Read Besoa Lukasi 20 Bible Online

Lukasi 20 - Besoa bible

Lukasi 20

¹Hangkani tempó, Iesu mepaturoꞌ hai mopahaweꞌ Ngkóráꞌ Marasa i tauna to handaꞌ to hirámpu i tangabaa Támbina Pueꞌ Ala. Haweꞌheꞌ kapalaꞌ-kapalaꞌ tadulako menómbá hai guru-guru agama hai totosaeraꞌ toIahudiꞌ to ntániꞌna. Mekuneꞌheꞌ i Iesu, rauliꞌ,

²“Nuhángáꞌáꞌangkaiꞌ, heáná to moweꞌiKoꞌ kuasaꞌ {mowura topobaluꞌ-baluꞌ iamáindi hai mopaturoꞌ tauna i Támbina Pueꞌ Ala}.”

³Mehániꞌ Iesu, “Ara woꞌo hampákáꞌ pekuneꞌKuꞌ i kómu:

⁴Heáná to moweꞌi kuasaꞌ i Iohane Toperiu moriu tauna? Pueꞌ Ala ba tauna?”

⁵Molaluitamoheꞌ tadulakoraꞌ toIahudiꞌ iti hadua hai hadua, rauliꞌ, “Noumbá miꞌi katahánikiNa? Ane tauliꞌi Pueꞌ Ala to moweꞌi kuasaꞌna, ina Nahángáꞌákeꞌ, ‘Ane noꞌonoꞌi, moapa riꞌi haneꞌi tiꞌarakou mampoinálái apa to nauliꞌ Iohane?’

⁶Agáiáná ane tauliꞌi tauna peá to moweꞌi kuasaꞌna, ina rawatuikeꞌ tauna to handaꞌ, láwiꞌ handaꞌheꞌ to mampoinálái Iohane iti hadua nabiꞌ.”[223]

⁷Mewaliꞌ rahániki, “Tiꞌara kiꞌisá heáná to moweꞌi kuasaꞌ meriu i Iohane.”

⁸Nauliꞌ Iesu, “Ane noꞌonoꞌi, tiꞌarakou woꞌo ina Kuhángáꞌá heáná to moweꞌiAꞌ kuasaꞌKuꞌ iti!”

⁹Roo onoꞌ, Iesu mopahaweꞌ hampákáꞌ ngkóráꞌ pándiriꞌ i tauna to handaꞌ, Nauliꞌ, “Ara hadua tauna to mantudaꞌ anggoroꞌ i hinoena. Pueꞌ hinoe iti mosaroheꞌ tauna mokámpái hinoena, láwiꞌ ia ina pohuꞌ lao i tampoꞌ ntániꞌna, hai ina marue toroꞌ ionoꞌ.

¹⁰Haweꞌ miꞌi tempóna mopupu wuaꞌ anggoroꞌ, ia mopohawaꞌá miꞌi hadua hawiꞌna bona lao membiáꞌ gáláꞌna hangko i topokámpái hinoena. Agáiáná hawiꞌ to rahuoꞌ iti rahakaꞌ riꞌi hai rapapahái, haneꞌi rahuoꞌ mesuleꞌ ntooꞌ.

¹¹Roo onoꞌ, pueꞌ hinoe iti mampohawaꞌá wopiꞌi hadua hawiꞌna lao ionoꞌ. Agáiáná ia woꞌo rapapahái hai rapakahiliá, haneꞌi rapopasuleꞌ ntooꞌ.

¹²Hangko ionoꞌ, nahuoꞌ wopiꞌi hadua hawiꞌna to ntániꞌna. Haweꞌ ionoꞌ, ia woꞌo bateꞌna peá rapapahái haneꞌi ratibe i rawa hinoe.

¹³Hangko ionoꞌ, nauliꞌ miꞌi pueꞌ hinoe iti, ‘Apa to hangaa-ngaa kubábehi? Rángina miꞌi ánáꞌkuꞌ to kupokaꞌahiꞌ kuhuoꞌ lao. Ia bateꞌna ina rapengkoruꞌi.’

¹⁴Agáiáná, i tempóraꞌ topokámpái hinoe moita ánáꞌna iti, mogómbóheꞌ, rauliꞌ, ‘Peita. Louꞌ mai ánáꞌna, ia to ina mewaliꞌ pueꞌ sosora hinoe deꞌe. Maroꞌa ane tapapate, hai taꞌala hinoena hai upu-upu óntóꞌna.’

¹⁵Mewaliꞌ, rahakaꞌ mpuꞌu miꞌi ánáꞌna iti, raꞌánti lao i rawa hinoe, haneꞌi rapapate.” Roo onoꞌ, napekuneꞌ Iesu, “Apa to ina nabábehi pueꞌ hinoe iti?

