hai motóiá Pueꞌ Ala láwiꞌ raita miꞌi handaꞌ tandaꞌ kuasaꞌ to nabábehi Iesu.

³⁸Monani-naniheꞌ, rauliꞌ: “Pueꞌ Ala mowátiꞌ Datu to haweꞌ, to mewaliꞌ HuoꞌáNa! Maroꞌa miꞌi huleꞌ pohintuwuꞌtaꞌ hai Pueꞌ Ala. Tatóiá miꞌi Pueꞌ Ala to i surugáꞌ!” [217]

³⁹Karahádina peá laluitaraꞌ tauna to handaꞌ iti, bahangapaheꞌ toParisi mohángáꞌá Iesu, “Guru, Nukóntómoheꞌ topeuláꞌMu bona ineeꞌheꞌ manguliꞌ noꞌonoꞌ!”[218]

⁴⁰Nahániki Iesu, “Tiꞌara! Kuhángáꞌáꞌákou: ane maniiꞌheꞌ topeuláꞌKuꞌ, watu-watu deꞌe ina monganga-nganga mopahaweꞌ kaheánáNgkuꞌ.”

⁴¹Hungkuꞌmoheꞌ i Ierusale, Iesu mampetiro kótá iti haneꞌi Nateriahi,

⁴²Nauliꞌ, “Meahiahiꞌkou toIerusale! Morasiꞌ ntepuꞌukou ane keniꞌisái alo deꞌe heáná to peisá mopahintuwuꞌkou hai Pueꞌ Ala, agáiáná upu-upu iti tiꞌara niꞌisá.

⁴³Hangkani tempó, ina rapombealaꞌákou ewálimi. Ina rabábehi pelibuꞌá mombeala to motolelingi kótámi, duuꞌna tiꞌara piꞌi ara rárámi mesuwuꞌ.

⁴⁴Ina marugiꞌkou, kómu hai kótámi hai upu-upu óntóꞌna, tepasuaꞌ ánáꞌmi, duuꞌna tiꞌara piꞌi ara haweꞌ hambuaꞌ watu to mentárá i katoroꞌána.[219] Upu-upu iti hangaa-ngaa mewaliꞌ, láwiꞌ tiꞌara niꞌisá alo kahaweꞌána {Datu Topehómpóꞌ to nahuoꞌ mai} Pueꞌ Ala.”[220]

⁴⁵{Kahalona,}[221] Iesu mesuaꞌ i tangabaa Támbina Pueꞌ Ala hai mowura tauna to mobaluꞌ-baluꞌ ionoꞌ,

⁴⁶Nahángáꞌáheꞌ, “I lalu Sura Magasaꞌ, Pueꞌ Ala manguliꞌ node: ‘TámbiNgkuꞌ deꞌe hangaa-ngaa mewaliꞌ támbi pekakaeá,’ agáiáná kómu, nipopewaliꞌ riꞌi támbi kahirámpuá topanako!”[222]

⁴⁷Alo-alona Iesu mepaturoꞌ i Támbina Pueꞌ Ala. Kapalaꞌ-kapalaꞌ tadulako menómbá, guru-guru agama hai tadulakoraꞌ toIahudiꞌ to ntániꞌna mampoinaoheꞌ mopapate Iesu,

⁴⁸agáiáná tiꞌara maniheꞌ molámbiꞌ rárá bona mewaliꞌ tunggáiáraꞌ iti, láwiꞌ tediiꞌ laluraꞌ tauna to handaꞌ mampehádingi oaꞌ paturoꞌNa.