¹⁶Bateꞌna ina mai mopapateheꞌ topokámpái hinoena iti, hai hinoena ina nasaroáheꞌ tauna ntániꞌna.” Karahádina tauna to handaꞌ ngkóráꞌ pándiriꞌ iti, rauliꞌ miꞌi node: “Tiꞌara ina mewaliꞌ to noiti i kitaꞌ toIahudiꞌ, hai tiꞌarakeꞌ ina nahuku Pueꞌ Ala!”[224]

¹⁷Agáiáná Iesu motótóiheꞌ, Nauliꞌ, “Ane noꞌonoꞌi, apa lempóna laluita deꞌe to teukiꞌ i lalu Sura Magasaꞌ: ‘Watu to ratibe topoaró támbi, watu iti riꞌi to mewaliꞌ pehodaꞌá támbi.’ ” [225]

¹⁸Hai nauliꞌ wopiꞌi Iesu, “Heáná to manawoꞌ i watu iti ina marugiꞌ, hai heáná to nadumpingi watu iti ina mate.” {Noꞌonoꞌ woꞌo, heáná to mosápuáka tauna to rapándiriꞌ nodo watu iti, ina molámbiꞌ pehukuna Pueꞌ Ala.}[226]

¹⁹Guru-guru agama hai kapalaꞌ-kapalaꞌ tadulako menómbá moisá kahirana to natunggái Iesu i lalu ngkóráꞌ pándiriꞌ to Napahaweꞌ ininá, onoꞌ haneꞌi rapoinao mohakaꞌ Iesu i tempó iti, agáiáná tiꞌaraheꞌ pebáiꞌ, láwiꞌ mampokalááꞌheꞌ tauna to handaꞌ.

²⁰Mewaliꞌ, mampeliꞌheꞌ tempó to maroꞌa, hai mosogoꞌheꞌ bahangapa tauna lao i Iesu bona mampeliꞌ kamasalaꞌána laluitaNa, bona peisá raꞌánti lao i mágáuꞌ Roma i Ierusale hai rasalaꞌi i lindoꞌna. Tauna to rahuoꞌheꞌ iti, mampe to laoheꞌ mekuneꞌ i Iesu, mole ara tunggáiáraꞌ mopakanawoꞌ Iesu.

²¹Kahaweꞌraꞌ i Iesu, rahángáꞌá, “Guru, kiꞌisá katoꞌuna laluitaMu hai upu-upu paturoꞌMu. MepaturoꞌKoꞌ i katoꞌu-toꞌuána apa peundeꞌána Pueꞌ Ala, hai tiꞌaraKoꞌ mampopontaniꞌ tauna.

²²Onoꞌ miꞌi haneꞌi mekuneꞌangkaiꞌ: Mouláꞌ áturána ágámántaꞌ, ba hintotoꞌkeꞌ mobaiari ásele i Datu Mahile i Roma, ba tiꞌara?”

²³Agáiáná naisá Iesu tunggáiána laluraꞌ kaꞌina raꞌákálángiNa,[227] onoꞌ miꞌi haneꞌi Nahángáꞌáheꞌ,

²⁴“NiweꞌiAꞌ mai hampepaꞌ dóiꞌ peráꞌ to biásá nipakeꞌ mobaiari ásele.[228] Lenggeꞌna hai hangaꞌna heáná to ara i dóiꞌ deꞌe?” Rahániki, “Lenggeꞌna hai hangaꞌna Datu Mahile.”

²⁵Nauliꞌ Iesu, “Ane noꞌonoꞌi, niweꞌi datu apa to hintotoꞌ raweꞌi, hai niweꞌi woꞌo Pueꞌ Ala apa to hintotoꞌ raweꞌi.”

²⁶Kahópóꞌána, Iesu monangiheꞌ ewálina iti. Tiꞌara ara kamasalaꞌána laluitaNa to ralámbiꞌ i lindoꞌraꞌ tauna to handaꞌ. Tingkáráꞌ ntepuꞌuheꞌ mohádi pehániꞌNa, onoꞌ miꞌi haneꞌi maniiꞌ-niiꞌ peheꞌ.

²⁷Roo onoꞌ, araheꞌ bahangapa toSaduki[229] to haweꞌ i Iesu. ToSadukiheꞌ iti, iamoheꞌ tadulako agama Iahudiꞌ to tiꞌara mampoinálái tauna to mate ina rapatueꞌ huleꞌ.

²⁸Tunggáiáraꞌ toSaduki iti, mampeliꞌheꞌ kamanawoꞌána Iesu. Rahángáꞌá, “Guru, nabiꞌ Musa moukiꞌ i lalu sura áturá ágámántaꞌ node: ane arai tobaleilo to mate, agáiáná tiꞌara ara ánáꞌna, halaluna hangaa-ngaa mampohambokoá bembaꞌna, bona ara pemuleꞌána toámána to mate miꞌi.[230]

²⁹Mewaliꞌ, araheꞌ pitu topohalalu, paka tobaleiloheꞌ. To towutuꞌ mampotoina hadua towawine, agáiáná tiꞌara mani woia ara ánáꞌraꞌ, mate miꞌi towutuꞌ iti.

³⁰Mewaliꞌ ádina mampohambokoá bembaꞌna. Tiꞌara mani woꞌo ara ánáꞌraꞌ, mate miꞌi woꞌo ádina iti.

³¹Noꞌonoꞌ woꞌo to mewaliꞌ i katáluna, duuꞌna haweꞌ i kapituna.

³²Kahópóꞌána, mate miꞌi woꞌo towawine iti.

³³Mewaliꞌ, i alo pobutusi, ane toꞌu-toꞌu tueꞌ huleꞌ upu-upu tomate, heáná miꞌi toámána towawine iti, láwiꞌ pitumoheꞌ to mampohambokoá?”

³⁴Nahániki Iesu, “Tauna to tueꞌ i duniáꞌ deꞌe, biásáheꞌ mohamboko.

³⁵Agáiáná tauna to hintotoꞌ molámbiꞌ gáláꞌraꞌ i duniáꞌ to woꞌu i tempóna Pueꞌ Ala mopatueꞌ huleꞌ, hira ina nodoheꞌ malaꞌeka láwiꞌ tiꞌaraheꞌ ina mohamboko hai tiꞌaraheꞌ ina mate. Hira iti, napoánáꞌmoheꞌ Pueꞌ Ala hai ina tueꞌheꞌ duuꞌna i rue-ruena.

³⁶

³⁷Ina Kupahaweꞌákou laluita to ara i lalu Sura Magasaꞌ to mopakanótó katueꞌraꞌ huleꞌ tomate. I lalu surana Musa, tabásá tuntukáná noumbá Pueꞌ Ala mongkóráꞌ i nabiꞌ Musa hangko i lalu dui to roreꞌ. I tempó iti, Burahima, Isakiꞌ hai Iako maruemoheꞌ mate. Agáiáná kehapiꞌ noꞌonoꞌ, Pueꞌ Ala mohángáꞌá Musa, Nauliꞌ node: ‘Kódóꞌ miꞌi Pueꞌ Ala to rapenómbái oaꞌ Burahima, Isakiꞌ hai Iako.’

³⁸Mewaliꞌ, hangko i laluitaNa Pueꞌ Ala iti, taisá ntepuꞌu Burahima, Isakiꞌ hai Iako bateꞌna tueꞌ maniheꞌ, láwiꞌ tiꞌara riꞌi tauna to mate to menómbá i Pueꞌ Ala, agáiáná bateꞌna peá tauna to tueꞌ to menómbá i Hia, láwiꞌ i Pueꞌ Ala, upu-upu tauna tueꞌ oaꞌ.”[231]

³⁹I tempó iti, bahangapa guru agama mohángáꞌá Iesu, “Guru, toꞌu ntepuꞌu pehániꞌMu.”

⁴⁰Roo onoꞌ, tiꞌara piꞌi ara hadua to báiꞌ mampekuneꞌ ba apa-apa i Iesu {bona mampeliꞌ kamanawoꞌNa}.

⁴¹Hangko ionoꞌ, Iesu mekuneꞌ i guru agama iti, Nauliꞌ, “Moapa riꞌi haneꞌi guru-guru agama manguliꞌ Datu Topehómpóꞌ Ia miꞌi pemuleꞌána Datu Daudiꞌ?

⁴²Mole riꞌi Daudiꞌ haduduána to mopakanótó Datu Topehómpóꞌ ia miꞌi Pueꞌ to napenómbái. I lalu Sura Petóiá, nauliꞌ Daudiꞌ node: Pueꞌ Ala molaluita i Pueꞌ to kupenómbái, Nauliꞌ: ‘MehodamoKoꞌ tándáꞌ i kuánáNgkuꞌ

⁴³duuꞌna Kupopengkoruꞌheꞌ upu-upu ewáliMu i Hio.’ [232]

⁴⁴Mewaliꞌ, ane Datu Daudiꞌ manguliꞌ Datu Topehómpóꞌ Ia miꞌi Pueꞌ to napenómbái, noumbá haneꞌi Ia mewaliꞌ woꞌo pemuleꞌána Daudiꞌ?”[233]

⁴⁵Tangaꞌraꞌ mani tauna to handaꞌ mampehádingi laluitaNa, nauliꞌ Iesu i topeguruNa,

⁴⁶“Maingáꞌ-ingáꞌkou, ineeꞌkou mampeuláꞌi bábehiáraꞌ guru-guru agama. Hira moundeꞌ molumao mopakeꞌ kumbá to malóe, hai mampoinaoheꞌ ratóiá tauna to handaꞌ i pobaluꞌ-baluꞌá. Góeꞌheꞌ ane rapopehoda i pehodaꞌá to teádái i támbi penómbáꞌá hai i posusaꞌá.

⁴⁷Agáiáná mobagiuꞌheꞌ towawine to bembaꞌ bona morámpákiheꞌ támbiraꞌ hai óntóꞌna, haneꞌiheꞌ mekakae rapakarue bona motámbungi bábehiáraꞌ to kadake iti. Ina matimi ntepuꞌu karahukuraꞌ!”